1, 2. Ba ginötö tatatugöi hadia zi sökhi nifaluada ba waʼauri, hadia mbörö wa moguna tafondrondrongo niwaʼö Zomböi? (Faigi gambara ba wamobörö wamahaʼö.)

NA SI bohou ebua ndraʼugö, tatu oya mene-mene nitemau sanandrösa ba zi so fönau. Tola manö lawaʼö khöu ira gurumö ba zekola mazui niha böʼö wa moguna ögohi zekola salawa mazui halöwö sebua gazi enaʼö tola ösöndra gefe soya. Hizaʼi, ibeʼe Yehowa mene-mene si faböʼö. Tatu manö, omasi Yehowa na owölö-ölö ita weʼamöi ba zekola enaʼö tola tefahaʼö ita ba tasöndra halöwö si tola mamönökhi soguna khöda. (Kolose 3:23) Hizaʼi, iʼila Yehowa wa angetula sabölö moguna nihalöu iadaʼa, molua-lua ia ba waʼauriu ba zi so miföna. Börö daʼö, ihenaigö goi-goi si tobali fanuturu lala ba wanolo yaʼugö enaʼö tefaudu lala waʼaurimö ba zomasi ia sagötö ngaluo safuria andre.​—Mataiʼo 24:14.

² Törö tödömö wa lö hadöi si tobini föna Yehowa. Iʼila hadia zalua ba zi so miföna ba iʼila göi hawaʼara tohare gamozua götö danö. (Yesaya 46:10; Mataiʼo 24:3, 36) Sindruhu-ndruhu aboto ba dödö Yehowa zalua khömö. Iʼila  hadia zi tola mameʼe khöu faʼowua-wua dödö ba hadia zangaʼasogö khöu abula dödö. Ba wamaigida, hulö baga mene-mene nibeʼe niha, hizaʼi lö teʼodane-dane daʼö ba Daromali Lowalangi. Ba tenga mene-mene satua-tua daʼö.​—Gamaedola 19:21.

3, 4. Hadia zalua khö Gadamo ba Khawa hegöi ba ngaʼötöra börö me laʼoʼö mene-mene si lö sökhi?

³ No ara so mene-mene si lö sökhi. Satana zi oföna sibai mameʼe mene-mene si lö sökhi ba niha. Iwaʼö khö Khawa hegöi khö Gadamo wa tola lasöndra waʼowua-wua dödö na yaʼira samösa zotatugöi lala waʼaurira. (1 Moze 3:1-6) Iwaʼö daʼö Satana börö me ha tana khönia iʼalui! Omasi ia na tenga Yehowa nifosumange Gadamo ba Khawa hegöi ngaʼötöra, hizaʼi enaʼö yaʼia niʼataʼufi ba nifosumangera. Sindruhunia, lö irai ibeʼe hadia ia ba niha. Ha Yehowa zangaʼasogö soguna ba niha. Ibeʼe khöra ngawalö hadia ia zoguna khöra. Ibeʼe khöra kabu si sökhi tobali nahiara, hegöi boto soʼahonoa si lö irai tebulö sagötö faʼara.

⁴ Hizaʼi, lö laʼoʼö li Lowalangi ira Adamo ba Khawa. Me lafalua daʼö, no laʼetuʼö gamakhaitara khö Zomböi faʼauri. Lua-luania abula dödö zalua. Simane bunga sateu ba huge-huge, itugu atua Gadamo hegöi Khawa ba mate ira. Tefakao göi fefu ngaʼötöra. (Roma 5:12) Ato göi niha iadaʼa si lö omasi mamondrongo niwaʼö Lowalangi ba ha nikhoi dödöra nifaluara. (Efeso 2:1-3) Hadia lua-luania? Imane Sura Niʼamoniʼö, ”Lö faʼatua-tua” ba niha samadaö khö Yehowa.​—Gamaedola 21:30.

5. Hadia waʼafaduhu dödö niʼokhögö Yehowa ba niha ba hadia atulö daʼö?

⁵ Faduhu dödö Yehowa wa so niha somasi mangokhögö faʼaboto ba dödö sanandrösa khönia ba somasi mamosumange yaʼia, simane si bohou ebua. (Zinunö 103:17, 18; 110:3) Tohude sibai ndra si bohou ebua andre ba wamaigi Yehowa! Hadia farahu ndraʼugö ba gotaluara? Na yaʼia, tatu örasoi ’zi sökhi’ moroi khö Lowalangi, ba itugu owua-wua dödömö. (Baso Zinunö 103:5; Gamaedola 10:22) Tatutunö hadia manö zi sökhi nibeʼe Yehowa. Yaʼia daʼö, ö ba wamati, awö si sökhi, ohitö dödö sameʼe faʼahono dödö, hegöi fangefa sindruhu.

6. Hana wa moguna öʼameʼegö tödö zoguna khöu ba wamati, ba hadia manö wanolo nihenaigö Yehowa?

⁶ Lö moguna ba gurifö zoguna ba wamati, ba lö moguna aboto ba dödöra Zomböi yaʼira. Hizaʼi, tenga simane daʼö ita. (Mataiʼo 4:4) Na öfondrondrongo niwaʼö Lowalangi, hasambalö so khömö waʼaboto ba dödö, faʼatua-tua, hegöi faʼowua-wua dödö. Imane Yesu, ”Yaʼahowu niha soʼameʼegö tödö soguna ba wamati.” (Mataiʼo 5:3) Ibeʼe khöda Lowalangi Zura Niʼamoniʼö ba iʼogunaʼö ”zawuyu si lö faröi ba satua-tua” ba wamaʼanö khöda publikasi enaʼö tola itugu aro wamatida. (Mataiʼo 24:45) Mufotöi fefu publikasi andrö ö ba wamati börö me tola iʼaroʼö wamatida hegöi fahuwusada khö Yehowa. Oi faböʼö-böʼö gö ba  wamati si tola taʼogunaʼö!​—Yesaya 65:13, 14.

7. Hewisa enaʼö möi fanoloda gö ba wamati moroi khö Lowalangi?

⁷ Ö ba wamati zanolo yaʼugö enaʼö tola öʼokhögö waʼatua-tua hegöi fangera-ngera si sökhi. Daʼa zolumöʼö yaʼugö moroi ba ngawalö zi lö sökhi. (Baso Gamaedola 2:10-14.) Duma-dumania, tola öʼila hadia wamahaʼö si fasala, simane na lawaʼö wa lö hadöi Somböi. Aboto göi ba dödöu wa tebai ibeʼe khöu waʼomuso dödö sindruhu kefe hegöi harato. Baero daʼö, tola göi ötimbagö gisö-isö dödö hegöi si toʼölö mufalua si tola möi famakiko. Tobali, moguna öforege ba wangokhögö faʼatua-tua hegöi fangera-ngera si sökhi. Na öfalua daʼö, tola örasoi samösa wa iʼomasiʼö ndraʼugö Yehowa ba omasi ia na si sökhi zalua ba waʼauriu.​—Zinunö 34:8; Yesaya 48:17, 18.

8. Hana wa moguna tahatöʼö ita khö Yehowa iadaʼa, ba hadia mbua nitemada dania?

⁸ Ba zi lö ara tö, tefakiko fefu gulidanö Zatana. Ba ginötö daʼö, ha tö Yehowa zi tola molumöʼö hegöi samönökhi soguna khöda. Taʼodaligö göi ia ba wameʼe soguna khöda sanandrösa ba gö soguna ba mboto. (Habakuki 3:2, 12-19) Andrö tefaudu sibai iadaʼa na öhatöʼö ndraʼugö khö Lowalangi ba öʼaroʼö waʼafaduhu dödömö khönia. (2 Fetero 2:9) Na öfalua daʼö, hasambalö ilumöʼö ndraʼugö Yehowa gofu hadia ia zalua ba zi fasuimö. Tola örasoi simane nisura Dawido, ”No ubeʼe ba gametahögu Yehowa, si lö mamalö-malö: na so ia ba gambölögu, ba lö mangiwa ndraʼo.”​—Zinunö 16:8.

9. (a) Hadia zomasi Yehowa enaʼö tafalua moloʼö Yohane 6:44? (b) Hana wa tohude sibai na faʼila ita ba niha si no aboto ba dödö sindruhu?

⁹ Me awena sibai falukha ndraʼugö ba niha si lö faʼaboto ba dödö ba zindruhu, hawaʼoya niʼilamö sanandrösa khönia? Tola manö öʼila döinia hegöi sikhalania, hizaʼi lö öʼila saʼae baero daʼö. Hizaʼi na  faʼila ndraʼugö ba niha si no mangokhögö faʼaboto ba dödö ba zindruhu, tola manö faböʼö zalua. Öʼila wa niha sangomasiʼö Yehowa ia. Aboto ba dödöu wa so zi sökhi nifaigi Yehowa khönia irege tobali ia ösi nomo ba wamati. (Baso Yohane 6: 44.) Gofu hezo moroi soira hegöi si toʼölö lafalua, iʼanemaiʼö öʼila sanandrösa khönia ba simanö göi ia khömö!

10, 11. Hadia waʼafagölö niʼokhögö nono mbanua Yehowa, ba hadia gunania khöda?

¹⁰ Na awena falukha ita khö ndra Samaduhuʼö tanö böʼö, iʼanemaiʼö taʼila waʼafagölö niʼokhögöda. Hewaʼae faböʼö li niʼogunaʼömi ba ginötö fahuhuo, hizaʼi fagölö-gölö fahuhuo ami ba ”mbewe si sökhi”, yaʼia daʼö sindruhu. (Zefania 3:9) Eluahania, fagölö-gölö faduhu dödömi khö Lowalangi, fagölö goi-goi sanandrösa ba woʼamuata niʼoʼömi, ba fagölö dötönafö niʼokhögömi. Daʼö fefu zabölö moguna taʼila ba zi samösa niha. Daʼa mbörö wa faoma tafaduhusi tödö nawöda ba tobali ita si fahuwu sagötö faʼara.

¹¹ Tatu öʼokhögö nawö si sökhi börö me ono mbanua Yehowa ndraʼugö. So nawömö ba zi sagörö ulidanö, hewaʼae lö irai falukha ndraʼugö khöra. Lö hadöi zorasoi howu-howu si tohude daʼa baero nono mbanua Yehowa!

12. Hadia gohitö dödö ba wamati si tola takhamö?

¹² Baso Zangombakha 11:9–12:1. Hadia so gohitö dödömö ba wamati somasi ökhamö iadaʼa? Te omasi öbaso Zura Niʼamoniʼö ero maʼökhö mazui ödouʼö waʼasökhi wameʼeu bua gera-era ba gangowuloa. Mazui öforege enaʼö atua-tua ndraʼugö wangogunaʼö Sura Niʼamoniʼö ba wanuriaigö. Hewisa dödömö na so niha sanuno yaʼugö börö me örasoi wa no tedou ndraʼugö ba wamati? Tola manö omuso dödömö, ba sinangea örasoi daʼö. Hadia mbörö? Börö me no öfalua zomasi Yehowa simane nifalua Yesu.​—Zinunö 40:8; Gamaedola 27:11.

13. Hana wa abölö sökhi wamosumange Yehowa moroi ba wolohi ngawalö hadia ia zi so ba gulidanö daʼa?

¹³ Na oya öʼogunaʼö ginötö ba wangai halöwö khö Yehowa, hasambalö örasoi waʼomuso dödö ba moʼeluaha waʼaurimö. Imane Faulo, ”Yaʼaro ba miʼabölöʼö ami, yaʼowölö-ölö ami ba wangai halöwö Lowalangi, börö me no miʼila wa tenga zaya-zaya gölö waʼerege dödömi ba wangai halöwönia.” (1 Korindro 15:58) Hizaʼi, tandraigö wonehegö niha solohi faʼakayo, faʼamotöi hegöi tanö böʼönia si so ba gulidanö daʼa. Sindruhunia, lö ohahau dödöra. Hewaʼae oya gefera, hizaʼi asese larasoi wa hulö zi lö eluaha waʼaurira. (Luka 9:25) Tola tafahaʼö ita moroi ba duma-duma Razo Selomo.​—Roma 15:4.

14. Hadia zi tola tahalö famahaʼö moroi ba zalua khö Zelomo?

¹⁴ Selomo andrö samösa niha si kayo ba sebua kuaso si no irai auri. No irai ’itandraigö waʼomuso dödö andrö, iʼowua-wuaʼö dödönia si sökhi’. (Zangombakha 2:1-10) Ifazökhi Selomo nomo si baga, ifazökhi kabu si sökhi ba ifalua hadia zomasi ia. Hadia ahono dödönia  mazui owua-wua dödönia aefa daʼö? Me itörö tödö Zelomo fefu nifaluania, imane ”oi si lö boto”. Imane nasa, ”Ba lö hare ba gulidanö.” (Zangombakha 2:11) Hadia omasi öfahaʼö ndraʼugö ba zalua khö Zelomo?

15. Hana wa moguna sibai wamati, ba hadia wamahaʼö si tola tahalö moroi ba Zinunö 32:8?

¹⁵ So ösa niha sangumaʼö wa fefu zi no irai alua no tobali samahaʼö si sökhi. Awena lafahaʼö ira na no aefa lafalua zala ba larasoi hadia ia lua-lua si lö sökhi moroi ba zi no lafalua. Hizaʼi, lö omasi Yehowa na alua khöu zimane daʼö, omasi ia na öfondrondrongo ba öʼoʼö linia. Moguna khöu wamati ba wangataʼufi hegöi ba wangofönaiʼö Yehowa ba lö irai maniasa ndraʼugö ba gangetula nihalömö. Ba lö irai iʼolifugö ’waʼomasimi börö döinia.’ (Heberaiʼo 6:10) Tobali, moguna öforege ba wangaroʼö famatimö. Tola örasoi wa hasambalö omuso dödö Namada Yehowa si so ba zorugo na si sökhi zalua ba waʼaurimö.​—Baso Zinunö 32:8.

16. Hana wa moguna taʼameʼegö tödö wangefa ba taʼogunaʼö ia si fao faʼatua-tua?

¹⁶ Imane Faulo, ”Hezo so geheha Yehowa ba daʼö so wangefa.” (2 Korindro 3:17) Omasi Yehowa wangefa ba ibeʼe daʼö ba dödö niha me iwöwöi ira. Hizaʼi, omasi ia na öʼogunaʼö wangefa andrö si fao faʼatua-tua. Sindruhunia, tobali folumöʼömö daʼa. Tola manö so nawömö samaigi pornografi, amuata soʼamakhaita ba wohorö, olahraga si tola mamaʼala faʼauri, sangogunaʼö narkoba mazui si mabu-mabu. Ba wamobörö, tola manö tobali faʼadöni dödö wamalua daʼö, hizaʼi iʼasogö lua-lua si lö sökhi simane fökhö, faʼasandru, hegöi faʼamate. (Galatia 6:7, 8) Si bohou ebua samalua daʼö tola manö larasoi wangefa, hizaʼi tenga fangefa sindruhu daʼö.​—Tito 3:3.

17, 18. (a) Hana wa tola ibeʼe khöda wangefa sindruhu na taʼataʼufi Lowalangi? (b) Hewisa wangefa nirasoi Gadamo ba Khawa mböröta?

¹⁷ Tatu manö, hasambalö örasoi mbua na öʼataʼufi Yehowa. Lö göna ndraʼugö fökhö ba örasoi wangefa sindruhu. (Zinunö 19:7-11) Baero daʼö, na öʼoʼö huku hegöi goi-goi soʼahonoa moroi khö Lowalangi eluahania no öʼogunaʼö wangefa andrö si fao faʼatua-tua. Na simanö, no öforomaʼö khö Lowalangi hegöi khö zatuamö wa tola mubeʼe khöu wangefa. Ba gafuriata dania, omasi Yehowa na ”latema wangefa solakhömi simane nitema ndraono Lowalangi” iraono mbanuania si lö faröi.​—Roma 8:21.

¹⁸ Ba wamobörö, larasoi wangefa andrö ira Adamo ba Khawa. Ha sambua zi lö itehegö khöra Lowalangi me so ira ba Kabu Edena. So sambua döla geu si tebai laʼa bua. (1 Moze 2:9, 17) Moloʼö yaʼugö, hadia fatandro sibai huku Lowalangi andrö mazui tebai tafalua hadia ia börö daʼö? Tatu manö löʼö! Angeragö  atö, oya sibai huku nifazökhi niha, ba lafaso niha böʼö ba woloʼö daʼö. Hizaʼi, ha sambua huku nibeʼe Yehowa khö Gadamo ba Khawa.

19. Hana wa tobali fanolo khöda wamahaʼö Yehowa hegöi Yesu ba worasoi fangefa?

¹⁹ Moroi ba nifalua Yehowa khöda, tola taʼila wa atua-tua sibai ia. Lö oya huku nibeʼenia khöda, hizaʼi ifahaʼö ita ba wamalua huku faʼomasi. Ifahaʼö ita enaʼö tafaudugö waʼaurida moloʼö goi-goinia ba taʼogorofi zi lö sökhi. (Roma 12:9) Ifatunö göi khöda daʼö Ononia Yesu ba Huhuonia ba Hili. Itolo ita enaʼö aboto ba dödöda hadia mbörö wa lafalua horö niha. (Mataiʼo 5:27, 28) Ba gulidanö si bohou, lö mamalö ifahaʼö ita Yesu enaʼö taʼokhögö lala wangera-ngera si fagölö khönia sanandrösa ba zatulö hegöi si sala börö me yaʼia zi tobali Razo ba Wamatörö Lowalangi. (Heberaiʼo 1:9) Ifoʼahonoa göi Yesu dania mboto hegöi fangera-ngerada. Khalaigö, lö saʼae dania tedönisi dödöda ba wamalua si lö sökhi. Lö göi tarasoi wamakao si tobali lua-lua horö. Ba tarasoi ”wangefa solakhömi” si no ifabuʼu Yehowa.

20. (a) Hewisa wangogunaʼö Yehowa fangefa si so khönia? (b) Hadia gunania khöda duma-duma Yehowa andrö?

²⁰ Ba gulidanö si bohou dania, hasambalö so nola-ola wangefa niʼokhögöda. Hewaʼae lö ola wangefa niʼokhögö Yehowa, hizaʼi ifalua fefu hadia ia khöda börö waʼomasi. Omasi taʼoʼö ia. Moguna göi tafalua hadia ia börö waʼomasida khö Lowalangi hegöi ba niha böʼö. (1 Yohane 4:7, 8) Tola sindruhu-ndruhu tarasoi wangefa na taʼoʼö waʼomasi Lowalangi.

21. (a) Hewisa dödö Dawido khö Yehowa? (b) Hadia nitutunöda ba wamahaʼö aefa daʼa?

²¹ Hadia moguna öʼameʼegö tödö zi sökhi si no ibeʼe Yehowa khömö simane ö ba wamati si fahöna, si fahuwu si sökhi, ohitö dödö si tola mangaʼasogö faʼahono dödö, hegöi fangefa sindruhu? (Zinunö 103:5) Na öʼandrö saohagölö ba daʼö fefu, tatu fao dödömö ba wehede si so ba Zinunö 16:11 sangumaʼö, ”Öfarongogö khögu lala ba waʼauri andrö: ahonoa waʼomuso dödö fönau ba somasi ita ba gambölöu, si lö aetu.” Ba wamahaʼö aefa daʼa, tatutunö ayati ba Zinunö 16 sanolo yaʼita ba wangokhögö faʼauri safönu faʼahono dödö.