1, 2. Fa a toli fu Tony e soi taki wan sama sa kengi?

TONY goo kon sondee en dda. Tony be de a hei sikoo ma a á be e booko en ede anga a sikoo. A be wani fika a sikoo sondee a kaba en. Tony be e go luku den mati fi en sataa anga sonde. Son leisi a be e go luku felon tu. A á be e du ogii. A á be e somoko takuu tabaka tu, ma a á be sabi san a wani du anga en libi. A á be e kaba biibi taki Gadu de. Wan leisi Tony miti tu Yehofa Kotoigi neen a taigi den taki a nai kaba biibi taki Gadu de. Den Kotoigi gi en tu bolosilo di e soi taki Gadu de. * (Luku a maiki a ondoo.)

² A taa leisi di den go a Tony, a be e denki taa fasi. A leisi den bolosilo te neen ala tan masimasi. Tony taigi den Kotoigi taki: „A musu de taki wan Gadu de.” A bigin sutudeli Beibel, neen saafisaafi a bigin denki taa fasi fu a libi. Tony á be e leli a sikoo, ma di a bigin sutudeli Beibel a toon wan fu den moo koni pikin fu a sikoo. A dikitoo fu  a sikoo seefi foondoo te neen a taigi Tony taki: „Ná pikin kengi i kengi. Yu e leli tu. A di yu e paa anga den Yehofa Kotoigi meke i kengi so?” Tony taigi a dikitoo taki a sani di a taki a tuu. Boiti dati a soi en san a leli. Tony kaba sikoo. En a wan kowownu pionili nownow. A toon wan dinali tu. Nownow Tony abi wan Dda di lobi en, Yehofa Gadu. A sani ya e meke a piisii!​—Psalm 68:5.

3. Sowtu taanga-sikin Yehofa e gi yonkuuwan?

³ A toli fu Tony e membee u taki Yehofa e booko en ede anga yonkuuwan. A wani i libi waka bun, neen meke a taki i mu „membee a Sama di meke i te i yonkuu” (Peleikiman 12:1). A ná ala yuu a makiliki fu du a sani ya, ma dati á wani taki yu á poi du en tu. Gadu sa yeepi i fi i libi waka bun te i yonkuu. A sa yeepi i te i bigi tu. Fu fusutan a sani ya moo bun, wi o luku san be yeepi den Islayelisama fu fende a kondee di Yehofa be paamisi den anga san be yeepi David fu wini Goliyat a gaan gadyaa man.

4, 5. San wi e leli te u luku a fasi den Islayelisama wini den Kana-ansama anga te u luku fa David wini Goliyat? (Luku a fowtow na a bigin.)

⁴ San Yehofa taigi den Islayelisama di den be de fu go aini a Paamisi Kondee? A be taigi den taki den mu leli feti fu toon bun suudati? Ehee! (Deitolonomi 28:1, 2) A be taigi den taki den mu aliki en. Den mu du san a taigi den tu (Yowsuwa 1:7-9). Kande libisama be o si a sani ya enke lawlaw sani, ma a sani ya na a moo bun sani di den Islayelisama be mu du. A omen leisi Yehofa yeepi a foluku fi en fu wini den Kana-ansama (Yowsuwa 24:11-13). A te wan sama biibi taanga fosi a o man aliki Gadu. Efu wi e biibi Gadu sani o waka bun gi wi ala yuu. A so a be de aini a ten di pasa, a so a de aini a ten ya tu.

⁵ Goliyat a be wan taanga man. A be sabi feti tu. A be langa wan sani fu 3 meter. A be abi kofaliki fetisani tu (1 Samuweli 17:4-7). Ma a wan aselenga namo David be abi. A be e biibi Gadu tu. Wan sama di nai biibi Gadu be o si enke David ede nai wooko bun di a go feti anga Goliyat! Ma a Goliyat be koli enseefi.​—1 Samuweli 17:48-51.

6. San wi o luku aini a artikel ya?

⁶ Aini a artikel a fesi u be luku fo sani di sa meke u moo piisii efuso di sa yeepi u fu u libi waka bun. U leli taki u mu meke moiti fu u biibi taanga, u mu suku mati di lobi Yehofa, u mu meke moiti fu go a fesi, boiti dati u mu teke en fu bigi taki Gadu gi wi a okasi fu luku san u wani du anga u libi. Aini a artikel ya wi o si den taa wini di wi o fende te wi e du den sani ya. Meke u luku fa Psalm 16 o yeepi u fu du den sani ya.

7. (a) On ten u sa taki wan sama e denki enke Yehofa? (b) San a be a moo pelensipali sani gi David? Fa a sani ya be e meke a fii?

⁷ Wan sama di e denki enke fa Gadu e denki e biibi Gadu. Ai gi Yehofa a okasi fu soi en fa a mu libi. Ai du san Yehofa taki tu (1 Korentesama 2:12, 13). David  a be wan fu den sama ya. A be singi wan poku taki: „Mi e dini Yehofa, a dati wawan mi abi fanowdu” (Psalm 16:5). David be e si a dini di a be e dini Yehofa enke wan gaan sani. A be e go kibii a Yehofa (Psalm 16:1). Neen meke a be man taki: „Mi e piisii gaan piisii.” Sani á de di be e meke David piisii enke a de di en anga Yehofa be de mati!​—Leisi Psalm 16:9, 11.

8. San a wantu sani di o meke i de koloku?

⁸ Den sama di e feti a gudu baka anga den sama di lobi meke piisii á poi de koloku enke David (1 Timotiyesi 6:9, 10). Wan baala a Kanada taki: „A ná te wan sama gudu efuso abi taa sani da a o de koloku tuutuu, ma a te ai du sani gi Yehofa Gadu, a sama di e gi u den moo bun sani” (Yakowbesi 1:17). Efi i meke moiti fu biibi Yehofa, da i dini en, i libi o waka bun. San o yeepi i fi i biibi kon moo taanga? I mu e leisi a Wowtu fu Gadu, poti pakisei a den moin sani di a meke, den bun manii fi en anga a lobi di a abi gi u.​—Romesama 1:20; 5:8.

9. San i mu du efi i wani a Wowtu fu Gadu yeepi i fu kengi?

⁹ Son leisi Gadu e soi u taki a lobi u fu di ai poti wi a pasi, enke fa wan dda di lobi en pikin e poti en a pasi te a de fanowdu. David be e teke en fu bigi te Yehofa be e poti en a pasi, neen meke a be taki: „Mi o gafa Yehofa, a Gadu di e poti mi a pasi. Te neti tapu, da den sani di mi e pakisei e poti mi a pasi” (Psalm 16:7). David be e meke moiti fu sabi fa Yehofa e denki. A be e meke moiti fu denki so tu. A be e meke moiti fu toon wan moo betee sama. Efu yu e meke moiti fu waka neen baka, yu o moo lobi Yehofa. Boiti dati i biibi o moo taanga. Wan sisa den e kai Christin taki te ai ondoosuku a Wowtu fu Gadu, anga te ai pakisei den sani di a leli, da ai fii enke neen Yehofa meke sama sikiifi den sani ya gi!

10. Sowtu wini wi o fende te wi e denki enke fa Yehofa e denki enke fa Yesaya 26:3 e soi?

¹⁰ Efi yu e denki enke fa Yehofa e denki yu o si a goontapu ya enke fa ai si en. Yu o sabi fa sani o waka aini a ten di e kon tu. Yehofa gi u koni fu man sabi ala den sani ya. Saide? A wani i sabi san a den moo pelensipali sani aini a libi. A wani i du sani anga koni tu. Boiti dati a á wani i feele te yu e pakisei fa sani o waka aini a ten di e kon! (Leisi Yesaya 26:3.) Wan baala fu Ameekankondee den e kai Joshua taki, efu yu anga Yehofa a mati yu o sabi san pelensipali aini a libi anga san á pelensipali.

11. Sama David be e teke enke mati?

¹¹ Leisi Psalm 16:3. David be sabi sama a mu teke enke mati. A sama di be lobi Yehofa a be teke enke mati. A den sama ya be e ’meke a piisii’. David be e kai den mati fi en ’sama di santa’, bika den be e meke moiti fu holi den weiti fu Yehofa. Wan taa psalm sikiifiman be e fii aseefi fasi tu. A be sikiifi taki: „Ala den sama di e lesipeki yu anga den sama di e du san i taki, a mi mati” (Psalm 119:63). Enke fa u be si aini a artikel a fesi, da iseefi sa  fende mati di lobi Yehofa anga sama di e aliki en. A ná namonamo yu anga den mati fi i mu de supee.

12. Saide David anga Yonatan a be bun mati?

¹² David á be e teke en supee wawan enke mati. I sabi sama a be wan fu den bun mati fu David? Kande yu e pakisei Yonatan. A toli fu David anga Yonatan a wan fu den moo moin toli di wi e leisi aini Beibel. Ma i be sabi taki a wan sani fu 30 yali Yonatan be gi David? Den be de mati fu di den be e biibi Gadu. Den be e lesipeki denseefi. Den be e si den bun manii fu makandaa tu. Wan fu den manii ya na a deki-ati di den be abi fu feti gi a foluku fu Gadu.​—1 Samuweli 13:3; 14:13; 17:48-50; 18:1.

13. San u sa du fu meke moo mati? Gi wan ondoofenitoli.

¹³ Leti enke David useefi sa „piisii” te wi abi mati di lobi Yehofa anga mati di e biibi en. Kiera, di e dini Gadu omen yali kaba taki: „Mi abi mati na ala se fu goontapu. Mi anga den mati fu mi a ná fu aseefi nasi. Boiti dati den abi taa gwenti.” Efi i meke moiti fu du aseefi sani, iseefi o si fa a Beibel anga a santa yeye e yeepi u fu de enke wan gaan famii di e dini Yehofa a hii goontapu.

14. (a) Fa yu o du sabi san i mu du anga i libi? (b) San wantu yonkuuwan taki fu den sani di den be wani du anga den libi?

¹⁴ Leisi Psalm 16:8. David be e si a dini di a be e dini Yehofa enke a moo pelensipali sani. Efi i waka a David baka te yu e luku san i wani du gi Yehofa, neen yu e du san Yehofa wani, sani o waka bun gi i. Wan baala den e kai Steven taki: „A sani di e meke mi piisii, a te mi du san mi be wani du gi Yehofa. Mi e piisii tu te mi e si taki mi e go a fesi.” Wan yonkuu baala fu Doisilikondee di go yeepi a wan taa kondee taki: „Te mi o gaandi, mi á wani a de taki a gi miseefi namo mi be e libi.”  A so iseefi e denki? Efu a so yu e denki, da koboloiki i koni anga i kaakiti fu wooko gi Yehofa, anga fu yeepi taawan. A so yu o gi Yehofa gaandi (Galasiyasama 6:10). Pakisei san i wani du gi Yehofa, da i begi en fu a yeepi i. I sa biibi taki a o piki den begi fi i!​—1 Yohanisi 3:22; 5:14, 15.

15. San i sa meke moiti fu du? (Luku a faki „ Wantu sani di i sa du gi Yehofa.”)

¹⁵ San i sa meke moiti fu du? Kande i sa meke moiti fu gi piki a komakandaa sondee i leisi aini a paragraaf. I sa meke moiti fu pionili efuso go wooko a Betel. Boiti dati i sa leli wan taa tongo fu man yeepi sama aini a peleikiwooko. Barak a wan yonkuu baala di e du a fuuten diniwooko. A taki: „Te mi weki a mamanten mi e fii bun, bika mi sabi taki mi wooko gi Yehofa anga ala mi kaakiti. Nawan taa wooko á poi meke mi fii so.”

16. Fa David be e si den weiti fu Yehofa? Saide a be e si den so?

¹⁶ Leisi Psalm 16:2, 4. Enke fa u be si na a artikel a fesi, da a te wi e du san Gadu taki fosi wi e fii tuutuu. Wi e leli taki u mu lobi san bun, ma u mu buuse ogii (Amos 5:15). David be taki a Yehofa e ’gi sama ala bun sani’. Bunfasi a te wan sama e tyai enseefi bun, efuso te ai libi a wan fasi di fiti. A soso bun sani Yehofa e du. Neen gi wi ala den bun sani di wi abi tu. David be e meke moiti fu waka a Yehofa baka. A be e meke moiti fu lobi den sani di Yehofa lobi. Boiti dati David be leli taki a mu buuse den sani di Gadu á lobi. Wan fu den sani ya na a dini di sama e dini falisi gadu. Solanga wan sama e dini wan taa sani boiti Yehofa, a falisi gadu ai dini. Te libisama e dini falisi gadu, den e lagi denseefi. Boiti dati, den e gi taa gadu a gaandi di den be mu gi Yehofa.​—Yesaya 2:8, 9; Openbaring 4:11.

17, 18. (a) San David taki fu den sani di e miti den sama di e dini falisi gadu? (b) Saide „omen ogii” e miti sama aini a ten ya?

¹⁷ Son leisi te sama be e dini den falisi gadu, den be e didon anga denseefi (Hoseya 4:13, 14). Sama be lobi dini falisi gadu, bika den be lobi du den sowtu sani ya. Ma den sani ya be e meke den de koloku? Nono. David be sikiifi taki a „omen ogii” e miti den sama di e dini falisi gadu. Den sama ya be e boon den eigi pikin enke ofaandi gi den falisi gadu fu den! (Yesaya 57:5) Yehofa á be lobi den ogii di den be e du (Yelemiya 7:31). Efi i be de aini a ten de, i be o piisii taki i mma anga i dda e dini Yehofa!

¹⁸ Aini a ten ya falisi biibi nai si en fu wan gaan sani te sama e didon anga taawan di den á toow anga en. Den nai si a libi di man anga man e libi, anga a libi di uman anga uman e libi fu gaan sani. A sani ya sa meke sama denki taki den sa du san den wani, ma te i luku en bun, a „omen ogii” e miti den (1 Korentesama 6:18, 19). Neen meke efu yu a wan yonkuuwan, i mu aliki i Dda di de a hemel. Soi taki yu e piisii fu du san Gadu taki. Sidon denki ala den ogii di sa miti i efi i libi a wan fasi di á fiti.  Da yu o si taki a ná abi nawan wini fu piisii wan pisiten namo, da ogii miti i bakaten (Galasiyasama 6:8). Joshua di u be taki fi en na a bigin taki: „U sa libi enke fa u wani, ma a nai tyai nawan wini te u nai libi enke fa Gadu wani.”

19, 20. Sowtu wini yonkuuwan o fende te den e biibi Yehofa anga te den e aliki en?

¹⁹ Yesesi taki: „Efu wi e du san mi taki, da wi a mi bakaman tuutuu. Wi o sabi a tuu, da a tuu o meke u fii” (Yohanisi 8:31, 32). Wi e gi Yehofa daa taki wi a ná saafu fu falisi biibi moo. Wi e angii fu „fii a wan foondoo fasi enke pikin fu Gadu” aini a ten di e kon (Romesama 8:21). Nownow kaba i sa fii pikinso te yu e du san Yesesi leli u. Wi á mu „sabi a tuu” namo da a kaba, ma u mu du san u leli tu!

²⁰ Yonkuuwan, u mu teke en fu bigi taki Yehofa meke u fii. Koboloiki a kado ya bun. A o yeepi i fu du sani di o tyai wini gi i bakaten. Wan yonkuu baala taki: „Te yu e koboloiki a kado di Gadu gi i fu luku san i wani du anga i libi a wan bun fasi, yu o du sani anga koni, moomoo te i mu luku efu wan wooko bun gi i, anga on ten yu o toow.”

21. San o yeepi i fu fende a „tuutuu libi”?

²¹ A libi di sama e si enke bun libi aini a ten ya, a wan pisiten namo ai tan. Nawan sama á sabi san o pasa tamaa (Yakowbesi 4:13, 14). Neen meke a moo bun sani di i sa du a fu meke moiti fu du sani di o yeepi i fu fende a „tuutuu libi”. Dati na a teego libi di Gadu paamisi wi aini a nyun goontapu (1 Timotiyesi 6:19). Yehofa nai dwengi sama fu dini en. A useefi mu luku san u wani du. Neen meke i mu si Yehofa enke a ’gudu’ fi i. Meke moiti ala dei fu toon en bun mati. Teke den „bun sani” di ai du gi i fu bigi (Psalm 103:5). I sa biibi taki Yehofa o yeepi i fi i piisii. Yu o de koloku fu teego!​—Psalm 16:11.