SINO sifrur pyum ko kuker sne ḇenaḇye ido, na komarisen ra. Koḇaḇir sima siswar ko. Sifrur ko radiri ido nari komarisen ḇae. Inja, rariso insama ko kako kakfasnai ḇaḇenaḇye ya rai?

Snonkaku ḇena sne ḇenaḇye nya saswar, ine nasnaibos ro wos ma fararur ḇyena. Ima imayaryaren monda ḇa. Mboi, ifrur pyum kaku snonkaku ḇesesya snar iswar ma ifawi moḇ sḇaḇir raya. Ḇefandun ya iso, ḇaḇenaḇye ima bon ḇesasyar ro rur ḇesren ya. (Galatia 5:22, 23) Yahwe imarisen fa kofasnai ḇaḇenaḇye. Inja, rwama kofarkor moḇsariso mankundi ma Roma Ḇyedi sufasnai ḇaḇenaḇye ine, ma rariso kakfrur raris su rai.

Yahwe fyasnai ḇaḇenaḇye faro manseisirya kam, ma faro ”snonkaku ḇekofen kasumasa ḇa ma snonkaku ḇeḇarḇor sya” kako. (Lukas 6:35) Imnis ra, Yahwe ḇyuk ”ori faro snonkaku ḇarḇor ma ḇeḇye sya ma ḇyuk mekemya dado faro snonkaku ḇenapes ma ḇenapesḇa” sya. (Matius 5:45) Yahwe fyasnai ḇaḇenaḇye kako faro snonkaku ḇekyar ḇa snar iso Manḇefrur. Ma snonkaku ḇeradine sya sikenem payamyum kako.

Yahwe ḇaḇenaḇye ḇepyum kaku oser Ḇyedi iso, rosai ifrur faro Adam ma Eva su. Rofyor susapi ro sasar raposa, ”suyanem undam ara fa suḇukidwarek sifer suḇena”. Mboi, Yahwe fyawi ro yaf Eden bandiri, sufandun sansun ḇemnis syadi kukro saprop na nafo kuker ”rokaker borek ma abris sup”. Inja, kuker sne ḇenaḇye, Yahwe ifrur ”sansun ḇekwan ro aiwan kif” fa susun na.​—Kejadian 3:7, 17, 18, 21.

”Snonkaku ḇeḇarḇor ma ḇepyum” monda Yahwe fyasnai ḇaḇenaḇye yoḇ si, isyadi wer na myam kawasa ḇesoasuser Ḇyesi. Rupa ra, ro nabi Zakharia fafisu ḇyedi, malaikat oso ḇyesneso kukro snonkaku Israel sya sḇawes Yahwe bait Ḇyedi ro Yerusalem werḇa. Yahwe ryower malaikat ani ma kyarem i kuker ”wos ḇepyum ma ḇemyaren”. (Zakharia 1:12, 13) Yahwe ifrur rarirya kako faro nabi Elia i. Fafisu ono, ḇyaḇir derer monda ḇefarmyan faro Yahwe I. Nane nafnai fa iboryae kaku ma dor fa imar mura. Yahwe fyawi rosai ḇyaḇiri, inja iwan malaikat oso fa ryama syambraḇser i. Yahwe ḇyuk kakyar ḇe Elia i kako snar derer monda ḇa. Yahwe ḇaḇenaḇye Ḇyedine syambraḇser Elia i fa ifrur fararur ḇyena pdef. (1 Raja 19:1-18) Mboi, roi wakkara ya, ro Yahwe manfamyan Ḇyesi, manseiso ḇefasnaibos ḇaḇenaḇye ine?

Fafisu Yesus ryo supswan ine, snonkaku sya bisa smam fyasnai ḇaḇenaḇye kaku. Dakrarmomen ḇaḇeri ma idif snonkaku sya fa siso roi imarisen na ḇa. Iswar si inja ikofen radine: ”Mkoramuma faro Aya, mkokam ḇemor ma ḇembrus ma ḇeḇekandera,  nari Yaḇuk mananai faro mko.” (Matius 11:28-30) Snar Yesus ifrur pyum kaku, inja snonkaku sya siso i ḇe moḇ risai monda ryayoḇ na. Saswar nadif Yesus i fa ḇyuk nanan faro si, pararei, ma fyarkor si ”roi nabor” ḇekur ḇe Kmari.​—Markus 6:34; Matius 14:14; 15:32-38.

Yesus fyawi kaku rosai snonkaku sya sḇaḇir na, ma fyasnai ḇaḇenaḇye ma ifrur pyum si. Isyadi wer, rofyor imbe imnaisu ya, imarisen ifnoḇek mansei monda ḇerama yoḇ i. (Lukas 9:10, 11) Imnis ra, bin ḇeduf rik ani. Snar imarisen fa iprei, inja pyan ro Yesus sansun ḇyeja. Ro Sasoser Moses, ipok fa ifrur awer roi anna kukro myamas. (Imamat 15:25-28) Rosai Yesus ifrur faro bin ani? Imsor i ḇa. Fyawi bin ani imkak, ma iswar bin ani kukro ḇyekandera ro swaf taun ri 12 kwar. Doḇe, ”Ne, inai Yedi, kakyar beja ḇyuk [pararei] faro au. Wabur kuker aski ma waprei ro dafduf bedi!” (Markus 5:25-34) Yesus fyasnai sne ḇenaḇye kaku!

Fawar insandi nafnoḇek ko fa kofawi sne ḇenaḇye iso rofyor komam ḇesesya sekandera, na kokain fasis monda ḇa. Yesus fyasnaibos roi inema nefandun kaku rofyor fyawar wos sarḇer ḇekur snonkaku Samaria ḇena sne ḇenaḇye. Smun snonkaku Yahudi oso, siprer i, ma imar kakyur ro nyan andir. Snonkaku Samaria ma Yahudi sima sembroḇyae si, mboi fyor snonkaku Samaria oso imbran ḇo myam snonkaku Yahudi ani, iswar i. Isaramper snonkaku ḇepar ani. Ifrur par ḇyana fa isren ma dun i ḇe rum. Imarisen ḇyak ḇemamwarek rum anya fa myamwarek snonkaku Yahudi ani ma imarisen ḇyak roi ḇesena wer.​—Lukas 10:29-37.

Ḇaḇenaḇye nari ifnoḇek ko fa kofrur pyum snonkaku ḇesesya, ro fararur koḇena monda ḇa mboi ro wos koḇena kako. Refo ya doḇe, ”Makakwarek ro snonkaku ya sneri nafrur fa sneri myarḇak, mboi wos ḇepyum nafrur fa sneri iryaḇ.” (Amsal 12:25, fasfas kasun ro sop) Kona sne ḇenaḇye ma kofrur pyum ido, na nasasyar ro wos koḇena kako. Komarisen kofrur fa ḇesesya skain pyum. * (Mam fasfas kasun ro sop.) Wos koḇena nfasnaiḇair koswar si ma bisa kofnoḇek si fa simku fa smam samswen ḇekur si.​—Amsal 16:24.

Bisa kofasnai ḇaḇenaḇye kukro Allah ḇyuk na yoḇ ko. (Kejadian 1:27) Raris, Yulius, sordade Romawi ḇeyun manwawan Paulus ḇe Roma, ”ḇyuk fa Paulus isrow bati ḇyesi, insa sifnoḇek i ro fandun ḇyena” ro mnu Sidon. (Farfyar 27:3) Paulus ma min ḇesesya siwarai ro myos Malta, mboi kawasa ḇero diwa sya ”senaḇye” kaku. Sikaḇen for fa Paulus ma min ḇyesi sidapen ro na. (Farfyar 28:1, 2) Sifrur pyum kaku. Mboi, insama Yahwe imarisen, kofrur roi ḇepyum oser-oser monda ḇa, mboi kofrur na ḇesya kwar.

Yahwe imarisen fa kufepen nako ma kofasnai rari ḇaḇenaḇye ro kenem koḇena. Iso ḇefnai fa, dor ko insama kufepen ḇaḇenaḇye ine. (Kolose 3:12) Mboi, samswen fa kofasnai na ro fafisu nakam. Kukro? Imbude komai, kokyar mankun ḇa, ḇaido kofaḇri mankunko kaker. Oroḇaido imbude samswen fa kofrur pyum snonkaku oso kukro ifrur fa komsor kwar. Mboi kor fafnoḇek ro rur ḇesren ma kakfrur raris Yahwe I ido, na ifnoḇek ko fa kofasnai sne ḇenaḇye.​—1 Korintus 2:12.

Rosai fandun fa kofrur insama kona ḇaḇenaḇye syadi wer? Kwarapan: ’Aya isya  yarower ḇesesya ma yasewar fa yafawi rosai sḇaḇir na ke? Yamarisen yaḇuk fafnoḇek rofyor ḇesesya sfandun na ke? Fafisu risai kwar yafasnai ḇaḇenaḇye faro snonkaku ḇena karyer kuker aya ḇa ḇaido bati ayesya ḇa?’ Raposa, wafrur aw, raris mambir pyum syadi snonkaku ḇero moḇ Bani, isyadi naek srar sya. Wafrur na ido nari wafawi samswen sena ma rosai sfandun na. Ramnai, wafrur pyum si raris moḇ wamarisen sifrur pyum Au raya. (Matius 7:12) Ḇefandun syadi ya, wor Yahwe I fa ifnoḇek Au. Nari ḇyebarakas sasewar Bena fa fasnai ḇaḇenaḇye syadi wer.​—Lukas 11:13.

Manwawan Paulus dapḇair roi fyandun insama bisa fyarmyan faro Allah. Oser ya iso sne ḇenaḇye. (2 Korintus 6:3-6) Kawasa sya simarisen Paulus i kukro wos ma fararur ḇyena napyum. Smam ḇoi iswar si. (Farfyar 28:30, 31) Rarirya kako, kona sne ḇenaḇye ido, nari snonkaku sya simarisen sfawi nabor wos Refo ya. Kofasnai frur pyum faro snonkaku syakam isyadi faro ḇefrur pyum ko ḇa ido, imbude ine nari nadif si fa sfadwer kenem sena. (Roma 12:20) Ras oso, imbude simarisen sakfarkor Refo.

Ro Firdaus, nari snonkaku syakam siswaryae si. Snonkaku ḇekenem kaḇer sya nari sifrur pyum si, ma sino insape na sakmam na ro randak kaku. Ine nari nafnoḇek si fa sfasnai sne ḇenaḇye faro ḇesesya. Snonkaku ḇena sne ḇenaḇye ḇa sya, nari saksmai kankenem ro Firdaus ya ḇa. Ḇena sne ḇemyaren ma sne ḇenaḇye serer monda nari ḇekenem ro Allah Karajan Ḇyedi. (Mazmur 37:9-11) Supswan ine nari ifo kaku kuker payamyum ma aski! Mboi, ras anya ryama ḇaime, snonkaku ḇena sne ḇenaḇye sya nari sna fainda nabore. Rariso?

Refo ya doḇe, ”Snon ḇena sne ḇenaḇye nun fainda faro i”. (Amsal 11:17) Koḇebati kuker snonkaku ḇefrur pyum ido na komarisen, ma nari sifrur pyum i kako. Yesus doḇe, ”Warnkyara mkoḇuki kyaraya, nari ssḇuki kyara mko kako.” (Lukas 6:38) Inja, snonkaku ḇena sne ḇenaḇye napyan fa ismai bati ma nya wis ḇepyum kuker si.

Manwawan Paulus ikofenḇair yoḇ jemaat ro Efesus fa ’sisnemna nfafir faro min sesi, siswaryae si, ma sḇuk ampunyae faro si’. (Efesus 4:32) Sikam sna sne ḇenaḇye ma sna saswar ido, nari sidang syambraḇ ma ḇyeoser. Na kopok kokoryae naek srar koḇesya ḇa, kanonef ḇaido kofnak monda ḇo kofrur fa simsor. Imbape, na kawos wos ḇesambraḇser si. (Amsal 12:18) Ine nari nafrur fa naek srar ro sidang siryaḇ sfarmyan ḇe Yahwe I.

Raris kawos kwar na, ḇaḇenaḇye ima rari ḇefasnaibos ro wos ma fararur. Kona sne ḇenaḇye ido, ima kofrur raris Allah ḇesaswar ma ḇena snemura koḇedi, Yahwe I. (Efesus 5:1) Ine nafrur fa saswar mambekanaek koḇedi syambraḇ syadi ma nun raryaḇ faro ḇesesya fa sfarmyan kako ḇe Yahwe I. Inja, rwama kosewar sambraḇ kaku insama snonkaku sya smam snar Saksi-Saksi Yahwe sima sna ḇaḇenaḇye!