1, 2. ?Wanem ol jenis we yumi save mekem, olsem we stori blong Toni i soemaot?

TONI i wan yangfala we i nogat papa taem hem i stap gruap. Hem i go long haeskul, be hem i no rili intres long skul. Blong talem stret, hem i stap tingting blong lego skul. Long ol wiken, hem i stap go wajem muvi o spenem taem wetem ol fren blong hem. Hem i no man blong faet mo i no tekem drag, be yet hem i harem se laef blong hem i nogat mining. Hem i no sua sipos i gat wan God we i laef. Wan dei, Toni i mitim tu Witnes blong Jehova ale hem i talem long tufala se, hem i no sua sipos i gat God we i laef. Tufala i givim tu buklet blong hem i ridim, hemia Was Life Created? mo The Origin of Life—Five Questions Worth Asking.

² Nekis taem we oli kambak blong visitim Toni, tingting blong hem i jenis fulwan. Hem i ridim tufala buklet ya plante taem, mekem se ol pej blong buklet ya oli benben olbaot. Toni i talem long tufala Witnes ya se: “I mas gat wan God ya.” Ale hem i stat blong stadi Baebol, mo sloslo hem i luksave se laef i gat wan mining. !Fastaem Toni i no wan gudfala studen,  be naoia hem i wan long ol beswan studen long skul blong hem! Prinsipol blong skul ya i sapraes tumas, nao i talem long hem se: “Fasin blong yu i jenis bigwan mo ol mak blong yu long skul oli gud. ?Ating from we yu stap joen wetem ol Witnes blong Jehova?” Toni i talem yes mo i tokbaot ol samting we hem i lanem long Baebol. Biaen hem i finisimgud skul blong hem, mo tede hem i wan fultaem paenia mo i wan man blong givhan. !Toni i glad tumas se naoia hem i gat wan Papa we i lavem hem, hemia Jehova!—Ol Sam 68:5.

3. ?Jehova i givim wanem advaes long ol yangfala?

³ Stori blong Toni i soemaot se Jehova i rili kea long ol yangfala. Hem i wantem se yu haremgud long laef blong yu, taswe hem i givim advaes ya se taem “yufala i yangfala yet, oltaem yufala i mas tingbaot hem.” (Prija 12:1) Hemia i no isi, be God i save mekem yu win taem yu yangfala mo taem yu kam bigman. Blong kasem save moa, bambae yumi tokbaot samting we i halpem ol man Isrel blong winim Promes Lan mo samting we i mekem Deved i winim bigfala man ya Golaeat.

4, 5. ?Yumi lanem wanem long ol man Isrel we oli winim ol man Kenan, mo Deved we i winim Golaeat? (Yu luk pija long stat blong stadi.)

⁴ ?Jehova i talem wanem long ol man Isrel taem klosap oli go insaed long Promes Lan? ?Hem i talem se oli mas kam ol nambawan soldia blong faet? !Nogat! (Dutronome 28:1, 2) Hem i talem se oli mas obei mo trastem hem. (Josua 1:7-9) Ating ol man oli luk se advaes ya i krangke, be hemia beswan advaes blong ol man Isrel. Jehova i gohed blong halpem olgeta blong oli winim ol man Kenan. (Josua 24:11-13) I nidim bilif blong obei long God, be oltaem bilif i mekem ol man blong God oli win. Hemia i tru long taem bifo mo tede tu.

⁵ Golaeat i wan strong man blong faet. Hem i longfala samwe long tri meta (9.5 fit), mo hem i gat ol tul blong faet. (1 Samuel 17:4-7) Deved i gat wan sling nomo, be hem i bilif long God. !Wan man we i nogat bilif bambae i luk Deved se hem i krangke, from i wantem agensem Golaeat! Be blong talem stret, Golaeat nao i krangke.—1 Samuel 17:48-51.

6. ?Bambae yumi tokbaot wanem long stadi ya?

⁶ Long las stadi, yumi tokbaot fo samting we oli save mekem yumi glad mo yumi win long laef. Yumi lanem se yumi mas lukaotgud long ol nid blong yumi long saed blong spirit, faenem ol gudfala fren we oli lavem God, putum ol gudfala mak, mo tinghae long fasin fri we God i givim long yumi. Long stadi ya, bambae yumi tokbaot sam moa rod we oli save halpem yumi blong mekem ol samting ya. Fastaem, i gud yumi tokbaot sam rul we oli stap long Ol Sam 16.

7. (1) ?Man we tabu spirit i lidim hem bambae i mekem wanem? (2) ?Deved i talem tangkiu from wanem samting?

⁷ Man we i tabu spirit i lidim hem, i soemaot se hem i bilif long God mo i traehad blong folem tingting blong God long evri samting we hem i mekem. Hem i letem Jehova i lidim hem mo i wantem blong obei long hem. (1 Korin 2:12, 13) Deved i soemaot samting ya taem hem i singsing se: “Hae God. Yu nomo yu stamba  blong olgeta laef blong mi.” (Ol Sam 16:5) Deved i stap talem tangkiu from evri samting we God i givim long hem, mo from we hem i stap frengud wetem God, mo i luk God olsem ples blong haed blong hem. (Ol Sam 16:1) Taswe, hem i save talem se: “Mi mi glad tumas.” !Deved i laekem tumas blong frengud wetem God, mo hemia nao samting we i givim trufala glad long hem!—Ridim Ol Sam 16:9, 11.

8. ?Wanem sam samting we yu save mekem blong kasem trufala glad?

⁸ Ol man we oli wantem tumas blong kam rijman bambae oli neva kasem glad ya we Deved i gat. (1 Timoti 6:9, 10) Wan brata long Kanada i talem se: “Trufala glad, i no kamaot long ol samting we yumi kasem, be i kamaot long ol samting we yumi stap givim long Jehova God.” (Jemes 1:17) Sipos yu bilif long Jehova mo yu mekem wok blong hem, bambae yu luksave se laef blong yu i gat mining. Taswe, ?olsem wanem blong mekem bilif i kam strong moa? Yu mas spenem taem blong ridim Baebol, lukluk ol naesfala samting we God i wokem, mo tingbaot ol gudfala fasin blong God, olsem lav we hem i gat long yu.—Rom 1:20; 5:8.

9. ?Olsem wanem yu save letem Tok blong God i jenisim yu?

⁹ God i olsem wan papa we i lavem yumi, taswe samtaem hem i soemaot lav ya taem hem i stretem yumi blong yumi folem rod we i stret. Deved i tinghae long fasin ya mo i se: “Mi mi stap presem Hae God, from we oltaem hem i stap lidim mi, mo long naet, tingting blong mi i stap toktok long mi, i stap soemaot rod long mi.” (Ol Sam 16:7) Deved i tingting dip long ol tingting blong God mo i traehad blong folem oli tingting blong God. Hem i letem God i jenisim tingting blong hem, olsem nao hem i save kam wan gudfala man. Taem yu traehad blong mekem olsem Deved, bambae yu lavem Jehova moa, mo bambae yu kam bigman long saed blong spirit. Wan sista we nem blong hem Kristin i talem se, taem hem i mekem risej mo i tingting dip long wanem we hem i ridim, hem i harem olsem se Jehova i givim ol tok ya i go stret long hem.

10. Folem Aesea 26:3, taem yu letem tabu spirit i lidim yu ?olsem wanem samting ya bambae i halpem yu?

¹⁰ Taem yu letem tabu spirit i lidim yu, bambae yu luk wol ya mo ol samting blong hem olsem we God i luk olgeta. Jehova i mekem se yu naf blong luksave samting ya. ?From wanem? Hem i wantem se yu luksave ol impoten samting long laef, yu mekem ol gudfala desisen, mo yu lukluk i go long fiuja we yu no fraet nating. (Ridim Aesea 26:3.) Josua, wan brata long Yunaeted Stet, i talem se sipos yu stap klosap long Jehova, bambae yu luksave wanem i impoten mo wanem i no impoten.

11. ?Olsem wanem Deved i jusum ol fren blong hem?

¹¹ Ridim Ol Sam 16:3. Deved i save olsem wanem blong faenem ol gudfala fren. Hem i jusum blong fren wetem olgeta we oli lavem Jehova, mo hem i “wantem tumas blong stap wetem olgeta.” Hem i se ol fren blong hem “oli gudfala man,” from we oli traehad blong folem ol rul blong Jehova. Wan narafala man blong raetem sam i talem se “Mi mi stap fren long olgeta man we oli stap wok blong yu mo oli stap obei long ol loa blong yu.”  (Ol Sam 119:63) Olsem we yumi tokbaot long las stadi, yu tu yu save faenem plante gudfala fren we oli lavem Jehova mo oli obei long hem. Mo tu, yu save gat ol fren we maet oli yang o oli olfala moa long yu.

12. ?From wanem Deved mo Jonatan oli fren gud?

¹² Deved i no jusum nomo blong fren wetem olgeta we oli gat sem yia olsem hem. ?Yu save nem blong wan gudfala fren blong Deved? Ating yu tingbaot Jonatan. Deved mo Jonatan i frengud tugeta, mo hemia wan long ol beswan eksampol long Baebol. Be Jonatan i gat 30 yia moa long Deved, hem i olfala moa long Deved. ?Wanem i mekem se tufala i gudfala fren? Tufala i bilif long God, tufala i respektem tufala, mo tufala i tinghae long ol gudfala fasin blong tufala, olsem strong tingting we tufala i gat blong go faet agensem ol enemi blong God.—1 Samuel 13:3; 14:13; 17:48-50; 18:1.

13. ?Olsem wanem blong gat plante fren? Talem wan eksampol.

¹³ Olsem Deved mo Jonatan, yumi “wantem tumas blong stap wetem” ol fren we oli lavem Jehova mo oli bilif long hem. Kiara, we i mekem wok blong God blong plante yia, i talem se: “Mi gat ol fren long ol defdefren ples long wol, oli gat defren kalja mo fasin blong laef.” Sipos yu mekem olsem, bambae yu luksave se Baebol mo tabu spirit oli mekem yumi kam olsem wan famle nomo long fulwol.

14. (1) ?Olsem wanem yu save putum ol gudfala mak long laef blong yu? (2) ?Sam yangfala oli talem wanem long saed blong ol mak blong olgeta?

¹⁴ Ridim Ol Sam 16:8. * Deved i luk se wok blong God nao i moa impoten. Sipos yu folem fasin blong Deved blong putum ol mak mo oltaem yu tingbaot samting we Jehova i wantem, bambae yu haremgud long laef blong yu. Wan brata nem blong hem Steven i talem se: “Taem mi putum wan mak, nao mi kasem mak ya,  mo mi luklukbak long ol samting we mi kamgud long hem, hemia i mekem mi mi haremgud tumas.” Wan yangfala brata blong Jemani we naoia i stap mekem wok blong prij long wan defren ples, i talem se: “Taem bambae mi kam olfala, mi no wantem luklukbak long laef blong mi mo luk se evri samting we mi mekem, i blong tingbaot mi nomo.” ?Yu yu gat sem filing olsem brata ya? Ale, i gud yu yusum paoa mo gudhan blong yu blong givim ona i go long God mo blong halpem ol narafala man. (Galesia 6:10) Yu putum ol mak long wok blong Jehova mo yu askem hem blong i halpem yu blong yu kasem ol mak ya. !Yu save sua fulwan se bambae hem i ansarem ol prea blong yu!—1 Jon 3:22; 5:14, 15.

15. ?Wanem sam mak we yu save putum? (Yu luk bokis ya “ Sam Mak Blong Tingbaot.”)

¹⁵ ?Wanem sam mak we yu save putum? Maet yu save givim ansa long prapa toktok blong yu long ol miting. O maet yu save traehad blong mekem wok blong fultaem paenia o wok long Betel. Mo tu, maet yu save lanem wan narafala lanwis blong yu save talemaot gud nius long plante moa man. Barak, wan yangfala brata we i mekem wok blong Jehova fultaem i talem se: “Evri dei taem mi wekap, mo mi tingbaot se bambae mi yusum ful paoa blong mi long wok blong Jehova, hemia i mekem mi haremgud moa i bitim evri samting.”

16. ?Deved i gat wanem tingting long ol loa mo ol rul blong Jehova, mo from wanem?

¹⁶ Ridim Ol Sam 16:2, 4. Olsem we yumi lanem long las stadi, taem yumi folem ol loa mo ol rul blong God, yumi kam fri be long wan fasin we i tru. Yumi lanem blong laekem samting we i gud mo agensem samting we i nogud. (Amos 5:15) Deved i talem se Jehova nao i stap givim “ol gudgudfala samting we mi mi gat.” Gudfala fasin i wan impoten samting. Jehova i mekem i gud long evri samting, mo hem nao i stap givim ol gudfala samting long yumi. Deved i traehad blong folem fasin blong God mo blong laekem ol samting we Jehova i laekem. Mo tu, Deved i lanem blong agensem ol samting we God i agensem. Wan long ol samting ya hemia wosip long ol aedol. Fasin ya i spolem ol man mo i tekemaot ona ya we i sud go long Jehova nomo.—Aesea 2:8, 9; Revelesen 4:11.

17, 18. (1) ?Deved i talem wanem long saed blong ol giaman wosip? (2) ?Olsem wanem ol man tede oli “pulum plante trabol nomo i kam long olgeta”?

¹⁷ Long taem bifo, doti fasin blong seks i wan haf blong giaman wosip. (Hosea 4:13, 14) Plante man oli laekem giaman wosip from we oli laekem ol rabis fasin, be ol fasin ya oli no mekem olgeta oli glad. Deved i talem se ol man we oli wosipim ol giaman god, “oli stap pulum plante trabol nomo i kam long olgeta.” !Mo tu, ol man ya oli stap givim pikinini blong olgeta olsem sakrefaes i go long ol giaman god! (Aesea 57:5) Jehova i no laekem nating ol nogud fasin ya. (Jeremaea 7:31) !Sipos yu bin laef long taem ya, maet bambae yu haremgud tumas se papa mo mama blong yu oli wosipim Jehova!

¹⁸ Tede, plante giaman skul oli agri nomo long eni kaen doti fasin blong seks, olsem fasin ya we man i slip wetem man o woman i slip wetem woman. Ating hemia i mekem ol man oli ting se oli fri, be hemia i “pulum plante trabol nomo i kam long olgeta.” (1 Korin 6:18, 19) ?Yu yu  luksave samting ya? Taswe ol yangfala, yufala i mas lesin long Papa blong yufala long heven. Yufala i mas soemaot se i impoten blong obei long God. Tingbaot ol nogud frut we i save kamaot from ol rabis fasin ya, nao bambae yufala i luksave se oli givim trabol nomo. (Galesia 6:8) Josua, we yumi tokbaot hem finis i talem se: “Yumi fri blong mekem samting, be sipos yumi no yusum gud fasin ya, bambae yumi harem nogud.”

19, 20. Ol yangfala we oli bilif mo oli obei long Jehova, ?bambae oli kasem wanem blesing?

¹⁹ Jisas i talem se: “Sipos yufala i obei oltaem long ol tok blong mi, yufala i prapa disaepol blong mi. Mo bambae yufala i save trutok, mo trutok bambae i mekem yufala i kam fri.” (Jon 8:31, 32) Yumi talem tangkiu long Jehova, from we yumi fri long ol giaman skul, long ol samting we yumi no save, mo long ol samting we oli no tru. Long fiuja, bambae yumi kam “fri olsem ol pikinini blong God.” (Rom 8:21) Be tede yu save haremgud long fasin fri ya sipos yu folem ol tijing blong Kraes. Long rod ya, bambae yu “save trutok,” i no from we yu lanem nomo be from we yu folem trutok.

²⁰ Ol yangfala, God i letem yufala i fri, taswe yufala i mas yusumgud fasin fri ya. Hemia bambae i halpem yufala blong mekem ol desisen we i save mekem yufala i gat wan gudfala fiuja. Wan yangfala brata i talem se: “Taem yu yusumgud fasin fri blong yu, hemia bambae i halpem yu blong mekem ol bigfala desisen, olsem blong faenem wan wok, mo blong jusum se bambae yu mared o nogat.”

 21. ?Olsem wanem yu save kasem “laef ya we i prapa wan”?

²¹ Long olfala wol ya, ol man oli haremgud be blong smol taem nomo. I nogat man i save samting we bambae i hapen tumoro. (Jemes 4:13, 14) Taswe, beswan samting blong yu mekem, hemia blong jusum ol samting we bambae oli halpem yu blong kasem “laef ya we i prapa wan,” hemia laef we i no save finis long niufala wol. (1 Timoti 6:19) Jehova i no fosem eni man blong mekem wok blong hem. I stap long yumi wanwan blong jusum samting we bambae yumi mekem. Taswe sipos yu traehad blong kam klosap long Jehova, bambae hem i givim ol samting we yu nidim, mo yu mas yusumgud ol “gudgudfala samting ya.” (Ol Sam 103:5) !Yu save sua fulwan se Jehova bambae i mekem yu glad blong olwe!—Ol Sam 16:11.