1, 2. Ki mannyer leksperyans Tony i montre ki i posib pour fer bann sanzman dan lavi?

TONY ti grandi san en papa. I ti dan lekol segonder, me i pa ti vreman enterese avek lekol. Anfet, i ti pe mazin pour kit lekol. Dan wikenn, Tony ti abitye al get film oubyen pas letan avek son bann dalon. I pa ti vyolan ni servi drog, me i ti napa en bi dan lavi. I pa ti ni menm asire si Bondye ti egziste. En zour, Tony ti zwenn de Temwen Zeova e i ti koz avek zot lo bann dout ki i ti annan lo Bondye. Zot ti donn li de brosir pour lir​—Was Life Created? e The Origin of Life​—Five Questions Worth Asking.

² Laprosenn fwa ki bann Temwen ti vizit Tony, son fason panse ti’n konpletman sanze. I ti’n telman lir sa de brosir ki sa bann brosir ti’n tou kraz kraze. Tony ti dir zot: “I bezwen annan en Bondye.” I ti konmans etidye Labib e ptitapti son pwennvi lo lavi ti sanze. Avan ki Tony ti konmans etidye, i pa ti pe fer byen kot lekol, me apre i ti vin enn bann pli bon etidyan dan son lekol! Menm direktris lekol ti enpresyonnen. I ti dir Tony: “Ou’n vreman amelyor ou  latitid ek rezilta dan lekol. Eski sa i akoz ou pe asosye avek Temwen Zeova?” Tony ti dir li wi e i ti partaz sa ki i ti pe aprann avek son direktris. I ti fini lekol segonder e ozordi i pe servi konman en pionye ordiner e en serviter kongregasyon. Tony i vreman kontan ki aprezan i annan Zeova konman en Papa ki kontan li!​—Psonm 68:5.

3. Ki konsey Zeova i donn bann zenn?

³ Leksperyans Tony i fer nou rapel ki Zeova i vreman enterese dan bann zenn. I oule ki ou reisi dan lavi e ki ou trouv vre satisfaksyon, alor i donn ou sa konsey: “Pandan ki ou ankor zenn, pa oubliy ou Kreater, rapel li byen.” (Eklezyast 12:1) I pa toultan fasil pour fer sa, me i pa enposib. Avek led Bondye, ou kapab reisi dan lavi ler ou ankor zenn e pli tar konman en adilt. Pour ed nou konpran sa pli byen, nou pou diskit lo kwa ki ti ed bann Izraelit pour konkeri Later Promiz e kwa ki ti donn David lafors pour defet sa zean Golyat.

4, 5. Ki bann bon leson nou kapab aprann avek lafason ki bann Izraelit ti konkeri Kanaan ek lafason ki David ti defet Golyat? (Vwar bann portre o konmansman sa lartik.)

⁴ Ler bann Izraelit ti pe al antre dan Later Promiz, ki lenstriksyon Zeova ti donn zot? Eski i ti dir zot vin bann pli bon solda oubyen konmans fer lantrennman pour al lager? Non! (Deterononm 28:1, 2) I ti dir zot obei li e met konfyans dan li. (Zozye 1:7-9) Petet dimoun ti pou dir ki sa konsey pa fer sans, me anfet i ti sa pli bon konsey pour bann Izraelit. Plizyer fwa Zeova ti ed son pep pour konkeri bann Kananeen. (Zozye 24:11-13) I demann lafwa pour obei Bondye, me sa lafwa i toultan fer nou reisi. Sa ti leka dan lepase e i ankor leka ozordi.

⁵ Golyat ti en gran gerye. I ti preski trwa met oter e i ti port bann zouti danzere. (1 Samyel 17:4-7) De lot kote, David ti annan zis en fles ek son lafwa dan Bondye. En dimoun san lafwa ti pou’n krwar ki David ti bet pour esey lager avek Golyat! Me anfet, Golyat ki ti bet.​—1 Samyel 17:48-51.

6. Ki nou pou diskite dan sa lartik?

⁶ Dan sa lartik avan, nou ti diskit lo kat keksoz ki kapab fer nou pli ere e pli reisi dan lavi. Nou ti aprann ki nou bezwen rod gidans Bondye, fer bann bon zanmi ki kontan Bondye, fikse bann bon lobzektif e apresye sa laliberte ki Bondye i donn nou. Dan sa lartik, nou pou diskit lo plis fason ki nou kapab benefisye ler nou fer sa bann bon keksoz. Pour fer sa, annou diskit lo serten prensip ki nou trouve dan Psonm 16.

7. (a) Ki mannyer ou ti pou dekrir en dimoun spirityel? (b) Kwa ki ti “soutyen” David e ki lefe sa ti annan lo li?

⁷ En dimoun spirityel i annan lafwa dan Bondye e i esey vwar keksoz parey li. I les Bondye gid li e i determinen pour obei li. (1 Korentyen 2:12, 13) David i en bon legzanp en dimoun spirityel. I ti sante: “[Zeova]! Ou menm mon soutyen.” (Psonm 16:5) David ti rekonesan pour son “soutyen,” andotmo pour son bon relasyon avek Bondye e i ti pran refiz dan li. (Psonm  16:1, NWT) Alor i ti kapab dir: “Mon leker i dan lazwa.” Napa nanryen ki ti fer David pli ere ki son bon lanmitye avek Zeova!​—Lir Psonm 16:9, 11.

8. Ki serten keksoz ki kapab fer ou trouv vre satisfaksyon dan lavi?

⁸ Bann dimoun ki konsantre lo larzan oubyen plezir pa zanmen kapab annan menm kantite lazwa ki David ti annan. (1 Timote 6:9, 10) En frer Kanada i dir: “Nou ganny vre satisfaksyon ler nou donn avek Zeova, sa Enn ki donn tou don ki bon, pa ler nou esey profit sa ki lavi i annan pour ofer.” (Zak 1:17) Si ou devlop lafwa dan Zeova e servi li, ou pou annan en vre bi dan lavi e trouv vre satisfaksyon. Alor, ki ou kapab fer pour fer ou lafwa vin pli for? Ou bezwen pas letan avek Zeova par lir son Parol, obzerv bann zoli keksoz ki i’n kree e reflesi lo son bann kalite, enkli son lanmour pour ou.​—Romen 1:20; 5:8.

9. Ki mannyer ou kapab les Parol Bondye enfliyans ou?

⁹ Par ler, Bondye i demontre son lanmour pour nou par koriz nou ler i neseser, zis parey en papa ki kontan son zanfan i fer. David ti apresye koreksyon e i ti dir: “Mon loue [Zeova] ki konsey mwan. Mon konsyans i gid mwan, menm dan lannwit.” (Psonm 16:7) David ti medit lo bann panse Bondye e fer zot vin son fason panse. I ti permet bann panse Bondye pour enfliyans li, setadir, i ti les bann panse Bondye sanz li pour ki i vin en pli bon dimoun. Ler ou fer parey, ou lanmour pour Bondye ek ou dezir pour fer li plezir pou vin pli for e ou pou vin en Kretyen matir. En ser ki apel Christin i dir ki ler i fer resers e medit lo sa ki i lir, i santi ki Zeova ti’n fer ekri sa bann keksoz zis pour li!

10. Parey nou’n aprann dan Izai 26:3, ki mannyer ou pou benefisye si ou en dimoun spirityel?

¹⁰ Ler ou en dimoun spirityel, ou pou vwar lemonn ek son lavenir parey Bondye i vwar. Zeova i donn ou sa konnesans ek konprenezon ekstraordiner. Akoz? Parski i oule ki ou konnen kwa ki enportan dan lavi, fer bann bon desizyon e esper lavenir san okenn lafreyer! (Lir Izai 26:3.) * (Vwar not.) En frer ki apel Joshua ki reste Leta-z-ini i dir ki si ou reste pros avek Zeova, ou pou klerman vwar sa ki enportan e sa ki pa sitan enportan.

11. Ki mannyer David ti swazir son bann zanmi?

¹¹ Lir Psonm 16:3. David ti konnen ki mannyer pour swazir bann bon zanmi. I ti fer zanmi avek bann dimoun ki ti kontan Zeova e sa ti donn li “bokou plezir.” I ti dir ki son bann zanmi ti “sen” parski zot ti esey swiv bann standar Zeova lo moralite. En lot psalmis ti annan menm pwennvi avek David konsernan swazir bann bon zanmi e i ti ekri: “Mon frekant tou dimoun ki respekte ou, ki obei ou bann direktiv.” (Psonm 119:63) Parey nou’n diskite dan sa lartik avan, ou osi ou kapab trouv en kantite dimoun pour fer zanmi avek parmi bann ki kontan e obei Zeova. Byensir, ou bann zanmi pa bezwen annan menm laz avek ou.

12. Akoz David ek Zonatan ti de bon zanmi?

 ¹² David pa ti zis fer zanmi avek bann dimoun ki ti annan menm laz avek li. Eski ou konn enn bann bon zanmi David? Petet ou’n mazin Zonatan. Sa lanmitye ant David ek Zonatan i enn parmi bann pli zoli lanmitye ki nou lir dan Labib. Me eski ou ti konnen ki Zonatan ti apepre 30 an pli vye ki David? Alor kwa ki ti fer zot sitan de bon zanmi? Zot lanmitye ti baze lo zot lafwa dan Bondye. Zot ti osi annan respe pour kanmarad e zot ti apresye bann bon kalite dan kanmarad, tel parey sa kouraz ki zot tou le de zot ti demontre ler zot ti lager kont bann lennmi Bondye.​—1 Samyel 13:3; 14:13; 17:48-50; 18:1.

13. Ki mannyer ou kapab fer plis zanmi? Donn en legzanp.

¹³ Parey David ek Zonatan, nou kapab ganny “bokou plezir” ler nou fer zanmi avek bann dimoun ki kontan Zeova e annan lafwa dan li. Kiera, ki’n servi Bondye pour plizyer lannen i dir, “Mon’n fer zanmi avek bann dimoun sorti partou kote, bann ki’n grandi dan diferan fason e ki annan diferan kiltir.” Ler ou fer parey, ou pou vwar pour ou menm ki Labib ek lespri sen i fer nou en fanmir enternasyonal ki ador Bondye.

14. (a) Ki mannyer ou kapab fikse bann bon lobzektif dan ou lavi? (b) Ki serten zenn i dir konsernan zot bann lobzektif?

¹⁴ Lir Psonm 16:8. Servi Bondye ti sa keksoz pli enportan pour David. Si ou swiv legzanp David ler ou pe fikse ou bann lobzektif e toultan mazin lo sa ki Zeova i anvi pour ou, ou pou ganny vre satisfaksyon dan lavi. En frer ki apel Steven i dir: “Mon ganny satisfaksyon ler mon fikse en lobzektif, atenn li e vwar ki mannyer mon’n amelyore.” En frer sorti Lalmanny ki pe servi dan en lot pei aprezan, i dir: “Ler mon vye, mon pa anvi mazin lo fason ki mon’n viv mon lavi e vwar ki tou sa ki mon’n fer ti zis pour mwan menm.” Eski ou  santi parey? Si wi, servi ou abilite ek talan pour anmenn loner lo Bondye e ed lezot dimoun. (Galat 6:10) Fikse bann lobzektif dan servis Zeova e demann Zeova pour ed ou atenn sa bann lobzektif. Ou kapab asire ki i pou reponn ou lapriyer!​—1 Zan 3:22; 5:14, 15.

15. Ki serten lobzektif ou ti kapab fikse pour ou menm? (Vwar sa bwat “ Serten lobzektif pour mazin lo la.”)

¹⁵ Ki serten lobzektif ou ti kapab fikse? Kekfwa dan renyon, ou kapab esey reponn dan ou prop mo. Oubyen, ou kapab fikse sa lobzektif pour fer pionye ouswa pour servi dan Betel. Ou osi kapab esey aprann en nouvo langaz pour ou kapab anons sa bon nouvel avek plis dimoun. Barak i en zenn frer dan servis a plen tan ki dir: “Toulezour ler mon leve mon konnen ki mon pe donn tou mon lafors dan servis Zeova. Napa okenn lezot aktivite ki kapab fer mwan santi koumsa.”

16. Ki mannyer David ti santi konsernan bann lalwa ek prensip Zeova e akoz?

¹⁶ Lir Psonm 16:2, 4. * (Vwar not.) Parey nou’n aprann dan sa lartik avan, ler nou viv dapre bann lalwa ek prensip Bondye, nou ganny vre laliberte. Nou aprann pour kontan sa ki byen e ay sa ki mal. (Amos 5:15) David ti dir ki Zeova ti “Sours tou sa ki byen.” “Sa ki byen” i vedir byen moralman. Tou sa ki Zeova i fer i byen e tou bon keksoz ki nou annan i sorti kot li. David ti travay dir pour swiv legzanp Bondye e pour kontan bann keksoz ki Zeova i kontan. Me David ti osi aprann pour ay sa ki Bondye i dir i mal. Enn sa bann keksoz i ador zidol, setadir ler nou ador okenn dimoun oubyen keksoz dan plas ador Zeova. Ladorasyon zidol i annan en move lefe lo bann imen e i pran laglwar ki zis Zeova ki merite e donn sa laglwar avek en lot dimoun ouswa keksoz.​—Izai 2:8, 9; Revelasyon 4:11.

17, 18. (a) Ki David ti dir konsernan bann move konsekans ki fo ladorasyon i anmennen? (b) Kwa ki fer dimoun ozordi “konn en kantite soufrans”?

¹⁷ Dan Labib, souvan imoralite seksyel ti form parti fo ladorasyon. (Osea 4:13, 14) En kantite dimoun ti kontan fo ladorasyon parski zot ti kontan fer bann keksoz imoral, me eski sa kalite ladorasyon ti fer zot ere? Non! David ti dir ki bann dimoun ki ador bann fo bondye i “konn en kantite soufrans.” Sa bann dimoun ti menm sakrifye zot zanfan avek bann fo bondye! (Izai 57:5) Zeova ti ay sa kriyote ki zot ti pe fer. (Zeremi 7:31) Si ou ti’n viv dan sa letan, pa ou ti pou’n vreman kontan si ou paran ti ador Zeova!

¹⁸ Ozordi, en kantite larelizyon i aksepte imoralite seksyel, enkli omoseksyalite. Sa kalite fason viv i kapab fer dimoun santi ki zot lib, me anfet sa i fer zot “konn en kantite soufrans.” (1 Korentyen 6:18, 19) Eski ou’n fer sa remark? Alor zenn, ekout ou Papa ki dan lesyel. Ou bezwen konvenki ki i bon pour ou obei Bondye. Mazin byen lo  bann move konsekans ki imoralite i anmennen. Ou pou vwar ki i pa vo lapenn pour annan sa bann plezir tanporer akoz i anmenn en kantite soufrans. (Galat 6:8) Joshua ki nou’n koz lo la pli boner i dir: “Nou kapab servi nou laliberte dan nenport ki fason ki nou oule, me nou pa ganny okenn satisfaksyon si nou mal servi li.”

19, 20. Ki benediksyon bann zenn ki annan lafwa dan Zeova e ki obei li pou gannyen?

¹⁹ Zezi ti dir: “Si zot obei mon parol, zot vreman mon bann disip, zot pou konn laverite e laverite pou fer zot lib.” (Zan 8:31, 32) Gras a Zeova, nou’n ganny libere avek fo larelizyon, linyorans ek siperstisyon. A lavenir, nou pou “ganny laglwar ek laliberte bann zanfan Bondye.” (Romen 8:21) Menm la konmela ou kapab profit sa laliberte ler ou viv dapre bann lansennyman Kris. Dan sa fason, ou pou aprann “konn laverite” pa zis atraver sa ki ou aprann, me osi par viv laverite!

²⁰ Zenn, apresye sa laliberte ki Bondye i donn ou. Servi li byen. I pou ed ou fer bann desizyon depi la konmela ki kapab donn ou en pli bon lavenir. En zenn frer i dir: “Ler ou servi ou laliberte byen konman en zenn, sa i ede pli tar ler ou bezwen fer fas avek bann pli gro desizyon, parey trouv en travay apropriye oubyen ler ou pe deside si ou pou marye ouswa reste selibater pour en pe letan.”

21. Ki mannyer ou kapab ganny “sa vre lavi”?

²¹ Dan sa lemonn, menm sa ki dimoun i dir i en bon lavi pa dire pour bokou letan. Personn pa konnen ki pou arive demen. (Zak 4:13, 14) Alor sa pli bon keksoz ki ou kapab fer i bann swa ki pou ed ou ganny “sa vre lavi,” setadir, lavi eternel dan sa zoli nouvo lemonn Bondye. (1 Timote 6:19) Zeova pa fors personn pour servi li. Nou menm nou ki bezwen deside ki nou pou fer. Alor fer Zeova ou “soutyen” par travay sak zour pour vin pli pros avek li e apresye tou “bann bon keksoz” ki i donn ou. (Psonm 103:5, NWT) Ou kapab asire ki Zeova i kapab donn ou lazwa ek lakontantman annabondans pour touzour!​—Psonm 16:11.