ໃຫ້ນັບຖືຊີວິດແຕ່ງດອງທີ່ພະເຈົ້າຈັດກຽມໄວ້

ເປີດ

“ສິ່ງນັ້ນທີ່ພະເຈົ້າໄດ້ກະທຳໃຫ້ຕິດພັນກັນຢູ່ແລ້ວ ຢ່າໃຫ້ຄົນກະທຳໃຫ້ແຍກຈາກກັນເຖີ້ນ.”—ມາລະໂກ 10:9

1, 2. ເຫບເລີ 13:4 ກະຕຸ້ນເຮົາໃຫ້ເຮັດຫຍັງ?

ເຮົາທຸກຄົນຢາກສະແດງຄວາມນັບຖືພະເຢໂຫວາ. ພະອົງສົມຄວນໄດ້ຮັບຄວາມນັບຖືຈາກເຮົາ ແລະພະອົງສັນຍາວ່າຈະນັບຖືເຮົາຄືກັນ. (1 ຊາເມືອນ 2:30; ສຸພາສິດ 3:9; ຄຳປາກົດ 4:11) ພະອົງຍັງຢາກໃຫ້ເຮົານັບຖືຄົນອື່ນໆນຳເຊັ່ນ ເຈົ້າໜ້າທີ່ບ້ານເມືອງ. (ໂລມ 12:10; 13:7) ແຕ່ມີຂົງເຂດໜຶ່ງທີ່ພະອົງຢາກໃຫ້ເຮົາສະແດງຄວາມນັບຖືເປັນພິເສດນັ້ນກໍຄື ຊີວິດແຕ່ງດອງ.

²ອັກຄະສາວົກໂປໂລບອກວ່າ: “ຈົ່ງໃຫ້ຊີວິດສົມລົດຂອງພວກທ່ານເປັນທີ່ຍົກຍ້ອງແກ່ທຸກຄົນ ແລະຈົ່ງໃຫ້ຄູ່ຜົວເມຍສັດຊື່ຕໍ່ກັນແລະກັນ.” (ເຫບເລີ 13:4, ທ.ປ.) ໂປໂລເວົ້າຢ່າງຈິງຈັງໃນເລື່ອງແຕ່ງດອງ ລາວບອກຄລິດສະຕຽນວ່າເຂົາເຈົ້າຕ້ອງມີຄວາມນັບຖືຕໍ່ຊີວິດແຕ່ງດອງນຳ ເຊິ່ງໝາຍເຖິງໃຫ້ຖືວ່າເປັນສິ່ງທີ່ມີຄ່າຫຼາຍ. ຖ້າເຈົ້າແຕ່ງດອງແລ້ວ ເຈົ້າຄິດວ່າຊີວິດແຕ່ງດອງຂອງເຈົ້າມີຄ່າບໍ?

3. ພະເຍຊູໃຫ້ຄຳແນະນຳຫຍັງທີ່ສຳຄັນກ່ຽວກັບຊີວິດແຕ່ງດອງ? (ເບິ່ງຮູບທຳອິດ)

³ຖ້າເຈົ້າຖືວ່າຊີວິດແຕ່ງດອງມີຄ່າຫຼາຍ ເຈົ້າກໍກຳລັງເຮັດຕາມຕົວຢ່າງທີ່ດີ. ພະເຍຊູເອງກໍນັບຖືເລື່ອງຊີວິດແຕ່ງດອງ. ເມື່ອພວກຟາລິຊຽນຖາມພະເຍຊູກ່ຽວກັບການຢ່າຮ້າງ ເພິ່ນເວົ້າເຖິງສິ່ງທີ່ພະເຢໂຫວາບອກກ່ຽວກັບການແຕ່ງດອງທຳອິດວ່າ: “ເພາະເຫດນັ້ນຜູ້ຊາຍຈະລາພໍ່ແມ່ໄປຕິດພັນຢູ່ກັບເມຍ ແລະເຂົາທັງສອງຈະເປັນເນື້ອອັນດຽວ” ແລະຍັງບອກອີກວ່າ: “ສິ່ງນັ້ນທີ່ພະເຈົ້າໄດ້ກະທຳໃຫ້ຕິດພັນກັນຢູ່ແລ້ວ ຢ່າໃຫ້ຄົນກະທຳໃຫ້ແຍກຈາກກັນເຖີ້ນ.”—ອ່ານມາລະໂກ 10:2-12; ຕົ້ນເດີມ 2:24

4. ພະເຢໂຫວາມີຈຸດປະສົງຫຍັງໃນເລື່ອງຊີວິດແຕ່ງດອງ?

⁴ພະເຍຊູບອກວ່າພະເຢໂຫວາເປັນຜູ້ກໍ່ຕັ້ງຊີວິດແຕ່ງດອງແລະຊີວິດແຕ່ງດອງກໍຄວນເປັນແບບຖາວອນ. ເມື່ອພະເຈົ້າເຮັດໃຫ້ມີການແຕ່ງດອງເທື່ອທຳອິດ ພະອົງບໍ່ໄດ້ບອກວ່າໃຫ້ອາດາມກັບເອວາຢ່າຮ້າງກັນໄດ້. ກົງກັນຂ້າມ ພະອົງມີຈຸດປະສົງໃຫ້ “ເຂົາທັງສອງ” ເປັນຜົວເມຍກັນຕະຫຼອດໄປ.

ສິ່ງທີ່ເຮັດໃຫ້ຊີວິດແຕ່ງດອງປ່ຽນໄປໄລຍະໜຶ່ງ

5. ເມື່ອມີຄວາມຕາຍເກີດຂຶ້ນເຮັດໃຫ້ຊີວິດແຕ່ງດອງເປັນແນວໃດ?

⁵ດັ່ງທີ່ເຈົ້າຮູ້ແລ້ວວ່າ ເມື່ອອາດາມເຮັດບາບມີຫຼາຍສິ່ງຫຼາຍຢ່າງປ່ຽນໄປ. ສິ່ງໜຶ່ງກໍຄື ມີຄວາມຕາຍເກີດຂຶ້ນ ແລະສົ່ງຜົນຕໍ່ຊີວິດແຕ່ງດອງນຳ. ອັກຄະສາວົກໂປໂລອະທິບາຍກັບຄລິດສະຕຽນວ່າຄວາມຕາຍເຮັດໃຫ້ຊີວິດແຕ່ງດອງຈົບລົງ ແລະຜົວຫຼືເມຍທີ່ຍັງມີຊີວິດຢູ່ກໍແຕ່ງດອງໃໝ່ໄດ້.—ໂລມ 7:1-3

ກົດໝາຍຂອງໂມເຊສອນເຮົາວ່າພະເຈົ້າຖືວ່າຊີວິດແຕ່ງດອງມີຄ່າຫຼາຍ

6. ກົດໝາຍຂອງໂມເຊສອນເຮົາວ່າພະເຢໂຫວາຄິດແນວໃດກ່ຽວກັບຊີວິດແຕ່ງດອງ?

⁶ກົດໝາຍທີ່ພະເຈົ້າໃຫ້ຊາດອິດສະລາແອນໃຫ້ລາຍລະອຽດກ່ຽວກັບຊີວິດແຕ່ງດອງ. ຕົວຢ່າງ ຜູ້ຊາຍຊາວອິດສະລາແອນມີເມຍຫຼາຍກວ່າໜຶ່ງຄົນໄດ້. ທຳນຽມນີ້ມີມາກ່ອນທີ່ພະເຢໂຫວາຈະໃຫ້ກົດໝາຍກັບເຂົາເຈົ້າ. ແຕ່ກົດໝາຍກໍປົກປ້ອງຜູ້ຍິງແລະລູກບໍ່ໃຫ້ຖືກປະຕິບັດແບບບໍ່ຍຸຕິທຳ. ຕົວຢ່າງ ຖ້າຜູ້ຊາຍຊາວອິດສະລາແອນແຕ່ງດອງກັບທາດ ແລ້ວຕໍ່ມາລາວເອົາເມຍອີກຜູ້ໜຶ່ງ ລາວກໍຍັງຕ້ອງເບິ່ງແຍງຄວາມຈຳເປັນຂອງເມຍຜູ້ທຳອິດຄືເກົ່າ. ພະເຈົ້າຮຽກຮ້ອງໃຫ້ລາວປົກປ້ອງແລະເບິ່ງແຍງເມຍຜູ້ທຳອິດຕໍ່ໆໄປ. (ອົບພະຍົບ 21:9, 10) ເຮົາບໍ່ໄດ້ຢູ່ພາຍໃຕ້ກົດໝາຍຂອງໂມເຊແລ້ວ. ແຕ່ເລື່ອງນີ້ສອນເຮົາວ່າພະເຈົ້າຖືວ່າຊີວິດແຕ່ງດອງມີຄ່າຫຼາຍ. ນີ້ເຮັດໃຫ້ເຮົານັບຖືຊີວິດແຕ່ງດອງ.

7, 8. (ກ) ໃນພະບັນຍັດ 24:1 ກົດໝາຍຂອງໂມເຊເວົ້າແນວໃດກ່ຽວກັບການຢ່າຮ້າງ? (ຂ) ພະເຢໂຫວາຄິດແນວໃດກ່ຽວກັບການຢ່າຮ້າງ?

⁷ກົດໝາຍຂອງໂມເຊເວົ້າແນວໃດກ່ຽວກັບການຢ່າງຮ້າງ? ເຖິງວ່າພະເຢໂຫວາບໍ່ໄດ້ມີຈຸດປະສົງໃຫ້ຜົວຫຼືເມຍຢ່າຮ້າງກັນ ແຕ່ກົດໝາຍກໍອະນຸຍາດໃຫ້ຜູ້ຊາຍອິດສະລາແອນຢ່າຮ້າງກັບເມຍໄດ້ຖ້າເມຍເຮັດ “ອັນບໍ່ດີ” ບາງຢ່າງ. (ອ່ານພະບັນຍັດ 24:1) ໃນກົດໝາຍບໍ່ໄດ້ອະທິບາຍວ່າ “ອັນບໍ່ດີ” ນັ້ນແມ່ນຫຍັງ. ແຕ່ຄົງຕ້ອງເປັນສິ່ງທີ່ອັບອາຍຂາຍໜ້າຫຼາຍ ຫຼືເປັນເລື່ອງຮ້າຍແຮງທີ່ບໍ່ແມ່ນເລັກໆນ້ອຍໆ. (ພະບັນຍັດ 23:14) ໃນສະໄໝຂອງພະເຍຊູ ຊາວຢິວຫຼາຍຄົນຢ່າຮ້າງກັບເມຍຂອງເຂົາເຈົ້າ “ເພາະເຫດທຸກຢ່າງ” ເຊິ່ງເປັນເລື່ອງເລັກໆນ້ອຍໆ. (ມັດທາຍ 19:3) ແນ່ນອນເຮົາບໍ່ຢາກມີຄວາມຄິດແບບນັ້ນ.

⁸ໃນສະໄໝຂອງຜູ້ພະຍາກອນມາລາກີ ເປັນເລື່ອງທຳມະດາທີ່ຜູ້ຊາຍຈະຢ່າຮ້າງເມຍຜູ້ທຳອິດ ບາງເທື່ອກໍໄປແຕ່ງກັບຜູ້ຍິງທີ່ໜຸ່ມກວ່າເຊິ່ງບໍ່ໄດ້ຮັບໃຊ້ພະເຢໂຫວາ. ແຕ່ພະເຢໂຫວາເຮັດໃຫ້ເຫັນແຈ້ງວ່າພະອົງຄິດແນວໃດກັບການຢ່າຮ້າງ. ພະອົງບອກວ່າ: “ເຮົາກຽດຊັງການປະຮ້າງກັນ.” (ມາລາກີ 2:14-16) ຄວາມຄິດຂອງພະເຢໂຫວາກ່ຽວກັບຊີວິດແຕ່ງດອງບໍ່ເຄີຍປ່ຽນແປງ ເມື່ອພະອົງບອກວ່າຜູ້ຊາຍ “ຈະຕິດພັນຢູ່ກັບເມຍແຫ່ງຕົນແລະເຂົາທັງສອງຈະເປັນເນື້ອໜັງອັນດຽວກັນ.” (ຕົ້ນເດີມ 2:24) ພະເຍຊູກໍຄິດຄືກັບພໍ່ຂອງເພິ່ນໃນເລື່ອງຊີວິດແຕ່ງດອງເມື່ອເພິ່ນເວົ້າວ່າ: “ສິ່ງນັ້ນທີ່ພະເຈົ້າໄດ້ກະທຳໃຫ້ຕິດພັນກັນຢູ່ແລ້ວ ຢ່າໃຫ້ຄົນກະທຳໃຫ້ແຍກແຕກຈາກກັນເຖີ້ນ.”—ມັດທາຍ 19:6

ການຕອບຮັບຂອງພະເຈົ້າຕໍ່ການຫຼິ້ນຊູ້ຂອງຊາດອິດສະລາແອນ

ທັງອິດສະລາແອນແລະຢູດາບໍ່ສັດຊື່ຕໍ່ພະເຢໂຫວາ. ເຂົາເຈົ້າສ້າງສາຍສຳພັນກັບຊາດນອກຮີດທີ່ນະມັດສະການພະປອມ. ພະອົງຕຳໜິເຂົາເຈົ້າຍ້ອນເຂົາເຈົ້າ “ຫຼິ້ນຊູ້ກັບກ້ອນຫີນແລະຕົ້ນໄມ້.” (ເຢເຣມີ 2:13, 20; 3:1-3, 9, ລ.ມ.; ສົມທຽບກັບເອເຊກຽນ 16:28; ຢາໂກໂບ 4:4) ເຂົາເຈົ້າບໍ່ຍອມປ່ຽນແປງແລະເຮັດຄືກັບ “ເມຍທີ່ຂາຍຕົວໃຫ້ຊາຍອື່ນ” ດັ່ງນັ້ນ ພະເຢໂຫວາໄດ້ຕັດສິນໃຈ “ປະພວກຍິດສະລາເອນຜູ້ບໍ່ສັດຊື່ແລະໄດ້ເອົາໜັງສືຄຳຢ່າຮ້າງໃຫ້ແກ່ເຂົາຍ້ອນການມິດສາຈານແຫ່ງເຂົາ.”—ເຢເຣມີ 3:6-8

ເຫດຜົນຢ່າງດຽວທີ່ຢ່າຮ້າງໄດ້

9. ຄຳເວົ້າຂອງພະເຍຊູໃນມາລະໂກ 10:11, 12 ໝາຍຄວາມວ່າແນວໃດ?

⁹ບາງຄົນອາດສົງໄສວ່າ: ‘ມີເຫດຜົນຫຍັງບໍທີ່ຄລິດສະຕຽນສາມາດຢ່າຮ້າງແລະແຕ່ງດອງໃໝ່ໄດ້?’ ຂໍສັງເກດສິ່ງທີ່ພະເຍຊູເວົ້າ: “ຄົນທຸກຄົນທີ່ຈະປະເມຍແຫ່ງຕົນແລະເອົາເມຍໃໝ່ ຜູ້ນັ້ນກະທຳຜິດຫຼິ້ນຊູ້ສູ່ເມຍກົກ ແລະຖ້າຍິງຜູ້ໜຶ່ງປະຜົວແລະເອົາຜົວໃໝ່ ຍິງນັ້ນກະທຳຜິດຫຼິ້ນຊູ້ສູ່ເໝືອນກັນ.” (ມາລະໂກ 10:11, 12; ລືກາ 16:18) ເຫັນໄດ້ແຈ້ງວ່າພະເຍຊູນັບຖືຊີວິດແຕ່ງດອງແລະຢາກໃຫ້ຄົນອື່ນນັບຖືຄືກັນ. ຖ້າຜູ້ຊາຍຢ່າຮ້າງເມຍທີ່ບໍ່ໄດ້ເຮັດຜິດສິນລະທຳທາງເພດ ແລ້ວໄປແຕ່ງດອງໃໝ່ກໍຖືວ່າລາວຫຼິ້ນຊູ້ ແລະຖ້າຜູ້ຍິງເຮັດແບບດຽວກັນນັ້ນກໍຖືວ່າເປັນການຫຼິ້ນຊູ້ຄືກັນ. ນັ້ນເປັນຍ້ອນວ່າການຢ່າຮ້າງຢ່າງດຽວບໍ່ໄດ້ເຮັດໃຫ້ຊີວິດຄູ່ສິ້ນສຸດລົງ. ພະເຈົ້າຍັງຖືວ່າເຂົາເຈົ້າເປັນ “ເນື້ອໜັງອັນດຽວກັນ.” ພະເຍຊູຍັງບອກວ່າຖ້າຜູ້ຊາຍຢ່າຮ້າງເມຍທີ່ບໍ່ໄດ້ເຮັດຜິດສິນລະທຳທາງເພດ ລາວກໍເຮັດໃຫ້ເມຍສ່ຽງທີ່ຈະຫຼິ້ນຊູ້. ເປັນໄປໄດ້ແນວໃດ? ໃນສະໄໝນັ້ນຜູ້ຍິງທີ່ຖືກຢ່າຮ້າງອາດຮູ້ສຶກວ່າຕ້ອງແຕ່ງດອງໃໝ່ເພື່ອຈະໄດ້ຮັບການເບິ່ງແຍງທາງດ້ານການເງິນ ເຊິ່ງການແຕ່ງດອງແບບນັ້ນກໍເປັນການຫຼິ້ນຊູ້ຄືກັນ.

ເຫດຜົນຢ່າງດຽວຕາມຫຼັກພະຄຳພີທີ່ຢ່າຮ້າງກັນໄດ້

ພະເຍຊູເວົ້າ 2 ເທື່ອວ່າມີເຫດຜົນດຽວທີ່ຄູ່ຜົວເມຍຈະຢ່າຮ້າງກັນແລ້ວໄປແຕ່ງດອງໃໝ່ໄດ້ ນັ້ນກໍຄື ການເຮັດຜິດສິນລະທຳທາງເພດ ເຊິ່ງຄຳພາສາເກັຣກໃຊ້ຄຳວ່າພໍເນຍ. ຄຳນີ້ສະແດງເຖິງການມີເພດສຳພັນກັນລະຫວ່າງຜູ້ທີ່ບໍ່ແມ່ນຜົວເມຍກັນຢ່າງຖືກຕ້ອງຕາມຫຼັກພະຄຳພີ ແລະຍັງລວມເອົາການມີເພດສຳພັນທາງປາກ ທາງຮູທະວານ ຫຼືຈັບຕ້ອງອະໄວຍະວະເພດຂອງຜູ້ທີ່ບໍ່ແມ່ນຜົວຫຼືເມຍຂອງຕົນເພື່ອຈຸດປະສົງກະຕຸ້ນຄວາມຮູ້ສຶກທາງເພດ.—ເບິ່ງບົດຄວາມ “ຄຳຖາມຈາກຜູ້ອ່ານ” ໃນຫໍສັງເກດການ 15 ກໍລະກົດ 2006 (ບໍ່ມີໃນພາສາລາວ).

10. ຄລິດສະຕຽນສາມາດຢ່າຮ້າງແລະແຕ່ງດອງໃໝ່ໄດ້ດ້ວຍເຫດຜົນດຽວຫຍັງເທົ່ານັ້ນ?

¹⁰ພະເຍຊູສອນວ່າມີເຫດຜົນຢ່າງດຽວທີ່ຄລິດສະຕຽນຢ່າຮ້າງກັນໄດ້ ເພິ່ນບອກວ່າ: “ເຮົາກ່າວແກ່ທ່ານທັງຫຼາຍວ່າ ຄົນທຸກຄົນທີ່ຈະປະເມຍແຫ່ງຕົນບໍ່ໃຊ່ເພາະເຫດຜິດກັບຊາຍຜູ້ອື່ນ ແລະຈະເອົາເມຍໃໝ່ ຜູ້ນັ້ນກະທຳຜິດຫຼິ້ນຊູ້.” (ມັດທາຍ 19:9) ເພິ່ນເວົ້າເຖິງເລື່ອງນີ້ອີກໃນຄຳເທດເທິງພູເຂົາ. (ມັດທາຍ 5:31, 32) ທັງສອງເທື່ອພະເຍຊູໄດ້ເວົ້າເຖິງເຫດຜົນທີ່ຈະຢ່າຮ້າງໄດ້ນັ້ນຄື ການເຮັດຜິດສິນລະທຳທາງເພດ ເຊິ່ງອາດລວມເຖິງການຫຼິ້ນຊູ້ ຂາຍບໍລິການທາງເພດ ເພດສຳພັນລະຫວ່າງຄົນທີ່ບໍ່ແຕ່ງດອງກັນ ຮັກຮ່ວມເພດ ແລະມີເພດສຳພັນກັບສັດ. ສົມມຸດມີຊາຍຄົນໜຶ່ງເຮັດຜິດສິນລະທຳທາງເພດ ເມຍຂອງລາວກໍສາມາດເລືອກໄດ້ວ່າຈະຢ່າຮ້າງກັບລາວຫຼືບໍ່. ຖ້າເມຍເລືອກຢ່າຮ້າງ ພະເຈົ້າກໍຖືວ່າທັງສອງບໍ່ແມ່ນຜົວເມຍກັນອີກຕໍ່ໄປ.

11. ເປັນຫຍັງຄລິດສະຕຽນອາດເລືອກທີ່ຈະບໍ່ຢ່າຮ້າງເຖິງວ່າຄູ່ຂອງຕົນເຮັດຜິດສິນລະທຳທາງເພດ?

¹¹ຂໍສັງເກດວ່າພະເຍຊູບໍ່ໄດ້ບອກວ່າຖ້າມີຝ່າຍໜຶ່ງເຮັດຜິດສິນລະທຳທາງເພດ ຝ່າຍທີ່ບໍ່ໄດ້ເຮັດຜິດຈຳເປັນຕ້ອງຢ່າຮ້າງ. ຕົວຢ່າງ: ເມຍຄົນໜຶ່ງອາດເລືອກຢູ່ກັບຜົວຕໍ່ໄປເຖິງວ່າຜົວໄດ້ເຮັດຜິດສິນລະທຳທາງເພດ. ຍ້ອນຫຍັງ? ຍ້ອນເມຍອາດຍັງຮັກຜົວແລະພ້ອມທີ່ຈະໃຫ້ອະໄພລາວແລະພະຍາຍາມທີ່ຈະປັບປຸງຊີວິດຄູ່ໃຫ້ດີຂຶ້ນ. ອີກຢ່າງໜຶ່ງ ຖ້າລາວເລືອກຢ່າຮ້າງແລະບໍ່ແຕ່ງດອງໃໝ່ ລາວກໍຈະມີບັນຫາບາງຢ່າງເຊັ່ນ: ມີບັນຫາເລື່ອງເງິນແລະຄວາມຕ້ອງການທາງເພດ ຮູ້ສຶກເຫງົາ ເຮັດໃຫ້ລູກມີປົມດ້ອຍ ແລະເຮັດໃຫ້ຍາກຂຶ້ນທີ່ຈະລ້ຽງລູກໃຫ້ໃຫຍ່ໃນຄວາມຈິງ. (1 ໂກລິນໂທ 7:14) ເຫັນໄດ້ແຈ້ງວ່າຖ້າຝ່າຍທີ່ບໍ່ເຮັດຜິດເລືອກຢ່າຮ້າງກໍຈະຕ້ອງມີບັນຫາຫຼາຍຢ່າງ.

12, 13. (ກ) ຊີວິດຄູ່ຂອງໂອເຊເປັນແນວໃດ? (ຂ) ເປັນຫຍັງໂອເຊຈຶ່ງພາໂຄເມນກັບມາຢູ່ນຳກັນອີກ ແລະເຮົາໄດ້ຮຽນຮູ້ຫຍັງຈາກຊີວິດຄູ່ຂອງໂອເຊ?

¹²ປະສົບການຂອງຜູ້ພະຍາກອນໂອເຊສອນບົດຮຽນຫຼາຍຢ່າງໃຫ້ເຮົາວ່າພະເຢໂຫວາຄິດແນວໃດກ່ຽວກັບຊີວິດແຕ່ງດອງ. ພະເຈົ້າບອກໂອເຊໃຫ້ໄປແຕ່ງດອງກັບຜູ້ຍິງຊື່ໂຄເມນເຊິ່ງຕໍ່ມາລາວ “ຈະມີຊູ້” ແລະຈະມີ “ລູກທີ່ເກີດຈາກການຫຼິ້ນຊູ້.” ໂຄເມນແລະໂອເຊມີລູກຊາຍນຳກັນຄົນໜຶ່ງ. (ໂອເຊ 1:2, 3, ລ.ມ.) ຕໍ່ມາ ໂຄເມນກໍເກີດລູກສາວແລະລູກຊາຍເຊິ່ງອາດຈະມີຈາກການຫຼິ້ນຊູ້. ເຖິງວ່າໂຄເມນຫຼິ້ນຊູ້ຫຼາຍເທື່ອ ແຕ່ໂອເຊກໍຍັງຢູ່ກັບລາວ. ໃນທີ່ສຸດລາວກໍຖິ້ມໂອເຊໄປແລະກາຍເປັນທາດ ແຕ່ໂອເຊກໍຍັງຊື້ລາວຄືນມາ. (ໂອເຊ 3:1, 2) ພະເຢໂຫວາໃຊ້ໂອເຊເປັນຕົວຢ່າງໃຫ້ເຫັນວ່າພະອົງໃຫ້ອະໄພຊາດອິດສະລາແອນເທື່ອແລ້ວເທື່ອອີກ ເມື່ອເຂົາເຈົ້າປະຖິ້ມພະອົງໄປນະມັດສະການພະອື່ນ. ເຮົາໄດ້ຮຽນຮູ້ຫຍັງຈາກຊີວິດຄູ່ຂອງໂອເຊ?

¹³ຖ້າຜົວຫຼືເມຍຄລິດສະຕຽນເຮັດຜິດສິນລະທຳທາງເພດ ຝ່າຍທີ່ບໍ່ໄດ້ເຮັດຜິດຕ້ອງເຮັດການຕັດສິນໃຈ. ພະເຍຊູບອກວ່າຝ່າຍທີ່ບໍ່ຜິດມີເຫດຜົນທີ່ຈະຢ່າຮ້າງແລະສາມາດແຕ່ງດອງໃໝ່ໄດ້. ແຕ່ກໍບໍ່ຜິດຖ້າລາວຈະເລືອກໃຫ້ອະໄພຄູ່ຂອງລາວ. ໂອເຊໄດ້ພາໂຄເມນກັບມາຢູ່ນຳກັນອີກ. ຫຼັງຈາກລາວກັບມາ ໂອເຊບອກລາວວ່າບໍ່ໃຫ້ມີເພດສຳພັນກັບຜູ້ຊາຍຄົນອື່ນ ແລະໂອເຊເອງກໍ “ບໍ່ນອນກັບ” ໂຄເມນໄລຍະໜຶ່ງ. (ໂອເຊ 3:3, ລ.ມ.) ແຕ່ໃນທີ່ສຸດ ໂອເຊກໍໄດ້ມີເພດສຳພັນກັບໂຄເມນອີກ. ນີ້ສະແດງວ່າພະເຢໂຫວາຍອມໃຫ້ພວກອິດສະລາແອນກັບມາແລະມີສາຍສຳພັນກັບພະອົງຕໍ່ໄປ. (ໂອເຊ 1:11; 3:3-5) ເລື່ອງນີ້ສອນຫຍັງເຮົາກ່ຽວກັບຊີວິດຄູ່ໃນປັດຈຸບັນ? ຖ້າຝ່າຍບໍ່ຜິດເລີ່ມມີເພດສຳພັນອີກກັບຝ່າຍທີ່ເຮັດຜິດ ນີ້ສະແດງວ່າລາວໃຫ້ອະໄພຜູ້ທີ່ເຮັດຜິດ. (1 ໂກລິນໂທ 7:3, 5) ດັ່ງນັ້ນຈຶ່ງບໍ່ມີເຫດຜົນທີ່ຈະຢ່າຮ້າງກັນ. ຫຼັງຈາກນັ້ນ ທັງຜົວແລະເມຍກໍຄວນຊ່ວຍກັນໃຫ້ມີຄວາມຄິດແບບພະເຢໂຫວາໃນເລື່ອງຊີວິດແຕ່ງດອງ.

ໃຫ້ນັບຖືຊີວິດແຕ່ງດອງເຖິງວ່າຈະມີບັນຫາຮ້າຍແຮງ

14. ຕາມ 1 ໂກລິນໂທ 7:10, 11 ສິ່ງໃດອາດຈະເກີດຂຶ້ນໃນຊີວິດຄູ່?

¹⁴ຄລິດສະຕຽນທຸກຄົນຄວນນັບຖືເລື່ອງຊີວິດຄູ່ຄືກັບພະເຢໂຫວາແລະພະເຍຊູ. ແຕ່ບາງເທື່ອກໍເຮັດແບບນັ້ນບໍ່ໄດ້ ຍ້ອນພວກເຮົາເປັນຄົນບໍ່ສົມບູນແບບ. (ໂລມ 7:18-23) ດັ່ງນັ້ນຈຶ່ງບໍ່ແປກໃຈທີ່ບາງຄົນໃນສະຕະວັດທຳອິດມີບັນຫາຮ້າຍແຮງໃນຊີວິດຄູ່ຂອງເຂົາເຈົ້າ. ໂປໂລຂຽນໄວ້ວ່າ: “ຢ່າໃຫ້ເມຍປະຜົວ” ແຕ່ບາງເທື່ອກໍມີການປະຫຼືແຍກກັນຢູ່ແທ້ໆ.—ອ່ານ 1 ໂກລິນໂທ 7:10, 11

ເມື່ອຊີວິດຄູ່ມີບັນຫາ ຜົວເມຍຈະກັບມາຄືນດີກັນໄດ້ແນວໃດ? (ເບິ່ງຂໍ້ 15)

15, 16. (ກ) ເມື່ອມີບັນຫາໃນຊີວິດຄູ່ ຜົວເມຍຄວນມີເປົ້າໝາຍຫຍັງ ແລະຍ້ອນຫຍັງ? (ຂ) ຖ້າມີຜົວຫຼືເມຍທີ່ບໍ່ໄດ້ຮັບໃຊ້ພະເຢໂຫວາຈະເຮັດຕາມເປົ້າໝາຍນີ້ໄດ້ແນວໃດ?

¹⁵ໂປໂລບໍ່ໄດ້ອະທິບາຍສິ່ງທີ່ເຮັດໃຫ້ຜົວເມຍແຍກກັນຢູ່. ເຮົາຮູ້ວ່າບັນຫາບໍ່ແມ່ນວ່າຜົວເຮັດຜິດສິນລະທຳທາງເພດ ເພາະຄັນຊັ້ນ ເມຍກໍມີເຫດຜົນທີ່ຈະຢ່າຮ້າງແລະແຕ່ງດອງໃໝ່ໄດ້. ແຕ່ໂປໂລບອກເມຍທີ່ແຍກກັນຢູ່ກັບຜົວວ່າ “ຢ່າໃຫ້ເພິ່ນເອົາຜົວອື່ນຈັກເທື່ອ” ຫຼືບໍ່ກໍໃຫ້ ‘ເຂົ້າມາເປັນໄມຕີກັນກັບຜົວອີກ.’ ພະເຈົ້າຍັງຖືວ່າເຂົາເຈົ້າຍັງເປັນຜົວເມຍກັນຢູ່ດີ. ໂປໂລບອກວ່າ ບໍ່ວ່າຄູ່ໜຶ່ງຈະປະສົບບັນຫາຫຍຸ້ງຍາກແບບໃດກໍຕາມ ຖ້າບໍ່ມີໃຜເຮັດຜິດສິນລະທຳທາງເພດ ເຂົາເຈົ້າກໍຄວນມີເປົ້າໝາຍທີ່ຈະຄືນດີກັນນັ້ນຄື ແກ້ໄຂບັນຫາຕ່າງໆແລະຢູ່ນຳກັນຕໍ່ໄປ. ເຂົາເຈົ້າຄວນຂໍຄວາມຊ່ວຍເຫຼືອຈາກຜູ້ເຖົ້າແກ່. ສ່ວນຜູ້ເຖົ້າແກ່ຈະບໍ່ເຂົ້າຂ້າງຝ່າຍໃດຝ່າຍໜຶ່ງ ແຕ່ເຂົາເຈົ້າອາດຈະໃຫ້ຄຳແນະນຳທີ່ດີຈາກຄຳພີໄບເບິນ.

¹⁶ຖ້າຄລິດສະຕຽນມີຜົວຫຼືເມຍທີ່ບໍ່ໄດ້ຮັບໃຊ້ພະເຢໂຫວາເດ? ເມື່ອປະສົບກັບບັນຫາ ເຂົາເຈົ້າສາມາດແຍກກັນຢູ່ໄດ້ບໍ? ດັ່ງທີ່ໄດ້ເວົ້າມາແລ້ວ ຄຳພີໄບເບິນບອກວ່າ ການເຮັດຜິດສິນລະທຳທາງເພດຄືເຫດຜົນດຽວທີ່ຈະຢ່າຮ້າງໄດ້. ແຕ່ຄຳພີໄບເບິນບໍ່ໄດ້ບອກເຖິງເຫດຜົນທີ່ຜົວແລະເມຍຈະຕ້ອງແຍກກັນຢູ່. ໂປໂລຂຽນວ່າ: “ຖ້າຜູ້ຍິງຄົນໃດມີຜົວທີ່ບໍ່ເຊື່ອແລະຜົວນັ້ນພໍໃຈຈະຢູ່ນຳເມຍ ຢ່າໃຫ້ເມຍປະຜົວນັ້ນຈັກເທື່ອ.” (1 ໂກລິນໂທ 7:12, 13) ທຸກມື້ນີ້ກໍໃຊ້ຫຼັກການນີ້ຄືກັນ.

17, 18. ເຖິງວ່າຈະມີບັນຫາຮ້າຍແຮງ ເປັນຫຍັງຄລິດສະຕຽນບາງຄົນຕັດສິນໃຈທີ່ຈະຢູ່ນຳກັນຕໍ່ໄປ?

¹⁷ແຕ່ມີບາງກໍລະນີທີ່ “ຜົວທີ່ບໍ່ເຊື່ອ” ສະແດງໃຫ້ເຫັນວ່າລາວບໍ່ “ພໍໃຈຈະຢູ່ນຳເມຍ.” ຕົວຢ່າງ: ຜົວອາດທຳຮ້າຍຮ່າງກາຍຢ່າງຮຸນແຮງ ເຖິງຂັ້ນເມຍຮູ້ສຶກວ່າເປັນອັນຕະລາຍຕໍ່ສຸຂະພາບຫຼືຊີວິດ. ຜົວອາດຕັ້ງໃຈບໍ່ຊ່ວຍເຫຼືອແລະບໍ່ຫາລ້ຽງຄອບຄົວ ຫຼືຂັດຂວາງເມຍບໍ່ໃຫ້ຮັບໃຊ້ພະເຈົ້າ. ໃນກໍລະນີແບບນີ້ ເມຍທີ່ເປັນຄລິດສະຕຽນອາດຈະຕັດສິນໃຈທີ່ຈະແຍກກັນຢູ່ກັບຜົວ ບໍ່ວ່າຜົວຈະເວົ້າແນວໃດກໍຕາມ ເພາະສິ່ງທີ່ຜົວເຮັດສະແດງວ່າລາວບໍ່ “ພໍໃຈຈະຢູ່ນຳ.” ແຕ່ຄລິດສະຕຽນຄົນອື່ນທີ່ມີສະພາບການທີ່ຄ້າຍໆກັນກໍໄດ້ຕັດສິນໃຈທີ່ຈະຢູ່ນຳຜົວຕໍ່ໄປ. ເຂົາເຈົ້າໄດ້ອົດທົນແລະພະຍາຍາມປັບປຸງຊີວິດຄູ່ໃຫ້ດີຂຶ້ນ. ເປັນຫຍັງເຂົາເຈົ້າຕັດສິນໃຈທີ່ຈະເຮັດແບບນັ້ນ?

¹⁸ຖ້າຜົວເມຍແຍກກັນຢູ່ໃນສະພາບການແບບນີ້ ເຂົາເຈົ້າກໍຍັງເປັນຜົວເມຍກັນຢູ່ແລະຍັງມີບັນຫາຫຼາຍຢ່າງທີ່ໄດ້ເວົ້າໄປແລ້ວ. ໂປໂລຍັງຊີ້ໃຫ້ເຫັນອີກເຫດຜົນໜຶ່ງທີ່ຜົວແລະເມຍຄວນຢູ່ນຳກັນ. ລາວບອກວ່າ: “ພະເຈົ້າຖືວ່າຜົວທີ່ບໍ່ມີຄວາມເຊື່ອນັ້ນບໍລິສຸດກໍເພາະເຫັນແກ່ເມຍ ພະເຈົ້າຖືວ່າເມຍທີ່ບໍ່ມີຄວາມເຊື່ອນັ້ນບໍລິສຸດກໍເພາະເຫັນແກ່ຜົວ ບໍ່ຢ່າງນັ້ນ ລູກໆຂອງເຈົ້າຈະບໍ່ສະອາດໃນສາຍຕາພະເຈົ້າ ແຕ່ຕອນນີ້ພວກເຂົາບໍລິສຸດແລ້ວ.” (1 ໂກລິນໂທ 7:14, ລ.ມ.) ຄລິດສະຕຽນຫຼາຍຄົນໄດ້ຕັດສິນໃຈຈະຢູ່ກັບຄູ່ຂອງຕົນທີ່ບໍ່ໄດ້ຮັບໃຊ້ພະເຢໂຫວາ ເຖິງວ່າຈະມີບັນຫາຫຼາຍ. ເຂົາເຈົ້າຮູ້ສຶກດີໃຈຫຼາຍທີ່ໄດ້ເສຍສະລະແບບນັ້ນ ເພາະໃນທີ່ສຸດຄູ່ຂອງຕົນກໍເຂົ້າມາເປັນພະຍານພະເຢໂຫວາ.—ອ່ານ 1 ໂກລິນໂທ 7:16; 1 ເປໂຕ 3:1, 2

19. ເປັນຫຍັງໃນປະຊາຄົມຄລິດສະຕຽນຈຶ່ງມີຫຼາຍຄອບຄົວທີ່ມີຄວາມສຸກຊີວິດຄູ່?

¹⁹ພະເຍຊູໃຫ້ຄຳແນະນຳກ່ຽວກັບການຢ່າຮ້າງ ແລະໂປໂລກໍໃຫ້ຄຳແນະນຳກ່ຽວກັບການແຍກກັນຢູ່ ທັງສອງຢາກໃຫ້ຜູ້ຮັບໃຊ້ພະເຈົ້າມີຄວາມນັບຖືຕໍ່ຊີວິດແຕ່ງດອງ. ປັດຈຸບັນທົ່ວໂລກ ໃນປະຊາຄົມຄລິດສະຕຽນມີຫຼາຍຄອບຄົວທີ່ມີຄວາມສຸກໃນຊີວິດຄູ່. ເຈົ້າອາດຈະເຫັນວ່າໃນປະຊາຄົມຂອງເຈົ້າມີຫຼາຍຄູ່ທີ່ມີຄວາມສຸກ ເພາະຜົວກໍສັດຊື່ແລະຮັກເມຍ ສ່ວນເມຍກໍຮັກແລະນັບຖືຜົວ. ພວກເຂົາເຈົ້າສະແດງໃຫ້ເຫັນວ່າສາມາດເຮັດໃຫ້ຊີວິດຄູ່ເປັນຕາໜ້ານັບຖືໄດ້. ເຮົາດີໃຈທີ່ຜົວເມຍຫຼາຍລ້ານຄູ່ກຳລັງພິສູດວ່າຄຳເວົ້າຂອງພະເຈົ້າເປັນຄວາມຈິງທີ່ວ່າ: “ເພາະເຫດນັ້ນຜູ້ຊາຍຈະລາພໍ່ແມ່ແຫ່ງຕົນແລະຈະໄປຕິດພັນກັບເມຍ ແລະເຂົາທັງສອງຈະເປັນເນື້ອໜັງອັນດຽວ.”—ເອເຟດ 5:31, 33

ຫໍສັງເກດການສະບັບສຶກສາ