1, 2. Te yu e pakisei san yu o du anga i libi, saide a bun fu wooko anga san Gadu taki? (Luku den fowtow na a bigin.)

EFU yu a wan yonkuuwan, a ná abi misi a omen sama e taigi san i sa du te i bigi. Kande Yefolow, muneli anga taa sama e taigi i taki i mu abi wan hei sikoo pampila efuso wan bun wooko pe i sa meke moni tyobotyobo. Ma Yehofa e taigi i wan hii taa sani. A tuu, a wani i leli a sikoo fi i sa fende wan wooko di o yeepi i fu solugu iseefi (Kolosesama 3:23). Ma a sabi tu taki te i yonkuu i mu du wantu pelensipali sani di o abi kaakiti a yu hii libi. A di a sabi den sani ya meke ai gi i leli di e yeepi i fu sabi fa i mu libi aini den lasiti dei ya, fu meke a piisii anga i.​—Mateyesi 24:14.

² Ná feegete, Yehofa sabi ala sani. A sabi san o pasa aini a ten di e kon. A sabi pilisisi on ten a kaba o kon  (Yesaya 46:10; Mateyesi 24:3, 36). Yehofa sabi yu tu. A sabi san o meke i piisii, anga san o meke i tyali. Kande yu e si enke son wan fu den sani di sama e taigi yu a bun sani, ma efu a Wowtu fu Gadu nai holibaka gi san den taki, yu á mu aliki den.​—Odo 19:21.

3, 4. Di Adan anga Efa aliki Saatan di a koli den, san miti den anga den pikin fu den?

³ Ná a tide sama e koli taawan. A Saatan fosi koli libisama. A be taigi Efa taki en anga Adan be o moo piisii te denseefi be o taki san bun anga san á bun (Genesesi 3:1-6). Ma Saatan be e suku wini fi en wawan. A be wani Adan, Efa anga ala den pikin di den be o meke dini en, pe fu den dini Yehofa. Saatan be wani den aliki en tu, pe fu den aliki Yehofa. Ma Saatan á be du nawan bun gi libisama. A Yehofa be gi den ala san den be abi. A Yehofa be meke den enke man anga uman. Yehofa be meke den bun fu den be man libi fu teego. A be gi den wan moin dyali fu den tan tu.

⁴ Ma a tyali taki Adan anga Efa ná aliki Gadu. Di den du a sani ya, a leti enke den pii denseefi puu na a Sama di be meke den. Ogii miti den di den du a sani ya. Leti enke fa wan boomiki e dee te i booko en puu a wan bon, a leti so Adan anga Efa be e gaandi saafisaafi te enke den dede. Ogii miti den pikin fu den tu. Ala wi e fii a bakapisi fu san den du (Romesama 5:12). A omen sama nai aliki Gadu. A fa den wani den e libi (Efeisesama 2:1-3). San na a bakapisi? Beibel taki den sama di nai du san Yehofa taki á „koni”.​—Odo 21:30.

5. San Gadu be e biibi taki libisama o du? A be abi leti?

⁵ Yehofa be e biibi taki sama be o de di be o wani sabi en anga di be o wani dini en. A be e biibi taki yonkuuwan seefi be o wani dini (Psalm 103:17, 18; 110:3). Yehofa lobi den yonkuuwan ya tuutuu! Yu a wan fu den yonkuuwan ya? Efi yu a wan fu den yonkuuwan ya, da a omen „bun” sani Yehofa gi i di e meke i piisii. (Leisi Psalm 103:5; Odo 10:22). Wi o luku fo fu den sani di Yehofa e du gi yonkuuwan. Ai gi den leli, bun mati, ai soi den a moo bun sani di den sa du anga den libi, boiti dati a puu den a katibo.

6. Saide i mu meke moiti fi i biibi kon moo taanga? San Yehofa gi u fu yeepi u taanga u biibi?

⁶ Meti ná abi fu dini Gadu. Den ná abi a fii fu sabi a Sama di meke den. Ma wi enke libisama e angii fu sabi a Gadu di meke u (Mateyesi 4:4). Te wi e aliki Gadu, wi e kon sabi sani, wi e man du sani anga koni, wi e piisii tu. Yesesi be taki: „Wan sama o de koloku te a sabi taki a abi Gadu fanowdu” (Mateyesi 5:3). Gadu gi wi en Wowtu Beibel. Ai meke „a koni  saafu di u sa fitoow” meke buku di e yeepi u fu taanga u biibi tu (Mateyesi 24:45). Den buku ya de enke nyanyan, bika den e meke u biibi kon moo taanga. Den e meke wi anga Yehofa toon moo bun mati tu. Ai bigi gi u taki wi abi omen sowtu sani di u sa koboloiki fu taanga u biibi!​—Yesaya 65:13, 14.

7. Fa den leli fu Gadu e yeepi i?

⁷ Den leli fu Yehofa e meke i koni. Den e yeepi i fu denki bun tu fosi i du wan sani. Den sani ya e kibii yu fu son sani á miti i. (Leisi Odo 2:10-14.) Den e yeepi i fu sabi efu wan sani di wan sama taigi yu a tuu. Den e yeepi i fu sabi taki a lei sama e lei te den e taki a ná Gadu meke libisama. Den e yeepi i fu sabi taki a lei sama e lei te den e taki moni anga goontapu gudu o meke i de koloku. Den e yeepi i tu fi yu á du sani di o hati i bakaten. Neen meke i mu meke moiti fi i koni, anga fu denki bun fosi i du wan sani. Da iseefi o si taki Yehofa lobi i. Yu o si tu taki a di a wani sani go bun anga i meke ai leli i.​—Psalm 34:8; Yesaya 48:17, 18.

8. Saide i mu meke moiti nownow fi yu anga Gadu toon bun mati? Sowtu wini yu o fende te yu anga Gadu toon mati?

⁸ Dyonson moo nawan pisi fu a goontapu fu Saatan o de moo. A Yehofa wawan o poi kibii wi. Neen wawan o man gi u san wi abi fanowdu a ten de. Wan fu den sani di a o yeepi u fu fende, a den sani di wi abi fanowdu fu nyan (Habakuk 3:2, 12-19). Neen meke a nownow u mu meke moiti fu wi anga Gadu toon mati. A nownow u mu meke moiti fu moo fitoow en tu (2 Peitilisi 2:9). Efi i du den sani ya winsi san e pasa, yu o man waka a David baka. A be  taki: „Ala yuu mi e pakisei Yehofa. Mi ná o bangula, bika a de a mi leti-ana.”​—Psalm 16:8.

9. (a) Te u luku Yohanisi 6:44, da san Yehofa e du? (b) Fa sani e waka te u miti wan Kotoigi fu a fosi leisi?

⁹ Te i miti wan sama di á de a waaleiti, i poi taki i sabi en tuutuu? Kande neen nen anga en fesi namo i sabi. Ma a ná so sani e waka te i miti Kotoigi fu a fosi leisi. I sabi wanten taki a lobi Yehofa. I sabi taki a di Yehofa si wan bun sani na a sama, meke a gi en a okasi fu kon aini a osufamii fi en. (Leisi Yohanisi 6:44.) Winsi a sama komoto a wan taa kondee, winsi a wan taa nasi, toku i sabi omen sani fi en. A sabi omen sani fi i tu!

10, 11. Fa a foluku fu Yehofa de? Fa a sabi di i sabi a sani ya e meke i fii?

¹⁰ Te i miti wan taa Kotoigi yu e fusutan wanten taki yu anga en e taki „a soifili tongo” (Sefanya 3:9). Dati wani taki yu anga en e biibi Gadu, wi e wooko anga denseefi leli fu Beibel, wi abi aseefi howpu gi a ten di e kon tu. A den sani ya e meke wi e fitoow useefi. Wi anga den o de mati fu teego tu.

¹¹ Neen meke te yu e dini Yehofa, i sa taki yu abi den moo bun mati di de. Yu abi mati na ala se fu goontapu winsi yu anga den á miti noiti! I sabi wan taa kulu sama boiti a foluku fu Yehofa di e libi na a fasi ya anga denseefi?

12. San a wantu sani di u sa meke moiti fu du?

¹² Leisi Peleikiman 11:9–12:1. San i wani du anga i libi? Kande i sa meke moiti fu leisi Beibel ala dei, fu gi moo bun piki a komakandaa efuso fu du taa sani aini a kemeente. Kande yu e meke moiti fu wooko moo bun anga a Beibel te yu e leli sama. Fa yu e fii te i si taki yu e go a fesi? Fa yu e fii te taawan gafa i taki yu e go a fesi? I musu e piisii. A wan bun sani fu piisii te yu e go a fesi. Saide? A di yu e du san Yehofa wani i du, leti enke Yesesi.​—Psalm 40:8; Odo 27:11.

13. Saide a moo bun fu dini Gadu pe fu u poti pakisei a den sani fu a goontapu?

¹³ Te yu e poti pakisei na a dini di yu e dini Yehofa, den sani di yu e du o meke i piisii. Bika na a moo bun sani yu e du anga i libi. Pawlesi be taki: „U mu taampu gingin, wi á mu buuya. U mu wooko taanga gi Masaa, bika u sabi taki a wooko di wi e du gi Masaa, a ná fu soso” (1 Korentesama 15:58). Ma te sama poti den pakisei a den sani fu a goontapu, sani enke moni anga balinen, den nai piisii tuutuu. Winsi den fende san den be e suku, tokuso den nai piisii aini den ati (Lukasi 9:25). Wi e si a sani ya te u luku a libi fu Kownu Salomo.​—Romesama 15:4.

14. San u sa leli fu a toli fu Salomo?

¹⁴ Salomo a wan fu den moo gudu  sama di libi a goontapu ya. A be abi makiti tu. A man ya du ala sowtu sani fu piisii, fu „luku sowtu wini piisii abi” (Peleikiman 2:1-10). Salomo meke gaan moin osu, a paandi moin boomiki dyali, a du ala san a be e angii fu du. A fende wini? A be moo de koloku? Di a pakisei ala den sani di a du te a kaba, a taki: „Mi si taki ala sani a soso sani.” A taki tu: „A gei a winta mi be e meke moiti fu kisi” (Peleikiman 2:11). Yu o leli wan sani fu a toli fu Salomo?

15. Saide i mu meke moiti fi i biibi taanga? Fa biibi o yeepi yu enke fa Psalm 32:8 e soi?

¹⁵ Son sama a te den fii a bakapisi fu den fowtu di den meke fosi, den e leli wan sani. Yehofa á wani a sani ya miti i. A wani i aliki en, da i du san a taki. I mu abi biibi efi i wani du a sani ya. Efi yu e du sani gi Yehofa fu di yu e biibi en, noiti a o hati i bakaten. Noiti Yehofa o feegete ’a soi di i soi taki i lobi a nen fi en’ (Hebrewsama 6:10). Neen meke i mu meke moiti fi i biibi taanga, da yu o man du sani anga koni. Yu o si tu taki i Dda di de a hemel wani sani go bun anga i.​—Leisi Psalm 32:8.

16. Saide a mu e bigi gi u taki u fii? Saide u mu du sani anga koni winsi fa u fii?

¹⁶ Pawlesi sikiifi taki: „A pe a yeye fu Yehofa de, sama e fii” (2 Korentesama 3:17). Yehofa fii fu du san a wani. A so a meke u tu. Ma winsi fa u fii fu du san u wani anga u libi, toku Yehofa á wani u du sani di o tyai ogii gi u. Kande wantu fu den supee fi yu e luku sekisi felon. Kande den e didon anga boi efuso meisyo sondee den toow. Kande den e du sport pe den sa kisi mankei, e diingi duungu efuso e somoko. Ai gei enke den sani ya e meke den piisii, ma a omen ogii sa miti sama di e du den sani ya. Son wan fu den e kisi takuu siki. Taawan e toon saafu fu sopi anga takuu tabaka. Son wan e dede seefi (Galasiyasama 6:7, 8). Yonkuuwan di e du den sani ya e denki den fii, ma a koli den e koli denseefi.​—Titesi 3:3.

17, 18. (a) Sowtu wini wi e fende e wi e holi den weiti fu Yehofa? (b) Saide u sa taki Adan anga Efa be fii moo den sama fu a ten ya?

¹⁷ A soso wini wi e fende te wi e wooko anga san Yehofa taki. A sani ya e yeepi u fu son siki á kisi u. Ai yeepi u tu fu wi á toon saafu fu nawan sani di sa du ogii anga u (Psalm 19:7-11). Efi i koboloiki a fii di i fii a wan bun fasi, dati wani taki efi yu e holi den weiti fu Gadu yu e soi Gadu anga i mma anga i dda taki den sa fitoow yu. Efi i mma anga i dda e fitoow i, den ná o poti tyaipi weiti gi i. Yehofa paamisi taki a o meke den  sama di e dini en fii tuutuu aini a ten di e kon. Beibel taki den sama ya „o fii a wan foondoo fasi enke pikin fu Gadu”.​—Romesama 8:21.

¹⁸ Adan anga Efa be fii na a fasi ya di den be de aini Eden. A wan kodo sani Gadu be taigi den taki den á mu du. Den á be mu nyan a sii fu wan bon (Genesesi 2:9, 17). I si enke a wan bun sani Gadu be du di a gi den a weiti de? I si enke a di a be wani fooseli den meke a be gi den a weiti de? Nono. Pakisei den somen weiti di libisama meke aini a goontapu ya. Den e dwengi taawan fu holi den weiti ya tu. Ma a wan kodo weiti namo Yehofa be gi Adan anga Efa.

19. Fa den sani di Yehofa anga Yesesi e leli wi o meke u fii?

¹⁹ Te u luku fa Yehofa e libi anga u, wi e si taki a koni tuutuu. Pe fu a gi wi omen pikinpikin weiti, ai taigi u taki u mu lobi taawan. Ai leli u taki u mu meke moiti fu denki enke fa ai denki. A taki u mu e buuse ogii (Romesama 12:9). Di en Manpikin Yesesi be holi a taki na a Mongo, a soi u saide sama e du ogii (Mateyesi 5:27, 28). Aini a nyun goontapu, di Yesesi o tii wi enke Kownu fu Gadu Kownukondee a o tan yeepi u fu denki enke fa ai denki. A o leli u san bun anga san á bun (Hebrewsama 1:9). Yesesi o yeepi u fu u ná abi sondu moo. U ná o go e pakisei sani di á bun moo tu. Pakisei fa a o de te u nai fii moo fu du sani di á bun. Den banowtu di wi e fii fu di wi abi sondu ná o de moo. A ten de wi o „fii a wan foondoo fasi” enke fa Yehofa paamisi u.

20. (a) Fa Yehofa e tyai enseefi winsi fa a poi du ala san a wani? (b) Fa u sa waka neen baka?

²⁰ Wi o fii aini a paladeisi, ma anga leti maiki. San u wani taki anga a sani de? Di wi o de aini a paladeisi, wi o abi fu du sani ete fu soi taki u lobi Gadu anga taa sama. Te wi e du sani fu soi taki u lobi taawan, a Yehofa baka wi e waka. Winsi fa Yehofa man du ala san a wani tokuso ai du ala sani anga lobi. Wi e si na a fasi fa ai libi anga u taki a lobi u (1 Yohanisi 4:7, 8). Neen meke u sa biibi taki a te wi e waka a Gadu baka namo u sa fii tuutuu.

21. (a) Fa David be e pakisei fu den sani di Yehofa be du gi en? (b) San wi o luku aini a taa artikel?

²¹ Den bun di Yehofa du gi yu e bigi gi i? Ai gi i leli, a gi i bun mati, a soi i san na a moo bun sani di i sa du anga i libi, a paamisi i tu taki aini a ten di e kon yu o fii tuutuu. Boiti den sani ya a gi yu omen taa moin sani tu (Psalm 103:5). Kande yu e fii enke David di be begi a Psalm 16:11 taki: „A yu e soi mi fa mi mu libi. Ai switi gi mi te mi si taki mi e meke i piisii. Te mi de a yu leti-ana, mi o piisii fu teego.” Aini a taa artikel wi o luku wantu taa sani di wi e leli fu Psalm 16. A sani ya o yeepi i fu si san i mu du fu fende a moo bun libi di de!