1, 2. Sanggah mambahen haputusan, mase porlu mangihutkon prinsip ni Bibel? (Tonggor ma gambar bani alm. 15.)

BAHAT do halak na mangojur hanima na maposo ase mangindahi sikolah na ginjang atap pe horja na beteng. Tapi anggo Jahowa lang sonai. Tongon, marosuh do Ia anggo hanima ringgas marlajar janah pongkut marhorja ase boi mansarihon dirinima i pudian ni ari. (Kol. 3:23) Tapi ibotoh Ia do homa anggo haputusan na ibahen hanima sonari, dong do pengaruhni bannima i pudian ni ari. Halani ai ma ase ipasirsir Ia prinsip na mangurupi hanima laho pamalaskon uhur-Ni bani panorang parpudi on.​—Mat. 24:14.

² Dingat ma ibotoh Jahowa do ganupan. Ibotoh Ia do aha na laho masa ampa attigan do ujungni dunia on. (Jes. 46:10; Mat. 24:3, 36) Itanda Jahowa do homa hanima. Ibotoh Ia do aha na boi mambahen hanima martuah atap na mambahen hanima gabe sunsah. Ra do podah na ibere halak songon na dear itangar. Tapi podah aha pe na ibere sidea anggo lang domu bani Hata ni Naibata, tontu lang madear ai.​—Pod. 19:21.

3, 4. Halani ra manangihon podah na sambor, sonaha ma ujungni hagoluhan ni si Adam, si Hawa, ampa ginomparni?

³ Sapari, Sibolis do na parlobei sahali mambere podah na sambor. Ia mangkatahon martuah do si Adam pakon si Hawa anggo manontuhon sandiri na madear bani sidea. (1 Mus. 3:1-6) Sasintongni mamontingkon diri do Sibolis ijai. Ia sihol ase si Adam, si Hawa, pakon ganup ginomparni manangihon janah manombah ia, sedo Jahowa. Hape lang adong age aha pe na ibere ia hubani manisia. Ganup na dong bani sidea humbani Jahowa do rohni ai. Umpamani, pohon Eden na jenges ampa angkula na gokan dear na boi mambahen sidea manggoluh sadokah ni dokahni.

⁴ Parahni, itangihon si Adam pakon si Hawa do Sibolis. Halani ai gabe rotap ma parhasomanan ni sidea pakon Jahowa. Anjaha majangin tumang do ujungni. Songon bunga na iponggol humbani batangni, gabe matua janah matei ma sidea. Sonai homa ginomparni ampa haganupan jolma. (Rom 5:12) Sonari on bahat do homa halak na lang ra manangihon Naibata. Sidea sihol mangkorjahon rosuhni sandiri. (Ep. 2:1-3) Sonaha hasilni? Bibel mangkatahon “seng dong hapentaran” bani halak na manlawan dompak Jahowa.​—Pod. 21:30.

5. Aha do na ibotoh Jahowa pasal manisia, anjaha tongon do sonai?

⁵ Jahowa mambotoh dong do holi halak, tarmasuk na maposo, na ra mananda ampa mangidangi-Si. (Ps. 103:17, 18; 110:3) Anjaha tongon do ai. Bahat do na maposo na domma mangahapkon sibere-bere “na madear” humbani Jahowa na mambahen martuah goluh ni sidea. (Basa Psalmen 103:5; Pod. 10:22) Sonari ulas hita ma ompat humbani sibere-bere ai: pangajaran, hasoman na bujur, cita-cita na parohkon malas ni uhur, ampa habebason mambahen haputusan.

6. Mase hita porlu mananda janah marhasoman pakon Jahowa, janah aha do na ipasirsir Ia laho mangurupi hita?

⁶ Anggo binatang lang porlu mananda ise do Panompani. Tapi anggo manisia porlu do mananda Panompa. (Mat. 4:4) Anggo itangihon hita Naibata, dapot hita ma habotohon, hapentaran, ampa hatuahon. Nini Jesus “martuah ma na sombuh tonduy” atap halak na sihol marhasoman pakon Naibata. (Mat. 5:3) Ibere Jahowa do Bibel ampa “juakjuak na bujur anjaha na maruhur” laho patoguhkon parhasomananta pakon-Si. (Mat. 24:45) Marhitei sidea ipasirsir ma marmasam publikasi laho mangajari hita, janah songon sipanganon na margizi do ai halani boi patoguhkon haporsayaon hu Bani. Malas tumang ma uhurta halani ai!​—Jes. 65:13, 14.

7. Sonaha pangajaran humbani Naibata boi mangurupi hanima?

⁷ Ganup pangajaran humbani Naibata mambahen hanima pandei janah maruhur. On boi manlinggomi hanima. (Basa Podah 2:10-14.) Umpamani, iarusi hanima ma adong do Naibata. Anjaha ibotoh hanima ma sedo  arta atap duit na parohkon hatuahon. Ibotoh hanima homa sonaha padaohkon diri humbani horja atap hasomalan na boi parrohkon mara. Halani ai marusaha ma laho mandapot hapentaran ampa pangarusion. Dob ai, ibotoh hanima ma holong do Naibata bannima anjaha sihol do uhur-Ni ase martuah hanima.​—Ps. 34:9; Jes. 48:17, 18.

8. Mase maningon orot parhasomanannima hubani Naibata, anjaha aha do gunani ai i pudian ni ari?

⁸ Tongkin nari iripaskon ma dunia na irajai Sibolis on. Pitah Jahowa do na boi manlinggomi hita ampa pasirsirhon ganup haporluanta. (Hab. 3:2, 12-19) Halani ai, sonari ma panorang na topat laho patoguhkon haporsayaon ampa parhasomanannima pakon Jahowa. (2 Ptr. 2:9) Anggo sonai ibahen hanima, lang soal aha pe na masa, dos ma pangahapnima songon si Daud. Ia mangkatahon, “Tongtong do hubahen Jahowa i lobei ni matangku; anggo i siamunku Ia, seng anjai jurgang ahu.”​—Ps. 16:8.

9. (a) Domu bani Johannes 6:44, aha do na dob ibahen Jahowa? (b) Sonaha do pangahapmu anggo pajumpah pakon sanina atap botou?

⁹ Sanggah parlobei sahali ho jumpah pakon halak na legan, somalni otik dassa ibotoh ho pasalsi. Ra do pitah goranni janah mananda bohini. Tapi legan do anggo pajumpah ho pakon sanina atap botou. Mintor ibotoh ho do ia mangkaholongi Jahowa. Anjaha pos do uhurmu anggo ia halak na bujur, halani ai ma ase itogu Jahowa ia hubagas organisasi-Ni. (Basa Johannes 6:44.) Lang soal sonaha rupani atap hunja asalni, domma bahat na ibotoh ho pasalsi, sonai homa ia.

10, 11. Aha do na sarupa ibagas organisasi ni Jahowa, janah aha ma gunani ai bamu?

¹⁰ Na sipontingan sanggah hanima jumpah pakon sanina atap  botou, ibotoh hanima dos do haporsayaonnima pakon sidea. Hassi pe marlegan-legan bahasa na igunahon, tapi ibotoh hanima do “sahap na pitah” ai ma hasintongan ai. (Sep. 3:9, Terjemahan Dunia Baru) Umpamani, porsaya do hanima adong do Naibata anjaha idalankon hanima do aturan ni Bibel. Dob ai, dos do homa pangarapannima pasal ari simagira. On ma na mambahen parhasomanannima lambin toguh ronsi sadokah ni dokahni.

¹¹ Jadi, ibagas organisasi ni Jahowa ma boi dapot hanima hasoman na bujur. Anjaha dong do hasoman sisonai i sab dunia on, hassi pe lape ongga hanima pajumpah. Malas tumang uhurta halani pitah ijon dassa hita boi mangahapkon sibere-bere sisonai.

12. Cita-cita aha do na dob ibahen hanima?

¹² Basa Parambilan 11:9–12:1. Ai dong do cita-cita na dob ibahen hanima? Ra do marcita-cita hanima laho mambasa Bibel bai ganup ari, atap lambin pandei mambere komentar ampa mangkorjahon tugas-tugas i partumpuan. Ra do homa marusaha hanima ase lambin pandei patorangkon isi ni Bibel sanggah marbarita. Sonaha pangahapnima anggo domma ibahen hanima sonai, atap sanggah dong na mamuji hanima halani ai? Tontu malas do uhurnima. Mase? Halani domma ihorjahon hanima harosuh ni Naibata, janah mangusihi Jesus.​—Ps. 40:9; Pod. 27:11.

13. Mase dearan marcita-cita mangidangi Naibata marimbangkon mangindahi habayakon?

¹³ Anggo pongkut hanima mangidangi Jahowa, ai do na mambahen hanima boi martuah. Apostel Paulus mangkatahon, “Totap ma nasiam, ulang mubah-ubah, anjaha lambin surung ma ibagas horja ni Tuhan in, ai ibotoh nasiam, sedo na soya halojaon nasiam ibagas Tuhan in.” (1 Kor. 15:58) Tongon, bahat do halak i dunia on marcita-cita gabe halak na bayak atap halak na tarsar. Hassi pe dapot sidea ai, tapi gati do lungun pangahap ni sidea. (Luk. 9:25) Boi do ididah hita on humbani pangalaman ni Raja Salomo.​—Rom 15:4.

14. Aha ma na boi iparlajari hanima humbani pangalaman ni si Salomo?

¹⁴ Lape ongga adong halak na songon si Salomo habayakon ampa hasangaponni. Ninuhurni ma, “Husuba ma lobei marhitei na marmalas-malas ni uhur.” (Par. 2:1-10) Jadi ipajongjong ia ma rumah na banggal, taman na jenges, ampa haganup harosuh ni uhurni. Ai malas do uhurni halani ai? Dob irimangi ia ganup na dob binahenni ai, ihatahon ma, “Tonggor ma, sisoya-soya do haganup.” Nini use, “Seng dong na marguna i toruh ni langit.” (Par. 2:11) Aha ma na boi iparlajari hanima hunjai?

15. Mase maningon porsaya hanima bani Naibata, janah songon na tarsurat bani Psalmen 32:8 aha do gunani ai?

¹⁵ Bahat do halak na mambotoh salah do hape haputusanni dobkonsi manaron hasunsahan. Tapi, Jahowa lang marosuh sonai na masa bannima. Ia sihol ase hanima manangihon parentah-Ni. Halani ai porsaya ma Bani. Anggo sonai  ibahen hanima, lang ongga isolsoli hanima haputusan aha pe na ibahen hanima. Anjaha Ia pe lang ongga lupa bani ‘holong ni uhur na ipatuduh hanima bani goran-Ni’. (Heb. 6:10) Jadi patoguh ma haporsayaonnima bani Jahowa ase boi mambahen haputusan na madear. Holi iahapkon hanima ma anggo Ia sihol mambere na sidearan bannima.​—Basa Psalmen 32:8.

16. Mase maningon maruhur hita manggunahon habebason na ibere Jahowa?

¹⁶ Apostel Paulus mangkatahon, “Ija tonduy ni Tuhan in, ijai do [habebason].” (2 Kor. 3:17) Sanggah itompa Jahowa manisia, ibere do habebason mambahen pilihan bani sidea. Tapi sihol do Jahowa ase maruhur hanima manggunahon ai, halani ai do na manlinggomi hanima. Ra do adong hasomannima na mangkatahon anggo hanima boi mangkorjahon aha pe na iharosuhkon hanima. (Tit. 3:3) Umpamani, bahat do sidea na mangidah pornografi, mangkorjahon seks na so patut, dihut bani olahraga na marbahaya, mamakei narkoba, atap pe tenggen. Mungkahni, songon na sonang do pangahap ni sidea mangkorjahon ai. Tapi ujungni, itaron sidea do bahat hasunsahan. Umpamani, gabe kecanduan, hona naborit, atap pe matei.​—Gal. 6:7, 8.

17, 18. (a) Aha do gunani anggo idalankon hita titah ni Jahowa? (b) Mase bahatan habebason na iahapkon si Adam pakon si Hawa marimbangkon jolma sonari on?

¹⁷ Tapi, bahat do gunani anggo hita manangihon Jahowa. Gabe sehat ma hita janah martuah. (Ps. 19:8-12) Anggo idalankon hita parentah ampa prinsip na ibere Jahowa, dos do artini ai maruhur hita manggunahon habebasonta. Anggo sonai ibahen hanima, on patuduhkon halak na martanggung jawab do hanima i lobei ni Naibata ampa namatorasnima. Lambin porsaya ma sidea bannima janah ibere ma lambin buei habebason. Dob ai marjanji do Jahowa laho mambere habebason na lambin banggal ai ma “hamardekaon hasangapon ni anak ni Naibata”.​—Rom 8:21.

¹⁸ Habebason sisonai ma na iahapkon si Adam pakon si Hawa i pohon Eden hinan. Ijia, pitah sada dassa na ipindo Jahowa na lang boi ihorjahon sidea. Jahowa mangkatahon seng boi panganon ni sidea buah ni sada hayu. (1 Mus. 2:9, 17) Ai borat do parentah-Ni ai? Tontu lang! Sonari, bahatan do parentah ni jolma na ibahen janah maningon idalankon. Tapi anggo Jahowa, pitah sada dassa titah na ibere Ia bani si Adam pakon si Hawa.

19. Aha do na iajarhon Jahowa pakon Jesus ase boi hita mandapot habebason?

¹⁹ Maruhur do Jahowa ibagas haganup pambahenan-Ni. Lang ibere Ia  bahat parentah hubanta. Tapi sabar do ia mangajari hita ase patuduhkon holong. Iajari do homa hita mandalankon prinsip ni Bibel janah mangkagigihon na sambor. (Rom 12:9) Sonai do homa Jesus. Sanggah ia marambilan i atas dolog, ipatugah do aha na mambahen halak mangkorjahon na sambor. (Mat. 5:27, 28) Anjaha bani Harajaon ni Naibata, iurupi ia do hita ase mambotoh ija do na sintong ampa na lepak. (Heb. 1:9) Anjaha bahenonni do holi hita gabe gokan dear. Halani ai, lang ra be hita mangkorjahon aha pe na masambor na mambahen hita marsitaronon. Ujungni, iahapkon hita ma habebason songon na dob ijanjihon Naibata.

20. (a) Sonaha Jahowa manggunahon habebason-Ni? (b) Sonaha hanima boi mangusihi-Si?

²⁰ I dunia na baru, hassi pe domma bebas hita tapi lang boi uhur-uhurta. Ijai, aha pe na ihorjahon hita maningon do halani mangkaholongi Naibata ampa hasomanta. Anggo ibahen hita sonai, dos do ai hita mangusihi Jahowa. Hassi pe Jahowa pargogoh na so tarimbang janah bebas mangkorjahon aha pe na iharosuhkon Ia, tapi ipatuduh do holong ibagas haganup pambahenan-Ni. (1 Joh. 4:7, 8) Jadi, hita boi mandapot habebason anggo hita mangusihi Jahowa.

21. (a) Sonaha pangahap ni si Daud bani Jahowa? (b) Aha do na laho iulas hita bani artikel na mangihut?

²¹ Ai martarima kasih do hanima halani ganup sibere-bere humbani Jahowa? Domma ibere Ia bannima pangajaran na mangurupi hanima ase totap marhasoman pakon-Si, hasoman na bujur, cita-cita na madear, habebason na lambin banggal bani ari simagira, ampa na leganni. (Ps. 103:5) Halani ai ra do sarupa pangahapnima songon si Daud. Sanggah martonggo ia nini do bani Psalmen 16:11, “Sai patugahon-Mu do bangku dalan hagoluhan; gok do malas ni uhur i lobei ni bohi-Mu, anjaha hatuahon do i siamun-Mu sadokah ni dokahni.” Bani artikel na mangihut ulas hita ma sibere-bere na legan na isurat bani Psalmen 16. On ma na mangurupi hanima mandapot hatuahon!