1, 2. Wetin Di Ibru Pipul Dɛn 13:​4 go ɛp yu fɔ du?

WI ƆL want fɔ ɔnɔ Jiova. Wi nid fɔ ɔnɔ am, ɛn i prɔmis fɔ ɔnɔ wi bak. (Fɔs Samiɛl 2:​30; Prɔvabs 3:​9; Rɛvɛleshɔn 4:​11, NW) I want wi bak fɔ ɔnɔ ɔda pipul dɛn lɛk gɔvmɛnt wokman dɛn. (Lɛta Fɔ Rom 12:​10; 13:​7) Bɔt ɔda say de we wi nid fɔ sho ɔnɔ mɔ. Dat na insay mared.

² Di apɔsul Pɔl bin rayt se: “Mek ɔlman rɛspɛkt mared layf, di man we mared nɔ fɔ gɛt ɔda uman ɛn di wɛf nɔ fɔ gɛt ɔda man.” (Di Ibru Pipul Dɛn 13:​4) Pɔl nɔ bin jɔs de tɔk jɛnɛral wan bɔt mared. I bin de tɛl Kristian dɛn se dɛn fɔ rɛspɛkt mared, we min se dɛn fɔ si am as sɔntin we rili valyu. Na so yu de si mared, mɔ yu yon, if yu dɔn mared?

3. Us impɔtant advays we Jizɔs bin gi bɔt mared? (Luk di pikchɔ nia dis atikul in taytul.)

³ If yu de si mared as sɔntin we rili valyu, yu de falamakata wan fayn ɛgzampul. Jizɔs insɛf bin rɛspɛkt mared. We di Faresi dɛn bin aks am bɔt dayvɔs, i bin tɔk bɔt wetin Gɔd bin se bɔt di fɔs pipul dɛn we bin mared.  I bin tɔk se: “Na dat mek man go lɛf in mama ɛn papa go mared in wɛf, ɛn dɛn tu go de lɛkɛ wan pɔsin.” Jizɔs bin tɔk bak se: “So mek pɔsin nɔ pat man ɛn uman we Gɔd dɔn jɔyn lɛkɛ wan pɔsin.”—Rid Mak 10:​2-12; Jɛnɛsis 2:​24.

4. Aw Jiova bin want mared fɔ de?

⁴ Jizɔs bin gri se na Gɔd mek mared ɛn mared fɔ de sote go. We Gɔd bin mek di fɔs mared, i nɔ bin tɛl Adam ɛn Iv se dɛn kin dayvɔs. Bifo dat, i bin want “dɛn tu” fɔ kɔntinyu fɔ de togɛda so dat dɛn mared go de sote go.

5. Aw day kin afɛkt mared?

⁵ Yu no se we Adam ɛn Iv bin sin, bɔku tin dɛn bin chenj. Wan pan dɛn tin dɛn de na we mɔtalman bigin fɔ day, ɛn dat bin afɛkt mared. Di apɔsul Pɔl bin ɛksplen to Kristian dɛn se na day de mek mared dɔn, ɛn di man ɔ uman we de alayf kin fri fɔ mared to ɔda pɔsin.—Lɛta Fɔ Rom 7:​1-3.

6. Wetin di Lɔ we Gɔd bin gi Mozis tich wi bɔt aw Gɔd de si mared?

⁶ Di Lɔ we Gɔd bin gi di Izrɛlayt dɛn bin tɔk bɔt mared. Fɔ ɛgzampul, Gɔd bin de alaw Izrɛlayt man dɛn fɔ mared pas wan uman. Dis kɔstɔm bin dɔn de ivin bifo Gɔd bin gi di Lɔ. Bɔt di Lɔ bin de protɛkt uman ɛn pikin dɛn fɔ lɛ dɛn nɔ trit dɛn bad. Fɔ ɛgzampul, if wan Izrɛlayt man mared uman we na slev ɛn leta i mared ɔda uman, i stil gɛt fɔ kia fɔ di fɔs uman jɔs lɛk aw i bin dɔn de du. Gɔd want lɛ i kɔntinyu fɔ protɛkt ɛn kia fɔ di fɔs uman. (Ɛksodɔs 21:​9, 10) Tide, wi nɔ de fala di Lɔ we Gɔd bin gi Mozis. Bɔt di Lɔ tich wi se Gɔd de si mared as sɔntin we rili valyu. Dis go rili ɛp wi fɔ rɛspɛkt mared.

7, 8. (a) Frɔm wetin de na Ditarɔnɔmi 24:​1, wetin di Lɔ bin tɔk bɔt dayvɔs? (b) Aw Jiova de si dayvɔs?

 ⁷ Wetin di Lɔ bin tɔk bɔt dayvɔs? Pan ɔl we Jiova nɔ ɛva want maredman ɛn in wɛf fɔ dayvɔs, di Lɔ bin alaw ɛni Izrɛlayt man fɔ dayvɔs in wɛf if “i nɔ de biev lɛkɛ mared uman.” (Rid Ditarɔnɔmi 24:​1.) Di Lɔ nɔ bin ɛksplen wetin-ɛn-wetin uman go du we go mek i nɔ “biev lɛkɛ mared uman.” Bɔt i go mɔs gɛt sɔntin fɔ du wit dɛn shemful shemful tin dɛn ɔ siriɔs tin ɛn nɔto jɔs af-af prɔblɛm. (Ditarɔnɔmi 23:​14) I sɔri fɔ no se insay Jizɔs in tɛm, bɔku Ju dɛn bin de dayvɔs dɛn wɛf dɛn fɔ ɛni smɔl tin we dɛn du. (Matyu 19:​3) Wi nɔ go rili want fɔ biev da kayn we de.

⁸ Insay prɔfɛt Malakay in tɛm, na bin kɔmɔn tin fɔ lɛ man dayvɔs in fɔs wɛf, sɔntɛm fɔ mared yɔŋ uman we nɔ de sav Jiova. Bɔt Gɔd bin sho klia wan aw i de si dayvɔs. I bin tɔk se: “In et dayvɔs.” (Malakay 2:​14-16) Di we aw Gɔd de si mared nɔ chenj frɔm di biginin, we i bin tɔk se man “go de wit in wɛf, ɛn dɛn tu go bi wan.” (Jɛnɛsis 2:​24) Ɛn Jizɔs bin sɔpɔt di we aw in Papa de si mared we i bin tɔk se: “Mek nɔbɔdi nɔ pat man ɛn uman we Gɔd dɔn jɔyn lɛkɛ wan pɔsin.”—Matyu 19:​6.

9. Wetin Jizɔs bin min we i tɔk di wɔd dɛn na Mak 10:​11, 12?

⁹ Sɔm pipul dɛn go aks se, ‘Ɛni rizin de we go mek Kristian dayvɔs ɛn mared to ɔda pɔsin?’ Notis wetin Jizɔs bin tɔk we i se: “If ɛni man pat wit in wɛf, dɔn i grap go mared ɔda uman, da man de dɔn sin. Ɛn if ɛni uman pat wit in man, dɔn i grap go mared to ɔda man, da uman de dɔn sin.” (Mak 10:​11, 12; Lyuk 16:​18) Dis sho klia wan se Jizɔs rɛspɛkt mared, ɛn i want ɔda pipul dɛn fɔ du di sem tin. If man dayvɔs in wɛf we nɔ du mami ɛn dadi biznɛs di we aw Gɔd nɔ want, ɛn mared ɔda uman, i dɔn kɔmit sin. Na di sem tin bak if uman dayvɔs in man we nɔ du mami ɛn dadi biznɛs di we aw Gɔd nɔ want. Na sin bikɔs nɔto dayvɔs nɔmɔ go mek mared dɔn. Gɔd go stil si di man ɛn in wɛf as “wan pɔsin.” Jizɔs bin tɔk bak se if man dayvɔs in wɛf we nɔ go du mami ɛn dadi biznɛs di we aw Gɔd nɔ want, dat go mek di uman pwɛl di lɔ bɔt mared. Aw dat go bi? Wɛl, trade, uman we dɔn dayvɔs kin fil se i fɔ mared bak fɔ lɛ i go gɛt pɔsin we go kia fɔ am. Da kayn mared de na di sem wit we pɔsin we mared du mami ɛn dadi biznɛs di we aw Gɔd nɔ want.

10. Wetin na di wangren rizin we go mek Kristian dayvɔs in man ɔ in uman ɛn mared to ɔda pɔsin?

¹⁰ Jizɔs bin tich wi se na wangren rizin go mek pɔsin dayvɔs. I se: “A de tɛl una se: ɛni man we pat wit in wɛf fɔ ɛni rizin pas we i nɔ tru to am, dɔn i mared ɔda uman, i dɔn brok di lɔ we  tɔk bɔt mared.” (Matyu 19:​9) I bin tɔk di sem tin we i bin de tɔk to pipul dɛn ɔp wan mawnten. (Matyu 5:​31, 32) Ɔl tu dɛn tɛm ya, Jizɔs bin de tɔk bɔt mami ɛn dadi biznɛs di we aw Gɔd nɔ want. Dis kin min bak we maredman ɔ mareduman du mami ɛn dadi biznɛs wit pɔsin we i nɔ mared to, rare layf, mami ɛn dadi biznɛs bitwin tu pipul dɛn we nɔ mared, we man ɔ uman de ledɔm wit in kɔmpin, ɛn fɔ ledɔm wit animal. Fɔ ɛgzampul, if maredman du mami ɛn dadi biznɛs wit pɔsin we i nɔ mared to, in wɛf go disayd if i go dayvɔs am ɔ i nɔ go dayvɔs am. If di uman disayd fɔ dayvɔs am, Gɔd nɔ go si dɛn igen as pipul dɛn we mared.

11. Wetin mek pɔsin we na Kristian go disayd nɔ fɔ dayvɔs ilɛksɛf in man ɔ in wɛf dɔn du mami ɛn dadi biznɛs wit ɔda pɔsin?

¹¹ Notis se Jizɔs nɔ bin tɔk se if pɔsin we mared du mami ɛn dadi biznɛs wit ɔda pɔsin, di man ɔ di uman we nɔ sin fɔ dayvɔs am. Fɔ ɛgzampul, di uman kin disayd fɔ de wit in man pan ɔl we di man dɔn du mami ɛn dadi biznɛs wit ɔda pɔsin. Wetin mek? Sɔntɛm i stil lɛk am ɛn i rɛdi fɔ fɔgiv am ɛn sɔpɔt am fɔ mek dɛn mared-os go bifo. Bɔt if i dayvɔs ɛn i nɔ mared igen, i go gɛt sɔm prɔblɛm dɛn. Fɔ ɛgzampul, wetin go apin if i fil fɔ du mami ɛn dadi biznɛs ɛn udat go kia fɔ am? I go de fil se na in wangren de? Aw dayvɔs go afɛkt in pikin dɛn? I go rili tranga fɔ mɛn di pikin dɛn insay di trut? (Fɔs Lɛta Fɔ Kɔrint 7:​14) Dis sho klia wan se if di man ɔ uman we nɔ sin disayd fɔ dayvɔs, i go gɛt siriɔs prɔblɛm dɛn.

12, 13. (a) Wetin bin apin na Ozie in mared-os? (b) Wetin mek Ozie bin tek Goma bak? Wetin wi lan frɔm Ozie in mared?

¹² Di tin we bin apin to prɔfɛt Ozie tich wi bɔku tin bɔt aw Gɔd de si mared. Gɔd bin tɛl Ozie fɔ mared wan uman we nem Goma, we go bi “rare gyal” ɛn i go bɔn pikin dɛn wit ɔda man dɛn. Goma bin bɔn wan bɔypikin fɔ Ozie. (Ozie 1:​2, 3) Leta, Goma bin bɔn wan galpikin ɛn wan ɔda bɔypikin ɛn i go bi se na fɔ ɔda man i bɔn dɛn. Pan ɔl we Goma bin de du mami ɛn dadi biznɛs wit ɔda man dɛn, Ozie bin stil kɔntinyu fɔ de wit am. Leta, i bin ɛndɔp fɔ lɛf Ozie ɛn go tɔn slev. Stil Ozie bin go tek am. (Ozie 3:​1, 2) Jiova bin yuz Ozie fɔ sho aw i bin de fɔgiv di Izrɛlayt dɛn afta we dɛn lɛf Am ɛn go wɔship ɔda gɔd dɛn. Wetin wi lan frɔm Ozie in mared?

¹³ If pɔsin we na Kristian du mami ɛn dadi biznɛs wit sɔmbɔdi we i nɔ mared to, na di man ɔ uman we nɔ sin gɛt fɔ disayd wetin fɔ du. Jizɔs bin tɔk se di man ɔ uman we nɔ sin gɛt gud rizin fɔ dayvɔs, ɛn i fri fɔ mared to ɔda pɔsin. Bɔt i nɔ bad if di man ɔ uman we nɔ sin disayd fɔ fɔgiv di wan we sin. Ozie bin tek Goma bak. Afta we Goma kam bak, Ozie bin tɛl am se i nɔ fɔ du mami ɛn dadi biznɛs wit ɛni ɔda man igen. Ozie nɔ bin du mami ɛn dadi biznɛs wit Goma fɔ sɔm tɛm. (Ozie 3:​3) Bɔt as tɛm de go, i go bi se Ozie bin du mami ɛn dadi biznɛs wit in wɛf bak. Dis de sho aw Gɔd bin rɛdi fɔ tek di Izrɛlayt dɛn bak ɛn kɔntinyu fɔ bi dɛn padi. (Ozie 1:​11; 3:​3-5) Wetin dis de tich wi bɔt mared tide? If di pɔsin we nɔ sin  bigin fɔ du mami ɛn dadi biznɛs wit in man ɔ uman we bin dɔn sin, dat de sho se i dɔn fɔgiv am. (Fɔs Lɛta Fɔ Kɔrint 7:​3, 5) Dɔn no rizin nɔ go de igen fɔ dayvɔs. Afta dat, di man ɛn in wɛf fɔ wok togɛda ɛn ɛp dɛnsɛf fɔ si mared di we aw Gɔd de si am.

14. Frɔm wetin de na Fɔs Lɛta Fɔ Kɔrint 7:​10, 11, wetin kin apin na mared-os?

¹⁴ Ɔlman we na Kristian fɔ rɛspɛkt mared jɔs lɛk Jiova ɛn Jizɔs. Bɔt sɔntɛnde, sɔm pipul dɛn nɔ kin du dis bikɔs wi ɔl nɔ pafɛkt. (Lɛta Fɔ Rom 7:​18-23) So wi nɔ fɔ sɔprayz if sɔm fɔstɛm Kristian dɛn bin de gɛt siriɔs prɔblɛm dɛn na dɛn mared-os. Pɔl bin rayt se “mareduman nɔ fɔ lɛf in man.” Bɔt sɔntɛnde, dis kin apin.—Rid Fɔs Lɛta Fɔ Kɔrint 7:​10, 11.

15, 16. (a) Wetin maredman ɛn in wɛf fɔ du we dɛn gɛt prɔblɛm na dɛn mared-os? Wetin mek? (b) Aw wi go fala dis advays if wi mared to pɔsin we nɔ de sav Jiova?

¹⁵ Pɔl nɔ bin ɛksplen wetin-ɛn-wetin bin de mek maredman ɛn in wɛf skata. Bɔt wi no se nɔto bikɔs di man go du mami ɛn dadi biznɛs wit ɔda pɔsin. If na dat, di uman go gɛt rizin fɔ dayvɔs ɛn mared to ɔda pɔsin. Pɔl bin rayt se if uman pat wit in man, “i nɔ fɔ mared ɔda man ɔ i fɔ mek pis wit in maredman.” So Gɔd de stil si dɛn as pipul dɛn we mared. Pɔl bin tɔk se ilɛk uskayn prɔblɛm maredman ɛn in wɛf de gɛt, wans no wan pan dɛn nɔ go du mami ɛn dadi biznɛs wit ɔda pɔsin, dɛn fɔ mek pis, we min se dɛn fɔ sɔlv dɛn prɔblɛm dɛn ɛn kɔntinyu fɔ de togɛda. Dɛn kin aks di ɛlda dɛn fɔ ɛp dɛn. Di ɛlda dɛn nɔ go sɔpɔt wan pɔsin, bɔt dɛn go gi advays dɛn frɔm di Baybul we go ɛp dɛn.

¹⁶ Bɔt wetin pɔsin we na Kristian go du if i mared to sɔmbɔdi we nɔ de sav Jiova? If dɛn gɛt prɔblɛm na dɛn mared-os, fɔ se dɛn fɔ skata? Jɔs lɛk aw wi bin dɔn tɔk fɔs, di Baybul se di wangren rizin we go mek pɔsin dayvɔs na we in maredman ɔ wɛf du mami ɛn dadi biznɛs wit ɔda pɔsin. Bɔt di Baybul nɔ gi wi rizin dɛn we fɔ mek maredman ɛn in wɛf skata. Pɔl bin rayt se: “If uman we na Kristiɛn gɛt man we nɔto Kristiɛn ɛn di man gri fɔ de wit am, di uman nɔ fɔ kɛr di man go kot fɔ pat wit am.” (Fɔs Lɛta Fɔ Kɔrint 7:​12, 13) Na di sem tin fɔ apin tide.

17, 18. Wetin mek sɔm Kristian dɛn dɔn disayd fɔ de wit dɛn man ɛn uman dɛn pan ɔl we dɛn de gɛt siriɔs prɔblɛm dɛn?

 ¹⁷ Bɔt wi dɔn yɛri bɔt kes dɛn we di “man we nɔto Kristiɛn” dɔn sho se i nɔ want fɔ de wit in wɛf. Fɔ ɛgzampul, i go de bit in wɛf bad bad wan, te di uman fil se in wɛlbɔdi ɛn in layf de pan denja. I nɔ de gri fɔ gi in famili wetin dɛn nid fɔ liv, ɔ i go de du tin we de mek i nɔ pɔsibul fɔ mek di uman kɔntinyu fɔ de biɛn Gɔd. If dɛn kayn tin ya apin, uman we na Kristian fɔ disayd fɔ insɛf ilɛk wetin in man se, i fɔ no se i nɔ want fɔ de wit am ɛn nid de fɔ mek dɛn pat. Bɔt sɔm ɔda Kristian dɛn we dis sem kayn tin dɔn apin to dɔn disayd fɔ de wit dɛn man ɔ uman. Dɛn dɔn bia ɛn dɛn dɔn tray fɔ du tin dɛn we go mek dɛn mared-os go bifo. Wetin mek dɛn disayd fɔ du dat?

¹⁸ If dis kayn tin apin we mek maredman ɛn in wɛf pat, dɛn go stil bi pipul dɛn we mared ɛn dɛn go gɛt di prɔblɛm dɛn we wi bin dɔn tɔk bɔt. Di apɔsul Pɔl bin sho ɔda rizin we fɔ mek maredman ɛn in wɛf kɔntinyu fɔ de togɛda. I bin rayt se: “Bikɔs maredman we nɔto Kristiɛn ɛn in wɛf we na Kristiɛn, dɔn bi wan, Gɔd go tek di man we nɔto Kristiɛn lɛkɛ in yon. Ɛn bikɔs mareduman we nɔto Kristiɛn ɛn in man we na Kristiɛn dɔn bi wan, Gɔd go tek di uman we nɔto Kristiɛn lɛkɛ i yon. If nɔ so, dɛn pikin go bi lɛkɛ dɛn pikin we nɔ no Gɔd. Bɔt we Gɔd dɔn tek dɛn mami ɛn dɛn dadi lɛkɛ in yon, Gɔd go tek di pikin dɛn lɛkɛ in yon.” (Fɔs Lɛta Fɔ Kɔrint 7:​14) Bɔku Kristian dɛn dɔn disayd fɔ de wit dɛn man ɔ uman we nɔ de sav Jiova pan ɔl we dɛn gɛt siriɔs prɔblɛm dɛn. Dɛn kin rili gladi we dɛn disayd fɔ du dat bikɔs dɛn man ɔ uman kin ɛndɔp fɔ bi Jiova Witnɛs.—Rid Fɔs Lɛta Fɔ Kɔrint 7:​16; Pita In Fɔs Lɛta 3:​1, 2.

19. Wetin mek bɔku mared-os dɛn dɔn go bifo insay di Kristian kɔngrigeshɔn?

¹⁹ Jizɔs bin gi advays bɔt dayvɔs, ɛn di apɔsul Pɔl bin gi advays bɔt we man ɛn uman de pat. Dɛn ɔl tu bin want Gɔd in savant dɛn fɔ rɛspɛkt mared. Ɔlsay na di wɔl tide, bɔku mared dɛn de we dɔn go bifo insay di Kristian kɔngrigeshɔn. Sɔntɛm yu go si bɔku maredman ɛn dɛn wɛf dɛn gladi insay yu kɔngrigeshɔn, usay maredman dɛn lɛk dɛn wɛf dɛn ɛn di wɛf dɛn de rɛspɛkt dɛn. Dɛn ɔl de sho se dɛn rɛspɛkt mared. Wi gladi fɔ no se bɔku maredman dɛn ɛn dɛn wɛf dɛn de pruv se wetin Gɔd tɔk na tru we i se: “Na fɔseka dis, man go lɛf in mama ɛn papa, go mared wɛf ɛn di man ɛn in wɛf go bi wan.”—Lɛta Fɔ Ɛfisɔs 5:​31, 33.