1, 2. Kai si banci sipelajari arah pengalamen Toni kerna erban perubahen bas kegeluhen?

TONI la erbapa kitik-kitikna nari. Ia anak SMA, tapi la meriah kapna sekolah, janah ngadi saja atena. Tiap akhir pekan, lawes ia ku bioskop ntah pe main-main ras teman-temanna. Bujur nge ia jelmana janah la make narkoba, tapi la lit tujun geluhna. Janah la ia tek lit Dibata. Bas sada wari, jumpa Toni ras dua Saksi Jahwe, janah ikatakenna maka la ia tek man Dibata. Ibereken kalak e dua buku man bana, buku Benarkah Kehidupan Diciptakan? ras buku Asal Mula Kehidupan—Lima Pertanyaan yang Patut Direnungkan.

² Sanga idahi kalak e ka Toni mulihi, nggo berubah kel pendapat Toni. Enggo mulih-ulih bacana buku ndai piah dungna buku e pe nggo mejin. Ikataken Toni man kalak e, “Pasti lit Dibata!” Mulai me ia erlajar Pustaka, janah alu manjar-anjar berubah pendapatna kerna kegeluhen. Mbarenda Toni murid si biasa-biasa saja, tapi kenca erlajar Pustaka, ia nggo jadi salah sada murid si beluhna bas sekolahna! Kepala sekolahna pe mamang atena ngenen ia.  Ikatakenna man Toni, “Enggo reh ulina kuidah perbahanen ras nilaindu. Perban erlajar nge kam ras Saksi Jahwe?” Ueken Toni, janah ikatakenna ka kai saja si ipelajarina. Lulus ia bas sekolahna nari janah gundari nggo jadi perintis biasa ia ras si nampati runggun. Meriah kel ukur Toni perban gundari nggo lit Bapakna si ngkelengi ia, eme Jahwe!​—Masmur 68:6.

3. Nasehat kai si ibereken Jahwe man anak muda?

³ Arah pengalamen Toni banci siteh maka tuhu-tuhu iperdiateken Jahwe anak muda. AteNa berhasil kam bas geluhndu janah puas iakapndu. Emaka inasehatiNa kam gelah ‘sanga kam nguda denga, ingetlah Si Nciptaken kam.’ (Pengerana 12:1) Mon-mon la menukah, tapi banci nge ilakokenndu. Alu penampat Dibata, banci kam berhasil gundari bage pe pagi sanga kam dewasa. Gelah reh jelasna siangkai kerna si e, sibahas kari ngkai maka banci idat kalak Israel Taneh Perjanjin ras kai si erbanca banci italuken Daud raksasa Goliat.

4, 5. Kai si banci sipelajari arah cara kalak Israel naluken Kanaan bage pe cara Daud naluken Goliat? (Nen gambar pemena artikel.)

⁴ Sanga nggo ndeher kel kalak Israel ku Taneh Perjanjin, kai petunjuk Jahwe man kalak e? IsuruhNa nge kalak e latihen perang gelah jadi tentera si hebat? Lang! (Ulangen 28:1, 2) IkatakenNa man kalak e gelah patuh janah tek man baNa. (Josua 1:7-9) Banci saja menurut manusia nasehat enda la masuk akal, tapi enda me nasehat si mehulina kel man kalak Israel. Enggo mulih-ulih sampati Jahwe umatNa naluken kalak Kanaan. (Josua 24:11-13) Perlu kiniteken guna patuh man Dibata, kiniteken e me si terus erban berhasil. Enda nggo terbukti mbarenda bage pe gundari.

⁵ Goliat sekalak tentera si mbisa. Gedangna menam telu meter, janah babana ka senjatana. (1 Samuel 17:4-7) Tapi si lit bas Daud nali pementer batu ras kiniteken man Dibata ngenca. Kalak si la erkiniteken pasti motu akapna Daud perban lawanna atena Goliat! Tapi, dungna terbukti maka Goliat nge si motu.​—1 Samuel 17:48-51.

6. Kai si man bahasenta bas artikel enda?

⁶ Bas artikel si nggo lewat, nggo sibahas empat pemere Jahwe si banci erban kita berhasil janah reh riahna ukurta. Nggo sipelajari maka perlu siperdiateken keperlun rohanita, sidarami teman si mehuli si ngkelengi Dibata, siban cita-cita rohani, janah siergai kebebasen si ibereken Dibata. I bas artikel enda, sibahas ka cara-cara si deban gelah sidat gunana ngelakoken si e kerina. Emaka, mari sibahas piga-piga pedah bas Masmur 16.

7. (a) Uga nge kalak si rohani e? Jelasken. (b) Kai kin ‘bagin’ Daud e, janah kai pengaruhna man bana?

⁷ Kalak si rohani tek man Dibata, janah iusahakenna gelah carana rukur bagi Dibata rukur. Nggit ia itegu-tegu Jahwe janah terus atena patuh man baNa. (1 Korinti 2:12, 13) Daud me contoh kalak si rohani. Rende ia, nina,  “Jahwe kap baginku.” (Masmur 16:5, Terjemahan Dunia Baru [NW]) Ngata bujur kel Daud kerna ‘baginna’ e, eme hubungenna si rembak ras Dibata, janah nggit ia ijagai Dibata. (Masmur 16:1) Dungna, banci ikatakenna, “Pusuhku pe ersurak-surak senang.” Hubungenna si rembak ras Jahwe ngenca si banci erban meriah kel ukur Daud!​—Baca Masmur 16:9, 11.

8. Kai saja si banci erban tuhu-tuhu puas geluhndu?

⁸ Kalak si terus ngayaki sen ntah pe kesenangen labo pernah banci ermeriah ukur bagi Daud. (1 Timotius 6:9, 10) Sekalak turang seninata i Kanada ngataken, “Kepuasen situhu-tuhu labo banci sidat arah kai si banci sidatken i bas geluh enda, tapi arah kai si banci sibereken man Dibata Jahwe si mereken kerina pemere si mehuli.” (Jakup 1:17) Adi pepaguhndu kinitekenndu man Jahwe janah ilayanindu Ia, dungna tehndu kai tujun geluhndu janah puas akapndu. Emaka, kai si banci ilakokenndu gelah reh paguhna kinitekenndu? Arus ibanndu waktundu ras Jahwe alu mbaca Pustaka, mperdiateken ciptanNa, ngukuri sipat-sipatNa, termasuk kekelengenNa man bandu.​—Roma 1:20; 5:8.

9. Kai si banci ilakokenndu gelah Kata Dibata banci mperobahi kam?

⁹ Mon-mon perban kelengna ate Dibata kita inasehatiNa kita, bali bagi bapak si perkeleng. Meherga kel akap Daud nasehat janah nina, ‘Kupuji Jahwe, erkiteken Ia kap si mabai aku [si mereken nasehat bangku, NW], dingen pusuh peratenku ngajari aku tupung berngi.’ (Masmur 16:7) Mbages iukuri Daud uga cara Dibata rukur janah iusihna e. Nggit ia ngikutken perukuren Dibata si banci erban ia robah, dungna ia jadi kalak si reh ulina. Adi lakokenndu bage, reh kelengna atendu Dibata, janah reh belinna sura-surandu erban meriah ukurNa, dungna kam jadi kalak Kristen si rohani. Turang seninata si gelarna Christin ngataken maka sanga erlajar ia janah mbages iukurina, igejapkenna maka kai si itulisken Jahwe e guna man bana ngenca!

10. Bagi si ikataken bas Jesaya 26:3, kai gunana jadi kalak si rohani?

¹⁰ Adi rohani kam, seri carandu rukur ras cara Dibata rukur kerna doni enda bage pe masa depanna. Ibereken Jahwe bandu pemeteh si luar biasa janah isampatiNa kam ngangkaisa. Engkai maka bage? AteNa gelah tehndu kai si pentingna bas geluh enda, banci banndu keputusen si mehuli, janah la kam mbiar kerna masa depan! (Baca Jesaya 26:3.) Sekalak turang seninata si gelarna Joshua, si tading bas Amerika Serikat, ngataken adi tetap kam ndeher ras Jahwe, banci jelas itehndu kai si penting ras kai si la penting.

11. Teman si uga si ipilih Daud?

¹¹ Baca Masmur 16:3. * (Nen keterangen tambahen.) Iteh Daud ise teman si mehuli. Ipilihna teman si ngkelengi Jahwe, janah temanna e mereken ‘keriahen si mbelin’ man bana.  Ikataken Daud temanna e “kalak si badia” perban iusahakenna ngikutken patoken Jahwe kerna lagu langkah si benar. Bage ka pe penggejapen pemasmur si deban kerna milih teman janah ituliskenna, “Kerina kalak si nembah man baNdu, e me temanku, kerina si ngikutken undang-undangNdu.” (Masmur 119:63) Bagi si nggo sibahas bas artikel si nggo lewat, kam pe banci datndu teman si ngkelengi Jahwe ras patuh man baNa. Janah labo arus seri umur kena.

12. Engkai maka Daud ras Jonatan banci erteman?

¹² Labo kalak si sebaya saja ras Daud si ipilihna jadi temanna. Ise menurutndu salah sada teman Daud? Banci saja jawapndu Jonatan. Pertemanen Daud ras Jonatan salah sada pertemanen si mehulina kel si banci sibaca bas Pustaka. Situhuna, lit kira-kira 30 tahun tuan Jonatan asangken Daud. Tapi ngkai maka banci kalak e erteman? Perban kalak enda duana erkiniteken man Dibata. Kalak enda pe siergan, janah ngena atena sipat-sipat si mehuli arah temanna e, misalna pang kalak enda ngelawan musuh-musuh Dibata.​—1 Samuel 13:3; 14:13; 17:48-50; 18:1.

13. Uga carana gelah reh buena temanndu? Ceritaken sada contoh.

¹³ Bagi Daud ras Jonatan, banci ka sidat ‘keriahen si mbelin’ adi erteman kita ras kalak si ngkelengi Jahwe janah tek man baNa. Kiera, si nggo ertahun-tahun ngelayani Jahwe ngataken, “Erteman aku ras kalak arah belang-belang doni, si beda latar belakangna ras budayana.” Adi kam pe bage, banci idahndu uga Pustaka ras kesah si badia erban kita jadi sada keluarga si nembah Jahwe bas sebelang doni.

14. (a) Uga carana gelah banci banndu cita-cita si mehuli? (b) Kai nina piga-piga anak muda kerna cita-citana?

¹⁴ Baca Masmur 16:8. Si pentingna bas Daud eme ngelayani Jahwe. Adi iusihndu Daud sanga kam erban cita-cita janah terus ukurindu kai si ate Jahwe ilakokenndu, puas me geluhndu. Turang seninata si gelarna Steven ngataken, “Kuban cita-cita ras kuusahaken ndatkenca, janah sanga kuinget ka mulihi maka nggo ermajuna aku, puas kel kuakap.” Sekalak turang seninata si nguda denga arah Jerman, si gundari  ngelayani bas negeri si deban, ngataken, “La ateku nyesal sanga metua kari aku adi kusia-siaken masa ngudaku.” Setuju nge kam? Adi bage, gunakenlah kengasupenndu ras keterampilenndu guna nghamati Dibata ras nampati kalak si deban. (Galati 6:10) Banlah cita-citandu bas ngelayani Jahwe, janah pindolah penampatNa guna ndatken cita-citandu e. Teklah kam maka pasti jawapNa pertotonndu!​—1 Johanes 3:22; 5:14, 15.

15. Kai cita-citandu? (Nen kotak “ Piga-Piga Cita-Cita si Banci Iukurindu.”)

¹⁵ Kai saja cita-cita si banci ibanndu? Misalna, banci nge berekenndu komentar bas perpulungen alu kata-katandu sendiri? Engkai maka la ibanndu cita-citandu guna merintis ntah pe ngelayani i Betel? Banci ka pelajarindu bahasa si deban gelah banci kam erberita man terbuen jelma. Barak, turang seninata si nguda denga si ngelayani bas dinas sepenuh waktu, ngataken, “Medak kenca aku tiap wari meriah kel ukurku perban kuteh nggo kubereken kerina gegehku man Jahwe. La lit dahin si deban si banci erban bage riahna ukurku.”

16. Uga perasan Daud kerna undang-undang ras pedah Jahwe, janah ngkai?

¹⁶ Baca Masmur 16:2, 4. Bagi si nggo sibahas bas artikel si nggo lewat, adi siikutken undang-undang ras pedah Dibata, banci kita tuhu-tuhu bebas. Erlajar kita gelah ngena ateta si mehuli ras segat ateta si la mehuli. (Amos 5:15) Nina Daud man Jahwe, “Kerina si mehuli kualoken i bas Kam nari.” Mehuli kerina si ilakoken Jahwe janah kerina si mehuli si lit bas kita rehna bas Ia nari. Erusaha kel Daud ngusih Dibata janah ngkelengi kai si keleng ate Jahwe. Iusahakenna ka gelah segat atena kai si segat ate Jahwe. Salah sadana nembah berhala, maksudna nembah kai pe ntah ise pe selain Jahwe. Situhuna kalak si nembah berhala nghina dirina sendiri, janah labo Jahwe si ipujina tapi manusia ntah pe si debanna.​—Jesaya 2:8, 9; Ketangkasen 4:11.

17, 18. (a) Kai nina Daud kerna akibat nembah berhala? (b) Kai si erbanca nterem jelma gundari ‘maba melala kesusahen man dirina’?

¹⁷ Bas jaman Pustaka, sanga kalak nembah berhala biasana lit perbahanen seks si salah i je. (Hosea 4:13, 14) Enterem kalak nggit nembah berhala perban meriah akapna erlagu langkah si la mehuli, tapi tuhu nge meriah ukur kalak e? Pasti lang! Ikataken Daud maka kalak si nembah dibata-dibata palsu ‘maba melala kesusahen man dirina.’ Ikorbanken kalak e ka anak-anakna man dibata palsu! (Jesaya 57:5) Segat kel ate Jahwe perbahanen si kejam e. (Jeremia 7:31) Bicara bas jaman e kam nggeluh, pasti ngata bujur kel kam perban orang tuandu nembah Jahwe!

¹⁸ Gundari, melala agama palsu ndukung perbahanen seks si salah, termasuk homoseks. Banci saja iakap kalak bebas ia adi lagu langkahna la mehuli, tapi situhuna e ‘maba melala kesusahen man dirina.’ (1 Korinti 6:18, 19) Perdiatekenndu nge e? Emaka kam anak muda, begikenlah Bapakta si i surga. Buktikenlah maka adi patuh kam man Dibata, mehuli hasilna  man bandu. Ukurilah kai saja akibatna lagu langkah si la mehuli. Amin gia senang akapndu gundari, enda kentisik ngenca, janah e pe labo ka sebanding ras akibatna. (Galati 6:8) Joshua, si nggo iceritaken ndai, ngataken, “Bebas nge kita milih, tapi adi salah pilih kita la banci puas geluhta.”

19, 20. Kai pasu-pasu si banci idatken anak muda si tek man Jahwe janah patuh man baNa?

¹⁹ Nina Jesus, “Adi terus inget kena kai si kuajarken, tuhu-tuhu me kena murid-muridku, iteh kena me kebenaren e, janah kebenaren e si mbebasken kena.” (Johanes 8:31, 32) Sikataken bujur man Jahwe perban nggo bebas kita arah agama palsu, arah cerita-cerita si la tuhu, janah nggo lit pemetehta. Bas masa depan, sitimai kel “kebebasen si mulia si bali bagi si inanami anak-anak Dibata.” (Roma 8:21) Gundari pe adi ikutkenndu ajaren Kristus, banci gejapkenndu piga-piga kebebasen e. Alu bage, banci ‘itehndu kebenaren’ adi ipelajarindu janah idalankenndu!

²⁰ Anak muda, ergailah kebebasen si ibereken Dibata man bandu. Ula salahgunakenndu. Enda banci nampati kam erban keputusen gundari gelah datndu masa depan si mehulina. Sekalak turang senina si nguda denga ngataken, “Adi bijak kam nggunaken kebebasenndu sanga nguda denga, pagi pe sanga arus banndu keputusen si penting banci ibanndu alu mehuli, misalna ndarami dahin si cocok, erjabu atendu ntah lang ntah ndigan atendu erjabu.”

 21. Uga carana gelah banci datndu “kegeluhen situhu-tuhu”?

²¹ Gundari, nggeluh si ntabeh si ikataken kalak kentisik bo ngenca. La siteh kai si terjadi pagi. (Jakup 4:13, 14) Emaka si mehulina, banlah pilihen si benar gelah datndu “kegeluhen situhu-tuhu,” nggeluh rasa lalap bas doni si mbaru si ijanjiken Dibata. (1 Timotius 6:19) Labo ipaksa Jahwe ise pe ngelayani Ia. Kita nge si milihsa kai si ateta silakoken. Emaka, banlah Jahwe jadi ‘baginndu’ alu terus reh deherna ras Ia, janah ergailah kerina ‘si mehuli’ si iberekenNa man bandu. (Masmur 103:5) Teklah kam maka pasti ibereken Jahwe man bandu keriahen ras kesenangen seh rasa lalap!​—Masmur 16:11.