1, 2. Sonaha pangalaman ni si Tony patuduhkon anggo sasada halak boi mubah?

HUMBANI dakdanak, domma lang dong be bapa ni si Tony. Sanggah SMA ia, marayoh do ia marlajar. Ninuhurni lang ra be ia manoruskon sikolahni. Tiap minggu somal do ia mardalani pakon hasomanni. Sasintongni lang gutul ia janah lang homa mamakei narkoba. Hassi pe sonai lang martuah ia. Anjaha ia pe lang porsaya adong do Naibata. Sanggah jumpah pakon dua Saksi Jahowa, ipatugah ia ma pasal ai bani sidea. Jadi ibere sidea ma dua brosur hu bani, ai ma Benarkah Kehidupan Diciptakan? pakon Asal Mula Kehidupan—Lima Pertanyaan yang Patut Direnungkan.

² Marulak-ulak do ibasa si Tony buku ai janah ai do na mambahen mubah pingkiranni. Jadi sanggah roh use Saksi Jahowa ai hu rumahni, nini ma, “Dong do hape Naibata ai.” Gabe ra ma ia marlajar Bibel anjaha mambahen hamubahon. Hinan, sanggah lape marlajar Bibel oto do ia i sikolah. Tapi dobkonsi marlajar, gabe murid na pandei ma ia. Gari kopala sikolahni pe gabe longang mangidahsi. Nini  ma, “Lambin bujur do ho tene. Pontenmu pe jenges-jenges sonari. Ai halani marlajar pakon Saksi Jahowa do ho ase sonai?” Ihatahon si Tony ma tongon do ai. Dob ai ipatugah ia ma aha na dob iparlajarisi bani kopala sikolah ai. Tamat sikolah ma ia. Sonari ia domma gabe perintis biasa ampa siparugas i kuria. Anjaha malas tumang uhurni halani domma dong Bapani, ai ma Jahowa!​—Ps. 68:6.

3. Podah aha do na ibere Jahowa hubani na maposo?

³ Humbani sarita ni si Tony ai, ibotoh hita ma parduli do Naibata hubani na maposo. Sihol do Ia ase martuah hanima. Halani ai, Ia mamodahi hanima ase ‘idingat hanima Panompa bani ari haposoonmu’. (Par. 12:1) Tongon lang sai urah mandalankon ai. Tapi marhitei pangurupion ni Naibata tontu boi do ihorjahon hanima ai. Hasilni iahapkon hanima ma holi hatuahon sadokah goluhnima. Ase lambin iarusi hita pasal ai, ulas hita ma lobei aha do na mangurupi halak Israel sapari boi masuk hu Tanoh Parpadanan janah sonaha si Daud boi manaluhon si Goliat.

4, 5. Parlajaran aha do na boi dapot hita humbani halak Israel pakon si Daud? (Tonggor ma gambar bani alm. 21.)

⁴ Aha do na iparentahkon Jahowa bani halak Israel sanggah sidea laho masuk hu Tanoh Parpadanan? Ai isuruh do sidea ase marlatih marporang? Lang. (5 Mus. 28:1, 2) Tapi isuruh do sidea ase manangihon-Si janah porsaya hu Bani. (Jos. 1:7-9) Ra do pangahap ni jolma lang masuk akal parentah ai. Hape marguna tumang do ai sanggah ibahen halak Israel sonai. Gati do iurupi Jahowa sidea manaluhon halak Kanaan. (Jos. 24:11-13) Hunjon ibotoh hita ma porlu do haporsayaon ase boi unduk bani Naibata. Janah tongtong do dear hasilni haporsayaon sisonai. Marlaku do homa ai ronsi sonari.

⁵ Sahalak puanglima na gogoh tumang do si Goliat. Ganjangni pe hira-hira tolu meter janah iboan do sinjata na jago. (1 Sam. 17:4-7) Hape anggo si Daud, pitah umbalang dassa iboan. Hassi pe sonai porsaya do ia bani Naibata. Anggo halak na lang marhaporsayaon, ra do iagan sidea na oto do si Daud halani ra manlawan si Goliat. Hape sasintongni si Goliat ai do na oto.​—1 Sam. 17:48-51.

6. Aha do na laho iulas hita bani artikel on?

⁶ Bani artikel na salpu domma iulas hita ompat sibere-bere humbani Naibata na mambahen martuah hita. Domma iparlajari hita porlu do ase marhasoman pakon Naibata, marhasoman pakon halak na mangkaholongi Naibata, mambahen cita-cita na pamalaskon uhur, ampa mangkargai habebason na ibere Naibata. Bani artikel on, iulas hita ma lambin bahat pasal ai. Jadi, pardiateihon hita ma piga-piga ayat bani Psalmen 16.

7. (a) Halak na sonaha do na ihatahon orot parhasomananni pakon Jahowa? (b) Aha do artini “parbagianan” na ihatahon si Daud, janah aha do pengaruhni ai hu bani?

⁷ Sahalak na toguh haporsayaonni, tontu orot do parhasomananni pakon Jahowa. Marusaha do ia mangihutkon  pingkiran ni Naibata janah mandalankon parentah-Ni. (1 Kor. 2:12, 13) Ibere si Daud do siusihan pasal ai. Nini do ibagas doding, “Jahowa do parbagianan bangku.” (Ps. 16:5) “Parbagianan” na ihatahon si Daud artini orot do parhasomananni pakon Naibata. Janah tongtong do ia marlinggom hu Bani. (Ps. 16:1) Hasilni nini do, “Malas do uhurhu.” Jadi pitah parhasomananni pakon Naibata ai do na mambahen si Daud martuah!​—Basa Psalmen 16:9, 11.

8. Aha ope na boi mambahen hannima martuah?

⁸ Tapi anggo halak na lalab mangindahi habayakon atap pe hasonangan lang boi martuah. (1 Tim. 6:9, 10) Sada sanina i Kanada mangkatahon, “Hita boi martuah sedo halani aha na boi idapot hita humbani dunia on. Tapi halani aha na boi ibere hita hubani Jahowa, harohanni sibere-bere na madear.” (Jak. 1:17) Jadi anggo hanima mangidangi Jahowa janah toguh haporsayaonmu hu Bani, ai do na mambahen martuah hanima. Aha do na boi bahenonmu ase toguh haporsayaonmu? Basa ma Bibel, rimangi ma tompaon-Ni, janah pingkirhon ma paruhuran-Ni ampa holong na dob ipatuduh Ia bannima—Rom 1:20; 5:8.

9. Songon si Daud, aha na porlu ibahen hita ase mandapot guna humbani hata ni Naibata?

⁹ Songon bapa na parholong, ibere Jahowa do podah hubanta. Si Daud malas do uhurni manjalo podah ni Naibata janah nini do, “Pujionku do Jahowa, na mamodahi ahu, age borngin iajari piah-piahku do ahu.” (Ps. 16:7) Jadi gati do irimangi si Daud podah ni Naibata janah marusaha do ia mandalankon ai. Hanima pe porlu do homa manrimangi podah ni Naibata, janah ra mambahen hamubahon. Anggo ibahen hanima sonai, gabe lambin banggal ma holongnima bani Jahowa, lambin dear ma parlahounima janah sihol ma hanima mambahen malas uhur-Ni. Sada botou na margoran si Christin mangkatahon halani gatih ia mambahen riset janah manrimangi aha na ibasa, iahapkon ia ma pitah hu bani tumang do podah ai isuratkon Naibata.

10. Songon na tarsurat bani Jesaya 26:3, aha do gunani anggo orot parhasomananmu pakon Jahowa?

¹⁰ Anggo orot parhasomananmu pakon Jahowa, tontu ibotoh ho do aha na laho bahenon-Ni bani dunia on. Anjaha domma ipatugah Jahowa pasal ai bamu. Mase? Halani Ia sihol ase ibotoh hanima aha do na sipontingan. Ai do holi na mangurupi hanima mambahen haputusan na madear, janah tongtong mangarap hu Bani. (Basa Jesaya 26:3.) Si Josua na tading i Amerika Serikat mangkatahon anggo totap hita dohor bani Jahowa, gabe ibotoh hita ma ija na ponting ampa na lang.

11. Hasoman na sonaha do na ipilih si Daud?

¹¹ Basa Psalmen 16:3. Domma ibotoh si Daud sonaha carani mangindahi hasoman na bujur. Pitah bani halak na mangkaholongi Jahowa do ia “marosuh” marhasoman. Ai do na mambahen ia marmalas ni uhur. Ihatahon si Daud do sidea ai “halak na ma pansing”, halani marusaha do sidea mandalankon  aturan ni Naibata. Sonai do homa pangahap ni panurat na legan humbani buku Psalmen. Nini do, “Hasoman do ahu bani sagala na mangkabiari Ham, sonai age bani sagala sidalankon aturan-Mu.” (Ps. 119:63) Songon na iulas bani artikel na salpu, bahat do halak i sab dunia on na mangkaholongi Jahowa, anjaha sidea boi gabe hasomanta. Jadi ulang ma marhasoman pitah pakon na saumuranta dassa.

12. Mase parhasomanan ni si Daud pakon si Jonatan boi orot?

¹² Si Daud lang pitah marhasoman bani na saumuran pakonsi. Ai ibotoh ho do ise hasoman ni si Daud? Ra do mintor idingat ho si Jonatan. Ibagas Bibel sidea ma sada contoh na patuduhkon sonaha parhasomanan na orot ai. Sasintongni tuanan do si Jonatan 30 tahun marimbangkon si Daud. Hassi pe sonai, sidea boi marhasoman halani toguh do haporsayaon ni sidea bani Jahowa. Leganni ai hormat do sidea samah sidea, janah marsihaholongan halani bahat do sifat ni sidea na sarupa. Umpamani, barani do sidea manlawan munsuh ni Naibata.​—1 Sam. 13:3; 14:13; 17:48-50; 18:1.

13. Aha do na boi ibahen hita ase lambin bahat hasomanta? Bere ma sada contoh.

¹³ Songon si Daud pakon si Jonatan, hita pe boi do marmalas ni uhur anggo marhasoman pakon halak na mangkaholongi Jahowa janah porsaya hu Bani. Sada botou na margoran si Kiera mangkatahon, “Marhasoman do ahu pakon sanina botou i sab dunia on age lang sasuku hanami.” Anggo ibahen ho sonai, gabe sada kaluarga ma ganup hita i sab dunia on. Anjaha ai pe saud halani ganup hita mandalankon ajaran ni Bibel janah iurupi Naibata marhitei tonduy na pansing.

14. (a) Aha do na mangurupi ho ase boi mambahen cita-cita na madear? (b) Aha do na ihatahon na maposo pasal cita-cita ni sidea?

¹⁴ Basa Psalmen 16:8. Mangidangi Jahowa do na sipontingan bani si Daud.  Anggo sonai ibahen ho cita-citamu gabe martuah ma ho. Si Steven mangkatahon, “Hubahen do cita-cita laho mangidangi Jahowa. Sanggah huidah parubahan na dob hubahen ase saud cita-citangku ai, gabe malas tumang ma uhurhu.” Dong homa sada sanina na maposo hun Jerman na dob mangidangi i ianan na mamorluhon. Nini do, “Lang ra au manosal i pudian ni ari halani pitah mangindahi na porlu bani diringku sandiri.” Sonai do homa pangahapmu? Halani ai gunahon ma hapandeianmu laho pasangapkon Jahowa ampa mangurupi halak na legan. (Gal. 6:10) Bahen ma cita-citamu laho mangidangi Jahowa janah tonggohon ma ai ase saud. Pos ma uhurmu ibalosi Jahowa do tonggomu ai!​—1 Joh. 3:22; 5:14, 15.

15. Cita-cita aha do na boi ibahen hanima? (Tonggor ma kotak “ Cita-Cita na Boi Ibahen.”)

¹⁵ Cita-cita aha do na boi ibahen hanima? Boi do ibahen hanima cita-cita ase lambin pandei mambere komentar i partumpuan. Boi do homa gabe parintis atap mangidangi i Betel. Atap hanima pe boi marlajar bahasa na legan ase boi marbarita bani buei halak. Dong sada sanina na margoran si Barak na dob gabe parintis. Nini do, “Tiap puho ahu bani sogot ni ari, malas tumang do uhurhu halani domma hubere na sidearan bani Jahowa.”

16. Sonaha do pangahap ni si Daud bani aturan ampa prinsip ni Jahowa, anjaha mase sonai?

¹⁶ Basa Psalmen 16:2, 4. Bani artikel na salpu domma iulas hita anggo idalankon hita aturan ampa prinsip ni Naibata gabe martuah ma hita. Maningon do homa iharosuhkon hita na madear janah mangkagigihon na sambor. (Ams. 5:15) Sonai do na ibahen si Daud. Bani teks aslini, na ihatahon si Daud bani Psalmen ai artini humbani Jahowa do ganupan na dear. Ai do mambahen sonang uhurni. Halani ai marusaha do ia mangusihi Jahowa janah mangkaholongi aha na iharosuhkon Naibata. Anjaha marusaha do homa ia mangkagigihon na sambor. Umpamani, manombah gana-gana atap pe mamuji-muji jolma. Anggo adong na mambahen sisonai, dos do artini ai sidea lang be pasangapkon Jahowa.​—Jes. 2:8, 9; Pangk. 4:11.

17, 18. (a) Aha do na masa bani sisombah gana-gana? (b)  Aha do na mambahen halak sonari on gabe buei sitarononni?

¹⁷ Hinan bahat do halak sisombah gana-gana, na somal mangkorjahon parriah-riahon. (Hos. 4:13, 14) Lang salah iahap sidea ai. Tapi, ai martuah do sidea? Lang. Si Daud mangkatahon, “buei do sitaronon” ni sidea. Gari anak ni sidea sandiri pe ibahen do gabe galangan situtungon. (Jes. 57:5) Magigi tumang do Jahowa mangidah ai. (Jer. 7:31) Anggo hanima manggoluh bani masa ai, tontu martarima kasih tumang ma hanima anggo namatorasmu manombah Jahowa!

¹⁸ Sonari pe bahat do ugama palsu na mangajarhon lang salah mangkorjahon parriah-riahon. Umpamani, songon mangkorjahon homoseksual. Iagan sidea ai do na parohkon hasonangan. Hape sasintongni “buei do sitaronon” ni sidea. (1 Kor. 6:18, 19)  Pangahapmu tongon do ai? Hassi pe songon na sonang sidea idahon tapi sunsah do ujungni. Jadi, tangihon hanima ma Naibata. Anjaha pingkirhon ma aha do gunani anggo idalankon hanima aturan-Ni, ampa sonaha ujungni anggo lang mandalankon. (Gal. 6:8) Si Josua na isaritahon nongkan ai mangkatahon, “Bebas do hita mambahen pilihan, tapi anggo hita mambahen pilihan na salah gabe sambor do ujungni.”

19, 20. Anggo porsaya hanima bani Jahowa janah unduk hu Bani, aha ma pasu-pasuni?

¹⁹ Jesus mangkatahon, “Anggo totap nasiam ibagas hatang-Ku, sintong ma nasiam susian-Ku. Tandaon nasiam ma hasintongan in, anjaha paluahon ni hasintongan in ma nasiam.” (Joh. 8:31, 32) Martarima kasih do hita bani Jahowa, halani hita lang be ipakahou ajaran palsu. Anjaha bani ari simagira iahapkon hita do holi “hamardekaon hasangapon ni anak ni Naibata”. (Rom 8:21) Gari humbani sonari pe boi do iahapkon hanima habebason ai anggo idalankon hanima parentah ni Jesus. Gabe ‘itanda hanima do hasintongan’ halani domma idalankon hanima ai!

²⁰ Jadi hargai hanima ma habebason na ibere Naibata. Ai do na mangurupi hanima mambahen haputusan na dear. Songon na ihatahon sada sanina na maposo, “Anggo maruhur hita manggunahon habebasonta, gabe boi ma hita mambahen haputusan na dear umpamani sanggah laho manorihi horja, ampa marhajabuan do atap lang.”

21. Aha do na boi bahenonmu ase mandapot “goluh na sintong”?

²¹ Pitah tongkin dassa hasonangan na iahapkon halak i dunia on. Lang ibotoh sidea na laho masa bani ari simagira. (Jak. 4:13, 14) Halani ai marusaha ma hanima mandapot “goluh na sintong”, ai ma hagoluhan sadokah ni dokahni i dunia na baru. (1 Tim. 6:19) Lang dong halak na ipaksa Jahowa ase manombah-Si. Hita sandiri do na mamutuskon ai. Halani ai, marusaha ma hanima ase totap dohor bani Jahowa. Anjaha hargai ma sibere-bere “na madear” na hun Bani. Ai do tandani ibahen hanima Jahowa gabe ‘parbagianannima’. (Ps. 103:5) Anjaha pos ma uhurnima bereon ni Jahowa do hadameion ampa hatuahon ronsi sadokah ni dokahni!​—Ps. 16:11.