ပှၤဖးလံာ်ဖိတဖၣ် အတၢ်သံကွၢ်
လၢပှၤအံၣ်စရ့လးဖိအစိၤန့ၣ် ပှၤလၢမ့းၡံအၤ ဟဲလီၤစၢၤလီၤသွဲၣ်န့ၣ် မ့ၢ်ထဲဖိခွါဝဲၢ်ကိတဖၣ်လီၤဧါ
လၢညါန့ၣ် ပနၢ်ပၢၢ်အီၤဒ်အံၤ မ့ၢ်လၢ ဧ့ၤဘြံၤ ၁၂:၁၆ အဃိလီၤ. ဖဲန့ၣ်တဲဝဲလၢ စီၤဧ့ၡီၤ “မၤတရီတပါ” မ့တမ့ၢ် တပာ်လုၢ်ပာ်ပှ့ၤဝဲ ဖိဝဲၢ်ကိအလီၢ်အဃိ “ဆါလီၤကွံာ်အတၢ်ဝဲၢ်ကိအလီၢ် လၢတၢ်အီၣ်ဘျဲးအီၣ်တဘျီအဂီၢ်” လီၤ. လၢတၢ်န့ၣ်အဃိ ပဆိကမိၣ်လၢ ဖဲစီၤယၤကိာ် ဒိးန့ၢ်ဘၣ်ဝဲ “တၢ်ဝဲၢ်ကိအလီၢ်” အခါလီၤဂာ်လၢ အဝဲဒိးန့ၢ်ဘၣ်စ့ၢ်ကီး တၢ်ခွဲးတၢ်ယာ်လၢ မ့းၡံအၤ ကဟဲလီၤစၢၤလီၤသွဲၣ်လၢအီၤလီၤ.—မးသဲ ၁:၂, ၁၆; လူၤကၣ် ၃:၂၃, ၃၄.
ဘၣ်ဆၣ် ဖဲပဃုသ့ၣ်ညါအါထီၣ်လံာ်စီဆှံ တၢ်ကွဲးနီၣ်ကွဲးဃါလၢအဂၤတဖၣ် လီၤတံၢ်လီၤဆဲးအခါ ပသ့ၣ်ညါဘၣ်လၢ ပှၤလၢမ့းၡံအၤ ဟဲလီၤစၢၤလီၤသွဲၣ်ဝဲန့ၣ် တလိၣ်လၢကဘၣ်ကဲ ဖိဝဲၢ်ကိဘၣ်. ပကတဲသကိး တၢ်အုၣ်သးတနီၤလီၤ.
စီၤယၤကိာ်ဒီးနီၢ်လ့ၤအၤ အဖိခွါဝဲၢ်ကိန့ၣ်မ့ၢ်ဝဲ စီၤရူၤဘ့ၣ်လီၤ. ဒီးစီၤယၤကိာ်ဒီး နီၢ်ရၤဃ့လးန့ၣ် အဖိဝဲၢ်ကိမ့ၢ်ဝဲ စီၤယိၤသးလီၤ. ဖဲရူၤဘ့ၣ် မၤကမၣ်မုၣ်ကမၣ်ခွါအခါ အဝဲဘၣ်ဟ့ၣ်ၡူကွံာ်ဝဲ အဖိဝဲၢ်ကိအလီၢ် ဒီးစီၤယိၤသးဒိးန့ၢ်ဘၣ်က့ၤဝဲ တၢ်ခွဲးတၢ်ယာ်အံၤလီၤ. (၁ မိၤၡ့ ၂၉:၃၁-၃၅; ၃၀:၂၂-၂၅; ၃၅:၂၂-၂၆; ၄၉:၂၂-၂၆; ၁ ကွဲးနီၣ်တၢ် ၅:၁, ၂) ဘၣ်ဆၣ် မ့းၡံအၤတဟဲလီၤစၢၤလီၤသွဲၣ်လၢ စီၤရူၤဘ့ၣ် မ့တမ့ၢ် စီၤယိၤသးဘၣ်. အဝဲဟဲလီၤစၢၤလီၤသွဲၣ်လၢ စီၤယူဒၤလီၤ. စီၤယူဒၤန့ၣ်မ့ၢ်ဝဲ စီၤယၤကိာ်ဒီးနီၢ်လ့ၤအၤ အဖိခွါလွံၢ်ဂၤတဂၤလီၤ.—၁ မိၤၡ့ ၄၉:၁၀.
လူၤကၣ် ၃:၃၂ ပာ်ဖျါထီၣ်ဝဲ ပှၤယဲၢ်စိၤအမံၤလၢ မ့းၡံအၤဟဲလီၤစၢၤလီၤသွဲၣ်ဝဲန့ၣ်လီၤ. လီၤဂာ်လၢ အဝဲသ့ၣ်မ့ၢ်ဝဲ ဖိဝဲၢ်ကိလီၤ. အဒိ, စီၤဘိၤဧးအဖိခွါ စီၤဧိၤဘး, စီၤဧိၤဘးအဖိခွါ စီၤယံးၡဲလီၤ.—ရူၤသး ၄:၁၇, ၂၀-၂၂; ၁ ကွဲးနီၣ်တၢ် ၂:၁၀-၁၂.
စီၤယံးၡဲအဖိခွါစီၤဒၤဝံးန့ၣ် တမ့ၢ်ဖိဝဲၢ်ကိဘၣ်. အဝဲမ့ၢ်စီၤယံးၡဲအဖိခွါ ဃိးဂၤတဂၤလီၤ. ဘၣ်ဆၣ် မ့းၡံအၤ ဟဲလီၤစၢၤလီၤသွဲၣ်လၢအီၤလီၤ. (၁ ၡမူၤအ့လး ၁၆:၁၀, ၁၁; ၁၇:၁၂; မးသဲ ၁:၅, ၆) ဒ်န့ၣ်အသိး ပှၤလၢခံတဂၤလၢ မ့းၡံအၤ ဟဲလီၤစၢၤလီၤသွဲၣ်လၢအီၤန့ၣ် မ့ၢ်ဝဲစီၤၡလိၤမိၤလီၤ. ဘၣ်ဆၣ် အဝဲတမ့ၢ် စီၤဒၤဝံးအဖိဝဲၢ်ကိဘၣ်.—၂ ၡမူၤအ့လး ၃:၂-၅.
ဘၣ်ဆၣ် တအဲၣ်ဒိးတဲဝဲလၢ ဖိဝဲၢ်ကိန့ၣ် အရ့တဒိၣ်ဘၣ်န့ၣ် တမ့ၢ်ဘၣ်. ဖိဝဲၢ်ကိန့ၣ် အဝဲဒိးန့ၢ်ဘၣ်ဝဲ တၢ်ခွဲးတၢ်ယာ်လီၤဆီလၢ ဖိလၢအဂၤတဖၣ် တဒိးန့ၢ်ဘၣ်ဝဲဘၣ်န့ၣ်လီၤ. အဝဲကဲထီၣ်ဘၣ် ဟံၣ်ခိၣ် ဒီးဒိးန့ၢ်ဘၣ် တၢ်န့ၢ်သါခံစးလီၤ.—၁ မိၤၡ့ ၄၃:၃၃; ၅ မိၤၡ့ ၂၁:၁၇; ယိၤၡူ ၁၇:၁.
ဖိဝဲၢ်ကိအလီၢ်န့ၣ် ဆီတလဲအသးသ့လီၤ. ဖဲစီၤအၤဘြၤဟၣ်မၢ စီၤယံးၡမၤဧ့လး စံၣ်လီၤကွံာ်လၢ ဟံၣ်ပူၤအခါ စီၤအံၤစဲး ဒိးန့ၢ်ဘၣ်က့ၤဝဲ ဖိဝဲၢ်ကိအလီၢ်လီၤ. (၁ မိၤၡ့ ၂၁:၁၄-၂၁; ၂၂:၂) ဒ်ပတဲတ့ၢ်အသိး စီၤရူၤဘ့ၣ် ဖိဝဲၢ်ကိအတၢ်န့ၢ်သါန့ၣ် စီၤယိၤသးဒိးန့ၢ်ဘၣ်က့ၤဝဲလီၤ.
မ့မ့ၢ်ဒ်န့ၣ်န့ၣ် စီၤပီလူးအတၢ်ကတိၤလၢ ဧ့ၤဘြံၤ ၁၂:၁၆ အပူၤန့ၣ် အဲၣ်ဒိးတဲဝဲတၢ်မနုၤလဲၣ်. ဖဲန့ၣ် တဲဝဲလၢ “ဒ်သိးပှၤမၤကမၣ်ပိာ်မုၣ်ပိာ်မၢၤမ့ၢ်ဂ့ၤ, ပှၤလၢအမၤတရီတပါတၢ် ဒ်စီၤဧ့ၡီၤလၢအဆါကွံာ် အတၢ်ဝဲၢ်ကိအလီၢ်လၢ တၢ်အီၣ်ဘျဲးအီၣ်တဘျီအဂီၢ်အသိးမ့ၢ်ဂ့ၤ, အသုတအိၣ်တဂ့ၤ.”
ဖဲန့ၣ် စီၤပီလူးတတဲဝဲ ဘၣ်ဃးဒီးမ့းၡံအၤ အစၢၤအသွဲၣ်အဂ့ၢ်ဘၣ်. လၢတၢ်န့ၣ်အလီၢ် မ့ၢ်ဒၣ်အဝဲ ဟ့ၣ်ပလီၢ် ခရံာ်ဖိတဖၣ်လီၤ. အဝဲတဲဝဲလၢ “မၤလိၤကျဲဧိၤကပူၤဧိၤလၢ သုခီၣ်အဂီၢ်” ဒ်သိး “ပှၤသုတလီၤတိၢ်လၢ ယွၤအဘျုးအဖှိၣ်နီတဂၤတဂ့ၤ” န့ၣ်လီၤ. လီၤသးအုးဒိၣ်မးလၢ အဝဲသ့ၣ်မ့ၢ်မၤ ကမၣ်မုၣ်မၤကမၣ်ခွါန့ၣ် တၢ်ကဲထီၣ်အသးဒီးအီၤဒ်န့ၣ်သ့လီၤ. (ဧ့ၤဘြံၤ ၁၂:၁၂-၁၆) အဝဲသ့ၣ်မ့ၢ်မၤဝဲဒ်န့ၣ်န့ၣ် ကလီၤဂာ်ဒီး စီၤဧ့ၡီၤလၢ အတပာ်လုၢ်ပာ်ပှ့ၤဝဲ တၢ်လုၢ်ဒိၣ်ပှ့ၤဒိၣ်လၢအမ့ၢ် ‘ဖိဝဲၢ်ကိအလီၢ်’ ဘၣ် ဒီးပာ်ဒိၣ်ဝဲအနီၢ်ကစၢ် အတၢ်မိၣ်န့ၢ်သးလီန့ၣ်လီၤ.
ဖဲန့ၣ်အဆၢကတီၢ် လုၢ်လၢ်အိၣ်လၢ ပှၤကဟ့ၣ်လုၢ်ထီၣ်တၢ်ဆူ ယဟိဝၤယွၤအအိၣ်လီၤ. ဘၣ်သ့ၣ်သ့ၣ် စီၤဧ့ၡီၤ စ့ၢ်ကီးအိၣ်ဒီးတၢ်ခွဲးတၢ်ယာ်လၢ ကဟ့ၣ်လုၢ်ထီၣ်တၢ်လီၤ. (၁ မိၤၡ့ ၈:၂၀, ၂၁; ၁၂:၇, ၈; ယိၤဘး ၁:၄, ၅) ဘၣ်ဆၣ် စီၤဧ့ၡီၤ အသးစၢၢ်ဆၢဝဲထဲ အနီၢ်ကစၢ် အတၢ်မိၣ်န့ၢ်သးလီအဃိ အဝဲဟ့ၣ်လီၤကွံာ်ဝဲ ဖိဝဲၢ်ကိအလီၢ်လၢ ပဲကသူတခွးအဂီၢ်လီၤ. ယဟိဝၤယွၤတဲဆိပာ်ဝဲလၢ စီၤအၤဘြၤဟၣ် အစၢၤအသွဲၣ်ကတူၢ်ဘၣ်ဝဲ တၢ်နးတၢ်ဖှီၣ်တဖၣ်လီၤ. လၢတၢ်န့ၣ်အဃိ ဘၣ်သ့ၣ်သ့ၣ် စီၤဧ့ၡီၤတအဲၣ်ဒိးတူၢ်ဘၣ်ဝဲ တၢ်ကီတၢ်ခဲတဖၣ်အံၤအဃိ အဝဲဟ့ၣ်လီၤကွံာ်ဝဲ ဖိဝဲၢ်ကိအလီၢ်န့ၣ်လီၤ. (၁ မိၤၡ့ ၁၅:၁၃) တကးဒံးဘၣ် အဝဲပာ်ဖျါထီၣ်ဝဲလၢ တပာ်လုၢ်ပာ်ပှ့ၤ ဖိဝဲၢ်ကိအလီၢ်ခီဖျိ အဝဲဆီဟံၣ်ဆီဃီဒီးပိာ်မုၣ်ခံဂၤလၢ အတဘူၣ်ထီၣ်ဘါထီၣ် ယဟိဝၤယွၤလီၤ. ဒီးအဝဲမၤဝဲဒ်န့ၣ်အဃိ အမိၢ်အပၢ်သးဘၣ်ဒိဒိၣ်မးလီၤ. (၁ မိၤၡ့ ၂၆:၃၄, ၃၅) မ့မ့ၢ်စီၤယၤကိာ်န့ၣ် လီၤဆီဒီးစီၤဧ့ၡီၤလီၤ. အဝဲဆီဟံၣ်ဆီဃီဒီး ပှၤလၢဘူၣ်ထီၣ်ဘါထီၣ် ယဟိဝၤယွၤလီၤ.—၁ မိၤၡ့ ၂၈:၆, ၇; ၂၉:၁၀-၁၂, ၁၈.
လံာ်စီဆှံအတၢ်ကွဲးနီၣ်ကွဲးဃါတဖၣ်န့ၣ် သိၣ်လိပှၤဘၣ်ဃးဒီး မ့းၡံအၤ အတၢ်ဟဲလီၤစၢၤလီၤသွဲၣ်အဂ့ၢ်ဒ်လဲၣ်. ပှၤလၢမ့းၡံအၤ ဟဲလီၤစၢၤလီၤသွဲၣ်ဝဲတဖၣ်န့ၣ် တနီၤမ့ၢ်ဝဲဖိဝဲၢ်ကိဒီး တနီၤတမ့ၢ်ဖိဝဲၢ်ကိဘၣ်. တၢ်ဂ့ၢ်အံၤ ပှၤယူဒၤဖိတဖၣ်နၢ်ပၢၢ်ဝဲဒီး တူၢ်လိာ်ဝဲလီၤ. အဝဲသ့ၣ်တူၢ်လိာ်ဝဲန့ၣ် ပသ့ၣ်ညါဒ်လဲၣ်. မ့ၢ်လၢအဝဲသ့ၣ် တူၢ်လိာ်ဝဲလၢ ခရံာ်ကဟဲလီၤစၢၤလီၤသွဲၣ်လၢ စီၤယံးၡဲအဖိခွါသဒါ စီၤဒၤဝံးအဃိလီၤ.—မးသဲ ၂၂:၄၂.
