1, 2. Faandi mbei a dë wan köni soni te u ta haika di Sëmbë di mbei u te u musu luku andi woo du ku di libi fuu? (Luku dee peentje a bigi u di woto.)

EE I da wan njönkuwan, nöö a musu u dë taa sëmbë ta da i sömëni lai di nama ku dee soni dee joo du a i libi bakaten. Dee mësitë, dee laima, nasö woto sëmbë sa ta piki i taa i musu go a hei siköö, nasö taa i musu abi wan wooko di sa mbei i ko abi hia möni. Ma Jehovah ta da i woto lai. A dë sö tuu taa hënseei kë fii wooko bunu a siköö, sö taa i sa feni wan fasi fii sa sölugu iseei (Kolosën 3:23). Ma a sabi tu taa te i njönku, nöö i musu du wanlö soni di o heepi i u soni waka bunu da i a di ten di ta ko. Fëën mbei a ta da i wanlö mama wëti di sa heepi i fii saandi i musu du a ilibi, söseei di o heepi i fii du soni a wan fasi di o mbei a wai ku i a dee lasiti daka u di goonliba aki.​—Mateosi 24:14.

 ² Hoi a pakisei taa Jehovah sabi hii soni. A sabi andi o pasa a di ten di ta ko, söseei a sabi unfa di kaba u di goonliba aki zuntu tjika (Jesaaja 46:10; Mateosi 24:3, 36). Jehovah sabi i tu. A sabi andi o mbei i ta dë waiwai, söseei a sabi andi o ta mbei i ta tjali tu. So juu dee lai di libisëmbë ta da u, sa ta djei kuma de bunu, ma ee di soni di de ta piki u an ta kai ku dee soni dee sikifi a di Wöutu u Gadu, nöö hën da di soni dë an dë wan köni soni tuutuu.​—Nöngö 19:21.

3, 4. Unfa di haika di Adam ku Eva bi haika poipoi lai, bi tja hogi ko da de ku dee mii u de?

³ Na tide jaa sëmbë ta da wotowan poipoi lai. Saatan da di fosu sëmbë di bi da libisëmbë poipoi lai. A bi piki Eva taa hën ku Adam bi o ta möön dë waiwai ee de bi sa ta taki da deseei unfa de musu libi (Kenesesi 3:1-6). Ma Saatan bi ta pakisei hënseei nöö! A bi kë u Adam ku Eva ku dee mii di de bi o pai bakaten, ko ta piki hën buka, söseei a bi kë u de ta dini ën ka u de dini Jehovah. Ma Saatan an du na wan soni da libisëmbë. Jehovah hën da libisëmbë hii dee soni di de abi. Adam feni Eva, Eva seei feni Adam, de tuu feni wan waiti djai u de sa libi nëën, söseei sinkii u de bi dë söndö föutu, nöö de bi o sa libi u teego.

⁴ Ma a tjali taa Adam ku Eva an piki Gadu buka. U di de du di soni aki, mbei de kumutu a di tii u di Sëmbë di da de libi. Wë soni an bi waka bunu seepiseepi. Pikipiki Adam ku Eva bi ta ko gaandi u te de dëdë, leti kumafa wan folo di de koti puu a di pau fëën ta dëdë pikipiki. Dee mii u de seei bi ko ta tja fuka tu, nöö di soni dë dë da hii u tuu (Loomë 5:12). Gaansë u dee sëmbë a di ten aki, an ta haika dee soni dee Gadu ta taki, nöö de ta kë du andi de kë (Efeise 2:1-3). Andi ta pasa ku dee lö sëmbë dë te u kaba fëën? Di Bëibel ta taki taa wan sëmbë an sa feni tuutuu „köni” ee a ta hopo fia ku Jehovah.​—Nöngö 21:30.

5. Andi Jehovah bi sabi u libisëmbë, nöö a bi abi leti ö?

⁵ Jehovah bi sabi taa sëmbë bi o dë di bi o kë ko sabi soni fëën, söseei di bi o kë dini ën, nöö sömëni njönkuwan bi o dë a dendu tu (Psalöm 103:17, 18; 110:3). Jehovah ta si dee njönkuwan aki u gaan soni seei! I da wan u dee njönkuwan aki ö? Wë an dë u taki taa i ta feni sömëni „bunu soni” u Gadu, nöö di soni aki ta mbei i abi wan piizii libi. (Lesi Psalöm 103:5; Nöngö 10:22). Woo taki u fö u dee soni aki. Dee soni aki da dee lei dee u ta feni a Bëibel, dee bunu mati dee u ta feni, dee soni dee u sa ta du a di dini u Jehovah, söseei di fii di u ko fii tuutuu.

6. Faandi mbei i musu ta mbei möiti fii ku Jehovah ko dë möön gaan mati, nöö andi Jehovah ta da i fii sa du di soni aki?

⁶ Mbeti an ta fii taa de musu ko sabi di Sëmbë di mbei de. Ma u kuma libisëmbë abi di fii dë (Mateosi 4:4). Te u ta haika Gadu, u ta ko fusutan soni möön bunu, u ta ko köni, nöö u ta ko dë waiwai. Jesosi bi taki taa: „Ee un ta fii taa söndö Gadu wan dë wan wojo soni. Un dë bunu e” (Mateosi 5:3). Gadu da u di Bëibel, söseei a da u „di köni saafu di dë u futoou” u de sa ta tja buku ko a döö da u di sa heepi u u di biibi fuu ko möön taanga (Mateosi 24:45, NW). Dee buku aki ta heepi u fuu ku Jehovah ko dë möön gaan mati. U ta lei sömëni soni di  ta heepi u fuu ku ën ko dë mati!​—Jesaaja 65:13, 14.

7. Na un fasi dee soni dee Gadu ta lei u, sa heepi i?

⁷ Dee soni dee Gadu ta lei i, sa mbei i ko köni, söseei de sa heepi i fii si soni a di soifi fasi, nöö dee soni aki o heepi i a peipei futu. (Lesi Nöngö 2:10-14.) Dee fasi aki, o heepi i fii ko sabi andi da dee mindimindi woto di sëmbë ta paaja. Wantu u dee mindimindi woto aki da di taki di sëmbë ta taki taa na wan sëmbë mbei u, söseei na wan sëmbë mbei dee woto soni di dë a goonliba aki ku liba ala. Nasö taa möni ku gudu sa mbei i ta dë waiwai. Dee fasi aki sa heepi i tu fii köni ku soni di sa tja hogi ko da i. Fëën mbei i musu du hii soni di i sa du fii sa ko abi köni, söseei fii ko ta si soni a di soifi fasi. Te a ko dë sö, nöö joo ko si unfa Jehovah lobi i tjika, söseei joo ko si taa a kë u soni waka bunu da i.​—Psalöm 34:8; Jesaaja 48:17, 18.

8. Faandi mbei nöunöu kaa i musu mbei möiti fii ku Gadu ko dë gaan mati, nöö unfa di soni aki o mbei i feni wini a di ten di ta ko?

⁸ Abiti möön de o poi di goonliba u Saatan kaba a sösö. Jehovah wanwan o sa heepi u, söseei hën wanwan o sa da u dee soni dee u abi fanöudu. Dee soni aki sa nama tu ku soni u njan (Habaki 3:2, 12-19). Fëën mbei nöunöu kaa u musu mbei möiti fuu ko dë möön gaan mati ku Gadu, söseei u musu ko ta möön futoou ën (2 Petuisi 2:9). Ee i ta du dee soni aki, nöö aluwasi andi ta pasa, joo fii kumafa Dafiti bi ta fii di a bi taki taa: „Hii juu kaa mi ta mëni Jehovah. U di hën dë a mi letimaun së, mbei ma o naki futu.”​—Psalöm 16:8.

9. (a) Andi Jehovah ta du, te u luku di soni di sikifi a Johanisi 6:44? (b) Faandi mbei a ta dë wan apaiti soni te i miti wan woto Kotoigi u di fosu pasi?

⁹ Te i miti wan sëmbë di an dë a di tuutuu lei u di fosu pasi, nöö an dë u taki taa ja ta  sabi hia soni fëën. Kandë i sa sabi di në fëën, nasö kandë i hoi di fesi fëën, ma kandë ja o sabi woto soni fëën möön. Ma di soni aki tooka ku te i miti wan sëmbë di dë a di tuutuu lei u di fosu pasi. I ta sabi taa a lobi Jehovah. I ta sabi taa Jehovah si wan bunu soni a di sëmbë aki, nöö a tei ën kuma wan dinima fëën. (Lesi Johanisi 6:44.) Aan toobi naasë di sëmbë aki kumutu, nasö unfa de kiijëën, tökuseei i ta sabi sömëni soni fëën kaa, söseei hënseei ta sabi sömëni soni fii tu!

10, 11. Andi hii dee sëmbë u Jehovah ta abi, nöö unfa i feni di soni aki?

¹⁰ Te i miti wan Kotoigi, nöö i ta sabi kaa taa wanlö fanöudu soni dë di i ku ën tuu ta du. I sabi tu taa aluwasi wan ta fan di wan töngö, tökuseei un ta fan „di soifi töngö” u di tuutuu lei (Sefanja 3:9). Di soni aki kë taki taa hii unu tuu ta biibi a Gadu, un ta hoi dee seei wëti, söseei unu tuu dë ku di mëni u soni waka bunu a di ten di ta ko kumafa Gadu paamusi u. Dee soni aki ta heepi i fii futoou di wotowan fii, söseei a ta mbei i ku ën ko dë gaan mati u teego.

¹¹ Fëën mbei te i ta dini Jehovah, i sa taki tuutuu taa i abi dee möön bunu mati. I abi mati a hii së u goonliba, aluwasi ee ja miti de wan daka! I si kuma sëmbë dë di ta piizii u di soni aki hedi möön dee sëmbë u Jehovah u?

12. Andi i sa buta taa i kë du a di dini u Jehovah?

¹² Lesi Peleikima 11:9–12:1. Soni dë di i bi o kë du a di dini di i ta dini Jehovah u? Kandë i buta taa joo ta lesi di Bëibel hiniwan daka, nasö taa joo ta mbei möiti fii sa ta da möön bunu piki a dee komakandi, nasö taa joo ta hoi dee taki fii a wan möön bunu fasi. Nasö kandë i ta mbei möiti u wooko möön bunu ku di Bëibel te i dë a di peleikiwooko. Unfa i ta fii te i ta si taa i ta ko sa u du dee soni aki a wan möön bunu fasi, nasö unfa i ta fii te wotowan ta piki i taa i ta du dee soni aki a wan möön bunu fasi? Kandë i ta wai seei! Ma faandi mbei? Wë i ta wai u di i ta du andi Jehovah kë fii du, leti kumafa Jesosi bi ta du ën.​—Psalöm 40:8; Nöngö 27:11.

13. Faandi mbei u sa taki taa di dini di u ta dini Gadu bunu möön dee soni dee u sa go du a di goonliba aki?

¹³ Te i ta buta pakisei fii a di dini di i ta dini Jehovah, hën da i ta du wan soni di o mbei i ta dë waiwai, söseei di o ta da i piizii a di libi fii. Paulosu bi taki taa: „Un musu tan gingin a di biibi un ta biibi Masa Jesosi dë. Wan musu disa möönsö. Un musu ta biinga hiniwanten a di wooko u Masa, biga i sabi taa di wooko i ta wooko da Masa dë an dë u sösö” (1 Kolenti 15:58). Ma te sëmbë ta buta hii de pakisei a di ko di de musu ko abi hia möni, nasö te de ta kë ko dë nëbai sëmbë u di goonliba aki, nöö de an ta dë waiwai tuutuu. Aluwasi ee soni ta waka bunu da de, tökuseei de an ta dë waiwai tuutuu (Lukasi 9:25). U ta si di soni aki a di libi u Könu Salumon.​—Loomë 15:4.

14. Andi i sa lei a di soni di Salumon bi öndösuku?

¹⁴ Salumon bi dë wan u dee möön gudu sëmbë di bi libi a goonliba aki, söseei a bi abi hia makiti tu. A bi go öndösuku wan soni luku. A bi taki nëën hati taa: „Be mi luku un wini piizii ta tja ko da sëmbë” (Peleikima 2:1-10). Salumon bi go mbei wanlö  gaan wosu, a bi ko abi gaan waiti kamian ka a bi ta paandi soni, nöö a bi ta du andi a kë. Ma dee soni aki bi ta mbei a dë waiwai ö? Di Salumon luku hii dee soni dee a bi du te a kaba, hën a taki taa: „Mi bi ko si taa hii soni bi dë u sösö.” A bi taki söseei taa: „Na wan soni a goonliba ta tja wini ko da libisëmbë” (Peleikima 2:11). Joo libi ku di soni di Salumon bi taki aki ö?

15. Faandi mbei i musu ko abi biibi, nöö unfa a o heepi i tjika, te u luku di soni di sikifi a Psalöm 32:8?

¹⁵ Te soni miti so sëmbë ufö de ta lei wan soni. Jehovah an kë u di soni aki miti i. A kë fii haikëën, söseei a kë fii piki hën buka. Ee i kë du dee soni aki, nöö i musu abi biibi, nöö nöiti a o hati i taa i du soni di ta lei taa i abi biibi. Söseei nöiti Jehovah o fëëkëtë di fasi fa i ta lei taa i „lobi ën” (Hebelejën 6:10). Fëën mbei, i musu mbei möiti fii sa ko abi wan taanga biibi. Di soni aki o mbei joo sa du soni a wan bunu fasi, nöö joo ko si taa di Tata fii a liba ala kë taa soni musu waka bunu da i.​—Lesi Psalöm 32:8.

16. Faandi mbei u musu si di fii di u ko fii kuma wan gaan soni, nöö faandi mbei u musu wooko ku ën a wan köni fasi?

¹⁶ Paulosu bi taki taa: „Di jeje u Jehovah, hën nöö sa da sëmbë fusutan u de kumutu a dee wëti dë basu ko fii” (2 Kolenti 3:17, NW). Jehovah lobi te wan sëmbë dë fiifii, nöö a mbei i a sö fasi taa iseei ta lobi te i dë fiifii tu. Ma a kë fii wooko ku di fii di i ko fii a wan köni fasi, sö taa hogi an miti i. Kandë dee pei fii ta luku fanafiti soni a di së u womi ku mujëë, nasö de ta libi fanafiti a di së u manu ku mujëë soni. Kandë de ta du peipei sport di sa mbei de kisi makei nasö di sa mbei de dëdë seei, nasö de ta bebe daan pasa maaka, ta hai taku tabaku. Kandë dee soni aki sa ta djei piizii soni, ma gaansë pasi de ta tja hogi ko da i bakaten. I sa kisi siki, nasö i sa ko dë saafu u dee soni aki, nasö a sa pasa taa i dëdë seei (Galasia 6:7, 8). Dee njönku sëmbë dee ta du dee soni aki sa ta si kuma de dë fiifii, ma na sö a dë tuutuu.​—Titusi 3:3.

17, 18. (a) Unfa di piki di u ta piki Gadu buka a soni, ta mbei u ko fii tuutuu? (b) Na un futu Adam ku Eva bi dë fiifii möön u dee sëmbë dee ta libi a di ten aki?

¹⁷ Ma di piki di u ta piki Jehovah buka, bunu da u seei. Te u ta piki Jehovah buka u ta dë gösöntu, nöö u ta ko fii tuutuu (Psalöm 19:7-11). Nöö te i ta wooko a wan köni fasi ku di fii di i ko fii, nasö te i ta hoi dee wëti u Gadu, ku dee mama wëti fëën, nöö i ta lei Gadu ku i mama ku i tata taa i ko dë wan gaan sëmbë di sa tja faantiwöutu. Di soni aki sa mbei i mama ku i tata ko ta futoou i möön gaanfa, söseei de sa ta da i pasi fii du so soni. Söseei Jehovah paamusi u taa abiti möön a o mbei hii dee  dinima fëën ko fii a wan möön apaiti fasi. Fëën mbei di Bëibel ta taki taa „dee mii u Gadu o ko fii”.​—Loomë 8:21.

¹⁸ Wë sö wë Adam ku Eva bi dë fiifii tjika. Wan kodo soni nöö Gadu bi piki de taa de an bi musu du, di de bi dë a di djai u Eden. De an bi musu njan di njanjan u wan u dee pau u di djai (Kenesesi 2:9, 17). I si kuma Gadu an bi libi bunu ku de di a bi da de di wëti dë u? Nasö i si kuma a bi da de wan wëti di bi taanga da de poi u de hoi ö? Wë nönö! Pakisei dee hia wëti di libisëmbë ta buta, nöö de ta duwengi wotowan u hoi de. Ma wan kodo wëti nöö Jehovah hën a bi da Adam ku Eva.

19. Andi da dee soni dee Jehovah ku Jesosi ta lei u, di o heepi u fuu ko fii?

¹⁹ Te u luku fa Jehovah ta libi ku u, nöö u ta si taa a köni gaanfa seei. An ta da u te a hia wëti fuu hoi, ma a ta lei u taa u musu ta lobi wotowan. A ta lei u taa u musu ta libi ku dee mama wëti fëën, söseei taa u musu buuse hogilibi (Loomë 12:9). A di taki di di Mii fëën bi hoi a di kuun liba, a bi taki soni di ta heepi u fuu ko fusutan faandi mbei sëmbë ta du hogi (Mateosi 5:27, 28). Nöö a di njunjun goonliba, te Jesosi o ta tii di Könuköndë u Gadu, nöö Jesosi o heepi u fuu ko ta si soni kumafa a ta si soni. Hën da a o heepi u fuu ko sabi andi da bunu ku andi da hogi (Hebelejën 1:9). Jesosi o heepi u tu fu wa ko abi zöndu möön. Pakisei unfa soni o dë te wa o ta fii u du hogi soni möön, söseei te wa o ta tja fuka möön, u di zöndu an o dë a u dendu möön. Wë te soni ko dë sö kaa, nöö woo wai seei, u di woo ko fii kumafa Jehovah bi paamusi u.

20. (a) Unfa Jehovah ta du soni, hii fa a sa du hii soni di a kë? (b) Unfa i sa djeesi ën?

²⁰ Te u dë a di njunjun goonliba, tökuseei wa o sa ta du hii soni kumafa u kë. Na un futu? Wë te woo du wan soni, nöö a o dë fuu ta wegi ën luku ee di soni di woo du dë o lei taa u lobi Jehovah ku dee baaa ku dee sisa fuu. Te u ta du soni ku lobi, nöö u ta lei taa u ta djeesi Jehovah a di fasi fa a ta du soni. Hii fa Jehovah sa du hii soni di a kë, tökuseei a ta du hii soni ku lobi. Boiti di dë, a ta lei u taa a lobi u, a di fasi fa a ta libi ku u (1 Johanisi 4:7, 8). Wë di soni aki ta lei u taa di wan kodo fasi fa u sa ko fii tuutuu, da te u ta djeesi Gadu.

21. (a) Unfa Dafiti bi ta si Jehovah? (b) Fuun soni woo taki a di woto di ta ko?

²¹ I ta tei hii dee gaan soni dee Jehovah du da i u bigi ö? A ta lei i soni u Bëibel, a da i bunu mati, a heepi i fii buta maaka di i sa dou a di dini di i ta dini ën, a lei i taa i sa ko fii a di ten di ta ko, nöö a ta du sömëni woto bunu soni da i tu (Psalöm 103:5). Kandë i ta fii kuma Dafiti di a bi begi Jehovah. A bi taki a Psalöm 16:11 taa: „Joo lei mi fa mi musu libi. Mi ta wai te mi si taa i feni mi bunu. Te mi dë a di letisë maun fii, nöö mi ta dë waiwai hii juu.” A di woto di ta ko, woo taki u woto waitiwaiti soni di u ta lei a Psalöm 16. Di soni aki o heepi i fii ko sabi unfa i sa feni di möön bunu libi di dë!