Tjalihati u sëmbë—Sëmbë ta si a dee soni dee i ta taki ku dee soni dee i ta du taa i abi di fasi aki
Te wotowan ta lei taa de abi tjalihati da u, nöö di soni dë ta mbei u ta fii bunu. U ta fii bunu te u sabi taa sëmbë ta booko de hedi ku u. U di a ta bigi da u te wotowan ta lei taa de abi tjalihati fuu, nöö unfa useei sa lei taa u abi tjalihati da wotowan?
Wan sëmbë di abi tjalihati da sëmbë ta booko hën hedi ku wotowan, nöö a ta dë u si a dee soni dee a ta taki ku dee soni dee a ta du. Söwan sëmbë an ta du bunu da wotowan u di a abi bunu fasi nöö, ma u di a lobi de, söseei u di a ta fusutan unfa de ta fii. Ma di möön fanöudu soni, hën da di tjalihati di sëmbë ta abi da wotowan, da wan u dee fasi di di jeje u Gadu ta mbei sëmbë ko abi (Galasia 5:22, 23). Jehovah kë taa u abi tjalihati u wotowan. Fëën mbei boo luku unfa Jehovah ku Jesosi bi lei taa de abi tjalihati da sëmbë, söseei unfa u sa djeesi de.
JEHOVAH ABI TJALIHATI U HII SËMBË
Jehovah abi tjalihati u hii sëmbë, te kisi „dee sëmbë an ta dëën tangi” ku „dee hogihati sëmbë tuu” (Lukasi 6:35). U ta si di soni dë, u di „te di sonu fëën ta jabi, nöö a ta jabi da dee bunu sëmbë ku dee hogi wan tuu. Te tjuba fëën ta kai, a ta kai te dou a hii sëmbë, dee ta libi bunu nëën wojo ku dee an ta libi bunu nëën wojo tuu” (Mateosi 5:45). Dee sëmbë dee na ta biibi taa Jehovah hën mbei hii soni seei ta feni wini, u di a abi tjalihati u sëmbë, söseei de sa ta dë waiwai.
Wan fasi fa Jehovah lei taa a abi tjalihati u sëmbë, hën da di soni di a bi du da Adam ku Eva. Baka di Adam ku Eva du zöndu, hën de „tei figa uwii, hën de nai de miti u mbei soni u tapa de sen kamian”. Ma Jehovah bi sabi taa te de bi o libi a döösë u di djai u Eden, nöö de bi o abi koosu lai fanöudu di sa tjubi de sinkii möön bunu, u di a bi siba di goon, söseei u di „maka ku taku uwii” bi dë a di goon. Fëën mbei a lei taa a abi tjalihati da de, u di a mbei „langa koosu ku mbeti kakisa” da de.—Kenesesi 3:7, 17, 18, 21.
Hii fa Jehovah abi tjalihati da „dee bunu sëmbë ku dee hogi wan tuu”, tökuseei a ta möön abi tjalihati da dee dinima fëën dee ta dini ën ku hii de hati. A di ten di Sakalia bi dë wan tjabukama u Gadu, wan ëngëli bi ta booko hën hedi, u di dee Isaëli sëmbë an bi ta mbei di Wosu u Jehovah a Jelusalen go dou möön. Jehovah bi haika andi di ëngëli bi taki, hën a piki ën „bunu soni ku soni di bi ta da kötöhati” (Sakalia 1:12, 13). Jehovah bi lei taa a abi tjalihati u di tjabukama fëën de kai Elia tu. Wan ten bi dë, di di tjabukama aki bi ta fii booko saka, söseei a bi ta fii taa a bi dë hën wanwan. Fëën mbei a bi hakisi Jehovah faa mbei a dëdë. Jehovah bi lei Elia taa a bi ta booko hën hedi ku di fasi fa a bi ta fii. Fëën mbei a bi manda wan ëngëli faa go dëën taanga. A bi piki Elia tu taa a dë ku ën. Di tjalihati di Jehovah bi abi da Elia, bi dëën taanga faa go dou ku di wooko fëën (1 Könu 19:1-18). Ma undi u dee dinima u Jehovah lei möön gaanfa taa a abi tjalihati u sëmbë, leti kumafa Jehovah bi lei taa a abi tjalihati u wotowan?
JESOSI BI ABI TJALIHATI U SËMBË GAANFA SEEI
Di Jesosi bi dë a goonliba aki, sëmbë bi sa si taa a abi tjalihati u sëmbë. An bi ta gandji da sëmbë, söseei nöiti a bi pooba u duwengi sëmbë u de du andi a kë. A bi ta booko hën hedi ku wotowan. A bi Mateosi 11:28-30). U di a bi abi sö wan tjalihati da sëmbë, mbei sëmbë bi ta waka nëën baka a hii së ka a bi nango. U di a bi abi tjalihati u de, mbei a bi ta da de soni u njan, a bi ta kula de, söseei a bi ta lei de „sömëni soni” fëën Tata.—Maikusi 6:34; Mateosi 14:14; 15:32-38.
taki taa: „Haika e, dee sëmbë, ee wan sëmbë i dë fukafuka, i ko wei u dee lai dee i ta tja, nöö be i ko a mi e. Nöö mi o mbei i ko dë bööböö. . . . Biga di tii u mi an taanga e” (Jesosi bi ta fusutan unfa dee sëmbë bi ta fii, nöö a bi ta lei taa a abi tjalihati u de, söseei taa a bi ta hoi de a pakisei. Hii fa a bi ta taanga so juu, tökuseei a bi ta heepi hii sëmbë di bi ta ko nëën (Lukasi 9:10, 11). Pakisei di soni di bi pasa ku di mujëë di bi ta lasi buuu. A bi kë ko bëtë, nöö fëën mbei a bi panjan di koosu u Jesosi. Ma kumafa di wëti u Mosesi bi ta taki, nöö an bi musu du di soni dë, u di an bi limbo (Leifitiki 15:25-28). Andi Jesosi bi du? An bi gandji dëën. A bi ta si taa di mujëë bi ta fëëë, söseei a bi abi tjalihati dëën u di a bi ta tja sitaafu 12 jaa longi kaa. A bi piki ën taa: „Mujëë, di fa i si i biibi a mi tjika dë, hën wë mbei i feni heepi e. Nöö go fii, i böö u di siki bi ta sitaafu i dë” (Maikusi 5:25-34). Jesosi bi abi tjalihati u sëmbë tuutuu!
WAN SËMBË DI ABI TJALIHATI DA WOTOWAN TA HEEPI DE
A dee woto dee u luku dë, u si taa ee u abi tjalihati u wotowan, nöö woo du soni u heepi de. U di Jesosi bi kë lei u unfa di soni aki dë fanöudu tjika, mbei a bi konda di woto u di Samalia womi di bi abi bunuhati. Fufuuma bi fufuu hii dee soni u wan Dju womi, de bi fon mën u kii, hën de disëën a bandja pasi. Wan Samalia womi di bi ta pasa, bi tjali da di Dju womi aki, hii fa Samalia sëmbë ku Dju sëmbë bi ta buuse deseei. U di a bi abi tjalihati da di womi, mbei a heepi di womi aki di bi kisi gaan makei. A bi buta deesi a dee kasikaasi fëën, hën a tjëën go a wan lantiwosu. Di Samalia womi bi paka di sëmbë di abi di lantiwosu faa luku di Dju womi, söseei a bi taa a bi o paka da woto soni di bi dë fanöudu jeti u de sa kula di womi.—Lukasi 10:29-37.
Te u abi tjalihati u sëmbë, nöö a o heepi u fuu hoi wotowan a pakisei, nöö woo ta da de taanga ku dee soni dee u ta du, söseei ku dee soni dee woo ta taki. Di Bëibel ta taki taa: „Te wan sëmbë ta booko hën hedi pasa maaka, nöö a o lasi hati, ma te sëmbë ta fan a wan suti fasi ku ën, nöö a ta dë waiwai” (Nöngö 12:25). Te u abi tjalihati u wotowan ku te u abi bunuhati, nöö woo ta da de taanga ku dee soni dee u ta taki, nöö di soni dë o ta mbei de fii möön bunu. * (Luku di pisi a basu.) Te u ta fan suti ku de, nöö u ta lei taa u ta booko u hedi ku de. Di soni dë o mbei an taanga da de u hoi dou te fuka ta miti de a di libi.—Nöngö 16:24.
UNFA U SA KO ABI TJALIHATI DA SËMBË?
Hii u tuu sa lei taa u abi tjalihati u wotowan, u di Gadu mbei u kumafa hënseei dë (Kenesesi 1:27). Di hedima u dee Loomë sodati de kai Julisi, di bi mbei de tja apösutu Paulosu go a Loomë, bi „libi bunu ku Paulosu. Biga a dëën pasi faa go a tela a dee mati fëën fu de sa sölugu ën”, di de bi dou a di kamian de kai Sidon (Tjabukama 27:3). Di di sipi ka Paulosu bi dë bi booko kaba a sösö, hën dee sëmbë u Malita bi ’kisi de ku wai’, söseei de bi zunta faja da de u de ta këndë faja (Tjabukama 28:1, 2). Dee sëmbë aki bi du wan bunu soni seei. Ma tökuseei, ee wan sëmbë kë u Jehovah ta wai ku ën, nöö a musu ta lei taa a abi tjalihati u wotowan hiniwan juu.
Jehovah kë taa di tjalihati di u abi da wotowan musu dë wan u dee fasi fuu. Fëën mbei a ta piki u taa u musu „a’ tjalihati u otowan” (Kolosën 3:12). Ma so juu a ta taanga u lei taa u abi tjalihati da wotowan. Faandi mbei u taki sö? A sa ta taanga da u fuu lei taa u abi tjalihati da sëmbë u di u ta sen, u di wa dë seiki nasö u di u ta pakisei useei nöö. Nasö a kan taa a ta taanga da u fuu lei taa u abi tjalihati da wan sëmbë di ta libi hogi ku u. Ma ee u ta hakisi Jehovah faa da u di santa jeje fëën, söseei ee u ta mbei möiti u djeesi ën, nöö a o heepi u fuu sa lei taa u abi tjalihati u wotowan.—1 Kolenti 2:12.
Unfa u sa sabi andi u musu du fuu sa möön abi tjalihati u wotowan? I sa hakisi iseei taa: ’Mi ta haika bunu te wotowan ta fan u? Söseei mi ta pooba u fusutan unfa de ta fii ö? Mi ta si te wan sëmbë abi Mateosi 7:12). Te u kaba fëën i sa hakisi Jehovah faa heepi i, nöö a o mbei i feeni gaan bunu u di i ta mbei taanga möiti u lei taa i abi tjalihati u sëmbë.—Lukasi 11:13.
heepi fanöudu ö? Un ten bi dë di lasiti pasi di mi lei wan sëmbë di an dë famii u mi nasö wan mati u mi, taa mi abi tjalihati fëën?’ Nöö buta maaka da iseei. Wan maaka di i sa buta da iseei, hën da fii musu ko sabi dee sëmbë dee i ku de ta hulu möön bunu, möönmöön dee sëmbë u di kemeente fii. A di fasi aki joo ko sabi un bookohedi de abi ku andi de abi fanöudu. Te i ko sabi dee soni aki, nöö pooba u libi ku de a wan fasi di ta lei taa i abi tjalihati u de, leti kumafa i bi o kë taa de du da i ee ju bi dë a de kamian (DI FASI FA WOTOWAN SA FENI WINI TE U ABI TJALIHATI U SËMBË
Di apösutu Paulosu bi ta taki u dee soni dee bi ta mbei taa a dë wan bunu futuboi u Masa, nöö wan u dee soni dee a bi kai da tjalihati u sëmbë (2 Kolenti 6:3-6). Sëmbë bi lobi Paulosu u di a bi ta taki soni, söseei a bi ta du soni di ta lei taa a abi tjalihati u sëmbë. Nöö de bi ta fii taa a bi ta booko hën hedi ku de (Tjabukama 28:30, 31). Sö nöö a dë ku u tu. Ee u ta lei taa u abi tjalihati u wotowan, nöö woto sëmbë o kë ko sabi möön soni u di tuutuu lei. Te u ta lei taa u abi tjalihati u hii sëmbë, te kisi dee sëmbë dee ta libi hogi ku u seei, nöö di soni dë sa mbei de ko ta pakisei woto fasi, söseei de sa tooka de manii (Loomë 12:20). Kandë bakaten de o kë lei soni u Bëibel tu.
A di Paladëisi, hii sëmbë o abi tjalihati u wotowan. Woo lei taa u abi tjalihati u dee sëmbë dee o weki ko a libi baka. A sa kan taa sëmbë an bi lei so u de taa de abi tjalihati u de wan daka. A kan taa di soni aki o heepi de u de lei taa de abi tjalihati u wotowan tu. Ee fuu taki ën, nöö ee wan sëmbë an abi tjalihati u wotowan, söseei ee an ta heepi wotowan, nöö an o sa libi a di ten di di Könuköndë u Gadu o tii. Dee sëmbë dee ta lei taa de abi lobi ku dee sëmbë dee abi tjalihati u sëmbë nöö o sa libi u teego a di paladëisi (Psalöm 37:9-11). An dë u taki taa a o dë wan ten ka wa o ta fëëë möön, söseei ka bööböö libi o dë! Ma ufö di soni dë pasa, u sa feni wini te u ta lei taa u abi tjalihati u sëmbë. Na un fasi?
DEE WINI DEE U TA FENI TE U ABI TJALIHATI U SËMBË
Di Bëibel ta taki taa: „Wan womi di ta libi bunu ku wotowan o feni wini” (Nöngö 11:17). Te wan sëmbë ta lei taa a abi tjalihati u wotowan, nöö sëmbë ta lobi ën, söseei de ta lei ën taa de abi tjalihati fëën tu. Jesosi bi taki taa: „Ku di wan seepi maaka di i ta maaka da otowan, nöö ku ën seei de o maaka da i tu” (Lukasi 6:38). Fëën mbei an ta taanga da wan sëmbë di abi tjalihati u wotowan faa feni bunu mati.
Apösutu Paulosu bi piki dee sëmbë u di kemeente u Efeise taa: „Un musu ta fii ku di otowan fii ta tjali ku ën. Un musu ta dëën paadon” (Efeise 4:32). Te hii dee sëmbë a di kemeente ta lei taa de abi tjalihati da wotowan, söseei taa de ta booko de hedi ku de, nöö dee sëmbë u di kemeente sa ta libi kuma wan famii. Wa bi o kë ta kuutu dee baaa ku dee sisa fuu, ta taki soni u de, ta mbei gaan sipootu ku de nasö ta taki soni di sa hati de. Ma u kë dë sëmbë di ta taki soni u heepi de nasö u da de taanga (Nöngö 12:18). Di soni dë o mbei taa woo sa ta dini Jehovah ku piizii a di kemeente.
U bi lei a di woto aki taa ee u abi tjalihati u wotowan, nöö a o dë u si a dee soni dee u ta taki ku dee soni dee u ta du. Te u ta lei taa u abi tjalihati u wotowan, nöö u ta djeesi di Gadu fuu Jehovah di lo’ sëmbë, söseei di lo’ u da sëmbë soni (Efeise 5:1). Di soni aki ta mbei taa u sa dë kuma wan famii ta dini Jehovah, söseei a ta da wotowan taanga u deseei ko ta dini ën tu. Fëën mbei boo du hii soni di u sa du, sö taa sëmbë sa si taa dee Jehovah Kotoigi da sëmbë di abi tjalihati u wotowan!
^ pal. 13 Woo taki u di fasi de kai bunuhati a wan woto pisi di o taki u dee fasi di wan sëmbë ta abi te di santa jeje ta tii ën.