1, 2. Sipasingat aha do na dapot hita humbani Heber 13:4?

TALUP do Jahowa manjalo hasangapon. Halani ai, ganup hita sihol pasangapkon Ia. Marjanji do homa Ia marsangap do bahenon-Ni ise pe na pasangapkon-Si. (1 Sam. 2:30; Pod. 3:9; Pangk. 4:11) Tapi sihol do homa Jahowa ase hita pasangapkon halak na legan, umpamani pamarentah. (Rom 12:10; 13:7) Sobali ai, dong homa na porlu ipasangap hita, ai ma parhajabuan.

² Apostel Paulus manuratkon, “Sangap ma [parhajabuan] bani haganup halak, ulang butak podoman.” (Heb. 13:4) Jadi, ijon iparentahkon si Paulus do halak Kristen ase mambahen sangap parhajabuanni. Anggo nasiam domma marhajabuan, ai sonai do ibahen nasiam?

3. Sipasingat na ponting aha do na ibere Jesus pasal parhajabuan? (Tonggor ma gambar bani alm. 9.)

³ Anggo sangap do ibahen nasiam parhajabuanmu, gabe siusihan na madear ma nasiam. Sonai do homa pangahap ni Jesus pasal parhajabuan. Sanggah halak Parisei manungkun hu bani pasal parhajabuan, ihatahon Jesus ma, ‘Halani ai tadingkonon ni dalahi do bapani ampa inangni,  ase gabe sada daging sidea na dua ai.’ Sonai do na ihatahon Naibata humbani mungkahni dong parhajabuan. Dob ai, nini Jesus use, “Na dob pinadomu ni Naibata, seng bulih sirangon ni jolma.”​—Basa Markus 10:2-12; 1 Mus. 2:24.

4. Aha do na iharosuhkon Naibata pasal parhajabuan?

⁴ Setuju do Jesus bani aha na ihatahon Naibata pasal parhajabuan. Humbani mungkahni lang adong ihatahon Naibata bani si Adam pakon si Hawa anggo sidea boi marsirang. Tapi sihol do Naibata ase “na dua ai” totap martahan parhajabuanni ronsi sadokah ni dokahni.

5. Halani matei manisia, aha ma pengaruhni ai bani parhajabuan?

⁵ Songon na ibotoh hita, bahat do na mubah dobkonsi mardousa si Adam. Umpamani, halani hamatean gabe sirang ma parhajabuan ni sidea. Apostel Paulus patorangkon sasahalak boi do marhajabuan use anggo domma matei pasanganni.​—Rom 7:1-3.

6. Prinsip aha do na dapot hita humbani Titah ni si Musa pasal parhajabuan?

⁶ Sapari, sanggah lape ibere Naibata Titah bani halak Israel, domma somal halak mambuat parinangon lobih humbani sada. Halani ai ibere Naibata ma Titah na mangatur parhajabuan ni sidea. Tujuanni ase manlinggomi hak ni parinangon ampa niombahni. Umpamani anggo dong sada dalahi na mambuat jabolon gabe parinangonni, tapi dobkonsi ai marhajabuan use pakon naboru na legan, maningon totap do isarihon ia istrini na parlobei ai. (2 Mus. 21:9, 10) Sonari hita lang be mangihutkon Titah ni si Musa. Hassi pe sonai prinsip na dong ijai mangajarhon hubanta arga do bani  Naibata parhajabuan. Gabe iurupi ma hita ase mambahen sangap parhajabuan.

7, 8. (a) Domu bani 5 Musa 24:1, aha do Titah ni Naibata pasal parsirangan? (b) Sonaha do pangahap ni Jahowa mangidah parsirangan?

⁷ Aha do Titah ni Naibata pasal parsirangan? Sasintongni lang marosuh Naibata mangidah parsirangan. Tapi bani Titah ihatahon do sahalak Israel boi mansirangkon istrini anggo “jumpahsi bani sada tikas”. (Basa 5 Musa 24:1.) Age pe bani Titah lang ipatorang “tikas” aha do ai, tontu parlahou na so patut atap na pailahon do ai. (5 Mus. 23:14) Parahni, bahat do ididah Jesus halak Jahudi na mansirangkon istrini ‘atap halani aha pe’. (Mat. 19:3) Tontu lang ra hita sonai.

⁸ Bani panorang ni nabi Maleaki, somal do sada dalahi mansirangkon istrini na parlobei, ase boi marhajabuan use pakon naboru na posonan na lang manombah Jahowa. Tapi tangkas do ipatuduh Jahowa sonaha pangahap-Ni mangidah ai. Ia mangkatahon, “Huhagigihon do parsirang-sirangon.” (Mal. 2:14-16) Humbani mungkahni ihatahon Jahowa do ase sada dalahi “mangkasomani parinangonni, gabe sada daging ma sidea”. Ronsi sonari sonai do homa pangahap ni Jahowa. (1 Mus. 2:24) Anjaha Jesus pe sonai do homa pangahapni. Nini do, “Na dob pinadomu ni Naibata, seng bulih sirangon ni jolma.”​—Mat. 19:6.

9. Aha do artini na ihatahon Jesus bani Markus 10:11, 12?

⁹ Ai dong do alasan ni halak Kristen boi marsirang janah marhajabuan use? Jesus mangkatahon, “Na paulakkon parinangonni, dob ai ibuat na legan, parbangkis do ia ijai. Naboru ai pe, anggo isirangkon dirini humbani paramangonni, anjaha laho bani halak na legan, parbangkis do.” (Mrk. 10:11, 12; Luk. 16:18) Hunjai torang ma ibotoh hita arga do parhajabuan bani Jesus. Janah ia pe sihol ase hita sonai. Jadi anggo dong sada dalahi na mansirangkon istrini na setia janah marhajabuan use ia pakon na legan, na marbangkis do dalahi ai. Sonai homa bani sada naboru na mansirangkon suamini na setia. Mase boi sonai? Halani lang sah parsirangan ni sidea ai. “Sada daging” ope sidea i lobei ni Naibata. Dob ai ihatahon Jesus homa naboru na isirangkon suamini ai, boi do ujungni gabe marbangkis. Ra do ase dong na mansarihon ia, marhajabuan ma use naboru ai. Jadi naboru ai pe ihatahon domma marbangkis.

10. Halani aha do ase halak Kristen boi marsirang janah marhajabuan use?

¹⁰ Jesus mangkatahon pitah sada dassa alasan ni halak Kristen boi marsirang. Nini do, “Barang ise na mansirangkon parinangonni, anggo seng  halani parbangkison, gabe ibuat na legan, parbangkis do ia ai.” (Mat. 19:9) Sonai do homa na ihatahon ia sanggah marambilan i dolog. (Mat. 5:31, 32) Dos do “parbangkison” ai pakon mangkorjahon parriah-riahon. Leganni ai, na tarmasuk parriah-riahon ai ma homo atap lesbian, marboru jalang, ampa berhubungan seks pakon binatang. Porini dong dalahi na mangkorjahon sisonai, istrini boi do mamutuskon laho marsirang atap lang. Anggo marsirang pe, sah do ai i lobei ni Naibata.

11. Mase dong halak na lang ra marsirang hassi pe pasanganni domma mangkorjahon parriah-riahon?

¹¹ Dingat ma lang adong ihatahon Jesus anggo pasanganni mangkorjahon parriah-riahon, pasangan na lang marsalah maningon mangindo sirang. Umpamani, dong sada naboru lang ra marsirang pakon suamini, hassi pe domma ihorjahon suamini parriah-riahon. Mase? Ra do halani holong ope uhurni bani suamini, janah ra manalpuhon salahni ai. Dob ai ia sihol patoguhkon parhajabuanni. Porini marsirang sidea, tong do adong parsoalan. Umpamani, sonaha ma holi ia boi mansarihon dirini atap anggo sihol ia berhubungan seks? Ai gabe lungunan do holi ia? Sonaha ma holi pangahap ni niombahni? Anjaha sonaha holi ia pagodangkon ampa mangajari sidea ase totap manombah Jahowa? (1 Kor. 7:14) Jadi tangkas ma tong do adong parsoalan hassi pe ipilih ia marsirang.

12, 13. (a) Aha do na masa bani parhajabuan ni si Hosea? (b) Mase si Hosea ra mardear use pakon si Gomer, janah aha parlajaranni hubanta?

¹² Humbani parhajabuan ni nabi Hosea, bahat do na laho iajarhon Naibata pasal parhajabuan. Isuruh Naibata do si Hosea mambuat si Gomer gabe istrini. Holi gabe “boru jalang” ma ia janah adong ma anakni hunjai. (Hos. 1:2, 3) Marhajabuan ma si Hosea pakon si Gomer, janah dong ma sada anak ni sidea. Dob piga-piga dokah tambah ma sada boru ampa anak ni si Gomer. Ra do ai humbani dalahi na legan. Hassi pe domma marulak-ulak ia marbangkis, tapi lang isirangkon si Hosea ia. Ujungni itadingkon naboru ai ma si Hosea janah gabe jabolon ma ia. Tapi ialop si Hosea ma use ia. (Hos. 3:1, 2) Jadi igunahon Jahowa do si Hosea laho patuduhkon marulak-ulak do isasap Jahowa hasalahan ni bangsa Israel na lang setia janah manombah gana-gana. Parlajaran aha ma na dapot hita humbani parhajabuan ni si Hosea?

¹³ Anggo dong pasangan na marbangkis, na lang marsalah boi mamutuskon laho marsirang atap mardear use. Nini Jesus porini pe sidea marsirang janah marhajabuan use, sah do ai. Tapi porini mardear use, lang homa salah. Songon si Hosea mardear do use ia pakon si Gomer. Sanggah ialop si Hosea use si Gomer, ihatahon ia ma bani istrini ase ulang be marbangkis. Anjaha ia pe ‘lang modom pakon si Gomer’. (Hos. 3:3, Terjemahan Dunia Baru) Tapi lang torus sonai halani ujungni rap modom  do use sidea. On patuduhkon sonai do homa na ibahen Jahowa bani halak Israel. Ujungni boi ma sidea marhasoman use pakon-Si. (Hos. 1:11; 3:3-5) Aha ma parlajaranni hubanta sonari on? Anggo na lang marsalah ai ra berhubungan seks pakon pasanganni na marbangkis, dos do artini ai anggo ia domma manalpuhon hasalahanni. (1 Kor. 7:3, 5) Jadi lang dong be alasanni laho marsirang. Halani ai maningon marsiurupan ma sidea laho patoguhkon parhajabuanni.

14. Domu bani 1 Korint 7:10, 11, aha do na masa ibagas parhajabuan?

¹⁴ Arga do parhajabuan ai bani Jahowa pakon Jesus. Halani ai ganup halak Kristen pe maningon sonai do. Tapi sipata lang urah mangkorjahon ai halani hita lang gokan dear. (Rom 7:18-23) Ai do na masa bani halak Kristen abad na parlobei. Dong parsoalan ibagas rumah tangga ni sidea. Halani ai isurat si Paulus ma “seng bulih sirang naboru ai humbani paramangonni”. Hape sipata ai do na tarjadi.​—Basa 1 Korint 7:10, 11.

15, 16. (a) Aha do na maningon ibahen anggo dong parsoalan ibagas rumah tangga, janah mase? (b) Sonaha do prinsip ai marlaku homa bani halak na pasanganni lang sisombah Jahowa?

¹⁵ Lang dong ipatorang si Paulus situasi aha do na mambahen sidea marsirang. Tontu lang halani parriah-riahon ai. Anggo halani ai do, sah do sidea marsirang janah boi marhajabuan use. Jadi, sirang bani ayat ai maksudni padaoh-daoh do sidea. Halani, ihatahon si Paulus use anggo istri na sirang [atap padaoh-daoh] humbani paramangonni “ulang be laho, atap mardomu ma use bani paramangonni”. Mase sonai? Halani i lobei ni Naibata marhajabuan ope sidea. Jadi, maksud ni si Paulus ijon atap aha pe parsoalan ibagas parhajabuan, marusaha ma sidea pasaloseihon ai anjaha totap marsada. Boi do homa ipindo sidea pangurupion ni sintua. Holi iurupi sintua ma sidea mangindahi podah hun Bibel laho pasaloseihon parsoalanni.

¹⁶ Sonaha anggo pasanganni lang sisombah Jahowa? Porini dong parsoalan ibagas rumah tangga, ai boi do sidea padaoh-daoh? Songon na dob iulas hita, pitah halani parriah-riahon do boi marsirang. Tapi lang dong  ipatugah bani Bibel aha do alasanni boi padaoh-daoh. Si Paulus manuratkon, ‘Anggo adong sada naboru na marparamangon na so porsaya, anggo marosuh do dalahi ai rap pakonsi, ulang ma itadingkon ia.’ (1 Kor. 7:12, 13) Marlaku do homa aturan ai ronsi sonari.

17, 18. Hassi pe bahat parsoalan, mase dong na mamutuskon totap tading pakon pasanganni?

¹⁷ Tapi sipata dong do piga-piga alasan na patuduhkon anggo ‘paramangon na so porsaya seng marosuh rap pakon parinangonni’. Umpamani, gati ia mambogbogi atap mangarsik-arsik istrini. Ra do lang isarihon ia kaluargani anjaha ilanglangi istrini mangidangi Jahowa. Atap ihatahon ia bani istrini lang ra be ia tading rap pakonsi. Ra do halani situasi sisonai, iahap istrini ma dearan do anggo sidea padaoh-daoh. Tapi dong do homa botounta na mamutuskon totap tading pakon suamini. Sabar janah marusaha do ia mampartahankon parhajabuanni. Mase iputuskon ia sonai?

¹⁸ Songon na dob iulas hita, porini pe padaoh-padaoh sidea halani situasi sisonai, tong do adong parsoalan. Anjaha i lobei ni Naibata marhajabuan ope sidea. Sobali ai, dong ope alasan na legan na ipatugah si Paulus ase sidea totap marsada. Ia mangkatahon, “Pansing do dalahi na so porsaya ai marhitei parinangon ai, anjaha gabe pansing do naboru na so porsaya ai marhitei sanina ai. Ambit lang, butak ma niombah nasiam, tapi tongon pansing do sidea.” (1 Kor. 7:14) Hassi pe bahat parsoalan, bahat do halak Kristen na mamutuskon totap tading pakon pasanganni na lang sisombah Jahowa. Anjaha malas tumang ma uhur ni sidea halani ujungni gabe Saksi Jahowa do pasanganni ai.​—Basa 1 Korint 7:16; 1 Ptr. 3:1, 2.

19. Mase parhajabuan ni halak Kristen boi martuah?

¹⁹ Songon na dob iulas hita ibere Jesus do sipasingat pasal na marsirang. Anjaha apostel Paulus pe mambere podah pasal na padaoh-daoh. Ganupan ai ibere ase juakjuak ni Naibata mambahen sangap parhajabuanni. I sab dunia on bahat do sanina botou na martuah parhajabuanni. Boi do ai ididah hita ibagas kuria. Umpamani, suami mangkaholongi istrini, janah istri pe hormat bani suamini. Ganupan ai patuduhkon sangap do ibahen sidea parhajabuanni. Malas do uhurta halani idalankon sidea do aha na ihatahon ibagas Bibel, “Halani ai tadingkonon ni halak do bapani ampa inangni, laho mangkasomani parinangonni, anjaha gabe sada daging do sidea na dua ai.”​—Ep. 5:31, 33.