1, 2. Heber 13:4 ngiahken kita ngelakoken kai?

KERINA kita siergai ateta Jahwe. Ia me si metunggungna sihamati ras siergai, janah erjanji Ia maka kita pe iergaiNa. (1 Samuel 2:30; Kuan-kuanen 3:9; Ketangkasen 4:11) AteNa pe siergai ka min kalak si deban, misalna pejabat pemerentah. (Roma 12:10; 13:7) Tapi lit ka si khususna perlu siergai, eme kap perjabun.

² Ikataken rasul Paulus, “Kerina kalak arus ngergai perjabun janah la banci iban jadi najis.” (Heber 13:4) I jenda Paulus labo sekedar mbahas perjabun. Ikatakenna man kalak Kristen maka arus ihamati kalak e perjabun, maksudna arus iergaina. Bage ka nge pengakapndu kerna perjabun, khususna perjabunndu sendiri adi kam nggo erjabu?

3. Pedah kai si ibereken Jesus kerna perjabun? (Nen gambar pemena artikel.)

³ Adi meherga akapndu perjabun, situhuna iusihndu contoh si mehuli. Jesus pe meherga akapna perjabun.  Sanga isungkun kalak Parisi ia kerna kalak si cerai, iulihi Jesus kata-kata Dibata kerna perjabun si pertama iban Dibata, nina, “Erkiteken si enda me sekalak dilaki nadingken bapakna ras mamakna, janah duana jadi sada daging.” Nina Jesus ka, “Kai si nggo ipersadaken Dibata, la banci isirangken manusia.”​—Baca Markus 10:2-12; Kejadin 2:24.

4. Kai nge tujun Jahwe kerna perjabun?

⁴ Iakui Jesus maka Dibata me si erban perjabun janah iakuina ka maka perjabun e arus tahan rasa lalap. Sanga iban Dibata perjabun si pertama, la lit ikatakenNa man Adam ras Hawa maka kalak e banci cerai. Tapi, tujun Dibata eme gelah “duana” tetap ersada bas perjabun seh rasa lalap.

5. Kai pengaruh kematen nandangi perjabun?

⁵ Sanga Adam erdosa, melala kel si berubah. Salah sadana mulai me manusia mate, janah enda mpengaruhi perjabun. Ijelasken rasul Paulus man kalak Kristen maka kematen banci nirangken kalak si erjabu, janah si nggeluh denga bebas erjabu mulihi.​—Roma 7:1-3.

6. Kai si iajarken Undang-Undang Musa kerna perukuren Dibata nandangi perjabun?

⁶ Bas Undang-Undang si ibereken Dibata man bangsa Israel lit keterangen kerna perjabun. Contohna, sekalak dilaki banci lebih sada ndeharana. Kebiasan e nggo lit sope lenga pe ibereken Dibata Undang-Undang. Tapi, Undang-Undang e ngelindungi diberu ras anak-anak gelah ula isiksa. Contohna, adi iempoi sekalak dilaki sekalak budak kenca e empoina ka si deban, arus terus iberekenna keperlun ndeharana si pertama e bagi si nggo ilakokenna sedekah enda. Ipindo Dibata gelah terus ilindungina ras iperdiatekenna ndeharana e. (Keluaren 21:9, 10) Gundari lanai sidalanken Undang-Undang Musa. Tapi, iajarkenna maka meherga kel perjabun e iakap Dibata. Emaka, kita pe arus siergai perjabun.

7, 8. (a) Kai nina Undang-Undang Musa kerna kalak si cerai menurut Ulangen 24:1? (b) Uga perukuren Jahwe kerna kalak si cerai?

 ⁷ Kai si ikataken Undang-Undang Musa kerna kalak si cerai? Amin gia la ate Jahwe perbulangen ras ndehara cerai, tapi menurut Undang-Undang banci iceraiken sekalak perbulangen ndeharana adi “ndeharana e ngelakoken lagu langkah si man kemelanken.” (Baca Ulangen 24:1.) La ijelasken Undang-Undang kerna kai saja “lagu langkah si man kemelanken” e. Tapi, pasti perbahanen e tuhu-tuhu man kemelanken ntah pe serius kel janah labo kesalahen si biasa saja. (Ulangen 23:14) Si parahna, bas jaman Jesus, melala kalak Jahudi nceraiken ndeharana “alu alasen kai pe.” (Matius 19:3) Pasti la ateta seri bagi kalak e.

⁸ Bas jaman nabi Maleaki, nggo biasa sekalak perbulangen nceraiken ndeharana si pertama, mungkin gelah banci empoina diberu si terngudan si la ngelayani Jahwe. Tapi jelas kel perukuren Dibata kerna kalak si cerai. Nina, “Nembeh ateKu kalak simulihen.” (Maleaki 2:14-16) La pernah berubah perukuren Dibata kerna perjabun, mulai kin mbarenda nari sanga ikatakenNa sekalak dilaki ‘ersada ras ndeharana, maka duana enggo jadi sada.’ (Kejadin 2:24) Perukuren Jesus pe seri bagi perukuren Bapakna kerna perjabun sanga ikatakenna, “Kai si nggo ipersada Dibata, la banci isirangken manusia.”​—Matius 19:6.

9. Kai maksud kata-kata Jesus bas Markus 10:11, 12?

⁹ Banci saja lit si nungkun, ‘Lit nge alasen kalak Kristen cerai janah erjabu mulihi?’ Perdiateken kai si ikataken Jesus, “Ise pe si nceraiken ndeharana, janah erjabu ia ras kalak si deban, ia nggo erlua-lua nandangi ndeharana, janah adi lit sekalak diberu si nceraiken perbulangenna, kenca si e erjabu ia ras kalak si deban, diberu e nggo erlua-lua.” (Markus 10:11, 12; Lukas 16:18) Jelas me, meherga kel iakap Jesus perjabun, janah atena kita pe bage. Adi iceraiken sekalak perbulangen ndeharana si setia janah erjabu ka ia ras si deban, ia nggo erlua-lua. Bage ka pe adi iceraiken sekalak ndehara perbulangenna si setia. Engkai? Perban amin pe kalak e nggo cerai, menurut Dibata tetap denga kalak e “sada daging.” Emaka cerai pe kalak e labo nirangken perjabunna. Ikataken Jesus ka adi iceraiken sekalak perbulangen ndeharana si la ersalah, ndeharana e pe banci saja dungna ikut erlua-lua. Engkai maka banci bage? Banci saja iakap ndehara si iceraiken ndai arus ka ia erjabu gelah lit si mereken keperlun geluhna. Perjabun si bage seri ras erlua-lua.

10. Kai nge alasenna kalak Kristen banci cerai janah erjabu ka ras kalak si deban?

¹⁰ Iajarken Jesus sada ngenca alasen banci cerai, “Kukataken man kena maka ise pe si nceraiken ndeharana, adi labo erkiteken perbahanen seks  si salah, janah erjabu ia ras kalak si deban, ia nggo erlua-lua.” (Matius 19:9) Ijelaskenna ka e bas Khotbah i Deleng. (Matius 5:31, 32) Dua kali ikataken Jesus kerna “perbahanen seks si salah.” Perbahanen seks si salah e termasuk dosa bagi erlua-lua, pelacuren, kalak si erhubungen seks tapi lenga erjabu, kalak si homo, bage pe hubungen seks ras binatang. Adi ilakoken sekalak perbulangen perbahanen seks si salah, banci ipilih ndeharana nceraiken ia ntah lang. Adi iceraikenna ia, lanai ianggap Dibata kalak e sada daging.

11. Engkai maka lit kalak Kristen si la atena cerai amin pe teman geluhna nggo ngelakoken perbahanen seks si salah?

¹¹ Labo lit ikataken Jesus maka kalak si nggo erjabu si ngelakoken perbahanen seks si salah arus iceraiken teman geluhna ia. Contohna, sekalak ndehara banci saja la atena cerai aminna pe nggo ilakoken perbulangenna perbahanen seks si salah. Engkai? Banci saja keleng denga atena ia, imaapkenna atena, janah ras-ras atena mpehuli perjabunna. Selain si e, adi cerai ia janah lanai erjabu, banci saja tambah masalahna. Misalna, uga kari masalah keuangenna bage pe kebutuhen seksna? Uga kari adi melungen kapna? Kai pengaruhna man anak-anakna? La lah reh serana kari mpebelin kalak e bas kebenaren? (1 Korinti 7:14) Jelas me, melala masalah si banci saja iadapi teman geluh si la ersalah si atena cerai.

12, 13. (a) Kai si terjadi bas perjabun Hosea? (b) Engkai maka ibuat Hosea ka mulihi Gomer, janah kai si banci sipelajari arah perjabun Hosea?

¹² Pengalamen nabi Hosea pe ngajarken man banta uga perukuren Dibata kerna perjabun. Isuruh Dibata Hosea ngempoi sekalak diberu si gelarna Gomer, si dungna jadi “diberu perlua-lua” janah lit kari “anakna arah dahinna erlua-lua.” Lit sada anak Gomer ras Hosea. (Hosea 1:2, 3, Terjemahan Dunia Baru [NW]) Lit ka anak Gomer diberu bage pe dilaki, banci saja arah dilaki si deban. Amin gia labo sekali ngenca Gomer erlua-lua, la iceraiken Hosea ia. Kenca si e, itadingken Gomer me Hosea janah jadi budak ia. Tapi, itukur Hosea ka ia mulihken. (Hosea 3:1, 2) Igunaken Jahwe Hosea gelah siteh uga Jahwe mulih-ulih ngampuni bangsa Israel aminna pe kalak e la setia janah nembah dibata-dibata si deban. Kai si banci sipelajari arah perjabun Hosea?

¹³ Adi sekalak Kristen si nggo erjabu ngelakoken perbahanen seks si salah, arus iban teman geluhna keputusen. Nina Jesus lit hak si sah man teman geluh si la ersalah guna cerai janah bebas ka ia erjabu mulihi. Tapi, labo salah adi imaapkenna teman geluhna e. Ibuat Hosea ka Gomer mulihi. Kenca mulihken ia ku Hosea, ikataken Hosea man bana gelah ulanai ia erhubungen seks ras dilaki si deban. Hosea pe “la erhubungen seks” ras Gomer piga-piga waktu dekahna. (Hosea 3:3, NW) Tapi dungna, arus ka Hosea erhubungen seks mulihi ras ndeharana e. Enda nggambarken Dibata si nggit ngaloken Israel mulihi guna tetap jadi umatNa. (Hosea 1:11; 3:3-5) Kai pelajarenna man banta kerna perjabun? Adi teman geluh si la ersalah nggo mulihi ngelakoken hubungen seks ras  teman geluhna si ersalah, e ertina nggo imaapkenna teman geluhna e. (1 Korinti 7:3, 5) Emaka lanai lit alasen si sah guna cerai. Kenca si e, perbulangen ras ndehara arus ras-ras mpehuli perjabunna, janah sisampat-sampaten gelah carana rukur kerna perjabun seri bagi cara rukur Dibata.

14. Menurut 1 Korinti 7:10, 11, kai si banci terjadi bas perjabun?

¹⁴ Kerina kalak Kristen arus meherga iakapna perjabun bali bagi pengakap Jahwe ras Jesus. Tapi, mon-mon lit si la ngergai perjabun, perban kita kerina la sempurna. (Roma 7:18-23) Emaka labo ateta mamang adi piga-piga kalak Kristen bas abad pertama pe mberat masalah perjabunna. Itulis Paulus maka “sekalak ndehara ula ranggung ras perbulangenna.” Tapi mon-mon banci kang e terjadi.​—Baca 1 Korinti 7:10, 11.

15, 16. (a) Kai si arus iusahaken perbulangen ras ndehara adi lit masalah bas perjabunna, janah ngkai? (b) Banci nge ranggung kalak Kristen si teman geluhna la ngelayani Jahwe?

¹⁵ La ijelasken Paulus kai saja si erbanca perbulangen ras ndehara banci ranggung ntah pe sirang. Tapi siteh enda labo perban salah sada ngelakoken perbahanen seks si salah. Contohna, adi sekalak perbulangen ngelakoken perbahanen seks si salah banci iceraiken ndeharana ia janah ndeharana banci erjabu ka mulihi. Ikataken Paulus maka adi sekalak ndehara ranggung ras perbulangenna “la banci ia erjabu. Pala, ersada ia mulihken ras perbulangenna.” Emaka menurut Dibata kalak e sada daging denga. Nina Paulus kai pe masalah bas perjabun, adi labo lit si ngelakoken perbahanen seks si salah, arus iusahaken kalak e gelah erdame. Maksudna arus idungi kalak e masalahna janah ula sirang. Banci ipindo kalak e penampat pertua. Labo ibela pertua e salah sada, tapi inasehatina arah Pustaka.

¹⁶ Tapi, uga adi teman geluh sekalak Kristen la ngelayani Jahwe? Banci kin kalak e ranggung adi lit masalah bas perjabunna? Bagi si nggo sibahas ndai, nina Pustaka perbahanen seks si salah ngenca alasen si sah guna cerai. Tapi la lit ikataken Pustaka alasen banci ranggung. Ikataken Paulus, “Adi lit sekalak ndehara si perbulangenna la sada kiniteken ras ia, janah perbulangenna e nggit tetap tading ras ia, la banci itadingkenna perbulangenna e.”  (1 Korinti 7:12, 13) Gundari pe arus bage.

17, 18. Engkai maka piga-piga kalak Kristen tetap tading ras teman geluhna aminna pe mesera kel keadanna?

¹⁷ Tapi, lit piga-piga keadan si “perbulangenna la sada kiniteken” ras ndeharana janah la ia “nggit tetap tading” ras ndeharana e. Misalna, kasar kel perbahanenna, dungna terancam kesehaten ntah pe kegeluhen ndeharana. La iberena keperlun anak ras ndeharana, ntah pe iusahakenna gelah lanai ndeharana e ngelayani Dibata. Adi bage perbahanen sekalak perbulangen, banci iputusken ndeharana ranggung ras ia. Sebap la soal kai pe si ikataken perbulangenna e, nggo teridah maka la ia “nggit tetap tading” ras ndeharana. Tapi lit kalak Kristen si deban si ngadapi situasi si bage iputuskenna tetap tading ras teman geluhna. Megenggeng kalak e janah iusahakenna kel mpehuli perjabunna. Engkai maka bage keputusenna?

¹⁸ Amin gia kalak e ranggung, tetap denga nge ia sada daging janah dungna arus ngadapi masalah si nggo sibahas ndai. Ikataken rasul Paulus ka alasen si deban gelah perbulangen ras ndehara tetap ersada. Nina, “Perbulangen si la sada kiniteken nggo badia erkiteken ndeharana e, janah ndehara si la sada kiniteken nggo badia erkiteken perbulangenna e. Adi lang, anak-anak kena jadi najis. Tapi gundari kalak e nggo badia.” (1 Korinti 7:14) Enterem kalak Kristen si tetap tading ras teman geluhna si la ngelayani Jahwe aminna pe mesera kel keadanna. Amin pe nggo melala pengorbanenna, meriah ukur kalak e sanga teman geluhna dungna jadi Saksi Jahwe.​—Baca 1 Korinti 7:16; 1 Petrus 3:1, 2.

19. Engkai maka bas runggun melala perjabun si berhasil?

¹⁹ Ibereken Jesus pedah kerna kalak si cerai, janah ibereken rasul Paulus pedah kerna kalak si ranggung. Ate kalak e duana iergai kerina umat Jahwe min perjabun. Bas kerina runggun i belang-belang doni, nterem si nggo berhasil perjabunna. Bas runggunndu banci saja lit idahndu nterem kalak si nggo erjabu si ermeriah ukur. Idahndu i je perbulangen si setia ngkelengi ndeharana, bage pe ndehara si ngergai perbulangenna. Ibuktiken kalak enda kerina maka meherga kel kapna perjabun. Janah kita pe meriah ukurta sanga siidah nterem perbulangen ras ndehara mbuktiken maka payo kel kata-kata Dibata enda, “Eme sebapna sekalak dilaki nadingken bapakna ras mamakna, jenari ersada ia ras ndeharana, janah duana ia jadi sada daging.”​—Epesus 5:31, 33.