1, 2. Thoonis lub neej qhia tau li cas tias tibneeg yeej hloov tau?

TUS tub Thoonis (Tony) loj hlob tsis muaj txiv. Nws niaj hnub mus kawm ntawv tiamsis nws tsis xav kawm li. Nws yuav luag tawm, nws xav tias kawm tsis tiav los kav liam. Ob hnub so, nws sij mus saib yeeb yaj kiab thiab nrog nws cov phoojywg ua si lomzem. Nws kuj tsis mus ua phem thiab tsis quav yeeb quav tshuaj, tiamsis nws ua lub neej tsis muaj qabhau li. Nws kuj tsis paub tias xyov muaj Vajtswv los tsis muaj. Muaj ib hnub, nws txawm ntsib Yehauvas 2 tug Timkhawv, nws thiaj nug nkawd seb puas muaj Vajtswv tiag. Nkawd thiaj muab tau 2 phau ntawv me rau nws nyeem uas qhia txog tej pov thawj tias muaj Vajtswv tiag. *​—Saib cov lus hauv qab taw qhia.

² Tom qab ntawd, thaum 2 tug Timkhawv rov mus xyuas Thoonis, nws hloov lawm. Nws twb muab 2 phau ntawv nyeem mus nyeem los ntsws tag. Nws hais rau nkawd tias: “Yuav tsum muaj Vajtswv tiag.” Nws thiaj li pib kawm Vajlugkub thiab qab siab ua neej lawm. Ua ntej nws los kawm Vajlugkub, nws yeej tsis nyiam  kawm ntawv li, tiamsis nimno nws yog ib tug tub kawm ntawv uas kawm tau zoo tshaj tom nws lub tsev kawm ntawv! Nws ua rau tus tuam xibhwb ntseeg tsis taus li. Tus tuam xibhwb thiaj nug nws tias: “Qhov uas koj coj tau tus cwj pwm zoo thiab kawm tau ntawv zoo lawd, puas yog qhov uas koj mus nrog Yehauvas Cov Timkhawv?” Nws teb hlo tias: “Yog.” Thoonis thiaj qhia tej uas nws tau kawm rau tus tuam xibhwb. Nimno nws twb kawm ntawv tiav lawm thiab ua ib tug tho kev. Nws kuj yog ib tug tub leg num thiab. Nws zoo siab kawg li uas nws muaj Yehauvas ua nws Leej Txiv uas hlub nws!​—Ntawv Nkauj 68:5.

3. Yehauvas hais li cas rau cov hluas?

³ Thoonis lub neej qhia rau peb tias Yehauvas hlub cov hluas heev. Nws xav kom koj tau lub neej zoo thiab vam meej xwb, nws thiaj hais rau koj tias, “Thaum koj tseem hluas koj cia li nco txog tus uas tsim koj.” (Laj Lim Tswvyim 12:1) Tej zaum yuav tsis yoojyim rau koj ua li Yehauvas hais txhua lub caij, tiamsis kuj tsis yog ib yam uas koj ua tsis tau. Vajtswv yuav pab kom koj tau lub neej zoo tamsim no thiab mus txog thaum koj laus. Yuav kom peb to taub zoo txog qhov no, cia peb kawm seb dabtsi pab tau cov Yixayee ntaus yeej lub tebchaws uas Vajtswv cog tseg, thiab dabtsi pab tau Davi tua yeej Kaulia.

4, 5. Qhov uas cov Yixayee kov yeej cov neeg Khana-as thiab qhov uas Davi tua tau Kaulia qhia li cas rau peb? (Saib thawj daim duab hauv zaj no.)

⁴ Ua ntej cov Yixayee mus rau hauv lub tebchaws uas Yehauvas cog tseg, Yehauvas qhia kom lawv ua li cas? Nws puas kom lawv kawm sib ntaus sib tua kom txawj ua tsov ua rog? Nws tsis kom lawv ua li ntawd! (Kevcai 28:1, 2) Nws hais kom lawv mloog nws lus thiab tso siab plhuav rau nws xwb. (Yausua 1:7-9) Rau tibneeg ces yeej tsis txaus ntseeg, tiamsis qhov uas cov Yixayee ua li Vajtswv hais no yeej zoo tshaj plaws. Vim cov Yixayee ua li no Yehauvas thiaj pab lawv kov yeej cov Khana-as ib zaug dhau ib zaug. (Yausua 24:11-13) Tsis hais yav thaum ub lossis nimno, peb yuav tsum muaj kev ntseeg peb thiaj kam ua li Yehauvas hais. Yog peb muaj kev ntseeg, peb yeej yuav tau lub neej zoo.

⁵ Kaulia yog ib tug tub rog muaj zog thiab txawj ua rog heev. Nws siab li 6 tshim thiab 1 dos (yuav luag 3 mev), thiab nqa rawv tej cuab yeej ua rog. (1 Xamuyee 17:4-7) Tiamsis, Davi tsuas muaj ib txoj hlua fiav ntaus zeb tuav ntawm tes thiab nws txojkev ntseeg rau Vajtswv xwb. Tus neeg uas tsis muaj kev ntseeg yuav xav tias Davi ruam kawg li nws thiaj kam mus ntaus Kaulia! Tiamsis qhov tseeb tiag Kaulia yog tus ruam.​—1 Xamuyee 17:48-51.

6. Hauv zaj no peb yuav kawm txog dabtsi?

⁶ Zaj tas los, peb tau kawm 4 yam uas yuav pab kom peb hajyam muaj kev zoo siab thiab muaj lub neej vam meej. Peb kawm tias peb yuav tau xyaum kom peb muaj kev ntseeg, txawj xaiv tej phoojywg zoo uas hlub Vajtswv, muaj tej hom phiaj zoo, thiab saib txojkev ywj pheej uas Vajtswv pub rau peb rau nqe. Hauv zaj no, peb yuav tham ntxiv tias yog peb ua li no kuj yuav pab tau peb li cas thiab. Cia peb kawm seb Ntawv Nkauj 16 muaj tej hauv paus ntsiab lus twg uas yuav pab tau peb.

7. (1) Piav seb tus neeg muaj kev ntseeg zoo li cas? (2) Davi teej tug yog dabtsi thiab pab tau nws li cas?

⁷ Tus uas muaj kev ntseeg tso siab plhuav rau Vajtswv thiab xyaum kom nws muaj Vajtswv txojkev xav. Nws zoo siab hlo cia Vajtswv coj nws txoj hau kev thiab txiav txim siab mloog Vajtswv lus tuag nthi. (1 Khaulee 2: 12, 13) Davi tus qauv qhia tias tus neeg muaj kev ntseeg zoo li cas. Nws hu nkauj tias: “[Yehauvas] yog kuv teej kuv tug.” (Ntawv Nkauj 16:5) Davi saib ‘nws teej nws tug’ uas yog nws txojkev sib raug zoo nrog Yehauvas rau nqe heev thiab Davi mus cawm siav rau hauv Yehauvas. (Ntawv Nkauj 16:1) Davi thiaj hais tias: “Kuv zoo siab.” Tsis muaj ib yam dabtsi ua rau Davi zoo siab npaum li nws txojkev sib raug zoo nrog Yehauvas!​—Nyeem Ntawv Nkauj 16:9, 11.

8. Dabtsi thiaj pab tau koj muaj lub neej uas zoo tshaj plaws?

⁸ Cov neeg uas tau hau ntsoov mus khwv nyiaj khwv txiaj thiab nrhiav kev lomzem xwb tsis muaj ib tug yuav muaj kev zoo siab xyiv fab cuag li Davi. (1 Timaute 6:9, 10) Ib tug kwvtij nyob tebchaws Kanada (Canada) hais tias: “Kev zoo siab tiag, tsis yog qhov peb muaj tej qhov txhia chaw, tiamsis yog qhov uas peb pub rau Vajtswv Yehauvas, tus uas pub txhua yam zoo rau peb.” (Yakaunpau 1:17) Yog koj rau siab ntso tsav koj txojkev ntseeg rau Yehauvas thiab teev tiam nws, koj yeej yuav tau lub neej muaj qabhau thiab zoo tshaj plaws. Ua li, koj yuav ua li cas koj thiaj yimhuab muaj kev ntseeg? Koj yuav tau siv sijhawm los nyeem Vajtswv Txojlus, saib tej uas nws tau tsim, thiab ua tib zoo xav txog nws tej yeeb yam zoo, xws li txojkev hlub uas nws muaj rau koj.​—Loos 1:20; 5:8.

9. Koj yuav tau yoog raws li Vajtswv Txojlus li cas?

⁹ Thaum Vajtswv qhuab ntuas peb kuj yog nws hlub peb thiab, ib yam li leej txiv qhuab ntuas nws tus menyuam uas nws hlub. Davi saib Vajtswv txojkev qhuab ntuas rau nqe heev. Nws hais tias: “Kuv qhuas [Yehauvas] uas taw qhia kuv. Tsaus ntuj kuv lub siab kuj qhuab ntuas kuv.” (Ntawv Nkauj 16:7) Davi ua tib zoo xav txog Vajtswv txojkev xav thiab muab coj los ua nws txoj. Nws yoog raws Vajtswv xwv nws thiaj ua tau ib tug neeg zoo. Yog koj ua li Davi ces koj yuav yimhuab hlub Vajtswv thiab yimhuab xav ua haum nws siab, thiab koj yuav ua tau ib tug Khixatia uas paub tab. Tus muam Khixitees (Christin) hais tias thaum nws tshawb fawb thiab ua tib zoo xav txog tej uas nws kawm mas cuag li yog Yehauvas sau kiag rau nws ntag!

10. Raws li Yaxaya 26:3, yog koj muaj kev ntseeg, yuav pab tau koj li cas?

¹⁰ Yog koj muaj kev ntseeg, koj yuav pom thiab to taub tias yav tom hauv ntej Vajtswv yuav ua li cas rau lub qab ntuj no. Ua tib zoo xav seb yog vim li cas Yehauvas thiaj pub koj paub txog tej no? Twb yog nws xav kom koj paub meej tias yam twg thiaj yog yam uas tseem ceeb tshaj plaws. Nws xav kom koj txawj txiav txim siab zoo thiab ua tau siab loj siab tuab! (Nyeem Yaxaya 26:3.) Ib tug kwvtij hu ua Yausua uas nyob tebchaws U.S.A. hais tias yog koj txav ze Yehauvas ces koj yuav pom tias yam twg tseem ceeb yam twg tsis tseem ceeb.

11. Davi xaiv cov phoojywg zoo li cas?

¹¹ Nyeem Ntawv Nkauj 16:3. Davi paub xaiv cov phoojywg zoo. Nws xaiv cov uas hlub Yehauvas nws thiaj muaj kev “zoo siab hlo.” Nws hais tias nws cov phoojywg yog “cov neeg dawb huv” rau qhov lawv ua raws nraim li Yehauvas tej kevcai dawb huv. Hais txog kev xaiv phooj xaiv ywg, tus uas sau Ntawv Nkauj 119:63 kuj xav ib yam li Davi thiab. Nws sau tias: “Kuv nrog txhua tus uas hwm thiab paub ntshai koj ua phoojywg, yog cov uas coj raws li koj tej kev tswjhwm.” Raws li zaj peb kawm tas los, koj yeej nrhiav tau coob tus phoojywg uas hlub thiab mloog Yehauvas lus tsis hais tus laus tus hluas.

12. Vim li cas Davi thiab Yaunathas ho ua tau phoojywg zoo ua luaj?

 ¹² Davi tsis xaiv tib co phoojywg uas nrog nws ib loj xwb. Koj puas paub Davi cov phoojywg ib tug thiab? Tej zaum koj yuav xav txog Yaunathas. Thaum peb nyeem phau Vajlugkub txog Davi thiab Yaunathas nkawd txojkev sib raug zoo, tsis muaj pes tsawg tus yuav ua phoojywg zoo npaum li nkawd. Tiamsis koj puas paub tias Yaunathas hlob Davi li 30 xyoo diam? Txawm li los, ua cas Davi thiab Yaunathas ho ua tau phoojywg zoo ua luaj? Vim nkawd ob leeg puavleej muaj kev ntseeg rau Yehauvas. Nkawd ib leeg kuj saib taus ib leeg, ib leeg hwm ib leeg, thiab ib leeg pom ib leeg tej yeeb yam zoo. Xws li thaum nkawd mus ntaus rog, nkawd ob leeg muaj lub siab tawv qhawv tua Vajtswv cov yeeb ncuab ib yam nkaus.​—1 Xamuyee 13:3; 14:13; 17:48-50; 18:1.

13. Yuav ua li cas koj thiaj muaj phoojywg coob? Piav txog tus qauv.

¹³ Zoo ib yam li Davi thiab Yaunathas nkawd, thaum peb cov phoojywg yog cov uas hlub thiab ntseeg Yehauvas, peb kuj yuav muaj kev “zoo siab hlo” thiab. Khi-elas (Kiera) twb teev tiam Vajtswv tau ntau xyoo lawm. Nws hais tias: “Kuv muaj phoojywg nyob thoob plaws ntiajteb, tus coj li cas thiab yog haiv neeg twg los muaj.” Yog koj ua siab dav li no, koj yuav pom tias phau Vajlugkub thiab lub hwj huam dawb huv tau sau peb sawvdaws los ua ib tse teev tiam Yehauvas ua ke.

14. (1) Yuav ua li cas koj thiaj paub tias tej hom phiaj twg thiaj zoo? (2) Ib txhia hluas tau hais li cas txog lawv tej hom phiaj?

¹⁴ Nyeem Ntawv Nkauj 16:8. Txojkev teev tiam Vajtswv tseem ceeb tshaj rau Davi. Yog koj xyaum Davi tus qauv es npaj tej hom phiaj zoo thiab xav ntsoov txog tej uas Yehauvas xav kom koj ua ces koj yuav tau lub neej zoo kawg nkaus. Ib tug kwvtij hu ua Xitivees (Steven) hais tias: “Thaum kuv muaj hom phiaj thiab ncav cuag tej hom phiaj ntawd ua rau kuv zoo siab heev.” Ib tug kwvtij hluas nyob tebchaws Ntsaws Mes Nis (Germany) uas mus ua Vajtswv tes haujlwm rau txawv tebchaws hais tias: “Thaum kuv laus lawd, kuv tsis xav rov tig saib kuv lub neej hluas es  pom tias kuv tsuas ua txhua yam rau kuv tus kheej xwb.” Koj puas xav li ntawd thiab? Cia li siv koj lub peevxwm thiab tej koj txawj los qhuas Yehauvas thiab los pab lwm tus. (Kalatia 6:10) Npaj tej hom phiaj ua Yehauvas tes haujlwm thiab thov kom nws pab koj ua tiav raws li tej hom phiaj ntawd. Nws yeej yuav teb koj tej lus thov!​—1 Yauhas 3:22; 5:14, 15.

15. Koj npaj tau tej hom phiaj zoo li cas? (Saib lub ntsiab me, “ Xav Txog Tej Hom Phiaj No.”)

¹⁵ Koj yuav npaj tej hom phiaj zoo li cas? Tej zaum koj kuj npaj kom txawj teb tawm hauv nruab siab tuaj? Los yog npaj ua ib tug tho kev lossis ua haujlwm hauv Npe-ee. Koj kuj kawm tau lwm yam lus koj thiaj tshaj tau txoj xov zoo rau neeg coob dua qub. Npala (Barak) uas yog ib tug kwvtij hluas uas ua haujlwm puv ntoob rau Yehauvas hais tias: “Txhua txhua tagkis thaum kuv sawv los kuv paub tias hnub no kuv yuav siv tag nrho kuv lub dag lub zog mus ua Yehauvas tes haujlwm mas ua rau kuv zoo siab xyiv fab tshaj plaws.”

16. Davi xav li cas txog Yehauvas tej kevcai thiab tej hauv paus ntsiab lus, thiab yog vim li cas?

¹⁶ Nyeem Ntawv Nkauj 16:2, 4. Raws li zaj peb kawm tas los, yog peb coj peb lub neej raws nraim li Vajtswv tej kevcai thiab tej hauv paus ntsiab lus ces peb yuav muaj kev ywj pheej tiag. Peb yuav paub nyiam yam zoo thiab ntxub yam phem. (Amau 5:15) Davi hais rau Yehauvas tias: “Dhau koj lawm kuv tsis muaj ib yam dabtsi uas zoo li.” Txojkev zoo yog txojkev ncaj ncees dawb huv. Ib puas tsav yam uas Yehauvas ua tsuas zoo kawg nkaus xwb. Thiab txhua yam zoo uas peb tau los yog los ntawm nws los xwb. Davi rau siab ntso kawm kom nws muaj Vajtswv tej yeeb yam thiab kom nws paub nyiam tej uas Vajtswv nyiam. Tiamsis Davi kuj kawm kom paub ntxub tej uas Vajtswv suav tias phem. Yehauvas hais tias qhov uas tibneeg pe dab pe mlom lossis pe hawm ib yam dabtsi yog ib yam uas phem heev. Qhov lawv ua li ntawd rhuav plhu kawg li. Yeej tsis tsim nyog muab lub meej mom uas yog Yehauvas li coj mus rau lwm tus lossis lwm yam.​—Yaxaya 2:8, 9; Qhia Tshwm 4:11.

17, 18. (1) Davi hais tias cov uas nyiam kev pe hawm cuav raug tej xwm txheej twg? (2) Niaj hnub no, dabtsi ua rau ib txhia “muaj kev lwj siab zuj zus” xwb?

¹⁷ Nyob rau lub caij sau phau Vajlugkub, kev plees kev yi thiab kev nkauj kev nraug yog ib feem ntawm tej kev pe hawm cuav. (Hauxeya 4:13, 14) Coob leej ntau tus nyiam tej kev pe hawm cuav ntawd rau qhov lawv nyiam ua kev nkauj kev nraug. Tiamsis qhov lawv mus pe hawm tej vajtswv zoo li ntawd puas ua rau lawv kaj siab? Yeej tsis ua li! Davi hais tias cov uas pe hawm tej vajtswv cuav tsuas “muaj kev lwj siab ntau zuj zus” xwb. Cov neeg ntawd tseem muab lawv tej menyuam xyeem rau tej vajtswv cuav ntawd thiab! (Yaxaya 57:5) Yehauvas thiaj ntxub tej kev phem kev qias ntawd kawg li. (Yelemi 7:31) Yog koj nyob rau lub caij ntawd, ntshe koj yuav zoo siab heev uas koj niam koj txiv teev tiam Yehauvas!

¹⁸ Niaj hnub nimno, muaj ntau txojkev ntseeg cuav hais tias kev nkauj kev nraug kev plees kev yi, tsis hais pojniam deev pojniam txivneej deev txivneej los tsis txhaum. Lawv xav tias ua li ntawd thiaj li yog muaj kev ywj pheej, tiamsis tiag tiag lawv tsuas “muaj kev lwj siab ntau zuj zus” xwb. (1 Khaulee 6:18, 19) Tej zaum koj twb pom li ntawd lawm thiab. Yog li ntawd, cov hluas cia li mloog nej Leej Txiv saum ntuj lus. Rau siab ntso kawm kom koj pom tias qhov uas koj mloog Vajtswv lus zoo dua. Ua tib zoo xav seb, yog koj mus ua kev plees kev yi koj yuav lwj siab npaum  li cas. Koj yuav pom tias yeej tsis tsim nyog koj mus ua tej kev lomzem ntawd ib vuag dua es cia li tau kev lwj siab mus ib txhis. (Kalatia 6:8) Tus tub hluas Yausua puag tab hais ntxiv tias: “Peb yuav siv peb txojkev ywj pheej li cas los tau, tiamsis yog peb ua ywj siab xwb yeej tsis txaus peb siab ib zaug li.”

19, 20. Cov hluas uas muaj kev ntseeg Yehauvas thiab mloog nws lus, yuav tau txais tej koob hmoov twg?

¹⁹ Yexus hais tias: “Yog nej tuav rawv kuv tej lus, nej kuj yog kuv li thwjtim tiag tiag, thiab nej yuav paub qhov tseeb, thiab qhov tseeb yuav tso nej nyob ywj pheej.” (Yauhas 8:31, 32) Peb ua Yehauvas tsaug vim nws tau tso peb nyob ywj pheej, peb dim kev ntseeg cuav tej lus qhia, peb paub tias yav tom hauv ntej yuav zoo li cas, thiab peb tsis qaug quav rau tej lus hem lus dag. Peb tos ntsoov hnub uas peb txhua leej txhua tus yuav tau “nyob ywj pheej thiab nrog Vajtswv cov menyuam tau koob meej.” (Loos 8:21) Yog koj ua raws li Yexus tej lus qhia ces txawm koj tseem nyob hauv lub qab ntuj no los, koj yeej tau nyob ywj pheej. Thiab tsis yog koj kawm kom paub qhov tseeb xwb tiamsis koj lub neej ua pov thawj tias koj yeej “paub qhov tseeb” tiag!

²⁰ Cov hluas, cia li saib txojkev ywj pheej uas Vajtswv pub rau nej rau nqe. Cia li siv tswvyim nej thiaj txawj txiav txim siab thiab tau lub neej zoo rau yav tom hauv ntej. Ib tug kwvtij hluas hais tias: “Yog koj muaj tswvyim txiav txim siab zoo thaum tseem hluas ces lwm hnub thaum koj yuav tau txiav txim siab txog tej yam tseem ceeb, xws li nrhiav haujlwm lossis thaum twg mam yuav txij nkawm ces koj hajyam yuav paub txiav txim siab.”

21. Yuav ua li cas koj thiaj li tau “txojsia uas tseeb”?

²¹ Hauv lub qab ntuj phem no, txawm tus neeg uas muaj lub neej zoo los tsuas nyob ib ntus xwb. Tsis muaj leejtwg paub xyov tagkis yuav zoo li cas. (Yakaunpau 4:13, 14) Yog li ntawd, cia li ua tib zoo xav seb koj yuav ua li cas koj thiaj li tau “txojsia uas tseeb” uas yog txojsia ib txhis tsis kawg hauv Vajtswv lub qab ntuj tshiab. (1 Timaute 6:19) Yehauvas tsis yuam ib tus twg teev tiam nws li. Peb nyias yuav tau txiav txim siab seb peb yuav ua li cas. Yog li ntawd, cia li muab Yehauvas los ua ‘koj teej koj tug,’ txav ze rau nws, thiab saib “tej yam zoo” uas nws pub rau koj rau nqe. (Ntawv Nkauj 103:5) Tso siab tias Yehauvas yeej muab tau lub neej zoo uas muaj kev zoo siab xyiv fab rau koj mus ib txhis!​—Ntawv Nkauj 16:11.