1, 2. Rofyor kwinfir roi imbe wafrur ro kenem Bedi, rosai ḇefnai fa ipyum syadi rwower Yahwe anun Ḇyena? (Mam sonin ro randak artikel ine.)

ROMA ḇaido inai babo disau ido, na rwower anun ḇebor ḇekur rosai imbe wafrur ro ras ḇarpon iyama. Guru, sinan sya, ḇaido snonkaku ḇesesya na sanun ḇe Au fa waksewar farkarkor ḇekaki ḇaido fararur ḇepyum insama nwa pipi nabore. Mboi, Yahwe danun fa wafrur roi ḇese. Kakuḇae, imarisen fa wafarkor pyum ro rumfarkor insama nari wapok fa wafamfon fandandun mankun Bena. (Kolose 3:23) Mboi Yahwe fyawi kako fyor babo kaker ine, fandun fa wafrur wos snemuk ḇefarfnak ḇa. Ma snemuk wun anna naiso nari ḇeyap kankenem Bedi ro ras ḇarpon iyama. Inja, Yahwe ḇyuk wos farkin ro Refo nari ḇefarkin ma ḇefnoḇek Au insama wafrur fa imarisen ro fafisu rasras ḇepupes ine.​—Matius 24:14.

² Ḇefnder awer, Yahwe ima ifawi roi nakam. Ifawi rosai  nari ḇeḇesya ro ras ḇarpon iyama, ma ifawi mnis kaku papupes dunya ine isya fyanam kaku kwar. (Yesaya 46:10; Matius 24:3, 36) Ma Yahwe myambir Au kaku. Ifawi rosai na ḇefrur fa waryaḇ ma waryaḇ ḇa. Wos anun ro snonkaku sya rya napyum, mboi neknam ro wos Refo ya ḇa ido na napyum ḇaḇeri.​—Amsal 19:21.

3, 4. Snar Adam ma Eva surower anun ḇeḇyeḇa ḇa na, rosai su ma romawa suḇesya sismai na?

³ Wos anun ḇepyum ḇa na naisya ro fafisu naiwara isof ro fafisu ine. Setan iso ḇerandak ḇeḇuk wos anun ḇepyum ḇa ḇe snonkaku koine. Ikofen ḇe Eva i ḇo doḇe nari Adam susmai aski syadi rofyor sukinfir ro mankunsu moḇsa sukenem raya. (Kejadian 3:1-6) Mboi Setan ima fyaḇri mankundi! Imarisen fa Adam ma Eva, romawa na sukapar sya kako, sisouser ma sisyom faro i, mboi Yahwe I ḇa. Setan dakfrur roi ono ḇaḇeri faro snonkaku sya. Yahwe iso ḇeḇuk kwar roi sifandun nakam. Yahwe ifrur su fa suḇe imbeswa, ḇyuk yaf ḇepyum kaku suḇarek ro na, ma ḇyuk baken ḇemnis kaku faro su insama sukenem fyoro.

⁴ Faḇye kaku, Adam ma Eva susouser faro Allah ḇa. Rarirya, suḇinkwanbur Mankun ḇeḇuk kankenem faro su kwar. Susmai bon ḇeḇyeḇa kaku. Raris pampen kyapafbur knam ḇyedi, fawawas Adam ma Eva suḇemansar binsar ma sumar. Romawa suḇesya kako, ma kokam koḇekandera. (Roma 5:12) Snonkaku ḇebor ḇero baboine sisouser faro Allah ḇa ma sifrur marisen sena. (Efesus 2:1-3) Bon rosai sismai na? Refo doḇe ”fawawinanem . . . noḇa” rofyor snonkaku sembroḇ faro Yahwe I.​—Amsal 21:30.

5. Rosai Allah ikyar ro snonkaku sya, ma roi ikyar nane nkaku ke?

⁵ Yahwe ikyar kaku snonkaku ono sisya, roma inai babo ḇebor sya kako, simarisen sakmambir I ma sakfarmyan ḇe I. (Mazmur 103:17, 18; 110:3) Yahwe iswar kaku roma inai babo ansine! Au iso oso rofandu si ke? Rarirya ido, Ausya wasmai ”roi ḇepyum” ḇebor ḇerama ro Allah kwar, ma naiso ḇeḇuk aski ro kenem Bedi. (Wasya Mazmur 103:5; Amsal 10:22) Nari kawos roi rifyak ro roi ḇepyum nane. Naiso roḇean rur, bati ḇepyum, aw ḇepyum, ma ḇaḇemkei ḇekaku.

6. Rosai ḇefnai fandun fa kosewar kaku fa kofawi Allah marisen Ḇyena, ma rosai Yahwe fyasos kwar insama nafnoḇek konya?

⁶ Snonkaku koine komnis aiwan sya ḇa. Koma kona fandandun fa komambir Manḇefrur ko. (Matius 4:4) Korower Allah ido, na kosmai fawawi, fawawinanem, ma aski. Yesus doḇe, ”Aski faro snonkaku ḇefawi sima sfandun farkankin ro Allah.” (Matius 5:3, NW) Allah ḇyuk Refo ḇe ko ma roro ’manfamyan ḇeḇesyowi ma ḇefawi nananem’, fyasos roi nakam insama nafnoḇek ko fa kosambraḇser kakyar koḇena. (Matius 24:45) Kap roi ḇeḇefasos nane ḇe roḇean rur kukro nsambraḇser kakyar koḇena ma nafrur fa ḇaḇebati koḇena  kuker Yahwe I nako syadi wer. Komarisen snar kona roḇean rur na nabore!​—Yesaya 65:13, 14.

7. Moḇsa roḇean rur Allah ḇyuk na nafnoḇek Au rai?

⁷ Roḇean rur na nbuk fawawinanem ḇe Au ma samambraḇ fa kwara mnis, naiso ḇekadaunwarek Au ro samswen ḇebor na. (Wasya Amsal 2:10-14.) Rari suine na nafnoḇek Au fa wafawi roi ḇeankarkar na. Raris, ankarkar ḇeyoḇe Manḇefrur ima isya ḇa ḇaido pipi ma arasai naiso nari ḇeḇuk aski ḇe Au. Nane nafnoḇek Au kako fa pampum marasrisen ḇaido kenem ḇeḇyeḇa na. Inja, swewar fa nwa fawawinanem ma karkara ḇemnis. Rarirya, na ḇaḇir ro mankundaw Yahwe ima iswar Au ma imarisen roi ḇepyum ḇe Au.​—Mazmur 34:8; Yesaya 48:17, 18.

8. Rosai ḇefnai fandun fa wafanam ḇe Allah ro kirine, ma moḇsa nane nun fainda ḇe Au ro ras ḇarpon iyama?

⁸ Kero wer, nari roi ḇero Setan dunya ḇyena kam neḇekakok. Yahwe I monda nari ḇekadaunwarek ko ma ḇefasos roi kofandun na, rosai kan ro ras ḇe ras kako. (Habakuk 3:2, 12-19) Inja, kirine oras fa wafanam syadi ḇe Allah ma swambraḇser kakyar Bena faro I. (2 Petrus 2:9) Wafrur rarirya ido, rosai na ḇekur Au na, nwa kakakyar nari Yahwe kyadaunwarek Au raris Daud i. Ikofen, ”Yamam ker Yahwe I ro ḇarpon ayedi. Nari yapok yaḇeḇirḇar ḇaḇeri, kukro isya ryo ḇar raku ayedi.”​—Mazmur 16:8.

9. (a) Imnis kowasya ro Yohanes 6:44, rosai Yahwe ifrur ya? (b) Rofyor Saksi sya sisrowyae randak si ido, rosai sifawi kwar ro ḇesesya na?

⁹ Rofyor wasrow randak snonkaku oso ḇefarmyan Yahwe I ḇa, na mambir kaku i ke? Imbude na wafawi snonsnon ḇyedi ma moḇ isnai raya, mboi wafawi roi nabor kuker i ḇa. Mboi fyor wasrow randak snonkaku oso ḇefarmyan ḇe Yahwe ido, na iḇese. Wafawi kaku iswar Yahwe I. Wafawi Yahwe myam roi  ḇepyum ro i, inja dor i fa ḇyekina Ḇyesi ḇeḇuk samsyom faro I. (Wasya Yohanes 6:44.) Ro moḇ risai ryama ḇaido iba ro ya, wafawi nabor kuker i kwar, ma dakfawi nabor Au kako!

10, 11. Roi ḇemnis rosai Yahwe kawasa Ḇyesi sismai na, ma moḇsa mam roi nane rai?

¹⁰ Kawan ḇa fyor wasrow kuker min Saksi ḇese ido, wafawi kwar roi ḇefrur fa wamnis kuker i. Muyawos ro wos ḇesisye, mboi muyawos wos ḇemnis ”wos ḇesren” isoine kakaku ya. (Zefanya 3:9) Ine kyurfasnai mukyar faro Allah, mukenem imnis marisen Ḇyena, ma musmai saneraro ḇemnis ro fafisu iwama. Roi nane nafnoḇek mu fa mukyaryae mu ma musambraḇser ḇaḇebati ḇekain fyoro.

¹¹ Snar wasyom ḇe Yahwe I, inja bisa wakofen nwa bati ḇepyum kwar. Wasrow si ro ras oso ḇaim mboi nwa bati ro supswan ine ḇesiper! Na kwara snonkaku ḇese ḇefarmyan ḇe Yahwe I ḇa sya saksmai roi ḇepyum ḇeradine ke?

12. Aw ḇepyum ḇeḇeso rosai na wafrur ya?

¹² Wasya Pengkhotbah 11:9–12:1. Nwa aw ḇeḇeso waḇe wafrur na ke? Imbude kwara fa wawasya Refo ro ras ḇe ras, buk kankarem ḇepyum syadi ḇaido wun ḇar oso ro fananjur na. Oroḇaido Auisya swewar fa wakir syadi ro buk Refo ro ḇaḇeḇaryas. Moḇsa ḇaḇir rai rofyor mam ḇesesya soḇe wafrur roi ḇepyum kwar? Na wamarisen kaku ḇae! Kukro? Ausya wafrur rosai Yahwe imarisen na, raris Yesus i.​—Mazmur 40:8; Amsal 27:11.

13. Rariso fararmyan ḇe Allah ipyum syadi ro mam monda faro aw ḇero dunya ine?

¹³ Mam monda faro fararmyan Bena ḇe Yahwe I ido, ima wafrur fararur ḇeyun aski ma ḇeḇuk payamyum ro kenem Bedi. Paulus danun radine, ”Iḇyekada mkosambraḇ ma mkodworen. Mkofararur pdef kaku ḇeri faro Manseren, snar naek srar mkofawi mboi roi mkofrur faro Manseren nakam, nari nefromoḇa.” (1 Korintus 15:58) Imbape, fyor snonkaku sya smam monda faro aw ḇero dunya ine, raris sisewar pipi ḇaido snonsnon ido, sisya sismai aski oḇa. Isyadi wer sismai nana arasai nabor kwar, mboi fyorno ido sḇaḇir nakam nefromo monda. (Lukas 9:25) Kofarkor roi ine ro Raja Salomo farfyar ḇyedi.​—Roma 15:4.

14. Farkarkor rosai wun ro Salomo fawar ḇyedine?

¹⁴ Salomo ima nya arasai nabor kaku ma nya papoik ḇeba kaku. Dawos ḇe mankundi, ”Nari yasewarpan fa yaḇero marasriseni ma yamam bon rosai na yasmai ya.” (Pengkhotbah 2:1-10) Inja Salomo ḇyawes rum ḇepyum kaku, ifrur yaf ḇepduk kaku, ma rosai monda imarisen na. Isya ismai aski ma doryaḇ ke? Fafisu Salomo myam kaḇer roi ifrur kwar na, doḇe, ”Yamam mboi nakam nefromo monda”. Ikofen wer, ”Nakam nefainda ḇaḇeri”. (Pengkhotbah 2:11) Wun farkarkor ro Salomo fawar ḇyedine ke?

15. (a) Rosai ḇefnai fa wafandun kakyar ya? (b) Raris kofarkor ro Mazmur 32:8, moḇsa ine ifnoḇek Au rai?

¹⁵ Sia sifrur sasar ma sismai bon ḇeḇyeḇa kwar insape sun farkarkor ro na. Yahwe imewer wasmai roi ḇeradine.  Imarisen rwower ma wasouser faro I. Ine nefandun kakyar, mboi na wafafko ḇaḇeri faro rosai kwinfir ro kenem Bedi snar kakyar Bena. Ma Yahwe nari ipok fa ḇyefnder ḇaḇeri saswar wafasnai kwar faro snonsnon Ḇyedi. (Ibrani 6:10) Inja, swewar fa ḇawes kakyar ḇesambraḇ. Rarirya na kwinfir roi ḇepyum ro kankenem ma mam ro mankundaw Mami Bedi ro nanki, Yahwe I, imarisen wasmai roi ḇepyum.​—Wasya Mazmur 32:8.

16. Rosai ḇefnai fandun fa koḇesyowi ḇaḇemkei koḇena ma koḇuk na kuker nyan ḇepyum?

¹⁶ Paulus fyas, ”Romoḇsai [Yahwe] Rur ḇyedi isya roya moḇ ani ḇaḇemkeya isya kako.” (2 Korintus 3:17) Yahwe imarisen faro ḇaḇemkei ya, ma ifrur Au fa wakmarisen faro ḇaḇemkei ine. Mboi, imarisen fa buk ḇaḇemkei Bedi kuker nyan ḇepyum insama nekadaunwarek Au. Imbude bati Besi ono smam sonin ḇeḇyeḇa na, sifrur farḇuk, sifnak farfnak olahraga ḇeyun marmar, ḇaido sḇuk sasar narkoba oroḇaido sfarandinem swan ya. Randak ya, rya nane nafrur marasrisen, mboi nun si ḇe roi ḇeḇyeḇa raris siduf, sewomen faro roi nane, ḇaido simar. (Galatia 6:7, 8) Roma inai babo ḇefrur roi ḇeradinena imbude skara simkei, mboi oroḇa kaku.​—Titus 3:3.

17, 18. (a) Rariso kosouser Allah nbuk ḇaḇemkei ḇekaku ḇe ko? (b) Rosai ḇefasnai Adam ma Eva suna ḇaḇemkei ro ḇepon iwara?

¹⁷ Imbape, sasouser faro Yahwe ima roi ḇepyum ḇe Au. Ine nun pararei ḇe Au ma nbuk ḇaḇemkei ḇekaku. (Mazmur 19:7-11) Inja, buk pyum ḇaḇemkei Bena kuker kwinfir fa wasouser Allah sasoser ma wos farkin ḇenapes Ḇyena. Rarirya, wafasnai ḇe Allah ma sinan Bansuya snar bisa sikyar Au. Sinan Bansuya na sukyar Au kaku ma suḇuk ḇaḇemkei ḇeba syadi ḇe Au wer. Ma Yahwe ḇyeasas kero wer nari ḇyuk ḇaḇemkei ḇekaku faro manfamyan ḇesouser Ḇyesi kam. Refo dap na ḇe ”ḇaḇemkei fnoḇek Allah romawa ḇyesi ro baba siḇe sismaya”.​—Roma 8:21.

¹⁸ Ine iso ḇaḇemkei Adam ma Eva susmai ro ḇepon iwara. Ro Yaf Eden, roi oser monda Allah ikofen ḇe su fa sufrur awer i. Supok suyan awer aibon ro aiknam oso. (Kejadian 2:9, 17) Kwara rariso, Allah ima inapes ḇa ḇaido idwarek kaku su kuker ḇyuk sasoser ani ke? Oroḇaḇeri! Kwarapan, snonkaku sifrur sasoser nabor kaku ma sidif ḇesesya fa sisouser na. Mboi, Yahwe ḇyuk ḇe Adam ma Eva sasoser oser monda.

19. Rosai Yahwe ma Yesus sufarkor ḇe ko insama kosmai ḇaḇemkei ya?

¹⁹ Yahwe ima ifrur pyum kaku ko. Ḇyuk sasoser nabor ḇe ko ḇa, mboi kyaḇaḇ fyarkor ko fa kosouser faro sasoser ḇefo saswar Ḇyena. Fyarkor ko fa kokenem imnis marisen Ḇyena ma kayin roi ḇeḇyeḇa na. (Roma 12:9) Ro Faya ro Urek, Yesus ifnoḇek ko fa  kofawi pyum roi ḇewar fa snonkaku sya sifrur roi ḇeḇyeḇa na. (Matius 5:27, 28) Ma ro dunya babo, fyor Yesus ḇye Raja ro Allah Karajan Ḇyedi, na fyarkor pdef ko fa komam roi ḇekaku ma roi ḇesasar raris mamam ḇyena. (Ibrani 1:9) Oso wer ido, Yesus nari ifrur fa swaruser ma baken koḇena namnis kaku. Kokarapan moḇsa fafisu ya na ḇyerai, rofyor kosmai farawrowes fa kofrur roi ḇeḇyeḇa werḇa ma koḇekandera werḇa snar sasar ya. Ḇarpur mura, nari kosmai ḇaḇemkei ḇekaku Allah ḇyeasas kwar anya.

20. (a) Rariso Yahwe ḇyuk ḇaḇemkei Ḇyena rai? (b) Moḇsa na waso nyan Ḇyena rai?

²⁰ Ro dunya babo ya, kona ḇaḇemkei ḇesyadadi ḇa kaker. Ine snar nari fandun kaker fa kofasnai saswar faro Allah ma min ḇesesya pdef. Saswar ya fyarkin ko ido, koisya koso Yahwe nyan Ḇyena. Yahwe nya ḇaḇemkei ḇeba syadi, mboi imarisen saswar ya fyarkin I fa ifrur roi nakam, ine kako nyan ifrur pyum ko raya. (1 Yohanes 4:7, 8) Inja nasnai kaku, na kosmai ḇaḇemkei ḇekaku ya rofyor koso Yahwe nyan Ḇyena monda kada.

21. (a) Moḇsa Daud ḇyaḇir rai faro rosai Yahwe ḇyuk kwar ḇe i na? (b) Rosai nari kawos ro farkarkor ḇerama ya?

²¹ Ḇesyowi kaku roi ḇepyum nakam Yahwe ḇyuk kwar ḇe Au raris roḇean rur, bati ḇepyum, aw ḇepyum, ḇaḇemkei ḇekaku ro ras nayama, ma roi ḇepyum ḇesena ke? (Mazmur 103:5) Imbude wakḇaḇir raris moḇ Daud ḇyaḇir raya fyor ḇyenadi ḇo ikofen wos ḇero Mazmur 16:11, ”Ḇe aya fa yakfawi nyan kankenem ya. Yaro ḇarpon Bedima yaryaḇ kaku; yaro ḇar raku Bedi ido nafrur fa yaḇeaski isof fyoro.” Ro farkarkor ḇerama ya, nari kawos arasai ḇepyum ḇese kosmai ro Mazmur 16 ine. Nari nane nafnoḇek Au fa wafawi moḇsa wasmai marasrisen ro kenem Bedi rai.