1, 2. Hadia wamarou dödö ba Heberaiʼo 13:4 sinangea tafalua?

FEFU ita, omasi tafosumange Yehowa. No sinangea itema zumange ba ifabuʼu khöda wa hasambalö iʼameʼegö tödö ita. (1 Zamueli 2:30; Gamaedola 3:9; Famaʼeleʼö 4:11) Omasi göi ia na tafosumange niha böʼö simane ira sohalöwö ba wamatörö. (Roma 12:10; 13:7) Hizaʼi, sabölö tohude moguna taʼameʼegö tödö wongambatö.

² Imane sinenge sotöi Faulo, ”Dozi niha enaʼö laʼosinangegö wangowalu ba böi taʼunö waʼorudu andrö.” (Heberaiʼo 13:4) Lö ibeʼe Faulo lala wangera-ngera si no toʼölö sanandrösa ba wangowalu. Hizaʼi iwaʼö ba niha Keriso enaʼö sindruhu-ndruhu laʼameʼegö tödö wongambatö andrö ba tobali sabölö tohude. Na no mongambatö ndraʼugö, hewisa wamaigiu fongambatö?

3. Hadia mene-mene soguna nibeʼe Yesu sanandrösa ba wongambatö? (Faigi gambara ba wamobörö wamahaʼö.)

³ Na abölö tohude wongambatö andrö ba wamaigimö, no öʼoʼö duma-duma si sökhi. Iʼameʼegö tödö göi Yesu wongambatö andrö. Me so ndra Farizaiʼo sanofu khönia sanandrösa ba wabalisa, ifatunö khöra hadia niwaʼö Lowalangi sanandrösa ba wongambatö siföföna, ”Andrö iröi dania namania  niha awö ninania, ba ha sambua boto ira.” Imane nasa Yesu, ”Hadia zi no iʼosambuaʼö Lowalangi tebai ifabali niha.”​—Baso Mareko 10:2-12; 1 Moze 2:24.

4. Hadia gohitö dödö Yehowa ba wamalua fongambatö?

⁴ Fao dödö Yesu wa Lowalangi zamobörö fongambatö ba moguna daʼö sagötö faʼara. Me ifalua Lowalangi wongambatö siföföna, lö iwaʼö khö Gadamo hegöi Khawa enaʼö fabali ira. Hizaʼi, omasi ia enaʼö ”ha sambua” ira ba wongambatö sagötö faʼara.

5. Hadia lua-lua waʼamate ba wongambatö?

⁵ Tatu öʼila wa oya zi tebulö me no ifalua horö Adamo. Sambua moroi ba gotaluania yaʼia daʼö, mate niha ba molua-lua daʼö ba wongambatö. Itutunö sinenge sotöi Faulo ba niha Keriso wa ha faʼamate zamabali fongambatö ba tola ifuli mangowalu ira ba niha böʼö.​—Roma 7:1-3.

6. Hadia wamahaʼö si tola tahalö moroi ba Goroisa Moze sanandrösa ba wamaigi Lowalangi fongambatö?

⁶ No izara-zara Lowalangi wanutunö ba Goroisa nibeʼenia ba ndraono Gizaraʼeli sanandrösa ba wongambatö. Duma-dumania, latehegö ba ndra matua Gizaraʼeli na töra samösa woʼomonia ira alawe. No mufalua daʼa fatua lö ibeʼe Goroisania Lowalangi. Tobali folumöʼö Goroisa daʼa ba ndra alawe hegöi ba ndraono moroi ba wamakao. Duma-dumania, na mangowalu ndra matua Gizaraʼeli khö zawuyunia ira alawe ba tobali foʼomonia, hizaʼi lö mamalö ibönökhi zoguna khö woʼomonia si oföna simane nifaluania ba zilalö. Iʼandrö khönia Lowalangi enaʼö lö mamalö ilumöʼö ba iʼameʼegö tödö woʼomonia. (2 Moze 21:9, 10) Iadaʼa tenga Oroisa Moze niʼoʼöda. Hizaʼi tobali famahaʼö daʼö khöda wa tohude sibai wamaigi Lowalangi fongambatö andrö. Daʼa göi zanolo yaʼita ba woʼameʼegö tödö fongambatö.

7, 8. (a) Hadia niwaʼö Goroisa nisura ba 5 Moze 24:1 sanandrösa ba wabalisa? (b) Hewisa wamaigi Yehowa fabalisa?

 ⁷ Hadia niwaʼö Goroisa sanandrösa ba wabalisa? Hewaʼae lö irai omasi Yehowa na fabali woʼomo ira matua khö woʼomonia ira alawe, hizaʼi moloʼö Oroisa, tola ifabalisi woʼomonia ira alawe ira matua Gizaraʼeli na ”iʼila ba khönia zi fatuwu khönia”. (Baso 5 Moze 24:1.) Lö nitutunö Goroisa ngawalö ”zi fatuwu”. Hizaʼi, tola manö fangaila sebua daʼö mazui si tebai muʼaohasi ba dödö ba tenga olalöwa side-ide. (5 Moze 23:14) Ba götö Yesu, ato niha Yahudi samabalisi foʼomora ira alawe ”gofu hadia manö mbörö”. (Mataiʼo 19:3) Tatu, lö omasi ita tafalua gamuata simane daʼö.

⁸ Ba götö zamaʼeleʼö sotöi Maleakhi, no toʼölö na ifabalisi woʼomonia ira alawe si oföna foʼomo ira matua. Ifalua daʼa enaʼö tola ihalö ndra alawe sawuyu-wuyu si tenga samosumange Yehowa. Hizaʼi, ihaogö ifatunö Lowalangi hewisa wamaiginia fabalisa me imane, ’fatuwu khögu wabalisa andrö’. (Maleakhi 2:14-16) Lö si tebulö lala wamaigi Lowalangi sanandrösa ba wongambatö iʼotarai ba wamobörö, me imane ’ba molemba ndra matua ba ngambatönia, ba tobali ha sambua boto ira’. (1 Moze 2:24) Fao göi dödö Yesu ba lala wamaigi Namania fongambatö andrö me imane, ”Hadia niʼosambuaʼö Lowalangi tebai ifabali niha.”​—Mataiʼo 19:6.

9. Hadia geluaha wehede Yesu ba Mareko 10:11, 12?

⁹ So ösa zanofu, ’Hadia so dane-dane ba niha Keriso enaʼö tola fabali ba ifuli mangowalu?’ Faigi hadia niwaʼö Yesu, ”Na so zamabali foʼomonia ba mangowalu zui ia ba niha böʼö, no sohorö niha andrö ba faröi ia khö woʼomonia. Na so ndra alawe samabali foʼomonia ba mangowalu ia ba niha böʼö, no sohorö daʼö.” (Mareko 10:11, 12; Luka 16:18) Ba daʼa oroma wa sindruhu-ndruhu iʼameʼegö tödö Yesu wongambatö ba omasi göi ia na simane daʼö wamaigi niha. Na so ndra matua samabalisi foʼomonia ira alawe si lö faröi, no ifalua horö. Simanö göi ndra alawe samabalisi foʼomonia ira matua si lö faröi. Börö me fabalisa andrö lö tobali amozua wongambatö. Ba wamaigi Lowalangi, niha si no mongambatö andrö tobali ”ha sambua”. Iwaʼö göi Yesu wa no ifalua horö ira matua samabalisi foʼomonia ira alawe si lö fasala. Hana wa tola simanö? Na ifuli möi nihalö ndra alawe si no mufabalisi andrö börö me lö samönökhi soguna khönia simane kefe, no amaedola zamalua horö wangowalu daʼö.

10. Hadia zi tobali dane-dane ba niha Keriso enaʼö tola fabali ba tola lafuli mangowalu?

¹⁰ So sambua dane-dane niwaʼö Yesu irege tola fabali. Imane ”Börö daʼö, ufatunö khömi na so zamabali foʼomonia, na tenga börö wohorö, aefa daʼö ifuli mangowalu zui, no sohorö daʼö.” (Mataiʼo 19:9) Ifatunö göi zimane daʼö ba Huhuonia ba Hili. (Mataiʼo 5:31, 32) Dua kali itutunö Yesu sanandrösa ba ”horö”.  Tefarahu ba daʼö ba wamalua fohorö, ira alawe sohorö-horö, fohorö nifalua zi darua niha si lö sangowalu, homoseksualitas, hegöi fohorö ba gurifö. Duma-dumania, na ifalua waʼorudu ba niha böʼö ira matua si no mangowalu, tola ihalö gangetula foʼomonia ira alawe hadia fabali ira mazui löʼö. Na fabali ira, tenga saʼae sambua ngambatö ira ba wamaigi Lowalangi.

11. Hana wa so niha Keriso si lö omasi fabali hewaʼae na so ngambatöra zamalua amuata fohorö?

¹¹ Lö imane Yesu, na ifalua horö niha si no mangowalu, lö zi lö tola löʼö ifabalisi ia foʼomonia. Duma-dumania, tola ifili foʼomo ira alawe ba wondrorogö fongambatöra hewaʼae no ifalua horö foʼomonia ira matua. Hadia mbörö? Tola manö börö me iʼomasiʼö sibai woʼomonia ba iʼefaʼö zala woʼomonia irege falulu fohalöwö ira ba wangaʼazökhi fongambatöra. Simanö göi na ihalö gangetula enaʼö fabali ba lö omasi ia mangowalu ba niha böʼö, tatu oya gabula dödö nitaögönia. Duma-dumania, hewisa sanandrösa ba zoguna khönia, soguna ba mboto hegöi ba waʼorudu? Hadia hulö zi lö awö-awö ia ba worasoinia? Hadia lua-lua wabalisara andrö ba ndraonora? Hadia itugu abua wangebuaʼö yaʼira ba zindruhu? (1 Korindro 7:14) Tatu manö, hasambalö oya gabula dödö sabua nitaögö ngambatö sangai angetula enaʼö fabali hewaʼae na tenga yaʼia zamalua sala.

12, 13. (a) Hadia zalua ba wongambatö Hosea? (b) Hadia mbörö wa ifuli ihalö Gomeri Hosea, ba hadia wamahaʼö si tola tahalö moroi ba wongambatöra?

¹² Salua khö zamaʼeleʼö sotöi Hosea zamahaʼö yaʼita hewisa wamaigi Lowalangi fongambatö. Iwaʼö Lowalangi khö Hosea enaʼö ihalö ndra alawe sotöi Gomeri, samösa ”ndra alawe sohorö-horö” hegöi ’ono horö’ andrö khönia. Moʼono Gomeri hegöi Hosea. (Hosea 1:2, 3) Aefa daʼö moʼono Gomeri, ono alawe ba ono matua, ba tola manö moroi ba ndra matua tanö böʼö daʼö. Hewaʼae töra sakali ifalua gamuata fohorö Omeri, hizaʼi lö ifabalisi ia Hosea. Hewaʼae simanö, iröi Hosea ba tobali ia sawuyu. Hizaʼi, ifuli zui ihalö ia Hosea. (Hosea 3:1, 2) Iʼogunaʼö Hosea Yehowa ba wangoromaʼö wa tenga ha sakali iʼefaʼö zala ndraono Gizaraʼeli hewaʼae faröi ira khönia ba lafosumange lowalangi tanö böʼö. Hadia zi tola tahalö famahaʼö moroi ba wongambatö Hosea?

¹³ Na so ngambatö niha Keriso samalua horö, tola ihalö gangetula ngambatö si lö mamalua sala. Iwaʼö Yesu wa so dane-dane saro ba niha daʼö ba wangetuʼö hadia fabali ba ifuli mangowalu. Hewaʼae simanö, lö fasala na ihalö gangetula ngambatö si lö mamalua sala andrö enaʼö fabali ba aefa daʼö mangowalu ia ba niha böʼö. Lö göi fasala na iʼefaʼö zala woʼomonia andrö. Simane nifalua Hosea, ifuli ihalö Gomeri. Me no mangawuli Gomeri khö Hosea, ifatunö khönia Hosea wa tebai ifalua waʼorudu Omeri ba ndra matua tanö böʼö. Lua-luania lö ifalua Hosea ’waʼorudu’ khö Gomeri, ba tenga sagötö faʼara daʼö. (Hosea 3:3) Hizaʼi ba gafuriatania, ifuli so gamakhaita si sökhi ba gotalua wongambatö Hosea khö woʼomonia ira alawe. Daʼa zangoromaʼö wa omasi sibai Lowalangi ba wanemaʼö iraono Gizaraʼeli sangawuli khönia ba lö mamalö so gamakhaita si sökhi ba gotaluara. (Hosea 1:11; 3:3-5) Hadia wamahaʼönia khöda sanandrösa ba wongambatö iadaʼa? Na ifuli  ifalua waʼorudu ngambatö si lö mamalua sala andrö khö woʼomonia si no mamalua sala, daʼö zangoromaʼö wa no iʼefaʼö zala woʼomonia. (1 Korindro 7:3, 5) Ba lö hadöi saʼae dane-dane saro enaʼö fabali. Aefa daʼö, moguna falulu fohalöwö woʼomo ira matua hegöi foʼomo ira alawe ba wangokhögö lala wangera-ngera simane niʼokhögö Lowalangi sanandrösa ba wongambatö.

14. Moloʼö 1 Korindro 7:10, 11, hadia manö zi tola alua ba zi sambua fongambatö?

¹⁴ Fefu niha Keriso, moguna laʼameʼegö tödö wongambatö simane nifalua Yehowa hegöi Yesu. Hizaʼi, so ösa ba gotaluada zabua wamalua daʼö börö waʼalöʼmoʼahonoada fefu. (Roma 7:18-23) Daʼö mbörö wa lö moguna tokea ita me taʼila wa so ösa ba gotalua niha Keriso ba götö föna zanaögö abula dödö sebua ba wongambatöra. Iwaʼö Faulo wa ”tebai ifabali ia khö woʼomonia ira matua” foʼomo ira alawe. Hizaʼi, itaria tola manö alua zimane daʼa.​—Baso 1 Korindro 7:10, 11.

15, 16. (a) Na so gabula dödö zi sambua ngambatö, hadia zi tobali ohitö dödöra ba hadia mbörö? (b) Hewisa wa tola moguna daʼa ba zi sambua fongambatö si tenga samosumange Yehowa?

¹⁵ Lö ifatunö Faulo hadia manö zi tola alua irege fabali zongambatö. Hizaʼi tola taʼila mbörönia, duma-dumania na ifalua gamuata fohorö foʼomo ira matua. Tola tobali dane-dane daʼö khö woʼomo ira alawe enaʼö fabali mazui ifuli möi nihalö. Isura Faulo wa so nifalua woʼomo ira alawe si no fabali khö woʼomonia ira matua yaʼia daʼö ”böi yamangowalu ia, ba na löʼö, yaʼorudu ia mangawuli khö woʼomonia ira matua”. Tobali, ba wamaigi Lowalangi si sambua ngambatö ira nasa. Iwaʼö Faulo, gofu hadia gabula dödö mazui famakao nitaögö zi sambua ngambatö, na lö hadöi ba gotaluara zamalua amuata fohorö, moguna lalau mangatulö ba wangasiwai abula dödöra ba lö moguna fabali ira. Moguna laʼandrö wanolo khö ndra satua sokubaloi. Lö faʼawö dambai ndra satua sokubaloi, hizaʼi labeʼe mene-mene soguna moroi ba Zura Niʼamoniʼö.

¹⁶ Hizaʼi, hewisa na tenga samosumange Yehowa ngambatö zi samösa niha Keriso? Na so gabula dödö ba wongambatöra, hadia tola fabali ira? Simane si no tatutunö, iwaʼö Sura Niʼamoniʼö wa amuata fohorö zi tobali dane-dane na fabali zongambatö. Hizaʼi, lö nifatunö Zura Niʼamoniʼö hadia mbörö wa tebai fabali zi sambua ngambatö. Imane Faulo, ”Na so dalifusö ira alawe si so foʼomo ira matua  si tenga si sara lala wamati, ba omasi woʼomonia andrö fao ira, böi yamuröi woʼomonia ira matua andrö.” (1 Korindro 7:12, 13) Moguna göi daʼö iadaʼa.

17, 18. Hana wa ato niha Keriso si lö omasi fabali hewaʼae na oya gabula dödö ba wongambatöra?

¹⁷ Hizaʼi, so ösa zalua sangoromaʼö wa so ’woʼomo ira matua si tenga si sara lala wamati’ si lö fao tödö na ’fao ira’ woʼomonia ira alawe. Duma-dumania, iböbözi mazui ifakao woʼomonia ira alawe irege irasoi wa tola teʼala waʼaurinia. Lö ibönökhi zoguna khö woʼomonia ira alawe hegöi soguna ba nösi nomonia mazui lö itehe khö woʼomonia ba wamosumange Lowalangi. Na alua daʼö, tola manö so ba wangera-ngera woʼomo ira alawe wa lö omasi woʼomonia ira matua enaʼö ’fao ira’ hewaʼae lö alua ba mbewe woʼomonia ira matua daʼö. Moloʼö yaʼia, angetula sabölö tefaudu yaʼia daʼö fabali. Hizaʼi, so göi ngambatö niha Keriso tanö böʼö sanaögö simanö, ba lö omasi ira fabali. Ebolo dödöra ba wanaögö salua ba laʼodödögö ba wangaʼazökhi fongambatöra. Hana wa lahalö gangetula simane daʼö?

¹⁸ Hewaʼae na fabali ira, hizaʼi lö aefa ira tobali si sambua ngambatö ba hasambalö lataögö gabula dödö simane si no tatutunö. So dane-dane tanö böʼö nifatunö Waulo enaʼö lö fabali. Imane, ”Teʼamoniʼö woʼomo ira matua si tenga si sara lala wamati andrö börö woʼomonia ira alawe, ba teʼamoniʼö woʼomo ira alawe si tenga si sara lala wamati börö woʼomonia ira matua andrö. Na löʼö, raʼiö ndraonomi. Hizaʼi teʼamoniʼö ira iadaʼa.” (1 Korindro 7:14) Ato niha Keriso si lö omasi fabali khö ngambatöra si tenga samosumange Yehowa hewaʼae oya lataögö gabula dödö ba wongambatöra. Itaria, so ngambatö si tenga si sara lala wamati si tobali Samaduhuʼö Yehowa ba gafuriata. Tatu omuso sibai dödöra na alua zimane daʼö.​—Baso 1 Korindro 7:16; 1 Fetero 3:1, 2.

19. Hadia mbörö wa ato niha Keriso ba gangowuloa sofozu ba wongambatö?

¹⁹ Ibeʼe Yesu mene-mene sanandrösa na fabali auri, ba ibeʼe mene-mene sinenge sotöi Faulo sanandrösa ba wabalisa. Yesu hegöi Faulo, omasi ira na fefu zamosumange Lowalangi, laʼameʼegö tödö wongambatö. Iadaʼa oya wongambatö ba mbanua niha Keriso ba zi sagörö ulidanö sanöndra faʼowua-wua dödö. Lö faröi woʼomo ira matua ba laʼomasiʼö woʼomora ira alawe. Foʼomo ira alawe laʼomasiʼö ba laʼosinangegö woʼomora ira matua. Tatu anehe ndraʼugö ngambatö simane daʼö ba mbanua niha Keriso si farahu yaʼugö. Fefu ira, laʼameʼegö tödö wongambatö. Omuso göi dödöda me zuta ngambatö soloʼö fehede Lowalangi andre me imane, ”Andrö wa iröi dania namania niha awö ninania, ba falemba dödönia khö ngambatönia ba ha sambua boto ira.”​—Efeso 5:31, 33.