1, 2. Eaa ra i meitaki ei kia akarongo ki Tei Anga me iki koe i taau ka rave i roto i toou oraanga? (Akara i te tutu mua.)

ME E mapu koe, penei ka orongaia atu tetai arataki anga noou no te tuatau ki mua. Penei ka akakite atu te au puapii, te aronga oronga ako, me kore tetai ke e ka anoano koe i tetai apii teitei me kore tetai angaanga kia rauka te moni maata. Inara e tuke ta Iehova akoanga ka oronga mai kia koe. E tika, ka inangaro aia ia koe kia angaanga pakari i te apii, kia rauka ia koe i te akono ia koe uaorai. (Kolosa 3:23) Inara kua kite katoa aia e i toou mapu anga, ka anoanoia koe kia rave i te au ikianga puapinga te ka akakeu i toou oraanga a te tuatau ki mua. No reira ka oronga mai aia i te au kaveinga no te arataki e te tauturu i toou oraanga, na te tu te ka akamareka iaia i teia au rā openga.—Mataio 24:14.

² E akamaara e te kite maira a Iehova i te au mea ravarai. Kua kite aia eaa te ka tupu a te tuatau ki mua, e kua kite tikai aia mei teaa te vaitata o te openga o teia akatereanga. (Isaia 46:10;  Mataio 24:3, 36) Kua kite katoa a Iehova ia koe. Kua kite aia i te au mea e mataora ai koe e te au mea te ka akamareka kore ia koe. Penei e tangi anga reka te akoanga a te tangata, inara me kare i akatumuia ki runga i te Tuatua a te Atua, kare te reira i te mea pakari tikai.—Maseli 19:21.

3, 4. Eaa ta te akarongo anga ki te arataki anga kino i akatupu kia Adamu e Eva e ta raua tamariki?

³ Kua roa te au akoanga kino i te vai ua anga. Ko Satani te mea mua tei oronga i te akoanga kino ki te tangata. Akakite aia kia Eva e ka mataora raua ko Adamu me iki raua uaorai, akapeea me akono i to raua oraanga. (Genese 3:1-6) Inara e tu noinoi to Satani! Kua inangaro aia ia Adamu e Eva, e ta raua uanga ka anau mai a te tuatau ki mua, kia akarongo e kia akamori iaia, kare ia Iehova. Inara kare a Satani apinga i rave ana no te tangata. Na Iehova i oronga i te au mea pouroa na raua. Kua anga aia ia raua, kua oronga i tetai kainga manea, e to raua kopapa apa kore kia ora raua e tuatau ua atu.

⁴ Te mea maromaroa, kua akarongo kore a Adamu e Eva i te Atua. Na te rave anga i teia, kua akatakake raua ia raua uaorai mei Tei Anga ia raua. E tumatetenga tei tupu. Mei te tiare tei tipuia, kua akamata a Adamu e Eva i te ruaine e kua mate. Kua mamae katoa ta raua tamariki, e te kapiti katoa maira ia tatou pouroa. (Roma 5:12) E maata te tangata tei kopae i ta te Atua i karanga e kua rave i ta ratou i inangaro. (Ephesia 2:1-3) Eaa tei tupu mai? Karanga te Pipiria e “kare e pakari” me patoi te tangata ia Iehova.—Maseli 21:30.

5. Eaa te irinaki anga papu a te Atua no te tangata, e kua tano ainei tana?

⁵ Kua irinaki papu a Iehova e e aronga tetai, kapiti mai te au mapu, te ka inangaro i te kite e te tavini iaia. (Salamo 103:17, 18; 110:3) E au mapu akaperepere tikai teia kia Iehova! Ko koe ainei tetai? Ka mataora i reira koe i te au mea “meitaki” mei ko mai i te Atua, e ka kapiti mai te mataora i toou oraanga. (E tatau ia Salamo 103:5; Maseli 10:22) Ka uriuri tatou e ā o teia au apinga. Ko te kai pae vaerua, au oa meitaki, au akakoroanga puapinga, e te tu rangatira mou.

6. Eaa tatou ka akono ei i to tatou au anoano pae vaerua, e eaa ta Iehova i oronga mai ei tauturu ia tatou?

⁶ Kare o te manu anoano i te pae vaerua, koia oki, kare ratou e anoano kia kite i Tei Anga ia ratou. Inara ka anoanoia tatou. (Mataio 4:4) Me akarongo tatou ki te Atua, ka rauka mai te kite oonu, te pakari, e te mataora. Karanga a Iesu: “E mataora to te aronga tei manako i to ratou anoano i te pae vaerua.” (Mataio 5:3, NW) Kua oronga mai te Atua i te Pipiria e te taangaanga ra i “te tavini akono meitaki e te pakari” kia oronga mai i te au puka no te akaketaketa i to tatou akarongo. (Mataio 24:45) E au kai pae vaerua teia au puka, no te mea ka akamatutu te reira i to tatou akarongo e ka akaketaketa i to tatou pirianga kia Iehova. E tukeke ta tatou kai pae vaerua e reka ana!—Isaia 65:13, 14.

7. Akapeea te kai pae vaerua no ko mai i te Atua me tauturu ia koe?

⁷ Ka oronga mai te kai pae vaerua i te pakari e kia rauka i te manako meitaki, te ka paruru ia koe i te au tu ravarai. (E tatau ia  Maseli 2:10-14.) Ei akaraanga, ka tauturu teia au tu ia koe kia kite i te au tuatua pikikaa, mei te pikikaa e kare e Atua Tei Anga mai, e te pikikaa e ka mataora koe me rauka te moni e te au apinga materia. Ka tauturu katoa teia au tu ia koe kia kopae i te au anoano e te au peu te ka tamamae ia koe. No reira e rave i taau ka rauka kia pakari koe e kia akamanako meitaki. I reira koe e kite ei e te inangaro maira a Iehova ia koe e kia meitaki toou oraanga.—Salamo 34:8; Isaia 48:17, 18.

8. Eaa tatou ka akavaitata atu ei ki te Atua i teianei, e akapeea koe e puapingaia ai a te tuatau ki mua?

⁸ Kare e roa atu ana, ka takoreia te au tuanga katoatoa o to Satani ao. Ko Iehova anake te ka paruru ia tatou e ka oronga mai i te au mea ka anoanoia, kapiti mai ta tatou kai i te au rā. (Habakuka 3:2, 12-19) No reira ko te taime teia kia akavaitata ki te Atua e te akaketaketa i to tatou irinaki kiaia. (2 Petero 2:9) Me pera koe, noatu eaa te ka tupu, ka aite koe mei ia Davida rai, tei karanga: “Kua tuku au ia Iehova ei mua ua rai iaku; tei toku rima katau aia kare au e ngaueue.”—Salamo 16:8.

9. (a) Me tatau tatou ia Ioane 6:44, eaa ta Iehova e rave ana? (e) Eaa te mea umere me aravei tatou i tetai Au Kite ke mai?

⁹ Me aravei koe i tetai tangata kare i roto i te tuatua mou no te taime mua, eaa te maata taau i kite no runga iaia? Penei kua kite koe i tona ingoa e tona tutu mata, inara ko te reira ua taau i kite. E tuke tikai me aravei koe i tetai tangata i roto i te tuatua mou no te taime mua. Kite koe e te inangaro ra aia ia Iehova. Kua kite a Iehova i te meitaki i roto iaia e kua pati iaia kia riro mai ei tuanga o tona iti tangata akamori. (E tatau ia Ioane 6:44.) Noatu noea mai te reira tangata e tona tupuanga mai, e maata taau i kite takere no runga iaia, e e maata katoa tana i kite no runga ia koe!

10, 11. Eaa te au mea tei aiteite i rotopu i te iti tangata o Iehova, e akapeea teia te akakeu anga ia koe?

¹⁰ Me aravei koe i tetai Au Kite, kua kite  takere koe e kua aiteite to korua manako puapinga. Noatu e tuke to korua reo e tuatua ana, kua kite korua i “te vaa viivii kore” o te tuatua mou. (Zephania 3:9) Te aiteanga, te irinaki kapiti ra korua i te Atua, te akono kapiti ra korua i te au turanga tau, e kua aiteite to korua manakonakoanga no te tuatau ki mua. Ka tauturu teia ia korua kia irinaki i tetai e tetai e kia akaketaketa i to korua pirianga e tuatau ua atu.

¹¹ No reira me akamori koe ia Iehova, ka karanga koe e kua rauka ia koe te au oa meitaki tikai. E au oa toou takapini i teianei ao, noatu kare koe i aravei ake ia ratou! Kua kite ainei koe i tetai kare i te tavini no Iehova tei rauka iaia teia apinga akaperepere?

12. Eaa te au akakoroanga puapinga ka rauka ia koe i te akanoo?

¹² E tatau ia Koheleta 11:9–12:1. E au akakoroanga ainei taau e tauta nei i te itae? Penei ka akakoro koe i te tatau i te Pipiria i te au rā ravarai e kia oronga i te au pauanga me kore te apii meitaki atu i ko i te au uipaanga. Penei ka tauta koe i te taangaanga meitaki atu i te Pipiria i roto i te angaanga tutu aere. Mei teaa toou tu me kite koe, me kore me akakite mai tetai ke e te meitaki maira koe? Penei ka mataora tikai koe, e e tau kia pera rai koe! No teaa ra? No te mea te rave ra koe i ta Iehova e inangaro maira, mei ia Iesu rai.—Salamo 40:8; Maseli 27:11.

13. Akapeea te tavini anga i te Atua i meitaki atu ei i te akamou anga ki te au akakoroanga o teianei ao?

¹³ Me akamou koe ki runga i te tavini anga ia Iehova, te rave ra koe i te angaanga te ka akamareka ia koe e ka puapingaia toou oraanga. Kua ako mai a Paulo: “Kia maroiroi kotou, auraka e ngaueue, kia maata nei te rave anga i te angaanga a te Atu, auraka e tivata, kua kite oki kotou e, kare te mea puapinga kore te angaanga a te Atu, ta kotou e rave na.” (1 Korinetia 15:58) Inara me akamou te tangata ki te au akakoroanga o teianei ao, mei te kimi moni e kia rongonui, kare ratou e mataora tikai ana. Noatu kua puapingaia ratou, te maata anga o te taime te ngere ra ratou i tetai apinga. (Luka 9:25) Ka apii tatou i teia mei te akaraanga o te Ariki ko Solomona.—Roma 15:4.

14. Eaa taau i apii mai mei ta Solomona kimikimianga?

¹⁴ Kua rave a Solomona, tetai tangata apinganui e te ririnui rava atu tei ora ana, i tetai kimikimi anga. Karanga aia kiaia uaorai: “E timata ana [au] i te rekareka, e kimi oki i te navenave.” (Koheleta 2:1-10) No reira kua patu aia i te au are manea rava atu, te au ngai e te au aua tiare manea tikai, e kua rave i tana i inangaro. Kua mareka e kua mataora ainei aia? Te akara anga a Solomona i te au mea tana i rave, karanga aia: “E mea puapinga kore anake” te reira. Karanga katoa aia: “Kare rava oki e puapinga” o te reira au mea. (Koheleta 2:11) Ka tamou ainei koe i teia apiianga mei ta Solomona kimikimianga?

15. Eaa koe ka anoano ei i te akarongo, e akapeea te reira me tauturu ia koe, me apii mei ia Salamo 32:8?

¹⁵ Tetai pae aronga, ka kite ratou i te au apiianga o te oraanga, na roto ua i te au tarevake e te mamae tei tupu kia ratou. Kare a Iehova e inangaro kia tupu teia kia koe. Te inangaro maira aia kia akarongo koe e kia aru iaia. Ka anoano maataia te akarongo, e kare rava koe e tataraapa i taau au  ikianga i te oraanga. E kare rava a Iehova e akangaropoina i “to kotou anoano, i tona ingoa.” (Ebera 6:10) No reira e tauta i te akamatutu i te akarongo ketaketa. I reira e rauka ai ia koe te rave i te au ikianga meitaki e ka kite koe e te inangaro maira toou Metua i te rangi i te mea meitaki noou.—E tatau ia Salamo 32:8.

16. Eaa ra tatou ka akaperepere ei e ka taangaanga pakari ei i te tu rangatira?

¹⁶ Kua tata a Paulo: “Tei iaia te vaerua o te Atu ra, tei reira te rangatira.” (2 Korinetia 3:17) Te inangaro ra a Iehova i te tu rangatira, e kua anga aia ia koe kia pera katoa. Inara te inangaro maira aia kia taangaanga pakari koe i te tu rangatira ei paruru ia koe. Penei te akara ra toou au oa i te au tutu ainga viivii, te rave ra i te ainga tau kore, te rave ra i te au tipoti kino, me kore te kai apinga akakona e te kava. I te akamataanga, penei ka akara anga mataora teia, inara ka taki atu te reira ki te tupuanga kino, mei te maki, te inangaro maata i te reira, me kore te mate. (Galatia 6:7, 8) Penei ka manako te au mapu tei piri atu ki teia angaanga e kua rauka te tu rangatira, inara kare ko te reira te tu.—Tito 3:3.

17, 18. (a) Akapeea te akarongo ki te Atua me akarangatira tikai ia tatou? (e) Na teea tu i rangatira maata atu ei a Adamu e Eva i te tangata i teia tuatau?

¹⁷ I tetai tua, e mea meitaki no tatou te akarongo kia Iehova. E meitaki te reira no to tatou oraanga e ka rangatira tikai tatou. (Salamo 19:7-11) E me taangaanga koe i te tu rangatira ma te pakari, koia oki, me iki koe i te akarongo i ta te Atua au ture e te au kaveinga apa kore, te akaari ra koe ki te Atua e ki toou nga metua e e tangata manako meitaki koe. Penei ka irinaki maata mai toou nga metua ia koe e ka oronga maata mai i te tu rangatira. E kua taputou mai a Iehova i te oronga i te tu rangatira mou tikai ki tona au tavini tiratiratu, ta te Pipiria i taiku e ko “te rangatira meitaki o te tamariki a te Atua ra.”—Roma 8:21.

¹⁸ Ko teia te tu rangatira ta Adamu e Eva i rekareka ana. I roto i te kainga i Edene, e okotai rai apinga ta te Atua i akakite kia raua e auraka e rave. Auraka raua e kai i te ua o tetai tumu rakau. (Genese 2:9, 17) Toou manako e tu tau kore e te arairai ainei to te Atua te oronga anga aia i taua ture ra? Kare! Akamanako ana eia au ture ta te tangata i maani e i māro i tetai ke kia akarongo. Inara e okotai rai a Iehova ture i oronga kia Adamu e Eva.

19. Eaa ta Iehova e Iesu e apii maira te ka tauturu ia tatou kia rangatira?

¹⁹ E tu pakari tikai to Iehova i tana akono anga ia tatou. Kare aia i oronga maata i te au ture, mari ra kua apii marie aia ia tatou kia akarongo ki te ture o te aroa. Te apii maira aia kia akono tatou i tana kaveinga e kia rikarika i te kino. (Roma 12:9) I tana Ako i te Maunga, kua tauturu tana Tamaiti, ko Iesu, ia tatou kia mārama i te tumu i rave ei te tangata i te kino. (Mataio 5:27, 28) E i roto i te ao ou, ei Ariki no te Patireia o te Atua, ka apii ua mai rai a Iesu ia tatou kia  kite i te tika e te tarevake mei iaia rai. (Ebera 1:9) Ka akatupu katoa a Iesu i te manako e te kopapa apa kore no tatou. Akamanako ana mei teaa te tu me kare tatou e timataia kia rave i te kino e kare tatou e mamae no te tu apa kore. I reira tatou e rekareka ai i “te rangatira meitaki” ta Iehova i taputou mai.

20. (a) Akapeea a Iehova te taangaanga anga i tona tu rangatira? (e) Akapeea koe me aru i tona akaraanga?

²⁰ I roto i te ao ou, ka kotingaia rai to tatou tu rangatira. Na teea tu? Ka anoano uaia rai tatou kia akakeuia e te aroa no te Atua e no tetai ke. Me aratakiia tatou e te aroa, te aru ra tatou ia Iehova. Noatu e tu rangatira kotinga kore to Iehova, te akariro ra aia i te aroa kia arataki i te au mea ravarai tana ka rave, kapiti mai tana akono anga ia tatou. (1 Ioane 4:7, 8) No reira ka rauka ia tatou te tu rangatira mou tikai me aru tatou i te Atua anake.

21. (a) Eaa to Davida manako no runga ia Iehova? (e) Eaa ta tatou ka uriuri i te atikara ka aru mai?

²¹ Te āriki ra ainei koe i te au mea meitaki pouroa ta Iehova i oronga mai kia koe? Kua oronga mai aia i te kai pae vaerua, te au oa meitaki, te au akakoroanga puapinga, te manakonakoanga no te tu rangatira apa kore a te tuatau ki mua, e tetai atu au apinga manea. (Salamo 103:5) Penei kua aite toou manako ki to Davida, te pure anga aia i roto ia Salamo 16:11: “Ka akakite mairai koe iaku i te ara ora; tei mua i to aroaro te ki anga o te rekareka; tei to rima katau te pereperekavana e tuatau ua atu.” I te atikara ka aru mai, ka uriuri tatou i tetai au tuatua mou akaperepere ke atu mei ia Salamo 16. Ka tauturu teia ia koe kia kite akapeea e rauka ai te oraanga meitaki rava atu!