1, 2. Ко со ваљани те поттикнинен амен о лафија таро Евреите 13:4?

САРИНЕ мангаја те сикава чест е Јеховаске. Ов заслужинела адава хем ветинѓа аменге кај ов да ка сикавел аменге чест (1. Сам. 2:30; Изр. 3:9; Отк. 4:11). Ов исто аѓаар мангела те поштујна е јавере манушен, сар на пример е државна службеникон (Рим. 12:10; 13:7). Ама, ко јекх подрачје таро живото ваљани посебно те сикава поштовање — ко брако.

² О апостол Павле пишинѓа: „Сарине ваљани те поштујнен о брако хем и брачно врска ваљани те овел чисто“ (Евр. 13:4). Акалеа о Павле денѓа јекх бут важно совет. Ов поттикнинѓа е христијанен те поштујнен о брако, јавере лафенцар те дикхен ки лесте сар нешто скапоцено. Дали ту да дикхеа аѓаар ко брако, посебно ко тло брако?

3. Кова важно совет денѓа о Исус башо брако? (Дикх и слика ко почеток тари статија.)

³ Ако дикхеа ко брако сар нешто скапоцено, ту џаја пало е Исусескоро пример. Лескоро стави башо брако дикхела пе таро адава со вакерѓа е фарисеенге. Кеда пучле ле башо развод, ов спомнинѓа адава со вакерѓа о Девел  башо прво брако: „Адалеске о мануш ка мукхел пле даја хем пле даде хем ка спојнел пе пле ромњаја, хем ола ка овен јекх тело“. Пало адава о Исус вакерѓа: „О Девел со пханља те овел јекх, о мануш те на одвојнел“. (Читин Марко 10:2-12; 1. Мој. 2:24.)

4. Која сине е Јеховаскири намера башо брако?

⁴ Акалеа о Исус потврдинѓа кај о Девел тано адава со керѓа о брако хем кај и брачно врска ваљани те трајнел вечно. Кеда о Девел керѓа о прво брако, ов на вакерѓа е Адамеске хем е Еваке кај шај те развединен пе. Наместо адава, лескири намера сине ола те ачховен ко брако засекогаш.

5. Сар влијајнела о мерибе упро брако?

⁵ Џанаја кај, кеда о Адам грешинѓа, бут буќа менинѓе пе. Јекх таро адала промене сине со о мануша почминѓе те мерен, а акава влијајнѓа упро брако. О апостол Павле објаснинѓа е христијаненге кај, ако јекх таро брачна партнерија мерела, о јавер тано слободно палем те прандинел пе (Рим. 7:1-3).

6. Со сикљоваја таро е Мојсеескоро закони башо адава сар дикхела о Девел ко брако?

⁶ Ко Закони со денѓа ле о Девел е Израелцонге сине упатствија башо брако. На пример, јекхе Израелцо шај сине те овел ле повише ромња. Акава обичај постојнела сине панда англедер о Девел те дел о Закони. Ама, о Закони заштитинела сине е џувлен хем е чхавен ко асавке бракија. На пример, ако јекх Израелцо прандинела пе сине јекхе робинкаја хем пало несаво време лела песке сине панда јекхе ромња, ов понадари да мора сине те грижинел пе башо потребе е прво ромњакере сар со керела сине адава англедер. О Девел родела сине ов понадари да те заштитинел ла хем те грижинел пе лаке (2. Мој. 21:9, 10). Иако аменге авдиве на важинела е Мојсеескоро закони, ама лестар шај те дикха кај о брако тано бут скапоцено англо е Девлескере  јакхја. Акава поможинела аменге да те ценина о брако.

7, 8. а) Спрема 5. Мојсеева 24:1, со пишинела сине башо развод ко Закони? б) Сар дикхела о Јехова ко развод?

⁷ Со пишинела сине ко Закони башо развод? Иако о Јехова никогаш на мангља јекх ром хем јекх ромни те развединен пе, о Закони дозволинела сине јекх Израелцо те развединел пе тари пли ромни ако ој понашинела пе ко начин кова со на личинела јекхе ромњаке. (Читин 5. Мојсеева 24:1.) Ко Закони на пишинела сине сој тано вклучимо ко асавко понашибе. Ама, адава сигурно на сине несави тикни бути, него нешто лаџаво хем бут сериозно (5. Мој. 23:14). Жално тано адава со ко време е Исусескоро бут Евреија развединена пе сине таро пле ромња „баши било сави бути“ (Мат. 19:3). Сигурно на мангаја те овел амен асавко стави.

⁸ Ко време кеда живинела сине о пророко о Малахија, бут рома развединена пе сине таро пумаре ромња, веројатно те шај те женинен пе потерне џувленцар кола со на служинена сине е Јеховаске. Ама о Девел јасно вакерѓа сар дикхела ко развод. Ов вакерѓа: „Ме мрзинава о развод“ (Мал. 2:14-16). О Девел дикхела сине ко брако исто сар ко почеток кеда вакерѓа кај о мануш „ка спојнел пе пле ромњаја, хем ола ка овен јекх тело“ (1. Мој. 2:24). О Исус да дикхела сине исто сар пло Дад ко брако кеда вакерѓа: „О Девел со пханља те овел јекх, о мануш ма те одвојнел“ (Мат. 19:6).

9. Со значинена о лафија таро Марко 10:11, 12?

⁹ Некој шај те пучел: „Дали иси несави причина јекх Девлескоро слуга те развединел пе хем палем те прандинел пе?“ Приметин со вакерѓа о Исус: „Секој со ка развединел пе тари пли ромни хем ка лел јавере ромња, керела прељуба спрема и прво. Хем ако и ромни развединела пе таро пло ром хем пало адава лела јавере роме, керела прељуба“ (Мар. 10:11, 12; Лука 16:18). Таро акава јасно дикхаја кај о Исус поштујнела сине о брако хем мангела сине о јавера да те керен адава. Ако несаво ром развединела пе тари пли верно ромни хем палем кхувела ко брако, ов керела прељуба. Исто акава важинела ако јекх ромни развединела пе таро пло верно ром. Акава тано аѓаар соске коркори о развод на значинела крајо башо брако. Англо е Девлескере јакхја ола понадари да тане „јекх тело“. О Исус исто аѓаар вакерѓа кај ако јекх ром развединела пе тари пли ромни со нане криво, анела ла ки опасност те керел прељуба. Сар? Ко адава време, јекх разведими џувли шај ка ваљани сине палем те кхувел ко брако таро финансиска причине. Адалеа уствари, ој ка керел прељуба.

10. Која тани и единствено причина јекх Девлескоро слуга те шај те развединел пе хем те овел слободно палем те прандинел пе?

¹⁰ О Исус вакерѓа која тани и единствено причина башо развод: „Вакерава туменге, секова јекх со ка  развединел пе тари пли ромни, освен башо сексуално неморал [грчко: порниа], хем кхувела ко брако јавераја, керела прељуба“ (Мат. 19:9). Исто мисла пхенѓа ки Проповед ки гора (Мат. 5:31, 32). Ко солдуј случаија, о Исус керела сине лафи башо сексуално неморал. Ко адава тане вклучиме гревија сар сој прељуба, проституција, хомосексуалност, сексуална односија животненцар хем сексуална односија машкар дуј мануша со нане ко брако. На пример, ако несаво мурш сој тано ко брако керела неморал, лескири ромни шај те одлучинел дали ка развединел пе или на. Ако развединела пе, англо е Девлескере јакхја ола нане више ко брако.

11. Соске несаво Девлескоро слуга шај те одлучинел те на развединел пе иако иси ле библиско причина башо адава?

¹¹ Приметин кај о Исус на вакерѓа кај ако јекх таро брачна партнерија керела неморал, о јавер со нане криво мора те развединел пе лестар. На пример, и ромни шај ка одлучинел те ачховел ко брако иако о ром керѓа неморал. Соске? Шај ој понадари да мангела ле хем спремно тани те простинел леске хем те пробинел заедно леа те керен о брако те овел пошукар. Исто аѓаар, ако развединела пе хем палем на прандинела пе, шај те овен ла несаве пхарипа. На пример, сар ка задоволинел пле материјална хем сексуална потребе? Ка осетинел пе ли коркори? Сар ка влијајнел о развод упро чхаве? Дали ка овел лаке попхаро коркори те сикавел лен башо Јехова? (1. Кор. 7:14). Јасно тано кај ако јекх брачно партнери со нане криво одлучинела те развединел пе ка овен ле бут пхарипа.

12, 13. а) Со случинѓа пе ко е Осијаскоро брако? б) Соске о Осија иранѓа е Гомера ки песте хем со шај те сикљова таро ленгоро брако?

¹² Таро адава со доживинѓа о пророко о Осија шај бут те сикљова башо адава сар дикхела о Девел ко брако. О Девел вакерѓа е Осијаске те лел ромњаке јекхе џувља со викинела пе сине Гомер „која со ка керел неморал хем ка бијанел чхаве таро неморал“. Е Гомера хем е Осија сине лен чхаво (Оси. 1:2, 3). Пало несаво време, ој бијанѓа чхај хем панда јекх мурш, веројатно таро јавер мануш. Иако и Гомер повише пути керѓа прељуба, о Осија ачхило лаја ко брако. Пало несаво време, ој мукхља е Осија хем ули робинка. Ама, о Осија кинѓа ла хем палем иранѓа ла ки песте (Оси. 3:1, 2). О Јехова користинѓа е Осија те сикавел кај ов секова пути простинела сине е Израелеске, иако о народо на сине леске верно хем служинела сине јавере девленге. Со шај те сикљова таро е Осијаскоро брако?

¹³ Ако јекх брачно партнери керела неморал, о јавер мора те одлучинел со ка керел. О Исус вакерѓа кај ки асавки ситуација о брачно партнери со нане криво иси ле причина те развединел пе хем тегани тано слободно палем те прандинел пе. Ама, нане те овел погрешно ако о брачно партнери со нане криво одлучинела те простинел. О Осија палем иранѓа е Гомера ки песте. Кеда ој иранѓа пе ко Осија, ов вакерѓа лаке кај на смејнела те овен ла сексуална односија јавере муршеа. Е Осија на сине ле односија е Гомераја несаво време (Оси. 3:3). Ама пало адава, сигурно сине ле палем односија пле ромњаја. Акава сикавѓа кобор сине спремно о Девел палем те  прифатинел е Израелцон хем понадари да те грижинел пе ленге (Оси. 1:11; 3:3-5). Со сикавела амен акава башо брако? Ако о брачно партнери со нане криво палем иси ле сексуална односија пле брачно партнереа со керѓа неморал, адалеа сикавела кај одлучинѓа те простинел леске (1. Кор. 7:3, 5). Ко асавко случај нане више причина башо развод. Пало адава, о ром хем и ромни ваљани заедно те поможинен јекх јекхеске те дикхен ко брако сар о Девел.

14. Спрема 1. Коринќаните 7:10, 11, со шај те овел ко брако?

¹⁴ Са е Девлескере слуге ваљани те поштујнен о брако сар о Јехова хем о Исус. Ама, адалеске со сием несовршена, понекогаш адава на успејнела сариненге (Рим. 7:18-23). Адалеске на ваљани те изненадинел амен адава со несаве христијања таро прво веко сине лен баре проблемија ко брако. О Павле пишинѓа: „И ромни на ваљани те џал песке таро пло ром“. Ама понекогаш адава случинела пе сине. (Читин 1. Коринќаните 7:10, 11.)

15, 16. а) Сави цел ваљани те овел е брачно партнерен кеда иси лен проблемија ко брако хем соске? б) Сар акава важинела чак кеда јекх таро брачна партнерија на служинела е Јеховаске?

¹⁵ О Павле на објаснинѓа соске несаве брачна партнерија одлучинена сине те одвојнен пе. Ама џанаја кај о проблеми на сине ко адава, на пример, кај о ром керѓа неморал. Ко асавко случај е ромња ка овел ла сине причина те развединел пе хем палем те кхувел ко брако. О Павле пишинѓа кај и ромни сој одвојми таро пло ром ваљани те ачховел „бипрандими или те иранел пе палем пле роместе“. Англо е Девлескере јакхја ола о дуј тане панда ко брако. О Павле вакерѓа кај, бизи разлика саве проблемија иси е брачно партнерен, ако никој лендар на керела неморал, ленгири цел ваљани те овел те смиринен пе, јавере лафенцар те решинен о проблемија хем те ачховен заедно. Шај те роден помош таро старешине. О старешине нане те овен тари никаскири страна, него ка ден практична советија тари Библија.

¹⁶ Ама, со ако јекх Девлескоро слуга тано ко брако некасаја со на служинела е Јеховаске? Кеда ка овен лен проблемија ко брако, дали тано прифатливо те одвојнен пе? Сар со дикхлем више англедер, и Библија вакерела кај о сексуално неморал тано причина башо развод. Ама ки лате на пишинела таро кола причине шај несаво брачно пари те одвојнел пе. О Павле пишинѓа: „И ромни со иси ла ром со нане вернико, а ов прифатинела те ачховел  лаја, ма те мукхел пле роме“ (1. Кор. 7:12, 13). Акава важинела аменге да авдиве.

17, 18. Соске несаве христијања ачхиле пле брачно партнереа иако сине ки бут пхари ситуација?

¹⁷ Ама, иси случаија кеда о ром со нане вернико, пле понашибаја сикавела кај на „прифатинела те ачховел“ пле ромњаја. На пример, шај бут физички малтретиринела ла, чак добором бут со ој мислинела кај лакоро састипе или живото тане ки опасност. Шај на мангела те грижинел пе лаке хем пле фамилијаке ко материјално поглед, или шај керела те нашти те служинел е Јеховаске. Ко асавке случаија, јекх христијанка шај ка дикхел кај лакоро ром на „прифатинела те ачховел лаја“, бизи разлика со вакерела ов, хем адалеске шај ка одлучинел кај мора те одвојнен пе. Ама јавера христијанке ки слично ситуација одлучинѓе те ачховен пле брачно партнереа. Ола истрајнѓе хем пробинѓе те керен пошукар пло брако. Соске анѓе асавки одлука?

¹⁸ Ако јекх брачно пари одвојнела пе баши асавки ситуација, англо е Девлескере јакхја ола понадари да тане ко брако хем ка овел лен о пхарипа баши кола со керѓем англедер лафи. О апостол Павле вакерѓа панда јекх причина соске тано шукар о брачна партнерија те ачховен заедно. Ов пишинѓа: „О ром со нане вернико тано свето преку пли ромни хем и ромни со нане вернико тани свето преку о пхрал. Те на овел сине акава аѓаар, тумаре чхаве нане те овен сине чиста, ама акана ола тане света“ (1. Кор. 7:14). Бут христијања одлучинѓе те ачховен пле брачно партнереа со на служинела е Јеховаске иако сине ки бут пхари ситуација. Сине ленге бут мило со керѓе асавке жртве соске пало несаво време ленгоро брачно партнери уло е Јеховаскоро сведоко. (Читин 1. Коринќаните 7:16; 1. Пет. 3:1, 2.)

19. Соске иси бут успешна бракија ко христијанска собранија?

¹⁹ О Исус денѓа совет башо развод, а о апостол Павле денѓа совет башо одвојбе. О солдуј џене мангена сине е Девлескере слуге те поштујнен о брако. Авдиве ко христијанска собранија ко цело свето иси бут успешна бракија. Шај ко тло да собрание иси бут асавке бракија коте со о пхраља сикавена мангипе пле ромњенге, а о пхења хор поштујнена пле ромен. Сарине ола сикавена кај шај те поштујнел пе о брако сар поклон таро Девел. Бахтале сием со милионија брачна парија сикавена кај адава со вакерѓа о Девел тано чаче: „О мануш ка мукхел пле даја хем пле даде хем ка спојнел пе пле ромњаја, хем ола ка овен јекх тело“ (Еф. 5:31, 33).