I te tuatau i topa, kua manako tatou e ko teia te tu no tei akakiteia te reira i roto ia Ebera 12:16. Te karanga ra no Esau “te tangata akono kore i te Atua” e kua oronga kia Iakoba “i tana tuanga tama mua i te kai anga kai okotai ra.” No reira kua manako tatou e i te rauka anga te “tuanga tama mua,” kua kapiti mai teia i te akameitakianga kia riro ei tupuna no te Mesia.—Mataio 1:2, 16; Luka 3:23, 34.

Inara, na te akara anga i tetai kimikimi anga apii o tetai au papaanga Pipiria, te akaari maira kare tetai tangata e anoanoia ei tama mua kia riro ei tupuna no te Mesia. Ka akara ana tatou i tetai au papaanga:

Ta Iakoba tama mua ko Reubena, na tana vaine ko Lea. Tana tama mua na Rahela ko Iosepha. Te rave anga a Reubena i te ainga tau kore, kua ngere aia i tona tikaanga ei tama mua, e kua aere teia tikaanga kia Iosepha. (Genese 29:31-35; 30:22-25; 35:22-26; 49:22-26; 1 Paraleipomeno 5:1, 2) Noatu ra, kare te Mesia i na roto mai i te uanga o Reubena me kore to Iosepha. Kua na roto mai ia Iuda, te ā o te tama a Iakoba raua ko Lea.—Genese 49:10.

Te akapapa ra a Luka 3:32 e rima au tupuna ke o te Mesia, te akaraanga e tama mua pouroa ratou. Ei akaraanga, ko Boaza te metua tane o Obeda, e ko Obeda te metua tane o Iese.—Ruta 4:17, 20-22; 1 Paraleipomeno 2:10-12.

Kare te tamaiti a Iese ko Davida i te tama mua. Koia te openga o te tamariki tamaroa tokovaru. Inara, kua na roto mai te Mesia ia Davida. (1 Samuela 16:10, 11; 17:12; Mataio 1:5, 6) Pera katoa, te rua o te tupuna o te Mesia ko Solomona, noatu e kare  aia i te tama mua na Davida.—2 Samuela 3:2-5.

Kare teia e ko te aiteanga e kare te tama mua tamaroa i te mea puapinga. E maata te au akameitakianga a te tama mua tamaroa tei rauka i tetai atu tamariki tamaroa. Te maata anga o te taime, koia te rua o te upoko o te ngutuare, e kua rauka iaia takirua te tuanga o te au apinga ravarai.—Genese 43:33; Deuteronomi 21:17; Iosua 17:1.

Inara ka rauka te tikaanga o te tama mua kia aere mei tetai tamaroa ki tetai. Te tuaru anga a Aberahama ia Isemaela, kua aere tona tikaanga tama mua kia Isaaka. (Genese 21:14-21; 22:2) Mei ta tatou i uriuri takere, kua aere to Reubena tikaanga ei tama mua kia Iosepha.

Eaa i reira te manako ta te apotetoro ko Paulo e taiku ra ia Ebera 12:16? I reira ka tatau tatou: “Ko te tupu ua ake tetai akaturi, e te tangata akono kore i te Atua, mei ia Esau ra, ko tei oko i tana tuanga tama mua i te kai anga kai okotai ra.”

I konei, kare a Paulo e uriuri ra no runga i te au tupuna o te Mesia. Mari ra, te oronga ra aia i tetai akamatakite anga ki te au Kerititiano. Akakite aia kia ratou: “E akatika ua oki i te ara o to kotou vaevae” e “ko te ngere aea tetai i te aroa ua o te Atua ra.” Ma te maromaroa, ka tupu teia me rave ratou i te ainga tau kore. (Ebera 12:12-16) Mei tera te tu, ka aite ratou kia Esau, “te tangata akono kore i te Atua” e kua inangaro i te akono i tona uaorai anoano.

Kia tau ki te peu o taua tuatau, penei kua rauka ia Esau tetai akameitakianga o te oronga anga i te au atinga kia Iehova. (Genese 8:20, 21; 12:7, 8; Iobu 1:4, 5) Inara kua akamou ua a Esau ki runga i tona uaorai anoano e kua oake i tana akameitakianga ei tama mua kia rauka tetai kapu manga. Penei kua inangaro rai a Esau i te akakore i te mamae ta Iehova i akakite no runga i te uanga o Aberahama. (Genese 15:13) Kua akaari katoa aia e kare aia i akamanako ana e e mea tapu e te puapinga te reira na te akaipoipoanga i te nga vaine enua ke, e apinga te ka akataitaia i tona nga metua. (Genese 26:34, 35) Mei teaa te tuke kia Iakoba, tei akapapu kia akaipoipo aia i tetai tokorua tei akamori i te Atua mou!—Genese 28:6, 7; 29:10-12, 18.

Eaa ta teia au papaanga Pipiria e apii maira ia tatou no runga i te au tupuna o te Mesia? Tetai pae ia ratou e au tamaroa tama mua, tetai pae, kare. Kua mārama e kua āriki te au ngati Iuda i teia. Akapeea tatou i kite ei? No te mea kua akakite ratou e ka riro te Mesia ei uanga no Davida, te tama openga a Iese.—Mataio 22:42.