Entete i diau twayindulanga mu kuma kia dina diasonama muna Ayibere 12:16. E sono kiaki kivovanga vo Esau ‘kayangalelanga mambu mavauka ko.’ Ediadi diamfila mu ‘teka kimbuta kiandi’ kwa Yakobo muna longa dimosi dia madia.’ Edi twayindulanga vo vava Yakobo katambula “kimbuta,” wavewa e lau dia kituka nkulu a Masia.—Matai 1:2, 16; Luka 3:23, 34.

Kansi, wau twatomene fimpa tusansu twankaka twa Nkand’a Nzambi, twabakwidi vo ke diavavanga ko vo muntu kakala mwan’antete muna kituka nkulu a Masia. Yambula twafimpa twankaka muna tusansu twatu:

O mwan’antete a Yakobo i Rubeni ona kawuta yo Lea wa nkaz’andi. O mwan’antete a Yakobo yo Rakele i Yosefe. Vava Rubeni katá e zumba, wavidisa malau mavewanga kwa mwan’antete. Malau mama mavewa kwa Yosefe. (Etuku 29:31-35; 30:22-25; 35:22-26; 49:22-26; 1 Tusansu 5:1, 2) Kansi, Masia kawutukila mu luvila lwa Rubeni ko ngatu lwa Yosefe. Mu luvila lwa Yuda kawutukila wa mwana wayá wa Yakobo yo Lea.—Etuku 49:10.

E sono kia Luka 3:32 kiyikanga akulu tanu a Masia. Nanga yau awonso wan’antete bakala. Kasikil’owu, Boaze wawuta Obede, Obede wawuta Yisai.—Rutu 4:17, 20-22; 1 Tusansu 2:10-12.

Davidi wa mwan’a Yisai kakala mwan’antete ko. Yandi i mwan’ansuka muna wana nana. Kansi, Masia mu luvila lwa Davidi kawutukila. (1 Samuele 16:10, 11; 17:12; Matai 1:5, 6)  O muntu ankaka wakituka nkulu a Masia i Solomo, kansi kakala mwan’antete ko.—2 Samuele 3:2-5.

Ediadi ke disongele ko vo o kala mwan’antete ke diakala mfunu ko. O mwan’antete malau mayingi katambulanga mana wana ankaka ke batambulanga ko. Nkumbu miayingi, yandi wakitukanga ntu a kanda yo tambula kunku yole muna vua dia kanda.—Etuku 43:33; Nsiku 21:17; Yosua 17:1.

Kansi, e malau mavewanga kwa mwan’antete malenda vewa kwa mwana ankaka. Vava Abarayama kasindika Yisemaele, e malau ma kimwan’antete mavewa kwa Isaki. (Etuku 21:14-21; 22:2) Nze una tuyikidi kala, e malau ma Rubeni ma kimwan’antete mavewa Yosefe.

Ozevo, adieyi Paulu kazola vova muna Ayibere 12:16? Muna sono kiaki tutanganga vo: “Nutoma kuyikenga valembi kala munta-zumba vovo lwina ngatu muntu olembi yangalelanga mambu mavauka, nze Esau ona wateka e kimbuta kiandi muna dia kumosi.”

Mu sono kiaki, Paulu kavovela akulu a Masia ko. Lulukisu kavana kwa Akristu. Wabavovesa vo: “Nusingika nzila za malu meno” kimana “valembi kala muntu ofunga mu vua nsambu za Nzambi.” Diankenda vo ediadi dilenda vangama avo batele e zumba. (Ayibere 12:12-16) Muna mpila yayi, badi kala nze Esau, ona “kayangalelanga mambu mavauka ko” wau vo zolela yandi kasianga vana fulu kiantete.

Mun’owu wa fu ya kisi nsi ya tandu kiakina, Esau wakala ye lau dia tambika tukau kwa Yave. (Etuku 8:20, 21; 12:7, 8; Yobi 1:4, 5) Kansi, wau vo Esau zolela ya yandi kibeni kasianga va fulu kiantete, wabembola e lau dia kala mwan’antete mu kuma kia longa dimosi dia madia. Esau nanga mpasi kazola venga zina Yave kasakula zibwila mbongo a Abarayama. (Etuku 15:13) Wasonga mpe vo kayangalelanga mambu ma mwanda ko vava kasompa akento wole a esi zula. Ediadi diakendeleka kikilu mase mandi. (Etuku 26:34, 35) Waswaswana kikilu kakala yo Yakobo ona wavanga mawonso kimana kasompa o nkento ona wasadilanga Nzambi aludi.—Etuku 28:6, 7; 29:10-12, 18.

Adieyi tulongokele muna tusansu twatu twa Nkand’a Nzambi mu kuma kia akulu a Masia? Akaka muna yau wan’antete bakala, kansi akaka ke bakala wan’antete ko. Ayuda batoma bakulanga yo tonda e diambu diadi. Aweyi tuzayidi wo? Kadi bakwikilanga vo Kristu mu luvila lwa Davidi kawutukila, wa mwan’ansuka a Yisai.—Matai 22:42.