1, 2. Ro Ibrani 13:4, rariso komam farḇakḇuk ya rai?

KOKAME komarisen koḇesyowi Yahwe I. Isyus fa ismai syowi ro ko, ma ḇyeasas na dakḇesyowi ko. (1 Samuel 2:30; Amsal 3:9; Fasasna 4:11) Yahwe imarisen koḇesyowi ḇesesya kako, raris snonkaku ḇeyuf papoik sya. (Roma 12:10; 13:7) Mboi, roi oso naisya fandun fa koḇesyowi wer, isoine farḇakḇuk ya.

² Manwawan Paulus fyas, ”Snonkaku syakam fandun fa sesyowi farḇakḇuk ya, ma sifrur mamas awer na kako”. (Ibrani 13:4, NW) Paulus dawosḇair farḇakḇuk ine rarirya monda ḇa. Isya ikofen faro snonkaku Kristen insama fandun fa sesyowi farḇakḇuk ya, smam na ḇe roi ḇefandun kaku. Wakmam farḇakḇuk ya ryariri ke? Iḇye syadi faro ḇefarḇuk kwar Au ya, ḇesyowi farḇakḇuk mankun Bena ke?

3. Ananun ḇefandun risai Yesus ikofen ḇekur farḇakḇuk ya? (Mam sonin ro randak artikel ine.)

³ Mam farḇakḇuk ya ḇe roi ḇefandun kaku ido, Ausya waso Yesus nyan ḇepyum kaku ḇyena. Yesus mankundi ḇyesyowi  kaku farḇakḇuk ya. Ras oso, snonkaku Farisi sifuken i ḇekur imbeswa ḇeḇesisye ro farḇakḇuk ya. Yesus kyarem kuker dap kaḇer rosai Allah ikofen faro farḇakḇuk ḇerandak ya: ”Inja snon oso nari ibur kmari ma snari su ma ḇye oser kuker swari, isof suḇe kraf oser.” Ikofen wer, ”Rosai Allah fyesepen kwar, snonkaku sya sipok sfaspar awer.”​—Wasya Markus 10:2-12; Kejadian 2:24.

4. Rosai Allah imarisen ro farḇakḇuk ya?

⁴ Allah iso ḇefrur farḇakḇuk ḇerandak rofandu Adam ma Eva su. Imarisen insama suḇeoser ro farḇakḇuk suḇena isof fyoro. Inja, ipok ikofen ḇe su fa suḇesisye ro farḇakḇuk suḇena ḇa. Yesus ifawi roi nane ma nya mamam raris moḇ Allah myam na rai.

5. Rariso marmar ya dawyae farḇakḇuk ya rai?

⁵ Mboi, fyor Adam isapi ro sasar anya, roi ḇebor nfarwei. Rupa ra, snonkaku sya simar ido nane nawyae farḇakḇuk sena kako. Manwawan Paulus fyasnai ḇe snonkaku Kristen sya ḇo doḇe fyor oso imar ido na wis ro farḇakḇuk ya imuk. Ikofen wer ḇo doḇe bin ḇaido snon oso swari imar kwar ido na imkei fa fyarḇuk wer.​—Roma 7:1-3.

6. Sasoser Moses fyarkor ko fa kofawi rosai Allah marisen Ḇyedi faro farḇakḇuk ya?

⁶ Sasoser Allah ḇyuk faro Israel naser akurfasnai ḇebor faro farḇakḇuk ya. Raris, snon Israel oso bisa fyarḇuk bin isyadi ro oser. Roi ḇeradine naisya fyoro kwar rofyor Allah ḇyuk Sasoser Moses ḇaim. Imbape, Sasoser ani kyadaunwarek bin ma romawa sya insama sifrur susa si ḇa. Rupa ra, fyor snon Israel oso fyarḇuk bin women mura dun bin ḇesuru ya wer ido, fandun fa myamfaduru kaker bin ḇyuk ḇepon ani raris randak ya. Allah dor insama kyadaun ma fyaduru i pdef. (Keluaran 21:9, 10) Baboine, koso Sasoser Moses werḇa. Mboi, Sasoser ani  fyarkor ko fa kofawi Allah ima myam farḇakḇuk ḇe roi ḇefarfnak ḇa. Ine ifnoḇek ko fa koḇesyowi farḇakḇuk ya kako.

7, 8. (a) Ro Ulangan 24:1, rosai Sasoser Moses ikofen ḇekur imbeswa ḇesisye ya? (b) Moḇsa Yahwe myam imbeswa ḇesisyeyae rai?

⁷ Rosai Sasoser Moses ikofen ḇekur imbeswa ḇesisye ya? Kakuḇae, Yahwe imewer kaku imbeswa suḇesisye. Mboi, Sasoser ya ḇye snon Israel oso fa fyaspar swari rofyor ”myam roi ḇemnis ḇa ro i”. (Wasya Ulangan 24:1.) Sasoser Moses fyasnaiḇair ḇa rosaiso ”roi ḇemnis ḇa” anya. Mboi, kaku ḇeri inema roi ḇefrur mamyai kaku ḇaido roi ḇefamfnom risyaḇa ma sasar kasun monda ḇa. (Ulangan 23:14) Ara faḇye, ro Yesus fafisu ḇyedi snonkaku Yahudi ḇebor sya sfaspar siswasi kuker ”knam famfnom monda”. (Matius 19:3) Komewer kaku fa kakfrur raris rosai sifrur nane.

⁸ Ro Nabi Maleakhi fafisu ḇyedi, snon sibor sfaspar bin sḇuk ḇepon ya, imbude insama sfarḇuk wer kuker bin ḇebabo ḇefarmyan ḇe Yahwe I ḇa. Mboi, Allah ikofen snai kaku moḇsa myam imbeswa ḇesisyeyae raya. Doḇe, ”Yamewer kaku fa imbeswa suḇesisye.” (Maleakhi 2:14-16) Allah ikofen ro farḇakḇuk ḇerandak ya ḇo doḇe snon oso ”nari ḇyeoser kuker swari, ma . . . suḇe baken oser”. (Kejadian 2:24) Moḇ Allah myam farḇakḇuk ya ryarirya kaker. Ma Yesus nya karkara oser raris Kmari, doḇe, ”Rosai Allah ḇyefa ḇeḇeoser kwar, snonkaku sipok sfaspar i ḇa.”​—Matius 19:6.

9. Rosai knam ro Yesus wos ḇyena ro Markus 10:11, 12 ya?

⁹ Imbude sia sifuken, ’Roi ḇefnai kaku isya faro imbeswa Kristen fa suḇesisye ma sufarḇuk wer ke?’ Komampan rosai Yesus ikofen na, ”Mansei ḇefaspar swar i, raimnai dun bin ḇese, irya ifrur [farḇuk famfnom] faro swa ḇepon byedi. Rarirya kako bin oso fyaspar swari ma fyakawin snon ḇese, i kako ifrur farḇuk [famfnom]”. (Markus 10:11, 12; Lukas 16:18) Nasnai kaku, Yesus ḇyesyowi farḇakḇuk ya, ma imarisen ḇesesya sakfrur rarirya kako. Rofyor snon ḇaido bin oso fyaspar swa ḇefrur pyum ḇyedi ma fyarḇuk wer ido, isya ifrur farḇuk famfnom. Snar fafisu imbeswa suḇesisye, na nafrur fa farḇakḇuk suḇena namnai ro dia ḇa. Allah myam kaker imbeswa ansuya suḇe ”baken oser”. Yesus ikofen kako rofyor snon oso fyaspar swari ḇefrur sasar ḇa, na ifnai fa eḇe bin ya ifrur farḇuk famfnom kako. Moḇsa ine ḇyerarirya rai? Fafisu ya, imbude snar eḇe bin ya swari fyaspar i mura, ismai samswen ro kumpan na, inja kyara fandun fa fyarḇuk wer. Farḇakḇuk ḇeradine imnis ifrur farḇuk famfnom.

10. Rosaiso knam oser monda faro snonkaku Kristen oso fa ḇyesisye kuker swari ma imkei fa fyarḇuk wer?

¹⁰ Yesus ikofenḇair knam oser monda ḇefnai fa snonkaku oso ḇyesisye kuker  swari. Doḇe, ”Mansei ḇefaspar swari, mḇoi swari ifrur farḇakbuk ḇa, raimnai ḇyuk bin oso ḇese, ikada ifrur farḇuk.” (Matius 19:9) Dap kaḇer roi ine ro Faya ḇyedi ro Urek. (Matius 5:31, 32) Ro swaf anya, Yesus kyur wos ”ifrur farḇakbuk”. Fararur farḇuk kyuf ḇe roi ḇesasar raris farḇuk famfnom, farḇuk ḇeḇyeḇa, fararur farḇuk rofandu ḇeḇe imbeswa ḇaim, snon ifrur farḇuk kuker snon ma bin kako rarirya, ma fararur farḇuk kuker aiwan sya. Rofyor snon ḇefakawin kwar ifrur rarirya ido, na eḇe bin ya bisa dun snemuk fa fyaspar i ke roḇa. Suḇesisye ido, Allah na myam su ḇeḇe imbeswa werḇa.

11. Rosai ḇefnai fa snonkaku Kristen oso ḇefawi sumin ya ifrur farḇuk kwar, imewer ḇyesisye kuker swari?

¹¹ Komam ido, Yesus ikofenḇair ḇa fyor oso ifrur farḇuk famfnom ido, na sumin ḇefrur sasar ḇa fandun fa fyaspar i. Rupa ra, eḇe bin ya ifawi swari ifrur farḇuk kwar mboi imbude kyinfir fa imewer ḇyesisye kuker swari. Kukro? Imbude iswar kaker swari, imarisen ḇyuk maf ḇe i, ma susewar fa sufrur farḇakḇuk suḇena fa napyum kaḇer. Oso wer ido, eḇe bin ya fyaspar i ḇo fyarḇuk werḇa ido, nari ismai samswen ono. Rupa ra, mansei na ḇefasos roi fyandun na ma fandun ro fararur farḇuk ḇyena kako? Nari ḇyaḇir ḇyero mankundi ke? Romawa ḇyesya ido na moḇsa sḇerai? Na samswen fa fyaduru romawa ḇyesya ro kakaku ya ke? (1 Korintus 7:14) Inja, swa ḇefrur sasar ḇa kyinfir fa fyaspar swari ido nari ismai samswen ḇemarḇak kaku.

12, 13. (a) Rosai ḇekur Hosea farḇakḇuk ḇyena? (b) Rosai ḇefnai fa Hosea dun kaḇer Gomer i, ma farkarkor rosai kun ro Hosea farḇakḇuk ḇyenane?

¹² Nabi Hosea farfyar ḇyena nfarkor syadi ko wer moḇsa Yahwe myam farḇakḇuk ya rai. Allah dor Hosea i fa fyarḇuk kuker Gomer i, iso nari ḇe ”bin ḇembran famfnom” ma nya romawa ro marandan famfnom ḇyena. Gomer ma Hosea suna romawa snon oso. (Hosea 1:2, 3) Ḇarpur mura, Gomer kyapar inai ma roma ḇyesuya wer, mboi rya ro snon ḇese wer. Gomer ifrur farḇuk syadi ro rarwan oser, mboi Hosea fyaspar i ḇa. Mura, Gomer ibur Hosea i ma ḇyewomen. Mboi, Hosea dun kaḇer i. (Hosea 3:1, 2) Yahwe ḇye Hosea i fa fyasnai moḇsa ḇyuk ampun ker ḇe Israel sya rofyor er ansi sisoasuser faro I ḇa ma sisyom allah ḇekaku ḇa. Farkarkor rosai kun ro Hosea farḇakḇuk ḇyena?

¹³ Rofyor imbeswa Kristen oso ifrur farḇuk ido, na sumin ḇesasar ḇa ani fandun fa ifrur snemuk. Yesus ikofen swa ḇesasar ḇa ani nya knam ḇekaku fa fyaspar i ma imkei fa fyarḇuk wer. Mboi, fyor ḇesasar ḇa ani kyinfir fa ḇyuk maf ḇe sumin ya ido, sasar oḇa. Hosea dun kaḇer Gomer i. Rofyor kyaḇer ḇe Hosea i raposa, Hosea ikofen ḇe i na ipok fa denefus snon ḇese ḇa. Ro swaf ono, Hosea denefus swari ḇa. (Hosea 3:3, fasfas kasun ro sop) Mboi ḇarpur ya, na Hosea denefus swari wer. Ine ḇyeḇair Allah imarisen faro er Israel fafisu skaḇer ma ḇyeoser wer kuker si. (Hosea 1:11; 3:3-5) Rosai kofarkor ro farfyar ine ḇekur farḇakḇuk ḇero ḇaboine na? Rofyor swa ḇesasar ḇa denefus sumin ḇefrur sasar  anya wer ido, ine fyasnai ḇyuk maf ḇe i kwar. (1 Korintus 7:3, 5) Rarirya ido, nya knam oḇa fa fyaspar i. Ramnai, imbeswa mambeswa su fandun fa susewar ma sufnoḇekyae su insama sumam farḇakḇuk ya raris moḇ Allah myam na rai.

14. Raris wos ḇero 1 Korintus 7:10, 11, imbude rosai na ḇekur farḇakḇuk ya?

¹⁴ Snonkaku Kristen syakam fandun fa sesyowi farḇakḇuk ya raris Yahwe ma Yesus su. Mboi, fyorno ido sino sifrur rarirya ḇa kukro kokam konapes ḇa kaker. (Roma 7:18-23) Inja, na kopok kokandor ḇa snar snonkaku Kristen ḇero abad randak siwara sino sisya sakna samswen ḇemarḇak ro farḇakḇuk sena. Paulus fyasḇair ”bin ḇefakawin kwar oso ibur awer swari”. Ḇape, fyorno ido roi ḇeradine naisya ndarirya kaker.​—Wasya 1 Korintus 7:10, 11.

15, 16. (a) Rosai fandun fa imbeswa sukara na fafisu susmai samswen ro farḇakḇuk suḇena, ma rosai ḇefnai ya? (b) Rariso snonkaku Kristen ḇena swa ḇefarmyan faro Yahwe I ḇa ifrur roi ine?

¹⁵ Paulus fyasnaiḇair ḇa roi risai na ḇewar fa imbeswa suburyae su. Mboi kofawi ima snar sumin ya ifrur farḇuk famfnom ḇa. Rarirya ido, nari sumin ḇefrur sasar ḇa nya nyan ḇekaku fa fyaspar swari ma fyarḇuk wer. Paulus fyas, binswa ḇebur swari fandun fa ”ipok ḇyeswa werḇa faswef, roḇa kyaḇer faro swari.” Inja, Allah myam su ḇeḇe imbeswa mambeswa kaker. Paulus doḇe samswen risai ḇekur su, mboi oso ifrur farḇuk famfnom ḇa ido, sukara fa suḇeoser kaḇer, isoine susewar nyan fa susae ro samswen anna ma sukain kayam pdef. Na suyor fafnoḇek ro penatua sya. Penatua sipok siwaira ḇe oso ḇa, mboi na sḇuk ananun ḇepyum ro Refo na.

¹⁶ Mboi, snonkaku Kristen ḇena swa ḇefarmyan faro Yahwe I ḇa ido na moḇsa ḇyerai? Suna samswen ro farḇakḇuk suḇena ido na suburyae su ke? Raris Refo dap kwar na, ikofenḇair knam ḇekaku faro imbeswa fa suḇesisye iso fyor oso ifrur farḇuk famfnom. Imbape, Refo ikofen fasnai ḇa roi ḇefnai fa imbeswa na suburyae su. Paulus fyas, ”Rofyor bin Kristen oso fyakawin kuker snon ḇekyar faro Kristus ḇa, ma snon ani imarisen ikenem fnoḇek bin ani, inja bin ani fyaspar aweri.” (1 Korintus 7:12, 13) Ine imnis kaker faro imbeswa ḇero baboine sya kako.

17, 18. Rosai ḇefnai fa snonkaku Kristen ono skinfir fa skain pdef kuker siswasi fafisu sismai samswen ḇemarḇak kaku?

 ¹⁷ Imbape, fafisu ono ”snon ḇekyarḇa” oso fyasnai ima ”imarisen ikenem fnoḇek” swari ḇa. Raris, irarmomen ḇo myunbos i rawo nafnai fa iduf ḇaido nun ḇe marmar. Imbude imewer fyamfon swari ma kina ḇyesi fandun sena ḇaido ifrur samswen i fa fyarmyan ḇe Allah. Ro samswen ḇeradine na, binswa Kristen oso na dun snemuk ro mankundi fa ibur swari. Imbude swari ikofen ḇa mboi isya fyasnai ”imarisen ikenem fnoḇek” i ḇa. Mboi, snonkaku Kristen ḇesesya ḇeyaksmai samswen ḇeradirya, sino sun snemuk fa skain pdef kuker siswasi. Simkuepen ma sisewar kwar fa sifrur farḇakḇuk sena fa namnis. Rosai ḇefnai fa sun snemuk ḇeradine?

¹⁸ Imbeswa ḇeburyae su ro fafisu ḇeradine, suma suḇe imbeswa kaker mboi na susmai samswen raris ḇeyap ḇepon kwar na. Manwawan Paulus ikofen kako roi ḇese wer ḇefrur fa imbeswa sukain kayam pdef. Fyas, ”Snon ḇekyarḇa ani Allah fyasreni snar fakawawin ḇyedi kuker bin Allah nya kwar ani. Rarirya kako bin ḇekyarḇa ani Allah fyasreni kwar snar fakawawin ḇyedi kuker snon Allah nya kwar ani. Rofyor rariryaḇa ido, romawa suḇesi simnis romawa [ḇemamas], ḇape romawa ansi Allah romawa ḇyesirya.” (1 Korintus 7:14) Na sismai fafisu ḇesamswen kaku ro farḇakḇuk sena, mboi snonkaku Kristen sibor sun snemuk fa skain pdef kuker siswasi ḇefarmyan ḇe Yahwe I ḇa sya. Fafisu ono, ḇarpur mura siswasi sakḇe Saksi Yahwe. Snonkaku Kristen ḇemkuepen ansi na simarisen kaku.​—Wasya 1 Korintus 7:16; 1 Petrus 3:1, 2.

19. Rosai ḇefnai fa naek srar ḇebor ḇero sidang ḇefarḇuk kwar sya sismai payamyum ro farḇakḇuk sena?

¹⁹ Yesus ḇyuk ananun ḇekur imbeswa ḇesisye sya, ma manwawan Paulus ḇyuk ananun ḇekur imbeswa ḇeburyae. Anun suḇenane nfasnai Allah imarisen insama manfamyan Ḇyesi sesyowi farḇakḇuk ya. Baboine, ro sidang Kristen ḇero supswan ine ḇesiper, naek srar ḇebor ḇefarḇuk kwar sya sismai payamyum ro farḇakḇuk sena. Snon sya siswar siswasi ma bin sya sesyowi kako siswasi. Sikam sfasnai sesyowi kaku farḇakḇuk sena. Ro sidang Bedi kako na mam imbeswa ḇesmai aski kwar sya. Na komarisen kaku kukro komam imbeswa sibor sfasnai Allah wos Ḇyenane nkaku: ”Snon oso ibur snari ma kmari ma ḇyeoser kuker swari, isof suḇe baken oser.”​—Efesus 5:31, 33.