1, 2. Jo Ibru 13:4 omyero ocuk cwinywa me timo gin ango?

WAN ducu wamito keto deyo i kom Jehovah. En opore me nongo deyo ki botwa, dok ocikke ni ebiketo deyo i komwa bene. (1 Camuel 2:30; Carolok 3:9; Niyabo 4:11) En bene mito ni wami deyo bot jo mukene, calo luloc me lobo. (Jo Roma 12:10; 13:7) Ento tye gin mo ma pire tek ma mitte ni waket deyo iye bene. Man aye nyom.

² Lakwena Paulo ocoyo ni: “Jo ducu myero guket deyo i kom nyom, dok kitanda pa jo ma gunyomme myero giwor obed maleng.” (Jo Ibru 13:4) Paulo onongo pe tye ka lok mere aloka keken i kom nyom. En onongo tye ka waco ki Lukricitayo ni omyero guket deyo i kom nyom, nyo ni, gunen nyom calo gin ma pire tek adada. Tika meno aye kit ma ineno kwede nyom, tutwalle nyom ma megi?

3. Yecu omiyo tam ma pire tek ango madok i kom nyom? (Nen cal ma tye i pot karatac man.)

³ Ka ineno nyom calo gin ma pire tek, ci nongo itye ka lubo lanen maber adada. Yecu kikome bene onongo neno  nyom calo gin ma pire tek. I kare ma Luparicayo gupenye lok i kom keto nyom, Yecu ogamo lapenygi kun tiyo ki lok ma Lubanga oloko i kom nyom me acel ni: “Pienno dano twero weko wonne ki minne, moko i kom dakone matwal. Ci gin aryo-nu gicako doko kom acel.” Yecu omedde ni: “Gin ma Lubanga oribo kacel dano pe opok kingi.”​—Kwan Marako 10:2-12; Acakki 2:24.

4. Pingo Jehovah ocako te yub me nyom?

⁴ Yecu omoko ni Lubanga aye ma oketo yub me nyom dok ni nyom omyero obed pi naka. I kare ma Lubanga oribo Adam ki Kawa i nyom mukwongo, en pe owaccigi ni gitwero keto nyomgi. Ento, mitine onongo tye ni ‘gin aryo-ni’ gubed ma gunote i nyomgi pi naka.

5. To ogudo nyom nining?

⁵ Wungeyo ni i kare ma Adam otimo bal, jami mapol olokke. Alokaloka acel i kine, aye ni dano gucako to, dok man ogudo wa nyom. Lakwena Paulo otito bot Lukricitayo ni to giko te nyom dok weko ngat ma odong ma kwo-ni bedo agonya me nyomme doki.​—Jo Roma 7:1-3.

6. Cik pa Moses pwonyowa kit ma Lubanga neno kwede nyom nining?

⁶ Cik ma Lubanga omiyo ki Luicrael otito kore ki kore lok madok i kom nyom. Me labolle, onongo kiye ni Laicrael twero nyomo mon mapol. Tekwaro man onongo dong tye con kadi wa ma peya Lubanga ominigi Cik. Kadi bed kit meno, Cik man onongo gwoko mon kacel ki lutino wek pe kitergi marac. Me labolle, ka Laicrael mo onyomo opii ci lacen dok okwanyo dako me aryo, onongo pud mitte ni en ocob miti pa dakone me acel kit ma onongo timo con. Lubanga onongo mito ni en omedde ki gwokke dok opar pire. (Nia 21:9, 10) Wan pe walubo Cik pa Moses i kare-ni.  Ento Cik man pwonyowa ni Lubanga neno nyom calo gin ma pire tek. Lok ada man bene konyowa me keto deyo i nyom.

7, 8. (a) Ma lubbe ki Nwoyo Cik 24:1, Cik onongo loko ningo i kom keto nyom? (b) Jehovah neno keto nyom nining?

⁷ Cik man onongo loko ningo i kom keto nyom? Kadi bed ni Jehovah pe oyubo ni nyom twero ket, ento Cik onongo ye ni Laicrael twero ryemo dakone ka “onongo roc mo i kome.” (Kwan Nwoyo Cik 24:1.) Cik meno pe otito ngo kikome ma kitwero lwongo ni “roc.” Ento, roc meno nen calo onongo obedo gin mo ma kelo lewic nyo bal mo madit adada ento pe bal matino tino. (Nwoyo Cik 23:14) Ki cwercwiny madit, i kare pa Yecu, Lujudaya mapol onongo giketo nyomgi “pi tyen lok mo keken.” (Matayo 19:3) Ngene kene ni wan pe wamito ni wabed ki tam ma kit man.

⁸ I kare pa lanebi Malaki, co onongo gimaro keto nyomgi wek ginyom dako ma pud tidi ma pe tiyo pi Jehovah. Ento Lubanga otito tamme ka maleng madok i kom keto nyom. En owaco ni: “Adag keto nyom.” (Malaki 2:14-16 Baibul me leb Lango.) Kit ma Lubanga neno kwede nyom onongo pud pe olokke cakke ki i acakki piny, i kare ma en owaco ni laco ‘bimoko i kom dakone liking, dok gin aryo-ni gidoko kom acel.’ (Acakki 2:24) Dok Yecu bene onyuto ni ecwako tam pa Wonne madok i kom nyom i kare ma owaco ni: “Gin ma Lubanga oribo kacel, dano pe opok kingi.”​—Matayo 19:6.

9. Lok pa Yecu ma tye i Marako 10:11, 12 tyen lokke ngo?

⁹ Jo mukene gitwero penye ni, ‘Tika tye tyen lok mo ma weko Lakricitayo keto nyomme ci dok nyomme odoco?’ Nen kong gin ma Yecu owaco: “Ka dano mo oryemo dakone woko, ce dok onyomo dako mukene, lanyom meno otimo abor, nongo obalo i nyim dakone; ki dako bene kit meno, ka ce oa woko ki bot cware dok ogero laco mukene, ci dako-nu otimo abor.” (Marako 10:11, 12; Luka 16:18) Ngene kene ni Yecu onongo neno nyom calo gin ma pire tek, dok en onongo mito ni jo mukene gutim kit meno bene. Ka laco oketo nyomme ki dakone ma lagen ci onyomo dako mukene, ci en nongo tye ka timmo abor. Man bene rom ki dako ma oketo nyomme ki cware ma lagen. Tye kit meno pien keto nyom keken pe giko nyom. Lubanga nongo pud neno laco ki dako meno calo “kom acel.” Yecu bene owaco ni ka laco oketo nyomme ki dakone ma lagen, ci dakone bedo i atematema me timmo abor. Pingo tye kit meno? I kare macon, dako ma nyomme oket onongo twero winyo ni omyero enyom ngat mukene wek enong jami ma mitti pi kwo. Nyom ma kit meno rom aroma ki timo abor.

10. Tyen lok acel keken mene ma weko Lakricitayo twero keto nyomme ci dok nyomme odoco?

 ¹⁰ Yecu opwonyo ni tye tyen lok acel keken mumiyo ngat moni twero keto nyomme: ‘Awaco botwu ni, dano mo ma oryemo dakone, ma pe pi tim me tarwang, ce onyomo dako mukene, nongo otimo abor.’ (Matayo 19:9) En bene oloko i kom gin acel-li i Pwonye me Wi Got. (Matayo 5:31, 32) I kabedo aryo magi ducu, Yecu oloko i kom “tim me tarwang.” Tim tarwang kwako tim me abor, tim me malaya, rwatte i buto i kin jo ma pe gunyomme, buto i kin co ki co nyo mon ki mon, kacel ki buto ki lee. Me labolle, ka laco munyomme otimo abor, ci dakone twero yero me keto nyom meno nyo pe. Ka dakone oyero me keto nyomgi, ci nongo Lubanga dong pe nenogi calo jo munyomme.

11. Pingo Lakricitayo twero yero pe me keto nyomgi kadi bed luote otimo tim me tarwang?

¹¹ Ki lok ada, Yecu pe owacci ka ngat munyomme otimo tim tarwang ci lawote ma pe obalo-ni omyero oket nyomme woko. Me labolle, dako romo yero me medde ki bedo i nyomme kadi bed cware otimo tim tarwang. Pingo? Pien twero bedo ni en pud maro cware dok tye atera me timme kica ki tic kacel kwede me yubo nyomgi. Ki bene, ka oketo nyomme ci ngat mo pe onyome, kwone twero bedo matek. Me labolle, en bicobo mitine me kom kacel ki jami ma mitte pi kwo nining? En tika biwinyone ni etye kene? Keto nyomgi bigudu lutinone nining? Tika biweko pwonyogi i ada doko tek? (1 Jo Korint 7:14) Ngene kene ni ka ngat ma balle pe oyero me keto nyomgi, ci bibedo ki kwo matek.

12, 13. (a) Ngo ma otimme i nyom pa Kocea? (b) Pingo Kocea ojolo Gomer i nge timmo bal, dok ngo ma watwero pwonyone ki i nyom pa Kocea?

¹² Gin mutimme i kwo pa Kocea pwonyowa jami mapol ma lubbe ki kit ma Lubanga neno kwede nyom. Lubanga owaco bot Kocea ni ocit onyom nyako ma nyinge Gomer, ma lacen onongo bidoko “nyako ma lakwele” dok binywalo “litino me kwele.” Gomer kacel ki Kocea gunywalo awobi. (Kocea 1:2, 3) Lacen, Gomer dok onywalo anyaka ki awobi, nen calo ki laco mukene. Kadi bed Gomer otimo abor tyen makato acel, Kocea pe oketo nyomgi. Lacen Gomer oweko Kocea ci odoko opii. Ento pud Kocea ocito owille, odwoke cen i gange. (Kocea 3:1, 2) Jehovah otiyo ki Kocea me nyuto kit ma ebedo ka timmo kica ki Luicrael i kare ducu ma pe gubedo lugen bote kun giworo lubange mukene. Ngo ma watwero pwonyone ki i nyom pa Kocea?

¹³ Ka luot ma Lakricitayo otimo tim tarwang, ci Lakricitayo ma pe ki bal-li omyero omok tamme. Yecu owaco ni ngat ma pe ki bal-li nongo tye ki tyen lok mupore me keto nyomme dok bedo agonya me nyomme odoco. Ento, pe bedo bal ka luot ma balle pe-ni oyero me timmo kica ki luote. Kocea ojolo Gomer pud dok aye. I ngeye ma odwogo cen, Kocea owacce ni en myero pe orwatte i buto ki laco mukene. Dok ni en bene ‘pe ebirwatte i buto’ ki Gomer pi kare mo. (Kocea 3:3, NW, lok ma i tere piny.) Ento lacen, Kocea orwatte i  buto ki dakone. Man onyuto kit ma Lubanga onongo tye atera me jolo Luicrael bote wek wat i kingi omedde. (Kocea 1:11; 3:3-5) Man pwonyowa gin ango i kom nyom i kare-ni? Ka luot ma balle pe-ni dok ocako rwatte i buto ki labal-li, ci man nyuto ni en dong otyeko timo kica woko. (1 Jo Korint 7:3, 5) Ka meno otimme, ci nongo en dong pe ki tyen lok matir me keto nyom. Dong gin myero gutute kacel dok gukonye kekengi me neno nyom kit ma Lubanga neno kwede.

14. Ma lubbe ki 1 Jo Korint 7:10, 11, ngo ma twero timme i nyom?

¹⁴ Lukricitayo omyero guket deyo i nyom calo Jehovah gin ki Yecu. Kadi bed kit meno, i kare mukene jo mogo pe gitimo man pien wan ducu watye ki roc. (Jo Roma 7:18-23) Pi meno, pe omyero wabed ki ur ka Lukricitayo me cencwari me acel gubedo ki pekki madongo i nyomgi. Paulo ocoyo ni “dako pe okwer cware.” Ento i kine mukene man otimme.​—Kwan 1 Jo Korint 7:10, 11.

15, 16. (a) Miti pa jo munyomme myero obed me timo ngo ka peko tye i nyomgi, dok pingo? (b) Man bene gudo ngat ma luote pe tiyo pi Jehovah nining?

¹⁵ Paulo pe otito ngo kikome ma oweko luot magi gupokke. Ento wangeyo ni pekki magi pe obedo ni laco otimo tim me tarwang. Ka onongo laco otimmo tim tarwang, ci kono dakone obedo ki tyen lok matir me keto nyomgi ki dok me nyomme odoco. Paulo ocoyo ni dako ma opokke woko ki bot cware “myero obed kene, nyo odwog cen bot cware.” Nongo Lubanga pud nenogi calo jo munyomme. Paulo owaco ni kadi bed pekkigi dongo nining, ka pe obedo tim tarwang, ci omyero gutute matek me cobone ki dok me yubo wat i kingi wek gumedde ki bedo kacel. Gitwero penyo pi kony ki bot luelda. Luelda pe gibicwako tungcel, ento gibiminigi tam ki i Baibul ma twero konyogi.

¹⁶ Ket kong ni, luot pa Lakricitayo mo pe woro Jehovah. Ka gwok peko tye i nyomgi, tika gitwero pokke? Kit ma waneno kwede, Baibul wacci tim me tarwang aye obedo tyen lok ma weko ngat moni yero me keto nyomme. Ento Baibul pe tito jami ma weko jo munyome gitwero pokke. Paulo ocoyo ni: “Ka dako mo bene tye ki cware ma pe oye Yecu, ka ce cware oye me medde ki bedo kwede, pe myero okwer cware.”  (1 Jo Korint 7:12, 13) Man bene pud tiyo wa i kare-ni.

17, 18. Pingo Lukricitayo mogo gumoko tamgi me medde ki bedo i nyomgi kadi bed pekki tye madongo?

¹⁷ Ento i kine mukene laco ‘ma pe i niye,’ nyuto ka maleng ni pe emito “medde ki bedo” ki dakone. Me labolle, romo bedo ni laco-ni pwodo dakone dok keto kwone ka mading. I kine mukene nongo pe miyo jami ma mitte me gwoko jo me ode, nyo gengo dakone ki tic pi Lubanga. Ka tye kit meno, ci dako ma Lakricitayo romo moko tamme pire kene me pokke woko, kadi bed ni cware pe waco ki doge ni pe emito “medde ki bedo” ki dakone. Ento Lukricitayo mogo ma gitye ka kato ki i kwo ma kit man gumoko tamgi me medde ki bedo. Gitye ka kanyone kun gitute matek me yubo wat i kingi. Pingo gumoko tam ma kit man?

¹⁸ Ka luot gupokke pi tyen lok ma kit man, nongo pud gitye jo munyomme dok gibikemme ki pekki ma waloko i komgi malo-ni. Lakwena Paulo omiyo tyen lok mukene ma weko jo munyomme gimedde ki bedo kacel. En ocoyo ni: “Laco ma pe oye Yecu doko leng pi dakone, ki dako ma pe oye bene doko leng pi cware ma Lakricitayo-ni. Ka pe kumeno, kono litinowu pe gibedo leng, ento kit macalo tye gileng gigi.” (1 Jo Korint 7:14) Lukricitayo mapol guyero me medde ki bedo ki luotgi ma pe tiyo pi Jehovah kadi bed ni kwone onongo pe yot. Cwinygi obedo yom pi tam ma gumoko i ngeye ma luotgi odoko Lacaden pa Jehovah.​—Kwan 1 Jo Korint 7:16; 1 Petero 3:1, 2.

19. Pingo tye jo mapol i kacokke pa Lukricitayo ma gitye ka keto deyo i nyomgi?

¹⁹ Yecu omiyo tam madok i kom keto nyom, dok lakwena Paulo omiyo tam madok i kom pokke. Gin ducu onongo gimito ni lutic pa Lubanga guket deyo i kom nyom. I twok lobo ducu, tye Lukricitayo mapol ma gitye ka keto deyo i nyomgi i kare-ni. Pud itwero nongo jo munyome ma cwinygi yom i kacokkewu, ma laco tye lagen dok maro dakone ki dako bene woro cware. Gin ducu ginyuto ni watwero keto deyo i nyom. Dok watwero bedo ki yomcwiny ni jo munyomme milion mapol gitye ka mokone ni lok pa Lubanga man tye ada: “Pi lok man dano biweko wonne ki minne, ci giribbe woko gin ki dakone, gin aryo dong gidoko kom acel.”​—Jo Epeco 5:31, 33.