Tûn hma chuan, Hebrai 12:16-a thu avângin chutiang a nih chu kan lo ring ṭhîn a. Chu Bible chângah chuan Esauva chu “Pathian zah lo mi” a ni a, “a fa tîr nihna chu” Jakoba hnênah chaw vawi khat eiah a hralh a ni. Chuvângin, Jakoba’n “fa tîr nihna” a chan khân, Messia thlahtu nihna chanvo pawh a tel niin kan lo ngai a.—Matthaia 1:2, 16; Luka 3:23, 34.

Mahse, Bible châng dangte ngun taka zir chianna chuan Messia thlahtu ni tûrin fa tîr nih kher a ngai lo tih a târ lang a ni. Chûng Bible châng ṭhenkhat chu i lo ngaihtuah ang u:

Jakoba leh Leaii te fa tîr chu Reubena a ni a, Jakoba leh Rakili te fa tîr chu Josefa a ni. Reubena chu nungchang bawlhhlawhna thilsual a tih khân a fa tîr nihna a hloh ta a, chûng a chanvo neih tûrte chu Josefa’n a chang ta a ni. (Genesis 29:31-35; 30:22-25; 35:22-26; 49:22-26; 1 Chronicles 5:1, 2) Chuti chung pawhin, Messia chu Reubena emaw, Josefa emaw aṭangin a lo chhuak lo. Ani chu Jakoba leh Leaii te fapa palina Juda aṭangin a lo piang a ni.—Genesis 49:10.

Luka 3:32-ah Messia thlahtu mi panga târ lan a ni a, an vaiin fa tîr vek niin a lang. Entîr nân, Boaza chu Obeda pa a ni a, tichuan Obeda chu Jesaia pa a ni.—Ruthi 4:17, 20-22; 1 Chronicles 2:10-12.

Jesaia fapa Davida chu fa tîr a ni lo. Dik tak chuan, fapa pariat zînga naupang ber a ni a. Mahse, Messia chu Davida aṭanga lo piang a ni. (1 Samuela 16:10, 11; 17:12;  Matthaia 1:5, 6) Chutiang bawkin, Messia thlahtu dang leh chu Solomona a ni a, ani pawh Davida fa tîr a ni lo.—2 Samuela 3:2-5.

Fa tîr nih chu a pawimawh lo tihna erawh a ni lo. Fa tîr chuan fa dangte chan loh chanvote a dawng a. Ani chu nakina chhûngkaw lû ber tûr a ni a, rochan tûr lêt hnihin a chang ṭhîn a ni.—Genesis 43:33; Deuteronomy 21:17; Josua 17:1.

Mahse, fa tîr nihna chu fa dang hnêna hlan chhâwn theih a ni. Abrahama’n in aṭanga Ismaela a chhuahtîr khân, a fa tîr nihna chu Isaaka’n a chang ta a. (Genesis 21:14-21; 22:2) Kan sawi tâk angin, Reubena fa tîr nihna pawh Josefa’n a chang ta a ni.

A nih leh, Hebrai 12:16-a tirhkoh Paula sawi tum chu eng nge ni? Chutah chuan heti hian kan chhiar a ni: “Inngaih hmang emaw, Esauva anga Pathian zah lo mi emaw an lo awm dah ang e. Ani chuan a fa tîr nihna chu chaw vawi khat eiah a hralh a,” tiin.

Hei hi, Paula’n Messia thlahtute chungchâng a sawina a ni lo. Chu aiin, Kristiante a vaukhânna a ni zâwk. An hnênah: “In kete tân kawng ngîlte siam rawh u,” a ti a, tichuan “Pathian khawngaihna ata in bo dah ang e,” tiin a hrilh a ni. Nungchang bawlhhlawhna thil sual an tih chuan chutiang thil a thlen theih avângin lungchhiatthlâk tak a ni. (Hebrai 12:12-16) Chu dinhmunah chuan, anni chu mahni châkna tihlawhtling duhtu, “Pathian zah lo mi” Esauva ang an ni ang.

Chutih hun laia mite tih thin dân angin, Esauva chuan Jehova hnêna thil hlan theihna chanvo a neih châng a awm thei a. (Genesis 8:20, 21; 12:7, 8; Joba 1:4, 5) Mahse, Esauva chuan mahni châkna a dah pawimawh lutuk avângin a fa tîr nihna chanvo chu englo chhûm kawiin a thleng ta a ni. Esauva chuan Jehova sawi lâwk Abrahama thlahte tawn tûr hrehawmna chu pumpelh a duh ngei ang. (Genesis 15:13) Chu bâkah, milem bia hmeichhe pahnih nupuia a neih khân Pathian zah lo mi a nihzia a lantîr a, chutianga a neihna chuan a nu leh pa nasa takin a tilungngai a ni. (Genesis 26:34, 35) Pathian dik betu nupuia nei Jakoba nên chuan an va inang lo tak em!—Genesis 28:6, 7; 29:10-12, 18.

Hêng Bible chângte hian Messia thlahtute chungchâng eng nge min zirtîr? Ṭhenkhat chu fa tîr an ni a, ṭhenkhat erawh an ni lo. Hei hi Juda mite hriatthiam leh pawm ngei a ni. Chu chu engtin nge kan hriat? Krista chu Jesaia fate zînga naupang ber Davida thlah a ni dâwn tih an pawm vâng a ni.—Matthaia 22:42.