Shiapuʼusü wanoujaka anain tia sümaiwa sutuma tü sümakat Hebreokana 12:16. Saashin tia pütchikat, Esaú nnojotsü «jamajatüin nümüin tü nüchekakat chi Maleiwakai nüpüleerua» sümaa nuikuin nümüin Jacob «sujut eʼirumaa saaʼu eküülü neʼe». Waaʼinruʼu wayakana, niainjachi Jacob kooʼuliwoʼuka chi Mesíaskai sutuma saapünüin nümüin tü sujutkat eʼirumaa (Mat. 1:2, 16; Luc. 3:23, 34).

Shiasaʼa sutuma shikirajaanüin maʼin achiirua tia, wayaawata aaʼu nnojoluin choʼujaain eʼirumaainjachin wanee israeliita süpüla niainjachin kooʼuliwoʼuin chi Mesíaskai. Wekirajaa sünain tü sümakat tü Wiwüliakat süchiki tia.

Chi niʼirumakai Jacob sümaa Lea nia Rubén jee müshia chi palajaikai nüchon sümaa Raquel nia José. Asütünüsü tü sujutkat eʼirumaa nuulia Rubén saaliijee nuʼluwajiraain nukuwaʼipa sümaa wanee jierü jee saapünaka tü sujutkat eʼirumaa nümüin José (Gén. 29:31-35; 30:22-25; 35:22-26; 49:22-26, TNM; 1 Crón. 5:1, 2). Nnojoipejeʼe niain Rubén jee müshia José kooʼuliwoʼuin chi Mesíaskai. Nuuʼuliwoʼu nia Judá, chi nüshaleinkai Jacob sümaa Lea (Gén. 49:10).

Suluʼu Lucas 3:32, aküjünüsü nanülia jaʼraishii wayuu kooʼuliwoʼukana chi Mesíaskai otta eeshiijaʼa eʼirumaale naya. Jamüshijaʼa Boaz, nia nüshi Obed otta Obed nüshi Jesé (Rut 4:17, 20-22; 1 Crón. 2:10-12).

David nnojoishi niʼirumain Jesé, nia chi nüshaleinkai. Akaratshishii na nuwalayuukana David (1 Sam. 16:10, 11; 17:12; Mat. 1:5, 6, TNM). Müsia neʼe nukuwaʼipa Salomón. Mayaapejeʼe niain noʼutku na kooʼuliwoʼukana chi Mesíaskai, nnojoishi niʼirumain nia David (2 Sam. 3:2-5).

Nnojoliipajaʼa mojutuin na israeliita eʼirumaakana. Wainma kasa anasü aapünaka nümüin chi eʼirumaakai nnojotka aapünüin namüin na wane  nuwalayuukana. Jamüshijaʼa nia, shikiipüʼüshi nia nüpüshi mapa otta wainmaleesia tü apaalaa aapünakat nümüin noulialeʼeya na nuwalayuukana (Gén. 43:33; Deut. 21:17; Jos. 17:1).

Eesü sülatinnapuʼule tü sujutkat eʼirumaa nümüin wanee nuwala chi eʼirumaakai. Naaʼinrüin tia Abraham wanaa sümaa nüjütüin Ismael nümaʼanajee, nülatirüin tü sujutkat eʼirumaa nümüin Isaac (Gén. 21:14-21; 22:2). Jee müsia wekirajaaitpa anain süsütünüin tü sujutkat eʼirumaa nuulia Rubén otta aapünüsü nümüin José.

¿Kasaka naashajaain maʼin achiki Pablo suluʼu Hebreokana 12:16? Anuu sünüiki tia wetsiikulokot: «Anakaja müleka jüchiaajiraale suulia aʼluwajirawaa akuaippaa sümaa wayuu jierü otta wane jierü nümaa wane toolo suulia kiʼrajüin jia sünain tia. Otta chi eekai nnojolüin jamajatüin nümüin tü nüchekakat chi Maleiwakai nüpüleerua, anakaja müleka jimeʼejüle naaʼin [...], suulia majüin aka naaʼin Esaú paala sümaiwa sünain nuikküin sujut eʼirumaa saaʼu eküülü neʼe».

Suluʼu wetsiikulokot tüü nnojoishi aashajaain Pablo nachiki na kooʼuliwoʼukana chi Mesíaskai. Süpülajatü nüchiaain na anoujashiikana. Süpülapünaa tia, nüküjain namüin eeinjatüin naaʼin sünain aaʼinraa tü anasükat süpüla neʼrüinjatüin tü naapüinjatkat Maleiwa namüin saaʼu anamiain maʼin nia. Nnojorüle eejüin naaʼin naashin Pablo, aʼluwajiraajeena nakuwaʼipa sümaa jieyuu (Heb. 12:12-16). Naaʼinrüle tia, niashijeʼe nashataka akuwaʼipa Esaú, nnojoikai kasajachin amüin «sujut eʼirumaa» süka shiain jülüjain naaʼin tü suchuntaakat naaʼin.

Eeshijaʼa naapawaire Esaú mürüt nümüin Jeʼwaa saaʼu eʼirumaain nia, shiapuʼusü sukuwaʼipakat tia natuma na wayuu eejanakana soʼu tia (Gén. 8:20, 21; 12:7, 8; Job 1:4, 5). Süka shiain jülüjain naaʼin Esaú tü suchuntaakat naaʼin, nuʼwanajaain tü sujutkat eʼirumaa saaʼu wanee eküülü neʼe. Eesüjaʼa naaʼinrüle tia süpüla nnojoluinjachin niʼrüin tü müliaa neʼrüinjatkat na nuuʼuliwoʼukana Abraham naashin Jeʼwaa (Gén. 15:13). Jaʼyasü naaʼu Esaú nnojoluin «jamajatüin nümüin tü nüchekakat chi Maleiwakai nüpüleerua». Ichaʼasa nia kaʼwayuusein piamasü wayuu nnojotka aʼwaajüin Jeʼwaa. Mojushaatasü naaʼin chi nüshikai jee tü niikat saaliijee tia (Gén. 26:34, 35). Aluʼujasaʼa Jacob, naata maʼin nukuwaʼipa. Nüchajaain wanee wayuu aʼwaajaka Jeʼwaa süpüla nuʼwayuuseinjatüin (Gén. 28:6, 7; 29:10-12, 18).

Sutuma tü wekirajaaitpakalü anain, ¿kasa watüjaka nachiki na wayuu kooʼuliwoʼukana chi Mesíaskai? Naʼaka naya wayuukana, eejana eekai nnojoluin eʼirumaain. Natüjaa aaʼu tia na judiokana otta nnojotsü mojushiin namüin. ¿Jamüsü watüjaaka saaʼu tia? Shia süka naküjain sünain nuuʼuliwoʼuin David chi Mesíaskai. David nüshalein Jesé (Mat. 22:42).