ADI melias kalak man banta, meriah kel siakap sebap siteh lit si ermediate banta. Perban ngata bujur kita sanga melias kalak man banta, kai si banci silakoken gelah kita pe melias?

Kalak si melias ermediate kel man kalak si deban. Si e teridah arah perbahanen ras rananna. Labo sopan saja ia, tapi melias ka ia perban keleng atena kalak e janah iangkaina uga perasanna. Si lebih penting, lias ate eme salah sada sipat si ihasilken kesah si badia Dibata. (Galati 5:22, 23) Ate Jahwe melias min kita, emaka mari sibahas uga Jahwe ras AnakNa nggo ncidahken sipat enda janah uga kita banci ngusihsa.

Jahwe melias man kerina jelma, termasuk kalak si “la meteh ngata bujur ras kalak jahat.” (Lukas 6:35) Contohna, ‘iban Jahwe pultak matawariNa man kalak si jahat bage pe man kalak si mehuli, janah ibanNa udan man kalak si bujur bage pe man si la bujur.’ (Matius 5:45) Perban lias ate Jahwe enda, kalak si la tek Jahwe e Pencipta pe banci nggeluh janah banci denga ermeriah ukur.

Arah kai si ilakoken Jahwe man Adam ras Hawa, banci siteh contoh si mehulina kerna lias ate Jahwe. La ndekah kenca kalak e erdosa, ‘ijaitna bulung ara guna nutupi dagingna.’ Tapi, iteh Jahwe perlu kalak e paken si lebih cocok perban taneh i darat Taman Eden nggo kena sumpah janah melala “dukut-dukut ras sinuan-sinuan si erduri.” Emaka iban Jahwe me “uis i bas kulit rubia-rubia nari” man kalak e. Melias kel Jahwe e!​—Kejadin 3:7, 17, 18, 21.

Aminna pe Jahwe melias man “kalak si jahat bage pe man kalak si mehuli,” khususna melias Ia man umatNa si setia. Contohna, bas jaman nabi Sakaria, lit sada malekat si latih ukurna perban kalak Israel ngadi mbangun rumah pertoton Jahwe i Jerusalem. Ibegiken Jahwe kai si ikataken malekat e janah ialoiNa ia alu “kata-kata pengapul si melias.” (Sakaria 1:12, 13) Man nabi Elia pe, bage kang iban Jahwe. Sanga kitik kel ukur nabi e janah sisada akapna bana, ipindona man Jahwe gelah mate saja ia. Iangkai Jahwe perasan Elia janah ikirimNa sada malekat guna mpegegehi ia. Ipetetap Jahwe ka ukur nabi e maka labo ia sisada. Lias ate Jahwe erban Elia ngasup ngelakoken tugasna mulihi. (1 Raja-Raja 19:1-18) Tapi, arah kerina umat Jahwe, ise nge contoh si mehulina bas ngusih lias ate Jahwe si luar biasa?

Sanga Jesus i doni, iteh kalak maka melias kel ia. La pernah ia kasar janah la pernah ipaksakenna kalak ngelakoken sura-surana. Ermediate ia man kalak si deban janah nina, “Marilah, kena kerina si latih janah beraten, gelah kupegegehi kena. . . . Pasangenku ntabeh mabasa.” (Matius 11:28-30) Perban melias kel ia, ikutken kalak ia ku japa  pe ia lawes. Perban mekuah ate Jesus kalak e, iberena kalak e man, ipepalemna, janah “melala si iajarkenna” kerna Bapakna.​—Markus 6:34; Matius 14:14; 15:32-38.

Iangkai Jesus perasan kalak emaka sanga erurusen ras kalak si deban, iukurina perasan kalak janah melias ia. Misalna, sanga istirahat pe ate Jesus, “alu mehuli” isampatina kerina kalak si reh ndahi ia. (Lukas 9:10, 11) Ukuri ka kai si terjadi man sekalak diberu si pendarahen. Merhat kel ia malem, emaka idadapna uis Jesus. Tapi menurut Undang-Undang Musa, la banci ilakokenna bage perban ia la bersih. (Imamat 15:25-28) Kai si ilakoken Jesus? Labo irawaina diberu e. Iteh Jesus maka mbiar kel diberu e, janah mekuah ate Jesus ngenen ia sebap nggo 12 tahun ia sakit. Nina man diberu e, “O Nakku, kinitekenndu nggo erban kam malem. Laweslah alu dame, janah malemlah i bas penakitndu si mekelek e nari.” (Markus 5:25-34) Melias kel Jesus e!

Bagi contoh-contoh ndai, nggo sipelajari maka adi melias kita nggit kita nampati kalak si deban. Ijelasken Jesus uga pentingna e sanga iceritakenna perumpaman kerna kalak Samaria si mehuli. Lit sekalak Jahudi si irampok, ipekpeki, janah menam mate i tepi dalan. Lewat me sekalak Samaria janah mekuah atena dilaki e, aminna pe kalak Samaria ras kalak Jahudi la sicocoken. Perban melias ia, nggit ia nampati dilaki si luka e. Ibersihkenna janah ibalutina luka-lukana jenari ibabana ku penginapen. Ibere kalak Samaria e sen man pengurus penginapen guna ngerawat kalak Jahudi e janah nggit ka ia mpedarat senna adi perlu biaya tambahen.​—Lukas 10:29-37.

Adi melias kita, labo perbahanenta ngenca mehuli tapi siukuri ka gelah rananta pe banci mpegegehi. Nina Pustaka, “Aru ate erbahanca keriahen lesap, tapi ranan mehuli erbahanca ate malem.” (Kuan-kuanen 12:25) Adi melias janah mehuli kita, sikataken me kai si mpegegehi kalak si deban, dungna malem me siban pusuh kalak e. * (Nen keterangen tambahen.) Adi melias kita ngerana, enda bukti siperdiateken kalak si deban janah banci reh nukahna iakap kalak e megenggeng ngadapi masalahna.​—Kuan-kuanen 16:24.

Kita kerina banci melias perban iciptaken Dibata kita mirip ras Ia. (Kejadin 1:27) Contohna Julius, eme perwira Roma si ertanggung jawap maba rasul Paulus ku Roma. ‘Mehuli perbahanenna man Paulus janah ipediatna ia ndahi temanna guna ngaloken penampat kalak e’ i kota Sidon. (Perbahanen Rasul-Rasul 27:3) Bas perdalanen e, karam me kapal si inangkihi Paulus ras kalak si debanna. Sanga si e, “mehuli kel” kalak si tading bas Malta man kalak e janah ipegarana api gelah ula kalak e bergehen. (Perbahanen Rasul-Rasul 28:1, 2) Ilakoken kalak e kai si mehuli. Tapi, gelah meriah ukur Jahwe, arus terus kita melias, ula sekali-sekali saja.

Ate Jahwe melias min kita bas kegeluhenta. E me sebapna isuruhNa kita gelah ‘makeken’ lias ate. (Kolose 3:12) Tapi labo menukah terus melias. Engkai? Banci saja la kita melias perban permela kita, la kita percaya diri, ntah pe perban lit sitik peregoista. Entah, banci saja mesera siakap melias man kalak si la mehuli banta. Tapi adi sipindo kesah si badia janah siusahaken ngusih Jahwe, banci isampatiNa kita gelah tuhu-tuhu melias.​—1 Korinti 2:12.

Kai si arus silakoken gelah banci lebih melias? Sungkuni bandu: ‘Tutus nge  ateku megiken kalak, janah kuusahaken nge ngangkai perasanna? Ermediate nge aku sanga kalak perlu penampat? Ndigan nge aku terakhir melias man kalak si labo keluargaku ntah pe temanku rembak?’ Kenca si e, banlah tujunndu, misalna nandai terdauhen kalak bas sekitarndu, khususna turang senina bas runggun. Adi ilakokenndu e, banci tehndu kai masalah kalak e janah kai si iperlukenna. Kenca si e, meliaslah kam man bana bagi si atendu iban kalak man bandu. (Matius 7:12) Si terakhir, pindolah penampat Jahwe. Pasti ipasu-pasuNa usahandu jadi kalak si melias.​—Lukas 11:13.

Sanga ikataken Paulus kai saja si erban ia jadi pelayan si mehuli, salah sadana eme lias ate. (2 Korinti 6:3-6) Meriah akap kalak ras Paulus perban mehuli perbahanen ras rananna, janah igejapken kalak e Paulus ermediate. (Perbahanen Rasul-Rasul 28:30, 31) Bage ka pe, adi melias kita, banci saja merhat kalak erlajar kebenaren. Adi melias kita man kerina jelma, termasuk kalak si la mehuli banta, banci saja kena ku pusuhna janah berubah ia. (Roma 12:20) Banci ka dungna nggit ia erlajar Pustaka.

Bas Pardis pagi, kerina jelma melias. Kalak si ipekeke pe igejapkenna e, banci saja piga-piga arah kalak e, edenga tangtangna kalak melias man bana. Pasti teriahken dungna kalak e gelah melias ka man kalak si deban. I je kari, kalak si la melias janah la nggit nampati kalak si deban la banci tetap nggeluh bas Kerajan Dibata. Kalak si perkeleng ngenca janah melias si banci nggeluh rasa lalap bas Pardis. (Masmur 37:9-11) Tuhu-tuhu aman janah dame kel pagi i doni! Tapi sope terjadi si e kerina, gundari pe melala gunana adi kita melias. Kai saja kin e?

Nina bas Pustaka, “Runtung kalak si mehuli ukurna.” (Kuan-kuanen 11:17) Meriah akap kalak rembak ras kalak si mehuli, janah biasana mehuli ka kalak man bana. Nina Jesus, “Uga perbahanen kena man kalak si deban, bage ka nge kari perbahanenna man kena.” (Lukas 6:38) Emaka kalak si melias menukah kapna ndat teman janah mpertahankenca.

Ikataken rasul Paulus man kalak bas runggun Epesus, “Melias janah mesayanglah kena sada ras si debanna, ampunilah sada ras si debanna.” (Epesus 4:32) Adi melias janah mesayang kerina si lit bas runggun, dungna paguh janah ersada me runggun e. La kita nggit ngkritik turang seninata, ncekurakisa, ntah pe kasar rananta, ntah erban kitik ukurna aminna pe jagar-jagar ngenca. Arusna lalap min rananta ngiahken ras mpegegehi. (Kuan-kuanen 12:18) Asilna, kerina turang senina bas runggun banci ermeriah ukur ngelayani Jahwe.

Bagi si nggo sipelajari, lias ate eme sipat si teridah bas ranan ras perbahanenta. Adi melias kita, siusih me Dibata Jahwe si perkeleng ras nggit mere. (Epesus 5:1) Alu bage terpegegehi me turang seninata bas runggun janah kalak si deban pe dungna nggit ngelayani Jahwe. Emaka siusahakenlah gelah iteh kalak Saksi-Saksi Jahwe e kalak si melias!