1, 2. Nemene la aqane amamane hnene la hna melëne hnei Tony laka, ijije hi tro sa saze aqane mel?

TONY la ketre thöth. Ngo tha hnei angeice kö hna ce mel memine la keme i angeic. Angeice ngöne la ketre uma ne ini ka tru, ngo pëkö aja i angeic troa ini. Ame koi angeic, tha tro kö angeic a hetre pepa. Ame e nöjei wiik, angeic a tro troa wai cinéma me ce tro memine la itre sinee ce elo i angeic. Tha ka pi isi kö angeic me xomi dorog, nge pë fe kö hnei angeic hna hnehengazon. Ketre, ame koi angeic, pëkö Akötresie. Ame ngöne la ketre drai, hnei Tony hna iöhnyi memine la lue Atre Anyipici Iehova. Hnei angeic hna qaja koi nyidro, ka hape, ame koi angeic, pëkö Akötresie. E cili, hnei nyidroti hna hamë angeic la lue boroshüre hna hape, La vie a-t-elle été créée ? me Cinq questions à se poser sur l’origine de la vie.

² Ame la nyidroti a bëeke troa wai Tony, saze hnyawa ha la aqane waiewekë i angeic. Pine laka, anyimua e angeice la lue boroshür, matre kolo ha ificany. Öni angeic kowe la lue trejin: “Maine jë hetre Akötresie.” Hnei angeic hna nyiqane ini Tusi Hmitrötr. Kola saze trootro la aqane goeëne angeic la mel.  Qëmekene tro Tony a ini Tusi Hmitrötr, ka ngazo la hatre i angeic. Ngo ame hë enehila, lolo hë la hnei angeic hna huliwa! Kola sesëkötr hnene la atre thupëne la uma ne ini. Öni nyidrë koi Tony: “Lolo catre la thiina i ‘ö me hatre i ‘ö. Maine jë, hnene la Itretre Anyipici Iehova?” Tony a nang. Ame hnei angeice hna qaja la itre hnei angeic hna inin. Hetre pepa i Tony hë, nge ketre pionie me drikona angeic. Madrine catre Tony ke, hetre Keme i angeice hë, ene Iehova!—Salamo 68:5.

3. Nemene la eamo hna hamëne hnei Iehova kowe la itre thöth?

³ Kola amekunë së hnene la hna melëne hnei Tony laka, ka tru koi Iehova la itre thöth. Nyidrëti a ajane tro epuni a mele ka loi. Celë hi matre, Nyidrëti a hamëne la eamo celë ka hape, loi e tro epuni a mekune la ‘atre xupi epun ngöne la itre drai e thupëtresiji epun.’ (Ate Cainöj 12:1) Nyipici laka, tha ka hmaloi kö, ngo ame pe, ijije hi tro epuni a trongën. Tro Akötresieti a xatua epuni troa mele ka loi, ngöne la epuni a thöth me thupëtresij elany. Ngo maine easa ajane troa trotrohnine lai, tro sa pane ce wange la ka xatua angetre Isaraela troa tro kowe la Nöje Hna Thingehnaean. Tro fe sa ce wange la ka hamë trengecatre koi Davita troa humuthi Goliatha.

4, 5. Nemene la ini hne së hna xom qa ngöne la aqane lepi angetre Kanana hnei angetre Isaraela, nge nemene la aqane humuthi Goliatha hnei Davita? (Wange ju la pane iatr.)

⁴ Nemene la itre hna amekötine hnei Iehova koi angetre Isaraela, qëmekene tro angatr a tro kowe la Nöje Hna Thingehnaean? Hapeu, hnei Nyidrëti kö hna upi angatr troa hnëkë, matre troa hune ngöne la isi? Ohea! (Deuteronomi 28:1, 2) Hnei Iehova hna upi angatr troa drengethenge Nyidrë me mejiune koi Nyidrë. (Iosua 1:7-9) Maine jë, ka gufa la eamo celë kowe la itre atr. Ngo emele i angetre Isaraela hi lai. Hnei Iehova hna xatuane la nöje i Nyidrëti troa lepe la angetre Kanana. (Iosua 24:11-13) Ka nyipiewekë troa catre lapaun, matre troa drengethenge Akötresie. E cili, tro palahi sa hetrenyi la mele ka loi. Ka hetre thangane lai ekö, me enehila mina fe.

⁵ Goliatha ekö la ketre atr ka catr ngöne la hna isi. Ka 3 met lao eqea i angeic, nge nyimutre la itre jiane isi angeic. (1 Samuela 17:4-7) Ame pe Davita ke, angeice me caa trehle, nge ka catre lapaune angeic koi Iehova. Maine jë, troa jele hmo angeic hnene la itre atr ka tha lapaune kö ke, Davita a cile troa isi me Goliatha! Ngo Goliatha la ka hmo.—1 Samuela 17:48-51.

6. Nemene la hne së hna troa ce wang ngöne la tane mekun celë?

⁶ Ame ngöne lo tane mekun hnapan, hne së lo hna ce wang la 4 lao ewekë ka troa xatua së troa mele ka loi. Nyipiewekë tro sa acatrene la lapaune së koi Iehova, me ce sinee memine la itre atr ka loi, me axecië mekune ka loi, me kepe thangane la aqane thepe së hnei Iehova. Ame pena ngöne la tane mekun celë, easa troa ce ithanatane la itre aqane tro sa kepe thangane qa ngöne la 4 lao ewekë cili. Ngo tro sa pane ce wang la itre xaa trepene meköt hna hamën ngöne Salamo 16.

7. (a) Qejepengöne jë la atr ka catre lapaune koi Akötresie. (b) Nemene la ‘edrö’ i Davita, nge nemene la thangane koi angeic?

⁷ Ame la atr ka catre lapaune koi Akötresie, tre, angeic a thele troa kuca la itre ewekë  tui Nyidrë. Angeice fe a nue Iehova troa eatrongë angeic ngöne la mele i angeic, me drengethenge Nyidrë. (1 Korinito 2:12, 13) Davita la ketre atr ka catre lapaune koi Akötresie. Hnei angeic hna nyima, me hape: “Iehova la edöng.” (Salamo 16:5) Tru la hni ne ole i Davita kowe la ‘edrö’ i angeic, ene la aqane imelekeu i angeic me Akötresie. Hnei Iehova palahi hna thupë Davita ke, hnei angeic hna zae fei Nyidrë. (Salamo 16:1) Celë hi matre, öni Davita: “Aciaci la lolong.” Caasi hi la ewekë ka amadrinëne la hni Davita, ene la aqane imelekeu i angeic me Iehova!—E jë la Salamo 16:9, 11.

8. Nemene la itre ewekë ka troa amadrinë së?

⁸ Ame la itre atr ka wangatrune menune la itre mo me itre nyine iamadrinë, tre, tha tro jë kö angatr a hane madrine tui Davita. (1 Timoteo 6:9, 10) Önine la ketre trejin trahmanyi qa Canada: “Ame la nyipi madrin, tre, tha qaathene kö la mele celë, ngo qa ngöne pe la hne së hna hamëne koi Iehova Akötresie, Atre Hamëne la nöjei ewekë asë.” (Iakobo1:17) Eje hi, maine tro sa acatrene la aqane imelekeu së me Iehova me catre nyihlue i Nyidrë, tro ha hetre aliene la mele së, nge tro hë sa madrin. Haawe, nemene la nyine tro sa kuca matre troa acatrene la lapaune së? Nyipiewekë tro sa e Tusi Hmitrötr me goeëne la itre hna xup hnei Iehova. Tro fe sa lapa mekune la itre thiina i Nyidrë, tune la ihnimi Nyidrëti koi së.—Roma 1:20; 5:8.

9. Nemene la aqane tro sa nue la Wesi Ula i Akötresie troa saze la mele së?

⁹ Ame e itre xaa ijin, Akötresieti a amamane la ihnimi Nyidrëti koi së ngöne la kola haji së, ceitu me kem ka hnime la kuku. Tru la madrine i Davita lo kola haji angeic, matre öni angeic: “Tro ni a atrunyi Iehova la ate eamo ni; nge hna haji ni hnene la hning’ e ite jid.” (Salamo 16:7) Hnei Davita hna lapa mekune la itre mekuna i Iehova. Hnei angeice palahi hna kuca la itre ewekë thenge la hna amekötin hnei Iehova. Ketre atr ka lolo Davita xajawa i Iehova. Eje hi, maine tro sa tui Davita, tro ha kökötre la ihnim me aja së koi Iehova. Tro hë sa ketre Keresiano ka macaj. Öni Christine, ketre trejin föe, ka hape, hnei eahlo hna ithel ngöne la itre itus me lapa mekune la itre hnei eahlo hna e. Öni eahlo jë hi, “Hnei Iehova hna cinyihane la itre ithuemacany celë koi ni!”

10. Nemene la aqane xatua së hnene la tusi Isaia 26:3, troa lapaun?

¹⁰ Ame fe la atr ka lapaun, tre, loi e tro angeic a goeëne la fene me mel elany, tui Akötresie. Hnei Iehova hna hamë së la atrehmekun me atreine waiewekë. Pine nemen? Nyidrëti a ajane tro sa atre la ka nyipiewekë ngöne la mel, matre tha tro kö sa xouene la mel elany! (E jë la Isaia 26:3.) Öni Joshua, ketre trejin qa Etazini: “Maine tro sa lapa qale koi Iehova, tro hë sa atre la ka nyipiewekë maine ka tha nyipiewekë pena.”

11. Nemene la aqane ië sinee i Davita?

¹¹ E jë la Salamo 16:3. Atre hnyawa hi Davita la aqane tro angeic a thele nyipi sinee. Hnei angeic hna iën thene la itre ka hnimi Iehova. Öni angeic: “Celë hi ka thue “madin’ asë.” Hnei Davita hna qaja la itre sinee i angeic ka hape, “ange ka hmitöt” ke, hnei angatre palahi hna thele troa trongëne la itre trepene meköti Iehova. Hnene fe la ketre atre cinyihane la Salamo hna qaja la aqane troa iëne la itre sinee. Öni angeic: “Ite sineng’ angate asë angete qoue cilie, me angete kuca la ite wathebo i cilie.” (Salamo 119:63) Ame ngöne lo tane mekun hnapan,  hne së hna ce wang laka, loi e tro fe sa ië sinee thene la itre ka hnimi Iehova, me drengethenge Nyidrë. Tha tro kö a iëne hmekuj thene la itre sine xötre së.

12. Pine nemene matre lolo la aqane imelekeu i Davita me Ionathana?

¹² Tha hnei Davita kö hna thele troa ce sinee memine la itre atr ka ce xötre me angeic. Drei la ketre sinee i Davita? Ionathana. Tusi Hmitrötr a qaja la aqane imelekeu Davita me Ionathana, nge nyine hain. Atre fe hi epun laka, ka tru catre kö Ionathana hui Davita laka, iananyi la itre macatre i nyidro, 30 lao macatre? Pine nemene matre lolo la aqane imelekeu i nyidro? Pine laka, hna nyitrepen hnene la lapaune i nyidro koi Akötresie. Hnei nyidroti hna imetrötrekeu me thiina ka lolo, me catre isi memine la itre ithupëjia me Akötresie.—1 Samuela 13:3; 14:13; 17:48-50; 18:1.

13. Nemene la nyine tro sa kuca matre troa tru hnei sinee? Qaja jë la ketre hna melën.

¹³ Eje hi, maine tro sa ië sinee thene la itre ka hnimi Iehova me lapaune koi Nyidrë, tro hë sa “madin’ asë” tui Davita me Ionathana. Hnei Kiera, ketre trejin ka nyihlue i Iehova a nyimu macatre hë, hna qaja ka hape: “Hetre sineeng qa ngöne la nöjei nöj me nöjei qene hlapa.” Haawe, maine tro sa tui Keira, tro hë sa öhne la emenene la itre ini qa hnine la Tusi Hmitrötr me qaathene la uati hmitrötr. Caasi hë së memine la itre hlue i Iehova e cailo fen.

14. (a) Nemene la itre mekun nyine tro sa eköth amë ngöne la mele së? (b) Nemene la hna qaja hnene la itre xaa thöth, göne la itre mekun hnei angatr hna eköth amë?

¹⁴ E jë la Salamo 16:8. Ka nyipiewekë koi Davita troa nyihlue i Akötresie. Loi e tro sa nyitipu Davita ngöne la easa eköthe la itre mekun hna troa eatrën. Loi e tro fe sa mekune la itre hnei Iehova hna kuca koi së. E cili, tro ha madrin me lolo la mele së. Öni Steven: “Ame la eni a thele troa eatrëne la itre mekun hnenge hna eköth amë ke, celë hi ka thue madrine koi ni.” Hnene la ketre trejine  thöth qa Alema, ka tro kowe la ketre götrane ka aja ixatua, hna qaja ka hape: “Ame la eni elanyi a troa qatr, xele ni troa qeje ni ka hape, hnenge hna ketre sipu huliwa thatraqang.” Hapeu itre thöth, epuni kö a hane mekun tui angeic? Loi e tro epuni a huliwane la inamacane i epun me itre hna atrein, matre troa atrunyi Akötresie me xatuane la itre xan. (Galatia 6:10) Thele jë troa eköthe amë la itre mekun thatraqane la huliwa i Iehova. Sipo ixatua jë thei Iehova matre troa eatrën itre ej. E cili, tro hë Nyidrëti a dreng la itre thithi epun!—1 Ioane 3:22; 5:14, 15.

15. Nemene la itre mekun nyine troa eköth amë? (Wange ju la hna eköhagen hna hape, “Itre Xaa Mekun Nyine Eatrën.”)

¹⁵ Nemene la itre xaa mekun nyine tro epuni a eköth amë? Tune kaa göi troa hane qeje mekun ngöne la itre icasikeu? Tha epuni kö a hane pi pionie maine huliwa pena ngöne la Bethela? Ijije hi tro epuni a inine la ketre qene hlapa, matre troa cainöjëne la itre maca ka lolo kowe la nöjei atr. Öni Barak, ketre thöth ka pionie hut: “Ame koi ni, pëkö huliwa ka tru hune la troa huliwa i Iehova e nöjei drai ke, ka hamë madrin.”

16. Nemene la aqane goeëne Davita la itre wathebo me itre trepene meköt, nge pine nemen?

¹⁶ E jë la Salamo 16:2, 4. Hne së hna ce wang ngöne lo tane mekun hnapan, laka, maine tro sa trongëne la itre wathebo i Akötresie me itre trepene meköti Nyidrë, haawe tro ha nuamacanyi së. Easa inine troa hniine la itre ewekë ka loi me methinëne la ngazo. (Amosa 5:15) Hnei Davita hna qaja ka hape, Iehova la “loi” i nyidrë. Ame la loi, tre, kola qaja la itre ewekë ka meköt maine ka wië pena. Ka loi asë la nöjei ewekë hna kuca hnei Iehova. Qaathei Nyidrëti la nöjei ewekë ka lolo. Hnei Davita hna catre thele troa nyitipu Akötresie. Hnei nyidrëti hna hniin la itre ewekë ka loi, me methinëne la itre ewekë ka ngazo, tune la troa thili koi idrola. Kola qaja la troa thili koi itre xaa haze, ngo tha Iehova kö. Ame la troa thili koi idrola tre, kola thaipiëne la atr. Ketre, kola xome la hmi thatraqai Iehova, matre troa hamëne pena kowe la ketre atr maine ketre ewekë.—Isaia 2:8, 9; Hna Amamane 4:11.

17, 18. (a) Nemene la hna qaja hnei Davita, göne la itre ka thili kowe la itre haze? (b) Pine nemene matre, ‘alanyimu la akötre’ ne la itre atr enehila?

¹⁷ Ame ekö, hna kuca la itre huliwa ka sis ngöne la hmi ka thoi. (Hosea 4:13, 14) Nyimutre la itre atr ka hniin la itre hmi ka thoi, pine laka, angatr a kuca la itre huliwa ka sis. Ngo hapeu, ka madrine kö angatr la aqane hmi cili? Ohea! Hnei Davita hna qaja, ka hape, ‘troa alanyimu la akötre’ ne la itre ka thili kowe la itre haze. Hnei angatre fe hna humuthe la itre nekö i angatr thatraqane la itre haze! (Isaia 57:5) Methi Iehova la huliwa ka ngazo cili. (Ieremia 7:31) Maine epuni ju a mel ngöne la hneijine cili, maine jë, tro epuni a madrin laka, keme me thine i epun a nyihlue i Iehova!

¹⁸ Ame enehila, nyimutre la itre hmi ka thoi ka kapa la itre huliwa ka sis, tune la troa ce meköl hnene la lue trahmany maine lue föe. Maine jë, tro la itre atr a isa kuci aja. Ngo ame pe, ‘troa alanyimu la akötre’ i angatr. (1 Korinito 6:18, 19) Hapeu, ka nyipiewekë kö la itre hna qaja e celë? Itre thöthi fe, epi tro epuni a drengethenge la Tretretro së e koho hnengödrai. Loi e troa  xecie e kuhu hni epun, laka, ka nyipiewekë troa drei Akötresie. Hetre ethane la itre huliwa ka sis. Ngacama epuni a madrin, ngo tha tro kö lai a cile hut. (Galatia 6:8) Öni Joshua, lo nekötrahmany hna qaja ha e caha, ka hape: “Nyipici laka, isa qanyi së axecië mekun, ngo ame pe, tha tro kö a sasaithi tulu.”

19, 20. Nemene la itre manathithi hna kapa hnene la itre thöthi ka lapaun me ka drengethenge Akötresie?

¹⁹ Öni Iesu: “Maine tro nyipunie a xome hutine la tenge ewekënge, itete dei ni nyipunie ka nyipici, nge tro hë nyipunie a ate la nyipici, nge tro ha nue amacai nyipunie hnene la nyipici.” (Ioane 8:31, 32) Hnei Iehova hna ini së, me thepe së qa ngöne la hmi ka thoi memine la xoue haze. Easa trengeneune la ijine kola troa “nue gufane ka hadehadeu ne la ite nekö i Akötesie.” (Roma 8:21) Ijije hi tro sa melëne lai enehila, ngöne la easa kapa me trongëne la itre ini qaathei Keriso. Maine tro sa inine me melën itre ej, tro hë sa “ate la nyipici”!

²⁰ Itre thöthi fe, wangatrune jë la aqane thepe epun hnei Akötresie. Tro hë lai a xatua epuni troa axecië mekune hnyawa enehila, thatraqane la mele i epun elany. Önine la ketre trejin thöth: “Maine tro sa huliwane hnyawa la aqane nuamacanyi së hnei Akötresie, e thöthi petre kö së, tro hë lai a xatua së elany. Tro lai a xatua së troa iëne hnyawa la huliwa së, maine pena la ka troa faipoipo me easë, maine iëne pena troa mele caas.”

21. Nemene la aqane tro epuni a xölehuje la “nyipi mel”?

²¹ Ame ngöne la fene celë, tha ka cile huti kö la madrinene la itre atr. Pëkö ka atre la itre ewekë ka troa traqa elany. (Iakobo 4:13, 14) Celë hi matre, nyipiewekë tro epuni a iëne hnyawa la itre mekun ka troa xatua epuni troa xölehuje la “nyipi mel,” mele ka tha ase palua kö ngöne la fene ka hnyipixe i Akötresie. (1 Timoteo 6:19) Tha Iehova kö a musinëne la itre atr troa nyihlue i Nyidrë. Isa qanyi së kö iëne la nyine troa kuca. Haawe, epi tro Iehova a “edö” i epun. Loi e tro epuni a thele troa acatrene la aqane imelekeu i epun me Iehova, me wangatrune “la loi” hnei Nyidrëti hna hamën. (Salamo 103:5) Tro kö Iehova a amadrinë epun, ene la madrin ka epine palua!—Salamo 16:11.