1, 2. Lebuh nuan milih utai ti deka digaga enggau pengidup nuan, nama kebuah nya manah enti nuan mendingka Jehovah? (Peda gambar ba pun artikel.)

ENTI nuan nya orang ke biak, nuan engka bulih mayuh jaku ajar bekaul enggau pengidup nuan dudi hari. Bala pengajar, tauka orang bukai engka ngasuh nuan belajar tinggi agi tauka ngiga kereja ke begaji besai. Tang Jehovah meri jaku ajar ke enda sama. Amat, Iya deka nuan bebendar belajar ngambika ulih ngidupka diri empu lalu melanja diri empu. (Kol. 3:23) Tang Iya mega nemu, lebuh nuan agi biak, nuan patut ngaga pemutus ti besai ke bekaul enggau pengidup nuan dudi hari. Nya alai Iya meri prinsip kena ngiring sereta nulung nuan ngambika ngembuan pengidup ti ngerinduka ati Iya ba hari ti penudi tu.—Mat. 24:14.

² Kingatka, Jehovah nemu semua utai. Iya nemu utai ti deka nyadi dudi hari, lalu Iya nemu pengujung dunya ti jai tu amat semak. (Isa. 46:10; Mat. 24:3, 36) Jehovah mega ngelala sapa nuan. Iya nemu utai ke ngasuh nuan gaga tauka enda. Penemu mensia baka ke manah, tang enti nya enda sejalai enggau Jaku Petara, nya ukai penemu ti betul.—J-lam. 19:21.

3, 4. Baka ni jaku lalau ti enda manah ngenusahka Adam, Hawa, enggau bala anak seduai iya?

³ Jaku lalau ti enda manah endang udah lama bisi. Sitan nya orang ti keterubah meri jaku lalau ti enda manah ngagai mensia. Ku Sitan madah ngagai Hawa, ‘Seduai Adam deka lantang agi enti seduai nentuka pengidup kediri empu.’ (P-kal. 3:1-6) Tang Sitan semina berundingka diri empu aja! Iya deka Adam seduai Hawa enggau bala anak seduai iya, ngasi sereta nyembah iya, ukai Jehovah. Tang Sitan nadai mai nama-nama penguntung ke mensia. Kebendar iya, Jehovah ke meri semua utai ngagai mensia. Jehovah nyadika Adam seduai Hawa tawing kaling pangan diri, meri kebun ti manah alai diau, enggau tubuh ti sempurna ke ulih tan belama iya.

⁴ Tang sayau amat, Adam seduai Hawa enda ngasika Petara. Seduai iya nyeraraka diri ari Petara, ke meri seduai iya nyawa. Lalu nya mai penusah ti besai. Baka bungai ti ditingkilka ari dan iya, Adam seduai Hawa belubah-lubah nyadi tuai lalu mati. Bala anak seduai iya mega merinsa, lalu nya nyengkaum semua kitai. (Rom. 5:12) Mayuh orang kemayaharitu enda ibuhka utai ti dipadah Petara lalu ngereja utai sepeneka ati sida aja. (Eps. 2:1-3) Nama penyadi? Bup Kudus madahka, enti orang ngelaban Jehovah, sida nadai “penemu-dalam.”—J-lam. 21:30.

5. Pengandal ke baka ni dikembuan Petara ba mensia, lalu kati nya patut?

⁵ Jehovah nemu, sekeda orang nyengkaum sida ke biak, deka ngelala sereta nyembah Iya. (Mas. 103:17, 18; 110:3) Sida ke biak nya berega ba Jehovah! Kati nuan nya seiku ari sida? Enti ya nuan tentu bulih mayuh “utai ti manah” ari Petara, lalu tu ngagaka agi ati nuan. (Bacha Masmur 103:5; J-lam. 10:22) Kitai deka berandauka empat iti utai manah nya: penemu ke nulung nuan semak enggau Jehovah, bala pangan ti badas, juluk ati ti manah, enggau pengelepas ti bendar.

6. Nama kebuah kitai patut nemu diri begunaka Petara, lalu nama disediaka Iya kena nulung kitai?

⁶ Jelu enda nemu diri patut ngelala Petara ke nempa sida. Tang mensia bebida. (Mat. 4:4) Lebuh kitai ngasika Petara, kitai bulih pemereti ati, penemu-dalam, sereta pengaga ba ati. Jesus madahka: “Gaga ati meh orang ke nemu diri begunaka Petara.” (Mat. 5:3, NW) Petara meri kitai Bup Kudus lalu Iya ngena “ulun ke tetap ati sereta bepenemu-dalam” nyediaka litaricha ti ulih negapka pengarap kitai. (Mat. 24:45) Litaricha tu baka pemakai, lalu kitai bisi bemacham litaricha ke baka tu ti ngerinduka ati. (Isa. 65:13, 14) Lebuh belajarka litaricha tu, kitai ngeringka pengarap kitai sereta ngerapatka kaul enggau Jehovah.

7. Baka ni penemu ari Petara ulih nulung nuan?

⁷ Penemu ari Petara ulih meri nuan penemu-dalam sereta penau ke dikena berunding enggau manah. Semua tu ulih ngelindung nuan ba mayuh pekara.  (Bacha Jaku Dalam 2:10-14.) Ambika chunto, kualiti nya deka nulung nuan ngelala utai ti bula ke madahka nadai Penempa tauka duit enggau reta deka ngasuh nuan gaga. Kualiti nya mega deka nulung nuan nyeliahka pengingin tauka tebiat ti deka ngemediska nuan. Nya alai enggau naka ulih nyadi orang ke bepenemu sereta ulih berunding enggau manah. Lalu nuan ulih nemu Jehovah sayauka nuan sereta dekaka utai ti pemadu manah ke nuan.—Mas. 34:8; Isa. 48:17, 18.

8. Nama kebuah nuan patut nyemakka diri enggau Petara ari diatu, lalu baka ni tu ulih nulung nuan dudi hari ila?

⁸ Enda lama agi, semua utai ti bekaul enggau dunya Sitan deka dirusak. Semina Jehovah aja ke ulih ngelindung sereta nyediaka utai ti diguna kitai, lalu tu nyengkaum pemakai ke diempa kitai ninting hari. (Hab. 3:2, 12-19) Nyadi, diatu meh maya kitai nyemakka diri enggau Petara lalu bepanggai agi ba Iya. (2 Pet. 2:9) Enti nuan nitihka nya, enda ngira nama utai ke nyadi, nuan deka berasai baka David, ke madahka: ‘Aku seruran nemu Jehovah bisi enggau aku. Iya semak aku, lalu nadai utai ulih ngelebuka aku.’—Mas. 16:8.

9. (a) Nitihka John 6:44, nama digaga Jehovah? (b) Nama utai ti ngerinduka ati lebuh nuan betemu enggau bala Saksi ke bukai?

⁹ Lebuh nuan baru betemu enggau orang ke ukai dalam pemendar, nama ditemu nuan pasal iya? Nuan nemu nama iya enggau baka ni gamal iya, lalu engka mimit aja ke ulih ditemu nuan pasal iya. Tang baru betemu enggau orang ke dalam pemendar enda baka nya. Nuan nemu iya rinduka Jehovah. Nuan nemu Jehovah meda utai manah ke bisi ba iya lalu Jehovah narit iya nyadi penyembah Iya. (Bacha John 6:44.) Enda ngira ari ni menua iya tauka chara iya dibesaika, nuan ulih nemu mayuh  utai pasal iya, lalu iya mega nemu mayuh utai pasal nuan!

10, 11. Nama utai ti sama ba bala penyembah Jehovah, lalu baka ni tu bisi kaul enggau nuan?

¹⁰ Lebuh betemu enggau Saksi ke bukai, nuan nemu bisi utai ke sama ba seduai. Taja pan bansa jaku ke dikena seduai enda sama, seduai bela ngena jaku ti tuchi iya nya pemendar Bup Kudus. (Sep. 3:9) Reti nya seduai bela arapka Petara, nitihka standard moral ti sama, sereta bisi pengadang ti sama ke jemah ila. Semua tu nulung seduai arapka pangan diri lalu ngemansangka kaul ti deka tan lama.

¹¹ Nya alai lebuh nuan nyembah Jehovah, nuan ulih ngumbai diri bisi bala pangan ti badas. Nuan bisi bala pangan di serata dunya, taja pan nuan bedau betemu enggau sida! Ulih nuan mikirka sapa ke ngasaika pemeri ti berega tu kelimpah ari nembiak Jehovah?

12. Nama juluk ati ti manah ke ulih ditetapka nuan?

¹² Bacha Pengajar 11:9–12:1. Kati nuan bisi juluk ati ti deka dijapai? Nuan engka deka macha Bup Kudus ninting hari tauka meri saut ke manah agi lebuh begempuru. Tauka engka nuan nguji deka suah agi ngena Bup Kudus lebuh nginjil sereta ngajar. Baka ni asai ati nuan lebuh nemu diri bisi ngaga pemansang tauka lebuh orang bukai madahka nya ngagai nuan? Nuan tentu berasai gaga, lalu nya endang patut! Nama kebuah? Laban sama baka Jesus, nuan ngereja utai ti dikedekaka Jehovah.—Mas. 40:8; J-lam. 27:11.

13. Nama kebuah gawa ke Petara manah agi ari beberatka juluk ati ba dunya?

¹³ Lebuh nuan beberatka pengawa ke Jehovah, nuan ngereja pengawa ke ulih ngagaka ati sereta nulung nuan bisi tuju ba pengidup. Paul nulis: ‘Bediri tegap, anang bekinsit, seruran bebendar gawa ke Tuan, laban kita nemu, kita enda lebu gawa ke iya.’ (1 Kor. 15:58) Lebuh orang beberatka juluk ati ba dunya, baka ngulihka duit tauka nyadi tebilang, sida engka ngasaika diri gaga ati lalu mujur ba pengidup. Tang kebendar iya, sida suah berasai puang. (Luk. 9:25) Kitai nemu pasal tu ari chunto Raja Solomon.—Rom. 15:4.

14. Nama ulih dipelajarka nuan ari utai ti deka ditemu Solomon?

¹⁴ Solomon nya seiku ari orang ke pemadu kaya sereta bekuasa. Iya nguji deka nemu siti utai. Ku iya: “Aku keran deka nemu utai ti dikumbai pengelantang.” (P-jar. 2:1-10) Nya alai Solomon nirika rumah ti besai, ngaga kebun sereta taman ti manah, lalu ngereja sebarang utai ti dikedekaka iya. Kati iya berasai puas sereta gaga? Lebuh Solomon ngenang pasal semua utai ti dikemisi iya, ku iya madah: “Aku nemu, utai nya nadai reti sekali-kali.” Ku iya agi: “Sigi nadai guna sekali-kali.” (P-jar. 2:11) Kati nuan ulih belajar ari utai ti deka ditemu Solomon?

15. Baka ke dibacha ari Masmur 32:8, nama kebuah nuan begunaka pengarap, lalu baka ni tu ulih nulung nuan?

¹⁵ Sekeda orang belajar ke siti-siti utai ba pengidup pengudah sida ngereja penyalah sereta napi pemerinsa ke datai ari penyalah ti dikereja sida. Jehovah enggai utai ke baka tu nyadi ba nuan. Iya  deka nuan mending sereta ngasika Iya. Tu begunaka pengarap, tang nuan enda nesal enggau pemutus ti digaga nuan laban nuan arap. Lalu Jehovah deka mengkang ingatka “pengerindu ti dipandangka kita.” (Heb. 6:10) Nya alai bebendar meh negapka pengarap nuan. Tu deka nulung nuan ngaga pemutus ti manah lalu nemu Apai ti di serega dekaka utai ti pemadu manah ke nuan.—Bacha Masmur 32:8.

16. Nama kebuah kitai ngumbai pengelepas nya utai ti berega lalu ngena iya enggau manah?

¹⁶ Paul madahka: ‘Dia alai roh kudus Jehovah, dia meh pengelepas.’ (2 Kor. 3:17, NW) Jehovah rinduka pengelepas, lalu nempa nuan ngambika nuan mega rinduka pengelepas. Tang Iya deka nuan ngena pengelepas enggau manah ngambika ulih nyaga nuan. Sekeda ari orang ke serambau enggau nuan engka meda pornografi, ngembuan ulah ti kamah, berambunka nyawa ba sukan ti ulih ngemedis, tauka salah guna dadah tauka ai bisa. Terubah-rubah, ulah nya baka ke ngerinduka ati, tang tu suah ngujungka utai ti enda manah, baka penyakit, gian, tauka pemati. (Gal. 6:7, 8) Orang nembiak ke enggau semua pengawa nya engka ngumbai diri bibas, tang kebendar iya enda.—Tit. 3:3.

17, 18. (a) Nama kebuah ngasika Petara nulung kitai bulih pengelepas ti bendar? (b) Nama kebuah Adam seduai Hawa ngembuan mayuh agi pengelepas enti dibandingka enggau mensia kemayaharitu?

¹⁷ Tang, ngasika Jehovah manah ke pengerai lalu nulung kitai bulih pengelepas ti bendar. (Mas. 19:7-11) Lebuh nuan ngena pengelepas ke diberi ngagai nuan enggau manah, iya nya, milih ngasika adat enggau prinsip ti badas ari Petara, nuan nunjukka ngagai Petara enggau apai indai, nuan nya orang ti betanggungjawap. Apai indai nuan tentu deka arap agi ke nuan lalu meri nuan mayuh agi pengelepas. Lalu Jehovah besemaya, enda lama agi Iya deka meri semua nembiak Iya ti tetap ati pengelepas ti bendar, ke dikumbai Bup Kudus ‘pengelepas ti bemulia ti endang enggi bala anak Petara.’—Rom. 8:21.

¹⁸ Tu meh bansa pengelepas ti dikembuan Adam seduai Hawa. Ba Kebun Eden, semina bisi siti aja utai ke enda diasuh Petara gaga seduai iya. Iya nya enda tau makai buah ari sepun kayu. (P-kal. 2:9, 17) Kati nuan ngumbai Petara enda lurus tauka kelalu terit ketegal meri atur ke baka nya? Tentu enda! Uji pikirka, mensia ngaga mayuh atur lalu mejal orang nitihka atur nya. Tang Jehovah semina meri seduai iya siti aja atur.

19. Nama utai ti diajar Jehovah enggau Jesus ke deka nulung kitai bulih pengelepas?

¹⁹ Jehovah ngintu kitai enggau manah. Ari ke meri mayuh atur, Iya enggau  sabar ngajar kitai ngasika adat pengerindu. Iya ngajar kitai idup sejalai enggau prinsip Iya sereta begedika utai ti jai. (Rom. 12:9) Dalam Ajar ba atas Bukit, Jesus nulung kitai meretika kebuah orang ngereja utai ti jai. (Mat. 5:27, 28) Lalu ba dunya baru, Jesus, ke nyadi Raja ba Perintah Petara, deka terus ngajar kitai ngambika nemu utai ti betul enggau salah, baka iya empu. (Heb. 1:9) Jesus mega deka ngasuh runding enggau tubuh kitai sempurna. Uji gambarka, kitai nadai ati deka ngereja utai ti jai lalu enda napi pemerinsa ke datai ari dosa. Lalu udah nya, kitai deka bulih “pengelepas ti bemulia” ke disemaya Jehovah.

20. (a) Baka ni Jehovah ngena pengelepas Iya? (b) Baka ni nuan ulih neladan Iya?

²⁰ Ba dunya baru, pengelepas kitai tetap bisi sekat. Nama kebuah? Chara kitai ngena pengelepas patut seruran bepelasarka pengerindu kitai ke Petara sereta ke orang bukai. Lebuh kitai diiring pengerindu, kitai neladan Jehovah. Taja pan Jehovah ngembuan pengelepas ti nadai sekat, Iya milih ngawakka pengerindu ngiring utai ti dikereja Iya. Nya nyengkaum chara Iya ngintu kitai. (1 Jhn. 4:7, 8) Enti kitai neladan Petara, nya baru kitai bulih pengelepas ti bendar.

21. (a) Baka ni asai ati David pasal Jehovah? (b) Nama deka dikerandauka kitai ba artikel pengudah tu?

²¹ Kati nuan beterima kasih ke semua utai manah ti udah diberi Jehovah ngagai nuan? Iya meri penemu ke ulih nulung nuan semak enggau Iya, bala pangan ti badas, juluk ati ti manah, bisi pengadang ke pengelepas ti bendar ke jemah ila, sereta mayuh pemeri bukai ti ngerinduka ati. (Mas. 103:5) Nuan engka ngasaika diri baka David lebuh iya nyebut sampi ba Masmur 16:11: “Nuan nunjukka ngagai aku jalai ti nuju ngagai pengidup. Ati aku gaga laban Nuan bisi enggau aku lalu ati aku lantang belama iya.” Ba artikel pengudah tu, kitai deka berandauka sekeda pemendar ti berega ari Masmur 16. Nya deka nulung nuan nemu chara ngembuan pengidup ti pemadu badas!