1, 2. Hebrai 13:4 chuan engti tûrin nge min chêttîr ang?

KAN za hian Jehova chawimawi kan duh ṭheuh va. Ani chuan kan chawimawi a phu a, min chawimawi lêt tûrin a tiam a ni. (1 Samuela 2:30; Thufingte 3:9; Thu Puan 4:10-11) Sawrkâr thuneitute ang chi, mi dangte pawh chawimawi tûrin min duh bawk a. (Rom 12:10; 13:7) Mahse, chawimawina lantîr lehzual a ngaihna hmun pakhat a awm. Chu chu inneihna hi a ni.

² Tirhkoh Paula chuan: “Mi zawng zawng zîngah inneih hi chawimawiin awm sela, khum pawh tihbawlhhlawh lohvin awm rawh se,” tiin a ziak a. (Hebrai 13:4) Paula chuan inneihna chungchâng a sawi satliah mai a ni lo. Kristiante chuan inneihna chu thil hlu tak anga thlîrin, an chawimawi tûr a ni tiin a hrilh a ni. Nupui pasal nei i nih chuan a bîk takin, inneihna chu, chutiang chuan i thlîr em?

3. Isua’n inneih chungchângah eng thurâwn pawimawh tak nge a pêk? (A thupui chunga milem en rawh.)

³ Inneihna chu thil hlu tak nia i thlîr chuan entawn tûr ṭha tak i zui a ni. Isua ngeiin inneihna chu a chawimawi a. Pharisaite’n inṭhenna chungchâng an zawh khân, inneihna hmasa  ber chungchânga Pathian sawi chu târ langin: “Mipain a nu leh a pa a kalsan ang a, a nupui a vuan ang; tichuan an pahnih chuan tisa pumkhat an lo ni tawh ang,” tiin a sawi a. “Pathianin a zawm tawh chu mihringin ṭhen suh se,” tiin a sawi belh bawk a ni.—Marka 10:2-12 chhiar rawh; Genesis 2:24.

4. Inneihnaa Jehova thiltum chu eng nge ni?

⁴ Isua chuan inneihna dintu chu Pathian a ni tih leh inneihna chu dam chhûng daih tûr a ni tih a pawm a. Pathianin inneihna hmasa ber a ruahman khân, Adam leh Evi hnênah an inṭhen thei tih a sawi lo. Chu aiin, a thiltum chu “an pahnih chuan” nupa nia chatuana inpumkhat tlat tûrin a ni.

5. Engtin nge thihnain inneihna a nghawng?

⁵ Kan hriat angin, Adama’n thil sual a tih khân thil tam tak a inthlâk danglam ta a. Chûng zînga pakhat chu mihringte an rawn thi ṭan a, chu chuan inneihnaah nghawng a nei a ni. Tirhkoh Paula’n Kristiante hnênah thihnain inneihna a tihtâwp chuan a la dam zâwkin mi dang a nei leh thei tih a sawi a ni.—Rom 7:1-3.

6. Mosia Dânin inneihna chungchânga Pathian thlîr dân eng nge min zirtîr?

⁶ Israel mite hnêna Pathian pêk Dânah chuan inneihna chungchâng chipchiar taka târ lan a ni a. Entîr nân, Israel mi pakhat chuan nupui pakhat aia tam a nei thei a. Chu chu Pathianin Dân a pêk hma aṭang rêngin a lo awm tawh a ni. Mahse, Dân chuan hmeichhiate leh naupangte chu dik lo taka cheibâwlna lakah a vênghim a. Entîr nân, Israel mi chuan bâwih pakhat nupuiah a neih a, a hnuah nupui dang a nei leh a nih chuan a nupui hmasa chu tûn hmaa a lo ngaihsak ang bawkin a ngaihsak zawm tûr a ni. A nupui hmasa chu vênghim a, ngaihsak zawm zêl tûrin Pathianin a phût a. (Exodus 21:9, 10) Tûn laiah Mosia Dân chu kan zui tawh lo. Mahse, Pathianin inneihna chu thil  hlu tak angin a thlîr tih min zirtîr a. Chu chuan inneihna chawimawi tûrin min ṭanpui tak zet a ni.

7, 8. (a) Deuteronomy 24:1-a sawi angin Dânin inṭhenna chungchâng eng nge a sawi? (b) Engtin nge Jehova’n inṭhenna chu a thlîr?

⁷ A nih leh, Dânin inṭhenna chungchâng eng nge a sawi? Jehova’n nupate chu inṭhen tûrin duh ngai lo mah se, Dân chuan Israel mipa chu a nupui chungchângah “a chunga thil mawi lo eng emaw a hriat,” chuan a ṭhen thei tih a sawi a. (Deuteronomy 24:1 chhiar rawh.) Dân chuan chu “thil mawi lo,” chu eng nge ni thei tih a sawi lo. Mahse, chu chu thinrimna tûr chhan ho tak ni lovin, thil zahthlâk tak emaw, thil pawi tak emaw a ni ngei ang. (Deuteronomy 23:14) Lungchhiatthlâk takin, Isua hun laia Juda mi tam tak chuan an nupuite chu “eng vâng pawhin,” an ṭhen mai a. (Matthaia 19:3) Chutiang rilru put hmang chu neih kan duh lo tak zet a ni.

⁸ Zâwlnei Malakia hun laiin, mipain Jehova rawngbâwl lo hmeichhe naupang zâwk neih a duh avâng maiin a nupui hmasa a ṭhen chu thil pângngai tak a ni. Mahse, Pathianin inṭhenna chungchânga a thlîr dân chu chiang takin a sawi a. Ani chuan: “Inmâk hi ka haw si a,” tiin a sawi. (Malakia 2:14-16) Pathianin mipa hnênah “a nupui a vuan ang: tichuan tisa pum khat an lo ni tawh ang,” tia a sawi aṭangin inneihna chungchânga a thlîr dân chu a la inthlâk danglam lo va. (Genesis 2:24) Isua pawhin: “Pathianin a zawm tawh chu mihringin ṭhen suh se,” tia sawiin inneihna chungchânga a Pa thlîr dân chu a thlâwp a ni.—Matthaia 19:6.

9. Marka 10:11, 12-a Isua thusawi awmzia chu eng nge ni?

⁹ Mi ṭhenkhat chuan, ‘Kristian tân inṭhen a, kawppui dang neih leh theihna tûr chhan a awm em?’ tiin an zâwt mai thei a. Isua’n: “Tupawh a nupui maa mi dang nei apiang chuan a nupui chu a uirêsan a ni; ani pawh chuan a pasal a ṭhen a, mi dang a neih chuan a uirê a ni bawk,” tia a sawi hi chhinchhiah ang che. (Marka 10:11, 12; Luka 16:18) Isua chuan inneihna chu a chawimawi a, mi dangte pawhin chawimawi ve se a duh tih a chiang hle. Miin a nupui rinawm tak chu main nupui dang a nei a nih chuan a uirê a ni ang. Hmeichhiain a pasal rinawm a ṭhen a nih chuan chutiang bawk chu a ni ang. A chhan chu inṭhenna ringawt chuan inneihna a tihtâwp loh vâng a ni. Pathianin anni chu “tisa pum khat,” angin a la thlîr a. Isua pawhin mipain sualna nei lo a nupui a mâk chuan, a nupui chu uirê thei dinhmun hlauhawmah a awm ang tih a sawi. Chu chu engtin nge a nih theih? Chutih hun lai chuan mâk hnu hmeichhia chuan sum leh pai avângin pasal neih leh ngai niin a inhre mai thei a. Chutiang inneihna pawh chu uirêna tho a ni ang.

10. Kristian tân inṭhen a, mi dang neih leh theihna tûr chhan awmchhun chu eng nge ni?

¹⁰ Isua chuan miin a kawppui a mâk theih  chhan awmchhun chu heti hian a sawi a ni: “Kei chuan ka ti a che u, ‘Tupawh tlangvâl ngaih vâng ni lova, nupui maa mi dang nei apiang chu, a uirê a ni,” tiin. (Matthaia 19:9) Tlâng Chunga Thusawiah chu thu bawk chu a sawi leh a. (Matthaia 5:31, 32) A thusawi ṭum hnihah chuan Isua’n “tlangvâl ngaih vâng,” tih a sawi a. Tlangvâl ngaihnaah chuan uirêna, nawhchizawrhna, nupa ni lote inkâra mipat hmeichhiatna hmanna, mawngkawhurnate, leh ran pâwlnate a tel a ni. Entîr nân, nupui nei lai tuemaw chu hmeichhe dang nên an chêtsual chuan a nupuiin a ṭhen dâwn leh dâwn loh chungchângah thu tlûkna a siam thei a. A ṭhen a nih chuan Pathianin anni chu nupa angin a thlîr tawh lo.

11. Kristian chuan a kawppuiin a uirêsan a nih pawhin engvângin nge inṭhen loh chu a duh mai theih?

¹¹ Isua chuan nupaa a tuemaw zâwk a uirê a nih chuan sualna nei lotu chuan a ṭhen ngei a ngaih thu a sawi lo tih chhinchhiah ang che. Entîr nân, nupui chuan a pasalin a uirêsan chung pawhin inṭhen lova awm chu a thlang mai thei a. Engvângin nge? A pasal chu a la hmangaihin, a ngaidam duh mai thei a, an inneihna siam ṭha tûra ṭan la dun tûrin a duh pawh a ni mai thei. Chu bâkah, nupui tân chuan inṭhen a, pasal nei leh lova a awm chuan harsatna ṭhenkhat a awm ngei ang. Entîr nân, sum leh pai lam leh mipat hmeichhiatna lam mamawhna hi engtin nge ni ang? A lung a lêng ang em? Engtin nge inṭhenna chuan a fate a nghawng ang? Thutaka fate enkawl seilen a harsat phah ang em? (1 Korinth 7:14) Inṭhen duhtu sualna nei lo zâwk chuan harsatna lian tak takte a nei ang tih a chiang a ni.

12, 13. (a) Hosea nupui neihnaah eng thil nge thleng? (b) Engvângin nge Gomeri chu a hruai kîr leh a, an inneihna aṭangin eng nge kan zir theih?

¹² Zâwlnei Hosea thiltawn hian inneihna chungchânga Pathian thlîr dân tam tak min zirtîr a. Pathianin Hosea hnênah “nawhchizuar” Gomeri chu nupuiah nei a, chu “nawhchizuar lakah fa hring” tûrin a hrilh a ni. Gomeri leh Hosea chuan fapa pakhat an nei a. (Hosea 1:2, 3) A hnuah, Gomeri chuan fanu leh fapa a nei leh a, chu chu mipa dang laka mi an nih a rinawm hle. Gomeri chu vawi khat aia tam a uirê chung pawhin, Hosea chuan a nupui atân a la pawm reng a. A tâwpah, Gomeri chuan Hosea chu chhuahsanin, bâwih a ni ta a. Chuti chung pawhin, Hosea chuan a hruai kîr leh a ni. (Hosea 3:1, 2) Jehova chuan Israel hnamte’n a chunga an rinawm lohva, pathian dangte an biak hnua a ngaihdam nawn fo dân târ lan nân Hosea chu a hmang a ni. Hosea nupui neihna aṭangin eng nge kan zir theih?

¹³ Kristian nupaa tuemaw zâwk a uirê a nih chuan thil sual ti lotu Kristian chuan thu tlûkna a siam thei a. Isua’n sualna nei lotu zâwk chuan inṭhenna tûr chhan ṭha a nei a, mi dang a nei leh thei tih a sawi a ni. Mahse, thil tisual lotu zâwkin a kawppui chu a ngaihdam chuan, chu chu thil dik lo a ni lo. Hosea pawhin Gomeri chu a hruai kîr leh a. A hruai kîr leh hnu chuan, mipa dang nên mipat hmeichhiatna an hmang tûr a ni lo tih Gomeri chu a hrilh a ni. Hosea chuan a nupui Gomeri chu hun engemaw ti chhûng “a mutpui lo” a. (Hosea 3:3, New World Translation footnote) Mahse, a tâwpah, Hosea chuan a nupui chu a mutpui leh ngei ang. Chu chuan Pathianin Israel mite chu pawm  leh a duhin, inlaichînna neih leh a duhzia a entîr a ni. (Hosea 1:11; 3:3-5) A nih leh, chu chuan tûn laia inneihna chungchângah eng nge min zirtîr? Thil tisual lotu zâwkin thil tisualtu a kawppui chu mipat hmeichhiatna a hmanpui leh a nih chuan ani chu a ngaidam tihna a ni ang. (1 Korinth 7:3, 5) Chutiang a nih chuan, inṭhen chhan tûr a awm tawh lo vang. Chu mi hnuah, an pahnih chuan inneihna chungchânga Pathian thlîr dân ang nei tûrin an inṭanpui tawn tûr a ni.

14. Korinth thawnkhat 7:10, 11-a sawi angin, inneihnaah eng thil nge thleng mai thei?

¹⁴ Kristian zawng zawng chuan Jehova leh Isua angin inneihna chu an chawimawi tûr a ni. Mahse, mi ṭha famkim kan nih loh avângin mi ṭhenkhat chuan inneihna chawimawi loh châng an nei a. (Rom 7:18-23) Chuvângin, tûn hmaa Kristian ṭhenkhatin inneihnaah harsatna lian tak an nei chu mak kan ti tûr a ni lo. Paula chuan “nupui chuan a pasal ṭhen suh se,” tiin a ziak a. Mahse, a châng chuan chutiang thil chu a thleng a ni.—1 Korinth 7:10, 11 chhiar rawh.

15, 16. (a) Nupa inkâra buaina a lo awm hunah an thiltum tûr chu eng nge ni a, engvângin nge? (b) Jehova be lotu kawppui nei chuan, chu chu engtin nge a nunpui ang?

¹⁵ Paula chuan nupa inṭhenna awmtîrtu dinhmunte chu a sawi lang lo va. Mahse, pasal uirêna ang chi buaina a ni lo tih kan hria a ni. Chutih ni suh se la chuan, nupuiin inṭhenna tûr chhan a neiin, mi dang a nei leh thei ang. Paula chuan a pasal nêna awm hrang nupui chu “pasal nei tawh lovin awm law law rawh se, a nih loh leh a pasal nên vêk innei leh rawh se,” tiin a ziak a. Chuvângin, Pathian chuan anni chu nupa angin a la thlîr reng a ni. Paula’n nupate chuan buaina leh harsatna engpawh nei mah se, a tu amah an uirê lo a nih chuan an thiltum chu an buainate chinfel a, inrem taka chên dun a ni tûr a ni tiin a sawi. Anni chuan kohhran upate hnênah ṭanpuina an dîl thei a. Upate chuan ṭan lam nei lovin, Bible aṭanga thurâwn ṭangkai tak takte an pe thei a ni.

¹⁶ A nih leh, Kristian chuan Jehova be lotu tuemaw nupui pasalah a nei a nih chuan engtin nge ni ang? An inneihnaah buaina a awm chuan awm hran theih a ni ang em? Kan târ lan tâk angin, Bible chuan uirêna chu inṭhen theihna chhan awm chhun a ni tih a sawi a. Mahse, nupate awm hran theihna tûr chhante a sawi lo. Paula chuan: “Hmeichhia pasal ring lo mi nei chuanin a pasalin a hnênah awm reng a lungnih chuan ṭhen suh se,” tiin a ziak a. (1 Korinth 7:12, 13) Chu chu tûn lai hun atân pawh a ni.

17, 18. Khristian ṭhenkhat chuan harsatna lian tak an nei chung pawhin engvângin nge inṭhen loh chu an duh?

 ¹⁷ Mahse, “pasal ring lo mi” chuan a nupui hnêna “awm reng a lungnih” lohzia a târ lanna dinhmunte a awm ṭhîn a. Entîr nân, ani chu a lutuka kutthlâk hmang a ni thei a, a nupui chuan a hrisêlna leh nunna atân hlauhawm niin a ngai mai thei a ni. Chu bâkah, a nupui fanaute tisa lam mamawh a ṭanpui duh lo emaw, a nupui chu Pathian rawngbâwl thei lo khawpin a siam emaw pawh a ni thei. Chutiang dinhmunah, a pasalin engpawh sawi se, a nupui nên ‘awm reng a lungnilo’ tih a târ lan avângin, Kristian nupuiin awm hran ngai nia a hriat chuan mi mal duh thlanna a siam thei a ni. Mahse, chutiang dinhmuna awm Kristian ṭhenkhat chuan an kawppui nêna inṭhen loh chu an duh a. Chhelna lantîrin an inneihna hmasâwn tûrin theih tâwp an chhuah a ni. Engvângin nge chutianga tih chu an duh?

¹⁸ Nupate chu chutiang dinhmuna an awm hrang a nih chuan nupa an la ni reng a, a hmaa kan sawi tâk harsatnate chu an nei mai thei a. Tirhkoh Paula chuan nupate an awm hran lohna tûr chhan dang pawh a sawi a ni. Ani chuan: “Pasal ring lo mi chu a nupui zârah tihthianghlimin a awm a, nupui ring lo mi pawh chu a pasal zârah tihthianghlimin a awm a, nupui ring lo mi pawh chu a pasal zârah tihthianghlimin a awm bawk si a; chuti ni suh sela in fate chu an thianghlim lo vang; nimahsela an thianghlim reng e,” tiin a ziak a ni. (1 Korinth 7:14) Kristian tam tak chuan an dinhmun chu harsa tak a ni chung pawhin Jehova be lotu an kawppui nêna chên dun reng an tum a. Chutianga an inpêkna avânga, a hnua an kawppuite Jehova Thuhretute an rawn nih chuan an lâwm tak zet a ni.—1 Korinth 7:16 chhiar rawh; 1 Petera 3:1, 2.

19. Engvângin nge Kristian kohhranah inneihna hlawhtling tam tak a awm?

¹⁹ Isua chuan inṭhenna chungchângah zilhna a pe a, tirhkoh Paula chuan awm hranna chungchângah thurâwn a pe a ni. An pahnih chuan Pathian chhiahhlawhte’n inneihna chawimawi se tih an duh a. Tûn laiah, khawvêl puma Kristian kohhranah inneihna hlawhtling tam tak a awm a. Pasal rinawm takte’n nupuite hmangaih a, hmangaihna nei tak nupuite’n pasalte zahthiamna lantîrtu nupa hlim tam tak chu in kohhranah i hmu thei a ni. An vaiin inneihna hi chawimawi theih a ni tih an târ lang a. Nupui leh pasal maktaduai tam takin: “Chu mi avâng chuan mipain a nu leh pa kalsanin a nupui a vuan ang a, tin, an pahnih chuan tisa pumkhat an lo ni tawh ang,” tih Pathian thute dikzia an finfiah avângin kan lâwm thei a ni.—Ephesi 5:31, 33.