1, 2. Sowtu taanga-sikin Hebrewsama 13:4 e gi u?

Ala u wani gi Yehofa gaandi. A fiti fu u gi en gaandi. A paamisi u taki a o gi u gaandi tu (1 Samuweli 2:30; Odo 3:9; Openbaring 4:11). Yehofa wani u lesipeki taa sama tu. A wani u lesipeki lanti (Romesama 12:10; 13:7). Boiti den sani ya, Yehofa wani man anga uman soi lesipeki gi denseefi.

² Apostel Pawlesi sikiifi taki: „Ala u mu lesipeki a toowlibi. Wi á mu tyobo a toowlibi fu u” (Hebrewsama 13:4). A ná kowownu Pawlesi be taki wan sani fu a toowlibi da a kaba, ma a be soi den Kelesten fa den mu si a toowlibi. A taigi den taki den mu lesipeki a toowlibi. A so yu e si a toowlibi? Efu yu a wan sama di toow, yu e lesipeki a toowlibi fi i?

3. San Yesesi be taki fu a toowlibi? (Luku a fowtow na a bigin.)

³ Efu yu e si a toowlibi enke wan pelensipali sani, da yu e waka a Yesesi baka. Yesesi be e lesipeki a toowlibi.  Di den Faliseiman be akisi wan sani fu a booko di sama e booko toow, a be soi den san Gadu be taki di a toow a fosi man anga uman. A taigi den taki: „Neen ede meke wan man o gwe fika en mma anga en dda. A o tan anga en uman, da den o toon wan sikin.” A be taki tu taki: „Nawan sama mu paati san Gadu tyai kon a makandii.”​—Leisi Malikisi 10:2-12; Genesesi 2:24.

4. San Yehofa be abi a pakisei di a sete a toowlibi?

⁴ Yesesi be soi taki a Gadu sete a toowlibi. A be soi tu taki te tu sama toow anga denseefi den á mu paati. Di Gadu be toow Adan anga Efa, a á be taigi den taki den sa paati. A be wani „den” tan anga denseefi fu teego.

5. San e pasa te wan fu den toowpaa dede?

⁵ U sabi taki a omen sani kengi di Adan sondu. Wan fu den sani ya na a dede di sama bigin dede. A sani ya e meke a toowlibi nai waka enke fa Gadu be sete en. Pawlesi be taigi den Kelesten taki te wan sama dede, da a toow fi en booko. A taa paa di fika sa toow baka.​—Romesama 7:1-3.

6. Fa Gadu e si a toowlibi te u luku a Weiti di a be gi Mosesi?

⁶ A Weiti di Gadu be gi den Islayelisama e taki finifini fu a toowlibi. A Weiti á be e tapu den Islayeliman fu abi moo enke wan uman, bika a so den sama fu a ten de be gwenti. Toku a Weiti be e yeepi uman anga pikin fu sama á libi ogii anga den. Efu wan Islayeliman be toow anga wan saafu, neen a toow anga wan taa uman bakaten, a be mu solugu a fosi uman fi en enke fa a be e solugu en fosi a be libi anga a taa uman. Gadu be wani den tan solugu a fosi uman fu den (Ekisodesi 21:9, 10). U nai holi a Weiti fu  Mosesi aini a ten ya moo. Ma a sani ya e leli u taki Gadu e si a toowlibi enke wan pelensipali sani. A sani ya e yeepi u fu lesipeki a toowlibi.

7, 8. (a) San a Weiti fu Mosesi e taki fu booko toow enke fa a sikiifi a Deitolonomi 24:1? (b) Fa Yehofa e si a booko di man anga uman e booko toow?

⁷ San a Weiti be e taki fu a booko di sama be e booko toow? Winsi fa Yehofa á wani man anga uman booko toow, toku a Weiti be gi den Islayeliman a okasi fu booko toow anga en uman te a uman be du „wan sani di á fiti”. (leisi Deitolonomi 24:1.) A Weiti á taki finifini san a den ’sani di á fiti’. Ma kande a te a uman be du wan sen sani efuso te a tyai enseefi a wan fasi di á fiti (Deitolonomi 23:14). A wan tyali sani taki aini a ten fu Yesesi, den Dyu be e booko toow anga den uman fu „iniiwan pikin sani” (Mateyesi 19:3). Wi á mu waka a den sama ya baka.

⁸ Aini a ten fu polofeiti Maleyaki den man be gwenti towe den fosi uman fu den. Son wan fu den be e du a sani ya fu di den be wani toow anga wan moo yonkuu uman di á be e dini Yehofa. Ma Gadu soi den fa ai si a booko di sama e booko toow. A taigi den taki: „Mi á lobi te sama e booko-toow seefiseefi” (Maleyaki 2:14-16). Di Gadu be toow a fosi man anga uman a be taki ’wan man o tan anga en uman, da den o toon wan sikin’. Na aseefi fasi Gadu e si a toowlibi ete (Genesesi 2:24). Yesesi holibaka gi en Dda di a taki: „Nawan sama mu paati san Gadu tyai kon a wan.”​—Mateyesi 19:6.

9. San a sani di Yesesi taki a Malikisi 10:11, 12 wani taki?

⁹ Kande son sama e akisi denseefi taki ’wan Kelesten sa booko toow, da a toow baka?’ Luku san Yesesi be taki. A taki: „Efu wan man booko toow anga en uman neen a toow anga wan taawan, da a waka a waka gi en uman. Efu wan uman booko toow anga en man neen a toow anga wan taawan, a waka a waka gi en man” (Malikisi 10:11, 12; Lukasi 16:18). A sani ya e soi kiin taki Yesesi e si a toowlibi enke wan gaan sani. A wani u si en so tu. Efu wan uman á du ogii, neen en man fika en go toow anga wan taawan, da a waka a man e waka gi en uman. Na aseefi sani Beibel e taki fu wan uman di gwe fika en man go toow anga wan taa man sondee en man waka gi en. Bika Gadu e si den enke „wan sikin” ete. Yesesi be taki tu taki efu wan man paati anga en uman sosokaali, a sa meke a uman waka gi en. Saide? Son leisi te wan man booko toow anga en uman, a uman e wani toow baka fu di a abi wan sama fanowdu fu solugu en.  Efu wan uman be o du a sani ya, a waka ai waka gi a fosi man fi en.

10. San na a wan kodo sani di sa pasa, da wan Kelesten sa booko toow, da a toow baka?

¹⁰ Yesesi be taki a wan kodo sani namo sa pasa da wan sama sa booko toow, da a toow baka. A taki: „Mi e taigi u taki efu wan man booko toow anga en uman, sondee en uman du ogii neen osu, neen a man toow anga wan taa uman, da a waka a waka gi en uman” (Mateyesi 19:9). A be taki aseefi sani ya di a be e leli sama na a mongo (Mateyesi 5:31, 32). Ala den tu leisi di Yesesi taki a sani ya, a taki a te ’wan uman du ogii neen man osu efuso te wan man waka gi en uman’ fosi den sa booko a toow. Dati wani taki a man efuso a uman didon anga wan taa sama, ai libi wan hulu libi, a man e didon anga taa man efuso a uman e didon anga taa uman, efuso te a man efu a uman didon anga wan meti. Efu wan man waka gi en uman, da na a uman seefi mu luku efu a wani booko a toow. Efu a booko a toow, da Gadu nai si den enke man anga uman moo.

11. Saide son Kelesten nai booko-toow winsi a taawan waka gi en?

¹¹ Holi a pakisei taki, Yesesi á taki efu wan man waka gi en uman efuso wan uman du ogii neen man osu, da a sama di á fowtu mu booko a toow namonamo. Wan uman sa tan anga en man winsi a man waka gi en. Saide? Kande a uman wani gi a man paadon fu di a lobi en ete. Kande a wani meke moiti fu den toowlibi waka bun baka. Efu a booko a toow neen a á fende taa sama fu toow, kande a o abi taa booko-ede. Kande den fii fi en o fooseli en. Boiti dati kande a abi wan sama fanowdu fu solugu en tu. Kande a á wani tan en wawan. A o moo taanga gi en fu solugu den pikin efuso kiya den a waaleiti (1 Korentesama 7:14). Den sani ya e soi kiin taki te a paa di á fowtu booko a toow, a ná o makiliki gi en.

12, 13. (a) Fa a toowlibi fu Hoseya waka? (b) Saide Hoseya be teke Gomer poti a osu baka? San a sani ya e leli u?

¹² A toli fu polofeiti Hoseya e soi fa Gadu e si a toowlibi. Gadu be sende Hoseya fu toow anga wan uman den e kai Gomer. A be taigi en taki a uman ya ’be o waka gi en’. A be o ’meke pikin anga taa man’ tu. Gomer anga Hoseya be meke wan boi (Hoseya 1:2, 3). Bakaten Gomer meke wan boi anga wan meisyo. A gei enke anga wan taa man a meke den. Winsi fa Gomer du ogii a Hoseya osu omen leisi, toku Hoseya á booko a toow. Baka wan pisiten a fika Hoseya neen a toon wan saafu, ma toku Hoseya teke en poti a osu baka (Hoseya 3:1, 2). Yehofa koboloiki a libi fu Hoseya anga Gomer fu soi fa a gi den Islayelisama paadon, winsi fa den fika en omen leisi go dini taa gadu. San a toli fu Hoseya e leli u?

¹³ Efu tu Kelesten toow, neen wan fu den waka gi a taawan, na a sama di á fowtu mu luku san a o du. A sama di á fowtu abi leti fu booko a toow, da a toow baka. Ma a sa gi a taawan paadon tu. Hoseya be gi Gomer  paadon. Di Hoseya tyai Gomer kon a osu baka, a taigi en taki a á mu du ogii neen osu moo. Hoseya á be e ’didon’ anga Gomer wan pisiten (Hoseya 3:3). Ma bakaten a gei enke Hoseya anga Gomer be e libi enke man anga uman baka. A sani ya e soi fa Gadu be gi den Islayelisama paadon. Ai soi tu fa a be gi den a okasi fu toon en mati baka (Hoseya 1:11; 3:3-5). San a sani ya e leli wi aini a ten ya fu a toowlibi? Efu wan sama waka gi en toowpaa, neen a sama di á fowtu siibi anga en, da a gi en paadon (1 Korentesama 7:3, 5). A sama di á fowtu ná abi a leti fu booko a toow moo. Now a den tu sama mu meke moiti fu yeepi denseefi fu si a toowlibi enke fa Gadu e si en.

14. San sa pasa aini wan toowlibi enke fa 1 Korentesama 7:10, 11 taki?

¹⁴ Kelesten mu si a toowlibi enke fa Yehofa anga Yesesi e si en. Ma fu di wi a sondu sama meke son leisi son Kelesten nai lesipeki a toowlibi (Romesama 7:18-23). Neen meke a nai foondoo wi taki son wan fu den fosi Kelesten toowlibi á be e go. Pawlesi be sikiifi taki „wan uman á mu fika en man”. Ma son leisi a sani ya be e pasa.​—Leisi 1 Korentesama 7:10, 11.

15, 16. (a) San man anga uman mu meke moiti fu du te a libi nai go? Saide den mu meke a moiti ya? (b) San wan Kelesten mu du efu en toowpaa nai dini Yehofa?

¹⁵ Pawlesi á taki saide man anga uman be e paati. Ma u sabi taki a ná waka a man be waka gi en uman. Efu a be dati, da a uman be o abi leti fu booko a toow, da a toow baka. Pawlesi be sikiifi taki efu wan uman fika en man „a mu tan sondee man, efuso a mu kon bun anga en man baka”. Gadu e si den tu sama ya enke man anga uman ete. Pawlesi taki winsi san e miti wan man anga en uman aini a toowlibi, den mu meke moiti fu tan anga denseefi, boiti efu wan fu den waka gi a taawan. Den sa suku yeepi a den owluman. Den owluman ná o teke se, ma den o gi den taanga-sikin anga den sani di sikiifi aini Beibel.

¹⁶ Ma efu wan Kelesten toow anga wan sama di nai dini Yehofa noh? Den sa paati te a libi nai go? Enke fa u si kaba, Beibel taki a te wan fu den toowpaa waka gi a taawan fosi da a toow sa booko. Ma Beibel á taki on ten wan  man anga en uman sa paati. Pawlesi sikiifi taki: „Efu wan uman abi wan man di nai dini Gadu, neen a man wani tan anga en, a á mu fika a man” (1 Korentesama 7:12, 13). A sani ya e teli aini a ten ya tu.

17, 18. Saide son Kelesten á gwe fika den toowpaa winsi fa a libi á be e go?

¹⁷ Ma son man ’di nai dini Yehofa’ soi taki den ’á wani’ a uman fu den moo. Kande ai fon a uman te da a uman e feele gi en libi. Kande a nai solugu a uman anga den pikin, efuso kande ai tapu en fu dini Yehofa. Te den sowtu sani ya pasa, winsi san a man taki, na a uman mu luku efu a si enke a man wani en ete. Efu a wani a sa gwe fika a man. Ma son Kelesten tan anga den toowpaa. Den holidoo. Den meke moiti fu den toowlibi waka moo bun tu. Saide den du a sani ya?

¹⁸ Efu wan man anga en uman paati fu den sani ya ede, a toow á booko. Tesi o miti den tu enke fa u be taki a fesi. Pawlesi be taki ete wan sani di e soi saide sama di toow á mu gwe fika denseefi. A taki: „A man di nai dini Gadu kon santa fu di en uman e dini Gadu. A uman di nai dini Gadu kon santa fu di en man e dini Gadu, efu a á be de so den pikin fu wi á be o kiin” (1 Korentesama 7:14). Winsi fa a libi á be e go toku son Kelesten tan anga den uman efuso den man di á be e dini Yehofa. Den be e poolo di den holidoo, bika bakaten a paa fu den toon Yehofa Kotoigi.​—Leisi 1 Korentesama 7:16; 1 Peitilisi 3:1, 2.

19. Saide a toowlibi fu gaanse Kelesten e waka bun?

¹⁹ Yesesi be soi on ten wan sama sa booko toow. Pawlesi be taki on ten wan sama sa gwe fika en toowpaa sondee fu booko a toow. Yesesi anga Pawlesi be wani sama di e dini Gadu lesipeki a toowlibi. A omen Kelesten toowlibi e waka bun aini a ten ya. Kande a omen toowpaa di de koloku, de aini a kemeente pe i de. Den man lobi den uman. Den uman e lesipeki den man tu. Ala den sama ya e soi taki a toowlibi a wan sani di u mu lesipeki. A omen miliyun man anga uman e soi taki a sani di Gadu be taki a tuu. A be taki: „Neen ede meke wan man o gwe fika en mma anga en dda. A o tan anga en uman, da den o toon wan sikin.”​—Efeisesama 5:31, 33.