ANGGO dong halak na basar atap pe bujur hubanta, tontu malas do uhurta. Anjaha anggo dong halak na parduli hubanta, tontu martarima kasih do hita hu bani. Halani ganup hita marosuh anggo dong na bujur hubanta, sonaha do hita boi gabe halak na bujur?

Halak na bujur parduli do bani halak na legan. Anjaha taridah do ai marhitei parsahap ampa pambahenanni. Janah lang sungkup pitah sopan parsahapni. Halani holong janah mamingkirhon pangahap ni halak na legan, ra do ia mangurupi sidea. Anjaha buah ni tonduy do homa habujuron ai. (Gal. 5:22, 23) Sihol do Jahowa ase hita patuduhkon ai. Jadi pardiateihon hita ma siusihan humbani Jahowa pakon Jesus janah rimangi ma sonaha hita boi maniru sidea.

Bujur do Jahowa bani ganup halak age bani “na so mambotoh martarima kasih ampa bani halak parjahat”. (Luk. 6:35) Umpamani, “ipapoltak do mata ni ari-Ni bani parjahat ampa parbujur, anjaha iparoh do udan bani parpintor ampa pargeduk”. (Mat. 5:45) Halani sibere-bere ai, ganup halak boi totap manggoluh janah martuah age sidea lang porsaya bani Naibata ampa lang ra manombah-Si.

Humbani pambahenan ni Jahowa bani si Adam pakon si Hawa, taridah do bujur tumang Naibata ai. Dobkonsi mardousa si Adam pakon si Hawa, ‘isomot sidea ma bulung ni hayu ara bahen hiou ni sidea’. Tapi ibotoh Jahowa do anggo sidea porlu mamakei hiou na sosok halani i darat ni Pohon Eden ai bahat do “duri pakon suga-suga”. Jadi ibahen Naibata ma “hiou” humbani kulit binatang bani sidea.​—1 Mus. 3:7, 17, 18, 21.

Hassi pe bujur Jahowa bani “parjahat ampa parbujur”, tapi bujuran do Ia bani juakjuak-Ni na setia. Umpamani, bani masa ni nabi Sakaria, dong sada malekat na marpusok ni uhur halani lang be itoruskon halak Israel padearhon rumah panumbahan i Jerusalem. Itangihon Jahowa ma na ihatahon malekat ai janah ibalosi ma ia “marhasoman hata na madear ampa hata apoh-apoh”. (Sak. 1:12, 13) Sonai do homa na ibahen Jahowa bani nabi Elias. Ijia pusok tumang uhur ni si Elias janah ipindo do bani Jahowa ase rahanan ma ia matei. Tapi parduli do Jahowa hu bani. Halani ai isuruh ma sada malekat laho patoguhkonsi. Ihatahon Jahowa do homa bahat do na mangkasomani si Elias. Ujungni gabe toguh ma ia janah idalankon ma use tugasni ai. (1 Raj. 19:1-18) Humbani ganup juakjuak ni Naibata, ise do na gabe siusihan sidearan na patuduhkon habujuron?

Sanggah Jesus i tanoh on, itanda do ia halak na bujur. Lang ongga ia kasar marsahap  ampa margijang ni uhur. Halani parduli, ihatahon ia do bani halak na mabuei, “Roh ma nasiam hu bangku, nasiam na loja anjaha na boratan, ase hupasonang nasiam. . . . Ai lamlam do pasanganku.” (Mat. 11:28-30) Halani bujur ia, bahat do halak na mangirikkon huja pe ia laho. Anjaha halani holongni, ibere do sidea mangan, ipamalum do na boritan, janah iajarhon ia do pasal Bapani bani sidea.​—Mrk. 6:34; Mat. 14:14; 15:32-38.

Humbani pambahenan ni Jesus, taridah do anggo ia parduli bani pangahap ni halak na legan. Umpamani sanggah roh bahat halak manorihi ia, totap do ijalo Jesus sidea hassi pe domma loja pangahapni. (Luk. 9:10, 11) Bani panorang na legan, dong do sada naboru na marpantang hiou sadokah 12 tahun roh manjolom pakeianni. Bani Titah ni si Musa, lang boi naboru ai manjolom sasada halak halani butak do ia. (3 Mus. 15:25-28) Hassi pe sonai lang mintor igilai Jesus ia. Tapi halani holong ihatahon do, “Haporsayaonmu do na paluahkon ham, inang! Mulak ma ham ibagas damei, anjaha malum ma naboritmu in!” (Mrk. 5:25-34) Hunjon taridah ma banggal tumang do habujuron ni Jesus ai!

Humbani contoh-contoh na dob iulas hita, taridah do anggo habujuron ai maningon ipatuduh marhitei pambahenan. Jesus mangajarhon ponting tumang do ai marhitei limbaga pasal halak Samaria na bujur. Ijia, lang mardear halak Jahudi pakon halak Samaria. Hassi pe sonai sanggah itonggor halak Samaria dong halak Jahudi na irampok, ibogbogi, janah itadingkon i tongah dalan, mintor ra do ia mangurupi halani holongni. Itambari ma halak Jahudi ai janah iboan hu ianan parbornginan. Isuruh do homa pangurus ni ianan ai manambari halak Jahudi ai. Janah ihatahon do homa igalari ia do holi ganup partambaranni sanggah roh use ia.​—Luk. 10:29-37.

Hassi pe habujuron ai gati ipatuduh marhitei pambahenan, tapi boi do homa ai ipatuduh marhitei parsahap. Bibel mangkatahon, “Holsoh ibagas uhur patunduk jolma, tapi parsahap na basar pahinsah uhur.” (Pod. 12:25) Jadi habujuron ampa dear layak boi do mangojur hita ase patoguhkon janah mangapoh halak na legan. * Anggo sonai ibahen hita artini parduli do hita bani sidea. Hasilni sidea pe boi totap martahan hassi pe bahat sitarononni.​—Pod. 16:24.

Halani hita itompa usih songon rupa ni Naibata, jadi ganup hita boi do patuduhkon habujuron. (1 Mus. 1:27) Umpamani si Julius, kopala ni tentara Rom ‘basar do ia hubani si Paulus’. Dob ai ‘ilopas ia do si Paulus marayak hasoman, ase itamuei sidea ia’ i Sidon. (Lah. 27:3) Sonai homa do sanggah manongnong kapal ni si Paulus i pulou Malta, “basar tumang” do parhuta ai bani sidea. Ipagara do apuy ase ulang borgohan sidea. (Lah. 28:1, 2) Tongon dear do pambahenan sisonai. Tapi ase hita tongon-tongon gabe halak na bujur, lang sungkun pitah sahali mambahen na bujur.

Ase hita boi pasonangkon Jahowa, tongtong ma hita mambahen habujuron. Iparentahkon Jahowa do ase ‘ipakei’ hita habujuron ai. (Kol. 3:12) Tapi lang sai urah mambahen sisonai. Mase? Ra do halani halak parmela do hita atap dong na mambahen na jahat hubanta. Ra do homa halani sunsah hita mangambukkon sifat na mamontingkon diri. Hassi pe sonai, hita boi do tongtong patuduhkon habujuron anggo  marusaha hita maniru Naibata janah iurupi tonduy na pansing.​—1 Kor. 2:12.

Ase boi lambin bujur, maningon dong do na ibahen hita. Umpamani pingkirhon ma, ‘Ai dear do ahu manangihon halak ase hubotoh sonaha pangahapni? Ai hupardiateihon do ise na porlu iurupi? Nantigan do parpudi sahali ahu mambahen na bujur bani halak na legan, lang pitah bani kaluarga atap hasoman tumang?’ Dob ai bahen ma tujuan ase lambin mananda halak na legan, tarlobih ma bani sanina botou i kuria. Anggo ibahen hita sonai, ibotoh hita ma sonaha situasi pakon haporluan ni sidea. Tontu marosuh do hita anggo dong na bujur hubanta. Halani ai bahen hita ma homa sonai bani sidea. (Mat. 7:12) Na parpudi, pindo ma pangurupion ni Jahowa. Pos ma uhurta sai iurupi Ia do hita ase lambin bujur.​—Luk. 11:13.

Sanggah ipatugah apostel Paulus sifat aha do na porlu ipatuduh juakjuak ni Naibata, dong sada na ihatahon ai ma, habujuron. (2 Kor. 6:3-6) Gabe bahat do halak na ra manangar barita ni si Paulus halani ia patuduhkon habujuron marhitei parsahap ampa pambahenanni. (Lah. 28:30, 31) Sonai homa ma hita, anggo bujur hita bani ganup halak age bani halak na lang marosuh manangar baritanta, ujungni ra do gabe mubah sidea. (Rom 12:20) Ra do i pudian ni ari gabe ra sidea marlajar Bibel.

Holi i Paradeiso bujur do ganup halak bani na legan. Tontu malas do uhur ni ganup halak na ipapuho sanggah sidea mangahapkon habujuron na ibahen halak na legan. Anjaha sidea pe tarojur do homa mambahen sisonai bani na legan. Anggo dong na lang ra mambahen na bujur, lang boi sidea manggoluh i Paradeiso, halani pitah halak parbujur do na boi manggoluh ijai. (Ps. 37:9-11) Tontu gabe damei ma holi i Paradeiso! Tapi paima masa ai, ai dong do gunani anggo hita mambahen na bujur sonari on?

Bibel mangkatahon, “Dirini do pinadearni anggo layak halak.” (Pod. 11:17) Halak na marosuh bani halak na bujur, tontu ra do homa ia mambahen na bujur bani halak na legan. Songon na ihatahon Jesus, “Ai parsuhatan, na sinuhatkon nasiam do, suhatkonon bani nasiam.” (Luk. 6:38) Anggo bujur hita, gabe urah ma hita mandapot hasoman na bujur. Anjaha dokah do martahan parhasomanan sisonai.

Si Paulus mangojur halak Kristen i Epesus ase ‘[bujur] ma sidea samah sidea, paridop ni uhur, anjaha sirsir marsisasapan dousa’. (Ep. 4:32) Anggo ganup halak i kuria bujur janah marsiurupan, bahat do gunani ai. Sidea lang be kasar marsahap, lang podas-podas manguhumi, lang mambahen borit uhur ni halak, atap pe margosip. Tapi marsiojuran do sidea. (Pod. 12:18) Hasilni, gabe lambin toguh ma kuria janah marsada.

Tangkas ma, habujuron ai maningon do ipatuduh marhitei parsahap ampa pambahenan. Anggo ibahen hita sonai, artini itiru hita do Jahowa, Naibata na parholong ampa pardear layak. (Ep. 5:1) Hasilni, lambin toguh ma kuria, anjaha halak na legan pe gabe ra manangar barita hasintongan. Halani ai, tongtong ma hita marusaha patuduhkon habasaron atap habujuron!