Tera tei manaˈohia na na mua ˈˈe no te mau parau e faahitihia ra i roto i te Hebera 12:16. Te na ôhia ra ua riro Esau ei taata o te “haafaufaa ore ra i te mau mea moˈa” e ua horoa ia Iakoba “ta ˈna tufaa matahiapo no te hoê noa maa.” Na mua ˈˈe, i manaˈo na tatou ua fanaˈo Iakoba i te haamaitairaa e riro ei tupuna no te Mesia i te taime a noaa ˈi ia ˈna te tiaraa “matahiapo.”—Mat. 1:2, 16; Luka 3:23, 34.

Ua hiˈopoa-maite-hia râ te tahi atu mau aamu Bibilia e ua faaite mai te reira aita i titauhia te tiaraa tamaiti matahiapo no te riro ei tupuna no te Mesia. E hiˈo anaˈe te tahi o tera mau aamu:

O Reubena te tamaiti matahiapo a Iakoba raua Lea, area o Iosepha na Iakoba ïa raua Rahela. I to Reubena raveraa i te peu taotoraa tia ore, ua ere oia i to ˈna tiaraa matahiapo e riro ihora te reira ia Iosepha. (Gen. 29:31-35; 30:22-25; 35:22-26; 49:22-26; Par. 1, 5:1, 2) Aita râ te Mesia i haere mai na roto i te opu o Reubena e to Iosepha. Mea na roto mai râ ia Iuda, te maha o te mau tamaroa a Iakoba raua Lea.—Gen. 49:10.

I roto i te Luka 3:32, te faahitihia ra e pae tupuna o te Mesia e e au ra e tamarii matahiapo anaˈe ratou. Te tahi hiˈoraa, o Boaza te metua tane o Obeda e o Obeda te metua tane o Iese.—Ruta 4:17, 20-22; Par. 1, 2:10-12.

E vaˈu tamaroa ta Iese e o Davida te hopea. Noa ˈtu râ, mea na roto mai ia ˈna te Mesia i te haereraa mai. (Sam. 1, 16:10, 11; 17:12; Mat. 1:5, 6) Hoê â atoa no Solomona, ua riro oia ei tupuna no te Mesia noa ˈtu e ere o ˈna  te tamaiti matahiapo a Davida.—Sam. 2, 3:2-5.

E ere râ te auraa mea faufaa ore te tiaraa o te tamaiti matahiapo. E fanaˈo hoi te matahiapo i te haamaitairaa o te ore e horoahia i te toea o te mau tamaroa. Pinepine i muri aˈe i te metua tane, o te tamaiti matahiapo te rave i te tiaraa upoo utuafare e e horoahia e piti tufaa na ˈna.—Gen. 43:33; Deut. 21:17; Ios. 17:1.

E nehenehe râ te tiaraa matahiapo e horoahia i te tahi atu tamarii tamaroa. I to Aberahama aniraa ia Isemaela ia faarue i te puhapa, ua riro te tiaraa matahiapo ia Isaaka. (Gen. 21:14-21; 22:2) E mai tei faaitehia i nia ˈtu, ua riro te tiaraa matahiapo o Reubena ia Iosepha.

Eaha ïa te manaˈo ta te aposetolo Paulo i hinaaro e faaite i roto i te Hebera 12:16? Te parauhia ra: “A ara eiaha roa ei taata o te rave ra i te mau peu taotoraa tia ore i rotopu ia outou, eiaha atoa ei taata o te haafaufaa ore ra i te mau mea moˈa, mai ia Esau o tei horoa i ta ˈna tufaa matahiapo no te hoê noa maa.”

Aita Paulo i faahiti i te parau no nia i te mau tupuna o te Mesia, ua hinaaro râ oia e horoa i te hoê faaararaa i te mau Kerisetiano. Ua na ô oia: “A haamanina noa i te mau eˈa no to outou avae . . . ia ore te hoê ia ere i te hamani maitai rahi o te Atua.” Tera hoi te tupu ia rave ratou i te peu taotoraa tia ore. (Heb. 12:12-16) E mea na reira ratou e riro ai mai ia Esau o tei ‘haafaufaa ore i te mau mea moˈa’ e ua haapao noa i to ˈna mau hinaaro tia ore.

Ia au i te mau peu o tera tau, eita e ore ua pûpû Esau i te tusia na Iehova i te tahi mau taime. (Gen. 8:20, 21; 12:7, 8; Ioba 1:4, 5) Ua haafaufaa aˈe râ oia i to ˈna mau hinaaro e horoa ihora i ta ˈna haamaitairaa ei matahiapo no te hoê auˈa maa. Aita paha Esau i hinaaro e faaruru i te mau fifi e farereihia e te huaai o Aberahama mai ta Iehova i faaara atea. (Gen. 15:13) Ua haafaufaa ore atoa Esau i te mau mea moˈa a faaipoipo ai oia e piti vahine no te mau nunaa o te haamori i te mau atua ěê. Ua oto roa to ˈna na metua i ta ˈna faaotiraa. (Gen. 26:34, 35) Mea taa ê roa Esau i to ˈna taeae, ua haapao maitai hoi o Iakoba i te faaipoipo i te vahine o te haamori ra i te Atua mau!—Gen. 28:6, 7; 29:10-12, 18.

Eaha ta teie mau aamu Bibilia e haapii mai ra no nia i te mau tupuna o te Mesia? E ere pauroa o ratou i te tamarii matahiapo. Ua ite e ua farii na te mau ati Iuda i te reira. Eaha tatou e parau ai mai tera? Ua tiaturi ratou e huaai te Mesia na Davida, te tamaroa hopea a Iese.—Mat. 22:42.