1, 2. Wetin mek i mek sɛns fɔ lisin to di Wan we mek yu we yu de disayd fɔ du sɔntin na layf? (Luk di pikchɔ nia dis atikul in taytul.)

IF YU na yɔŋ pɔsin, i go bi se yu dɔn gɛt bɔku advays bɔt yu tumara bambay. Ticha dɛn, gaydiɛns kanselɔ dɛn, ɔ ɔda pipul dɛn go de tɛl yu se yu nid fɔ go yunivasiti, ɔ yu nid fɔ gɛt wok we go mek yu gɛt bɔku mɔni. Bɔt Jiova de gi yu difrɛn advays. Na tru se i want yu fɔ tray tranga wan na skul so dat yu go ebul fɔ gɛt mɔni ɛn sɔpɔt yusɛf. (Lɛta Fɔ Kɔlɔse 3:​23) Bɔt i no bak se we yu yɔŋ, na da tɛm de yu nid fɔ disayd bɔt impɔtant tin dɛn we go afɛkt yu tumara bambay. So Jiova dɔn gi prinsipul dɛn we go gayd yu insay dis las dez ɛn we go ɛp yu fɔ liv yu layf di we we go mek i gladi.—Matyu 24:​14.

² Mɛmba se Jiova no ɔltin. I no wetin go apin tumara bambay, ɛn i no se di tɛm nɔ de fa igen fɔ lɛ dis wɔl dɔn. (Ayzaya 46:​10; Matyu 24:​3, 36) Jiova sabi yu bak. I no  wetin go mek yu gladi ɛn wetin go mek yu nɔ gladi. Di advays we mɔtalman de gi kin luk fayn, bɔt if i nɔ kɔmɔt frɔm Gɔd in Wɔd, i nɔ rili mek sɛns.—Prɔvabs 19:​21.

3, 4. We Adam ɛn Iv bin lisin to bad advays, aw dat bin afɛkt dɛn ɛn dɛn pikin dɛn?

³ Fɔ lɔng tɛm, pipul dɛn dɔn de gi bad advays. Na Setan na bin di fɔs pɔsin fɔ gi mɔtalman bad advays. I bin tɛl Adam ɛn Iv se dɛn go gɛt mɔ gladi-at if dɛn disayd fɔ dɛnsɛf aw fɔ liv dɛn layf. (Jɛnɛsis 3:​1-6) Bɔt Setan bin jɔs bisin bɔt insɛf! I bin want Adam ɛn Iv wit dɛn pikin dɛn we dɛn go bɔn tumara bambay fɔ obe ɛn wɔship am, i nɔ bin want lɛ dɛn obe ɛn wɔship Jiova. Bɔt Setan nɔ du ɛnitin fɔ mɔtalman. Na Jiova bin gi dɛn ɔltin we dɛn bin gɛt. I mek di man fɔ di uman ɛn di uman fɔ di man, i mek fayn gadin fɔ lɛ dɛn de, ɛn i gi dɛn pafɛkt bɔdi we go de sote go.

⁴ I sɔri fɔ no se Adam ɛn Iv nɔ bin obe Gɔd. Dis bin mek dɛn lɔs dɛn padi biznɛs wit di Wan we gi dɛn layf. Di tin we bin apin afta dat bin rili bad. Jɔs lɛk we yu kɔt flawa pan in tik, na so smɔl smɔl Adam ɛn Iv bin ol ɛn day. Dɛn pikin dɛn we na wi ɔl, de sɔfa bak. (Lɛta Fɔ Rom 5:​12) Bɔku pipul dɛn tide nɔ de du wetin Gɔd se, ɛn dɛn jɔs de du wetin dɛn want fɔ du. (Lɛta Fɔ Ɛfisɔs 2:​1-3) Wetin dɔn apin? Di Baybul se pipul dɛn we de agens Jiova nɔ de gɛt “sɛns.”—Prɔvabs 21:​30.

5. Wetin Gɔd bin shɔ bɔt mɔtalman? Di we aw i bin de tink bin rayt?

⁵ Jiova bin rili shɔ se pipul dɛn ɛn ivin bɔku yɔŋ wan dɛn go want fɔ no bɔt am ɛn sav am. (Sam 103:​17, 18; 110:​3) Dɛn yɔŋ wan dɛn ya rili valyu na Jiova in yay! Yu na wan pan dɛn? If yu na wan pan dɛn, yu go de rili ɛnjɔy bɔku gud tin dɛn frɔm Gɔd, ɛn dis go mek yu gɛt gladi-at mɔ na layf. (Rid Sam 103:​5; Prɔvabs 10:​22) Wi go tɔk bɔt 4 pan dɛn tin dɛn ya insay dis atikul. Dɛn tin dɛn ya na: di tin dɛn we i de tich wi, gud padi dɛn, fayn fayn gol dɛn, ɛn tru tru fridɔm.

6. Wetin mek yu fɔ bisin fɔ lan bɔt Gɔd? Wetin Jiova dɔn gi fɔ ɛp yu?

⁶ Animal dɛn nɔ nid fɔ lan bɔt Gɔd, we min se dɛn nɔ nid fɔ no bɔt di Wan we mek dɛn. Bɔt wi nid fɔ du dat. (Matyu 4:​4) We wi de lisin to Gɔd, wi de lan mɔ, gɛt sɛns, ɛn gladi-at. Jizɔs bin tɔk se: “Di wan dɛn we no se dɛn nid fɔ lan bɔt Gɔd gɛt gladi-at.” (Matyu 5:​3, NW) Gɔd dɔn gi wi di Baybul, ɛn i de yuz di “slev we fetful ɛn gɛt sɛns” fɔ gi wi buk, magazin, ɛn ɔda tin dɛn fɔ ɛp wi fɔ gɛt mɔ fet. (Matyu 24:​45, NW) Dɛn tin dɛn ya we dɛn de gi wi de mek wi gɛt mɔ fet ɛn mek wi padi biznɛs wit Jiova tayt mɔ ɛn mɔ. Wi de ɛnjɔy difrɛn difrɛn tin dɛn we de mek wi lan bɔt Gɔd!—Ayzaya 65:​13, 14.

7. Aw di tin dɛn we Gɔd dɔn gi fɔ tich wi bɔt am go ɛp yu?

⁷ Di tin dɛn we Jiova dɔn gi fɔ tich wi bɔt am de mek yu gɛt sɛns ɛn ebul fɔ  tink fayn, we go protɛkt yu difrɛn difrɛn we dɛn. (Rid Prɔvabs 2:​10-14.) Fɔ ɛgzampul, dɛn kwaliti dɛn de go ɛp yu fɔ no lay lay tɔk dɛn, lɛk we dɛn kin se nɔbɔdi nɔ mek di wɔl ɛn ɔda tin dɛn, ɔ di lay we pipul dɛn de lay se mɔni ɛn prɔpati go mek yu gladi. Dɛn kwaliti dɛn ya go ɛp yu bak fɔ avɔyd tin dɛn ɔ abit dɛn we go ambɔg yu. So du ɔl wetin yu ebul fɔ bi pɔsin we gɛt sɛns ɛn we de tink fayn. Dɔn, yu go si fɔ yusɛf se Jiova lɛk yu ɛn i want di bɛst tin fɔ yu.—Sam 34:​8; Ayzaya 48:​17, 18.

8. Wetin mek na naw yu fɔ kam nia Gɔd? Aw dat go bɛnifit yu tumara bambay?

⁸ I nɔ go te igen, Gɔd go dɔnawe wit ɔltin na Setan in wɔl. Na Jiova nɔmɔ go ebul fɔ protɛkt wi ɛn gi wi di tin dɛn we wi nid, ivin di nɛks tin we wi fɔ it. (Abakɔk 3:​2, 12-19) So naw na di tɛm fɔ kam nia Gɔd ɛn abop pan am mɔ ɛn mɔ. (Pita in Sɛkɔn Lɛta 2:​9, NW) If yu du dat, ilɛk wetin de apin arawnd yu, yu go fil jɔs lɛk aw Devid bin fil we i bin tɔk se: “A de mɛmba se PAPA GƆD [“Jiova,” NW] de wit mi ɔltɛm ɛn bikɔs i de wit mi, a nɔ de fred natin.”—Sam 16:​8.

9. (a) Frɔm wetin wi rid na John 6:​44, wetin Jiova kin du? (b) We yu mit yu kɔmpin Jiova Witnɛs fɔ di fɔstɛm, aw dat difrɛn wit we yu mit pɔsin we nɔto Jiova Witnɛs?

⁹ We yu mit sɔmbɔdi we nɔto Jiova Witnɛs fɔ di fɔstɛm, wetin yu go se yu no bɔt am? I go bi se yu sabi in nem ɛn aw i tan lɛk, bɔt sɔntɛm na dat nɔmɔ yu no bɔt am. Bɔt i rili difrɛn we yu mit sɔmbɔdi we na Jiova Witnɛs fɔ di fɔstɛm. Yu no se di pɔsin lɛk Jiova. Yu no se Jiova si gud tin pan am ɛn na dat mek i kɔl am fɔ de na in famili we de wɔship am. (Rid Jɔn 6:​44.) Ilɛk usay di pɔsin kɔmɔt ɔ aw dɛn mɛn am, yu no bɔku tin bɔt am, ɛn insɛf no bɔku tin bɔt yu!

10, 11. Wetin Jiova in pipul dɛn no bɔt dɛnsɛf? Aw dat go afɛkt yu?

 ¹⁰ As yu mit yu kɔmpin Jiova Witnɛs, yu go no se di tin dɛn we impɔtant to yu na dɛn impɔtant to am. Yu no se pan ɔl we una de tɔk difrɛn langwej dɛn, yu ɛn in de tɔk di “klin langwej” we de na di Baybul. (Zɛfanaya 3:​9, NW) Dis min se una ɔl tu biliv Gɔd, una de liv di sem klin layf, ɛn una gɛt di sem op fɔ tumara bambay. Dɛn tin ya de ɛp una fɔ trɔst unasɛf ɛn gɛt tayt padi biznɛs we go de sote go.

¹¹ So we yu de wɔship Jiova, yu go tɔk fɔ tru tru se yu gɛt gud padi dɛn. Yu gɛt padi dɛn ɔlsay na di wɔl, ilɛksɛf yu nɔ mit dɛn yet! Yu tink se ɛni ɔda pɔsin de we de ɛnjɔy dis kayn fayn gift apat frɔm Jiova in pipul dɛn?

12. Us gol dɛn yu kin gɛt?

¹² Rid Ɛkliziastis 11:​9–12:​1. Yu gɛt ɛni gol we yu de tray fɔ mitɔp? Sɔntɛm yu gɛt gol fɔ de rid di Baybul ɛvride ɔ fɔ gi fayn kɔmɛnt dɛn ɔ fɔ du yu pat dɛn fayn na di mitin dɛn. Ɔ sɔntɛm yu de tray fɔ yuz di Baybul fayn fayn wan we yu de prich. Aw yu de fil we yu de si se yu de du wɛl ɔ we ɔda pipul dɛn de tɛl yu se yu de du wɛl? Yu go mɔs gladi, ɛn yu fɔ gladi fɔ dat! Wetin du? Na bikɔs yu de du wetin Jiova want yu fɔ du, jɔs lɛk Jizɔs.—Sam 40:​8; Prɔvabs 27:​11.

13. Aw fɔ sav Gɔd bɛtɛ pas fɔ pe atɛnshɔn pan di tin dɛn na dis wɔl?

¹³ We yu pe atɛnshɔn fɔ sav Jiova, yu de du wok we go mek yu gɛt gladi-at ɛn we go mek yu layf bɛtɛ. Pɔl bin advays se: “Una tinap traŋa, una nɔ gri mek ɛnitin mek una dawt. Una fɔ de du Gɔd in wok ɔltɛm, una no se ɛnitin we una de du fɔ Gɔd nɔ go go fɔ natin.” (Fɔs Lɛta Fɔ Kɔrint 15:​58) Bɔt we pipul dɛn de pe atɛnshɔn pan di tin dɛn na dis wɔl, lɛk fɔ gɛt bɔku mɔni ɔ fɔ mek bɔku pipul dɛn no dɛn, dɛn nɔ kin rili gɛt gladi-at. Ilɛksɛf dɛn go bifo, bɔku tɛm dɛn layf nɔ kin gɛt minin. (Lyuk 9:​25, NW) Wi lan dis frɔm Kiŋ Sɔlɔmɔn in ɛgzampul.—Lɛta Fɔ Rom 15:​4.

14. Wetin yu lan frɔm di tin we Sɔlɔmɔn bin pruv?

¹⁴ Sɔlɔmɔn, we na wan pan di man dɛn we bin jɛntri ɛn gɛt pawa pas ɔlman we bin da tɛm dɛn de, bin du sɔntin fɔ pruv dis. I bin tɛl insɛf se: “A go ɛnjɔy misɛf [fɔ] si.” (Ɛkliziastis 2:​1-10) So Sɔlɔmɔn bin bil fayn fayn os dɛn, mek fayn fayn gadin dɛn ɛn pak dɛn, ɛn i bin du ɛnitin we i want fɔ du. Yu tink se dat bin mek i satisfay ɛn gɛt gladi-at? We Sɔlɔmɔn bin wach ɔl di tin dɛn we i dɔn du, i bin tɔk se: “Ɔl na fɔ natin.” I kɔntinyu fɔ tɔk se: “I nɔ de prɔfit pɔsin natin na dis wɔl.” (Ɛkliziastis 2:​11) Yu lan ɛni lɛsin frɔm wetin Sɔlɔmɔn bin pruv?

15. Frɔm wetin wi lan na Sam 32:​8, wetin mek yu nid fɔ gɛt fet? Aw dat go ɛp yu?

¹⁵ Sɔm pipul dɛn kin lan lɛsin we dɛn mek mistek ɛn we dɛn de sɔfa fɔ di bad tin we dɛn du. Jiova nɔ want dis fɔ apin to yu. I want mek yu lisin to am ɛn obe am. Dis min se yu fɔ gɛt fet, bɔt yu nɔ go ɛva rigrɛt di tin dɛn we yu  disayd fɔ du na layf bikɔs yu gɛt fet. Jiova nɔ go ɛva fɔgɛt ‘di lɛk we yu lɛk’ in nem. (Di Ibru Pipul Dɛn 6:​10) So tray tranga wan fɔ gɛt strɔng fet. Dɔn yu go disayd fɔ du di rayt tin dɛn na layf ɛn yu go si fɔ yusɛf se yu Papa we de na ɛvin want di bɛst tin fɔ yu.—Rid Sam 32:​8.

16. Wetin mek wi fɔ valyu di fridɔm we wi gɛt ɛn yuz am di rayt we?

¹⁶ Pɔl bin rayt se: “Usay Jiova in spirit de, fridɔm de de.” (Sɛkɔn Lɛta fɔ Kɔrint 3:​17, NW) Jiova lɛk fridɔm, ɛn i mek yu di we we yu go lɛk fridɔm bak. Bɔt i want yu fɔ yuz di fridɔm we yu gɛt di rayt we we go protɛkt yu. Sɔntɛm sɔm pan yu kɔmpin dɛn kin luk rud rud pikchɔ dɛn, dɛn kin du mami ɛn dadi biznɛs di we aw Gɔd nɔ want, du spɔt dɛn we de put dɛn layf pan denja, ɔ tek drɔgs ɔ drink rɔm. Fɔs, dɛn tin ya kin luk fɔni ɔ fayn, bɔt bɔku tɛm dɛn kin mek bad tin dɛn apin to yu lɛk sik, bad abit we at fɔ lɛf, ɔ ivin day. (Lɛta Fɔ Galeshya 6:​7, 8) Di yɔŋ wan dɛn we kin put an pan dɛn tin dɛn de kin tink se dɛn gɛt fridɔm, bɔt dɛn nɔ rili gɛt fridɔm.—Taytɔs 3:​3.

17, 18. (a) Aw fɔ obe Gɔd de mek wi gɛt tru tru fridɔm? (b) Aw Adam ɛn Iv bin gɛt mɔ fridɔm pas mɔtalman dɛn tide?

¹⁷ Wan ɔda tin na dat, fɔ obe Jiova na tin we gud fɔ wi. I gud fɔ wi wɛlbɔdi ɛn i de mek wi gɛt tru tru fridɔm. (Sam 19:​7-11) Ɛn we yu yuz yu fridɔm di rayt we, we min se yu disayd fɔ obe Gɔd in lɔ ɛn prinsipul dɛn, yu de sho Gɔd ɛn yu mama ɛn papa se yu na machɔ pɔsin. Sɔntɛm yu mama ɛn papa go biliv yu mɔ, ɛn dɛn go gi yu mɔ fridɔm. Ɛn Jiova prɔmis se i nɔ go te igen i go gi ɔl in fetful savant dɛn pafɛkt fridɔm, we di Baybul tɔk bɔt se “dɛn go fri, lɛkɛ aw Gɔd in pikin dɛn dɔn fri.”—Lɛta Fɔ Rom 8:​21.

¹⁸ Dis na bin di kayn fridɔm we Adam ɛn Iv bin de ɛnjɔy. We Adam ɛn Iv bin de na di gadin we bin de na Idɛn, na wangren tin Gɔd bin tɛl dɛn nɔ fɔ du. Dɛn nɔ fɔ it di frut we bin de pan wan patikyula tik. (Jɛnɛsis 2:​9, 17) Yu tink se Gɔd nɔ bin trit dɛn fia wan ɔ i bin tu strikt we i gi dɛn da lɔ de? Nɔ, nɔto so i bi! Tink bɔt di bɔku bɔku lɔ dɛn we mɔtalman dɔn mek ɛn we dɛn de fos ɔda pipul dɛn fɔ obe. Bɔt na wangren lɔ nɔmɔ Jiova bin gi Adam ɛn Iv.

19. Wetin Jiova ɛn Jizɔs de tich wi we go ɛp wi fɔ gɛt fridɔm?

¹⁹ Di we aw Jiova de trit wi de sho se i rili gɛt sɛns. Bifo i gi wi bɔku lɔ dɛn, i de peshɛnt fɔ tich wi fɔ obe di lɔ we tɔk bɔt lɔv. I de tich wi fɔ fala in prinsipul dɛn ɛn fɔ et wetin bad. (Lɛta Fɔ Rom 12:​9) We in Pikin, Jizɔs, bin de tich pipul dɛn ɔp wan mawnten, i bin ɛp wi fɔ no wetin mek pipul dɛn de du bad tin dɛn. (Matyu 5:​27, 28)  As Kiŋ na Gɔd in Kiŋdɔm, Jizɔs go kɔntinyu fɔ tich wi fɔ no wetin rayt ɛn rɔŋ jɔs lɛk am, insay di nyu wɔl. (Di Ibru Pipul Dɛn 1:​9) Jizɔs go mek bak wi maynd ɛn bɔdi pafɛkt. Imajin aw layf go tan lɛk we natin nɔ go de fɔ tɛmt wi fɔ du bad tin dɛn, ɛn wi nɔ go sɔfa igen bikɔs wi nɔ pafɛkt. Dɔn wi go ɛnjɔy fɔ bi ‘Gɔd in pikin dɛn we dɔn fri’ jɔs lɛk aw Jiova prɔmis.

20. (a) Aw Jiova de yuz in fridɔm? (b) Aw yu go falamakata am?

²⁰ Insay di nyu wɔl, wi fridɔm go stil gɛt say we i stɔp. Aw? Di lɛk we wi lɛk Gɔd ɛn ɔda pipul dɛn go ɛp wi ɔltɛm fɔ no usay wi fridɔm stɔp. We wi alaw lɔv fɔ gayd wi pan ɛnitin, wi de falamakata Jiova. Pan ɔl we Jiova nɔ gɛt usay in fridɔm stɔp, i disayd fɔ alaw lɔv fɔ gayd am pan ɛnitin we i de du, ivin di we aw i de trit wi. (Jɔn In Fɔs Lɛta 4:​7, 8) So i mek sɛns fɔ no se wi go gɛt tru tru fridɔm nɔmɔ we wi falamakata Gɔd.

21. (a) Aw Devid bin fil bɔt Jiova? (b) Wetin wi go tɔk bɔt insay di nɛks atikul?

²¹ Yu gladi fɔ ɔl di gud tin dɛn we Jiova dɔn gi yu? I dɔn gi yu tin dɛn we de tich yu fɔ lan bɔt am, gud padi dɛn, fayn fayn gol dɛn, di op fɔ gɛt pafɛkt fridɔm tumara bambay, ɛn bɔku ɔda wɔndaful gift dɛn. (Sam 103:​5) Sɔntɛm yu de fil lɛk aw Devid bin fil we i pre na Sam 16:​11 se: “Yu dɔn sho mi aw fɔ gɛt layf we go de sote go; yu dɔn mek mi at kol, bikɔs yu de wit mi. Na yu mek a go ɛnjɔy layf sote go.” Insay di nɛks atikul, wi go tɔk bɔt ɔda valyu tin dɛn we de insay Sam 16. Dis go ɛp wi fɔ no aw wi go gɛt di bɛst layf ɛva!