1, 2. Moroi ba zalua khö Tony, hadia zangoromaʼö wa tola tebulö zi samösa niha?

EBUA-BUA Tony ba lö hadöi bapania. No SMA ia, hizaʼi lö adöni dödönia weʼamöi ba zekola. Omasi ibato zekola fatua lö si tamat ia. Si toʼölönia, ero hari Satu mazui Migu, ihorigö ginötönia wefao khö ndra awö-awönia weʼamöi ba bioskop. Tenga niha si lö sökhi ia mazui si sandru ba narkoba, hizaʼi lö hadöi zi tobali ohitö dödönia ba waʼauri. Lö faduhu dödönia wa so Lowalangi. Samuza maʼökhö, falukha Tony khö zi darua Samaduhuʼö Yehowa ba itutunö khöra hadia waʼaombö-aombö dödönia sanandrösa khö Lowalangi.Labeʼe khönia dombua brosur, yaʼia daʼö Asal Mula Kehidupan—Lima Pertanyaan yang Patut Direnungkan faoma Benarkah Kehidupan Diciptakan?

² Me ifuli zui falukha Tony khö ndra Samaduhuʼö Yehowa, no saʼae tebulö lala wangera-ngerania. Oya kali ibaso brosur nibeʼe khönia andrö irege ahori saʼae tekörö-körö ba taʼunö. Imane khöra Tony, ”Faduhu dödögu wa so Lowalangi.” Ibörögö ifahaʼö ia ba Zura Niʼamoniʼö, ba tebulö lagu waʼaurinia. Ba zilalö, tenga ono zekola si sökhi Tony. Hizaʼi me no ifahaʼö ia ba Zura Niʼamoniʼö, tobali ia samösa ono  zekola si sökhi! Ahöli-höli dödö gafalo zekola me iʼila daʼa. Imane khö Tony, ”Itugu baga-baga gamuatamö hegöi nilaimö. Hadia börö me no öfahaʼö ndraʼugö khö ndra Samaduhuʼö Yehowa daʼö?” Ifaduhuʼö daʼö Tony ba itutunö göi khö gafalo zekolania hadia zi no ifahaʼö yaʼia. Iadaʼa, no tamat ia sekola ba tobali ia perintis biasa ba samösa enoni sohalöwö. Omuso sibai dödö Tony börö me so Namania sebua faʼomasi iadaʼa, yaʼia daʼö Yehowa!​—Zinunö 68:5.

3. Hadia mene-mene nibeʼe Yehowa khö ndra si bohou ebua?

³ Salua khö Tony zangoromaʼö wa sindruhu-ndruhu iʼameʼegö tödö Yehowa zi bohou ebua. Omasi ia na mofozu waʼaurira ba laʼokhögö waʼahono dödö. Daʼö mbörö wa ibeʼe mene-mene Yehowa enaʼö ”törö-törö tödöu zomböi yaʼugö, götö wa ono matua na ndraʼugö”. (Zangombakha 12:1) Tola mifalua daʼö, hewaʼae na itaria abua wamalua yaʼia. Tola mofozu waʼaurimi börö wanolo moroi khö Lowalangi Tenga ha ba waʼawuyu-wuyumi, hizaʼi na no atua ami. Enaʼö itugu aboto ba dödöda daʼa, datatutunö hadia zanolo iraono Gizaraʼeli irege tola lakhamö Danö Amabuʼula ba hadia zanolo Dawido ba wokalaisi Goliato..

4, 5. Hadia wamahaʼö si tola tahalö ba ndraono Gizaraʼeli sanandrösa ba lalara wokalaisi niha Ganaʼana hegöi lala Dawido ba wokalaisi Goliato? (Faigi gambara ba wamobörö wamahaʼö.)

⁴ Me arakhagö larugi Danö Amabuʼula iraono Gizaraʼeli, hadia wanuturu lala nibeʼe Yehowa khöra? Hadia iwaʼö khöra Yehowa enaʼö lafomaha ira tobali saradadu mazui enaʼö tehenaigö ira ba wasuwöta? Löʼö! (5 Moze 28:1, 2) Iwaʼö khöra Yehowa enaʼö laʼoʼö linia ba lafaduhusi tödö ia. (Yosua 1:7-9) Moloʼö fangera-ngera niha, tola manö lö tefaudu mene-mene daʼö. Hizaʼi sindruhunia, daʼö mene-mene fondrege zi sökhi ba ndraono Gizaraʼeli. No hauga kali itolo nono mbanuania Yehowa ba wokalaisi niha Ganaʼana. (Yosua 24:11-13) Ba woloʼö niwaʼö Lowalangi, moguna khöda wamati ba hasambalö mofozu ita. Iʼotarai mböröta, lö si tebulö daʼa.

⁵ Goliato andrö saradadu sabölö. Arakhagö tölu meter waʼalawania ba so khönia wangöna si tobali famaʼala. (1 Zamueli 17:4-7) Hizaʼi, ha dombua niʼokhögö Dawido yaʼia daʼö ribo-ribo ba famatinia khö Lowalangi. Ba wamaigi niha si lö famati, no si bodo nifalua Dawido andrö börö me itandraigö ilawa Goliato! Hizaʼi, sindruhunia Goliato zi bodo.​—1 Zamueli 17:48-51.

6. Hadia nitutunöda ba wamahaʼö daʼa?

⁶ Ba wamahaʼö si no tataluʼi, no tatutunö öfa ngawalö zi tola mameʼe khöda faʼowua-wua dödö hegöi lala enaʼö tola mofozu waʼaurida. No tafahaʼö ita wa moguna taʼameʼegö tödö zoguna khöda ba wamati, fahuwu ita ba niha sangomasiʼö Lowalangi, taʼokhögö gohitö dödö si tola mangaʼasogö faʼahono dödö, ba taʼameʼegö tödö wangefa si no ibeʼe Lowalangi khöda. Ba wamahaʼö daʼa, tatutunö hadia nifaluada enaʼö abölö oya mbua nitemada na tafalua ngawalö zi sökhi andrö. Börö daʼö, datafaigi ösa goi-goi si tesöndra ba Zinunö 16.

7. (a) Hewisa niha sangokhögö fangera-ngera ba wamati andrö? (b) Hadia ’gurakha’ niʼokhögö Dawido ba hadia mbuania?

⁷ Niha sangokhögö fangera-ngera ba wamati, iʼokhögö wamati khö Lowalangi ba iforege wamaigi hadia ia simane famaigi  Lowalangi. Iʼalui wanuturu lala moroi khö Yehowa ba ihalö gangetula ba woloʼö linia. (1 Korindro 2:12, 13) Tobali duma-duma si sökhi Dawido ba wangokhögö fangera-ngera ba wamati. Manunö ia imane, ”Yehowa gurakhagu.” (Zinunö 16:5) Iʼandrö sibai saohagölö Dawido börö ’gurakhania’ irege tola ahatö ia khö Lowalangi ba tobali folumöʼönia. (Zinunö 16:1) Hadia mbuania? Imane, ”Omuso dödögu.” Lö hadöi zameʼe faʼohahau dödö khö Dawido baero wahuwusania khö Yehowa!​—Baso Zinunö 16:9, 11.

8. Hadia manö zi tola mameʼe khöda faʼahono dödö ba waʼauri?

⁸ Niha samorege ba wolohi kefe mazui faʼasana dödö, lö irai larasoi waʼomuso dödö simane nirasoi Dawido. (1 Timoteo 6:9, 10) Imane samösa talifusöda ira matua si so ba Kanada, ”Tola so khöda waʼahono dödö tenga börö zi no tasöndra ba waʼaurida, hizaʼi börö me so nibeʼeda khö gumbu mbuala si sökhi andrö, yaʼia daʼö Lowalangi Yehowa.” (Yakobo 1:17) Na itugu mamati ndraʼugö khö Yehowa, ba öfosumange ia, tola moʼeluaha waʼaurimö ba ösöndra waʼahono dödö sindruhu. Tobali, hadia zinangea öfalua enaʼö itugu aro wamatimö? Moguna oya öhorigö ginötömö wefao khö Yehowa. Yaʼia daʼö na öbaso Daromalinia, önehegö gomböila dangania si sökhi, ba öʼangerönusi mbua-buania, simane faʼomasi niforomaʼönia khömö.​—Roma 1:20; 5:8.

9. Hewisa wangoromaʼömö wa ötehegö iʼazökhi ndraʼugö Taromali Lowalangi?

⁹ Itaria iforomaʼö waʼomasinia khöda Lowalangi na ibeʼe degu-tegu soguna khöda, simane ama sebua faʼomasi. Iʼameʼegö tödö Dawido degu-tegu simane daʼö. Imane, ”Usuno Yehowa, si no mamolala tödögu, ba ba zi bongi ifarou ndraʼo buagu.” (Zinunö 16:7) Iʼangerönusi Dawido lala wangera-ngera Lowalangi ba iʼodödögö woloʼö daʼö. Itehegö iʼazökhi ia fangera-ngera Lowalangi enaʼö tobali ia niha sabölö sökhi. Na öʼoʼö duma-duma Dawido, itugu öʼomasiʼö Lowalangi ba itugu öfalua zomasi ia. Tola göi tobali ndraʼugö niha Keriso saro ba wamati. Itutunö talifusöda ira alawe sotöi Christin, ba ginötö ifalua riset ba iʼangerönusi hadia nibasonia, irasoi wa ha khönia isura daʼö Yehowa!

10. Hadia wamahaʼö si tola tahalö ba Yesaya 26:3 sanandrösa ba wangokhögö fangera-ngera ba wamati?

¹⁰ Na taʼokhögö wangera-ngera ba wamati, tola fagölö lala wangera-ngerada khö Lowalangi sanandrösa ba gulidanö daʼa hegöi salua khönia ba zi so miföna. Ibeʼe khöu Yehowa waʼatua-tua sahöli-höli dödö hegöi faʼaboto ba dödö. Hadia mbörö? Börö me omasi ia na öʼila hadia zabölö moguna ba waʼauri, öhalö gangetula si sökhi, ba lö khöu faʼataʼu ba wodöna-döna salua ba zi so miföna! (Baso Yesaya 26:3.) Iwaʼö talifusöda ira matua sotöi Joshua si toröi ba Amerika Serikat, na ahatö ndraʼugö khö Yehowa, tola öʼila hadia zabölö moguna ba hadia zambö moguna.

11. Hewisa Dawido wamili si fahuwu khönia?

¹¹ Baso Zinunö 16:3. Iʼila Dawido hewisa lala wanöndra si fahuwu si sökhi. Ifili nawönia sangomasiʼö Yehowa, ba daʼa zameʼe khönia faʼomuso dödö. Iʼamaedolagö nawö-awönia andrö ”niʼamoniʼö” börö me lö mamalö laʼodödögö woloʼö goi-goi Yehowa sanandrösa ba gamuata. Irasoi göi zimane daʼö sanura sinunö tanö böʼö ba imane, ”Awö zangataʼufi yaʼugö andrö fefu ndraʼodo andre, ba awö zanöngöni nifakhoimö andrö.” (Zinunö 119:63) Simane  si no tatutunö ba wamahaʼö si no tataluʼi, tola göi ösöndra zi fahuwu sangomasiʼö Yehowa ba sangataʼufi Yehowa. Böi göi olifugö, tenga dali si fagölö döfi khömö zi tobali si fahuwu khömö.

12. Hana wa tola fahuwu Dawido hegöi Yonata?

¹² Tenga si fagölö döfi khönia niʼalui Dawido enaʼö tobali si fahuwu khönia. Haniha döi zi fahuwu khö Dawido niʼilamö? Tola manö itörö tödömö Yonata. Fahuwusa Dawido faoma Yonata andrö sambua fahuwusa si sökhi nisura ba Zura Niʼamoniʼö. Hizaʼi, hadia öʼila wa töra 30 fakhe abölö atua Yonata moroi khö Dawido? Hana wa tola fahuwu ira? Börö me fagölö-gölö mamati ira khö Lowalangi. Faoma göi laʼameʼegö tödö mbua-bua si sökhi niʼokhögö nawöra. Duma-dumania, faoma barani ira ba ginötö lalawa nudu Lowalangi.​—1 Zamueli 13:3; 14:13; 17:48-50; 18:1.

13. Hadia zinangea tafalua enaʼö ato nawöda? Beʼe duma-duma.

¹³ Simane Dawido hegöi Yonata, tola owua-wua dödöda na fahuwu ita ba niha sangomasiʼö Yehowa ba samati khönia. Imane Kiera si no mamosumange Lowalangi ba zi hauga fakhe, ”Fahuwu ndraʼo khö ndra talifusöda si faböʼö-böʼö soi hegöi si toʼölö lafalua ba zi sagörö ulidanö.” Na öfalua zimane daʼö örasoi wa Sura Niʼamoniʼö hegöi eheha niʼamoniʼö tola iʼosambuaʼö zamosumange Yehowa ba zi sagörö ulidanö tobali sambua ösi nomo ba wamati.

14. (a) Hewisa enaʼö taʼokhögö gohitö dödö sangaʼasogö faʼahono dödö? (b) Hadia niwaʼö zi bohou ebua ösa sanandrösa ba gohitö dödöra?

¹⁴ Baso Zinunö 16:8. Moloʼö Dawido, famosumange Yehowa zabölö moguna. Na öʼoʼö Dawido sanandrösa ba wotatugöi ohitö dödö ba lö mamalö öʼangeragö hadia zomasi Yehowa, hasambalö örasoi waʼahono dödö ba waʼauri. Imane talifusöda ira matua sotöi Steven, ”Na so gohitö dödögu ba uʼodödögö wolohi daʼö, hasambalö urasoi waʼahono dödö, mendrua manö börö me mofozu ndraʼo ba wondrouʼö sinangea ufalua.” Imane göi talifusöda ira matua si  bohou ebua ba Jerman, sangai halöwö ba soi böʼö iadaʼa, ”Na atuado dania, ba ufuli utörö tödögu waʼaurigu, lö omasido na so ba dödögu wa fefu zi no ufalua andrö ha soguna khögu samösa.” Hadia örasoi göi zimane daʼö? Na yaʼia, ogunaʼö waʼabölö hegöi nekhe-nekhemö ba wamolakhömi Lowalangi hegöi ba wanolo niha böʼö. (Galatia 6:10) Tatugöi gohitö dödömö ba wamati, ba angandrö khö Yehowa enaʼö itoloʼö ba wogamö daʼö. Moguna faduhu dödömö wa hasambalö ifondrondrongo Yehowa wangandrömö!​—1 Yohane 3:22; 5:14, 15.

15. Hadia manö gohitö dödö si tola ökhamö? (Faigi kotak ” Ohitö Dödö si Tola Ökhamö”.)

¹⁵ Hadia manö gohitö dödö si tola ökhamö? Hadia ötandraigö öʼogunaʼö wehedemö samösa ba wameʼe bua gera-era na möiʼö ba gangowuloa? Mazui hadia so gohitö dödömö enaʼö tobali perintis mazui mohalöwö ba Mbetieli? Tola göi öfahaʼö ndraʼugö ba li si bohou enaʼö tola öfaʼema duria somuso dödö ba niha sato. Imane Barak, talifusöda ira matua sangai halöwö safönu inötö, ”Ero maosodo si hulö wongi, uʼila wa moguna ubeʼe fefu waʼabölögu khö Yehowa. Lö hadöi halöwö tanö böʼö si tola mameʼe khögu faʼahono dödö simane daʼa.”

16. Hadia nirasoi Dawido sanandrösa ba huku hegöi goi-goi Yehowa, ba hadia mbörö?

¹⁶ Baso Zinunö 16:2, 4. Simane si no tatutunö ba wamahaʼö si no tataluʼi, na tafaudugö waʼaurida ba huku hegöi goi-goi Lowalangi, hasambalö taʼokhögö wangefa sindruhu. Tafahaʼö ita ba wangomasiʼö si sökhi hegöi ba wangogorofi si lö sökhi. (Gamosi 5:15) Iwaʼö Dawido wa Yehowa andrö Umbu ngawalö zi sökhi. Faʼasökhi andrö zabölö tohude ba gamuata, mazui bua-bua si sökhi. Oi si sökhi fefu nifalua Yehowa ba fefu zi sökhi niʼokhögöda, moroi khönia daʼö. Iʼodödögö Dawido ba woloʼö Lowalangi ba iʼomasiʼö zomasi Lowalangi. Hizaʼi, ifahaʼö göi ia Dawido ba wangogorofi si fatuwu khö Yehowa. Farahu ba daʼö wamosumange adu, eluahania wamosumange niha mazui hadia ia danö böʼö baero Yehowa. Famosumange adu andrö, möi fangosiwawöi niha ba mubeʼe ba niha mazui ba danö böʼö lakhömi sinangea mubeʼe khö Lowalangi.​—Yesaya 2:8, 9; Famaʼeleʼö 4:11.

17, 18. (a) Hadia niwaʼö Dawido sanandrösa ba mbua si lö sökhi moroi ba wamosumange faya? (b) Hana wa ”oya ngawalö waʼafökhö” nitaögö niha iadaʼa?

¹⁷ Ba götö Zura Niʼamoniʼö, asese tobali faosatö wamosumange faya gamuata fohorö. (Hosea 4:13, 14) Ato niha somasi wamosumange faya börö me omasi lafalua gamuata fohorö. Hizaʼi, hadia iʼasogö khöra faʼowua-wua dödö wamosumange simane daʼö? Löʼö! Iwaʼö Dawido wa ”oya ngawalö waʼafökhö” nitaögö niha samosumange lowalangi faya. Mendrua manö na latehegö labeʼe ndraonora tobali sumange lowalangi faya! (Yesaya 57:5) Fatuwu khö Yehowa waʼalösökhira. (Yeremia 7:31) Na so ndraʼugö menaʼö ba götö daʼö, hadia lö mangandrö saohagölö dödömö börö me samosumange Yehowa zatuamö?

¹⁸ Iadaʼa, oya agama faya si fao tödö ba wamalua amuata fohorö, simane homoseksual. Niha samalua daʼa, tola manö larasoi wangefa, hizaʼi sindruhunia ”oya ngawalö waʼafökhö” nirasoira. (1 Korindro 6:18, 19) Hadia önehegö göi daʼö? Daʼö mbörö wa moguna mifondrondrongo Namami si so ba zorugo yaʼami si bohou ebua. Moguna so khömi waʼaro dödö wa no si sökhi na miʼataʼufi Lowalangi. Angeragö hadia manö mbua si lö sökhi na mufalua  gamuata fohorö. Tola miʼila wa faʼahono dödö si ha sabata nirasoimi andrö lö fagölö ira mbua si lö sökhi niʼasogönia. (Galatia 6:8) Imane Joshua nitutunöda ba wamobörö, ”Tola tatatugöi samösa hewisa wangogunaʼöda fangefa si no mubeʼe khöda. Hizaʼi na taʼogunaʼö daʼö ba zi lö tefaudu, lö tasöndra waʼahono dödö sindruhu.”

19, 20. Hadia manö howu-howu nitema zi bohou ebua na mamati ira ba laʼataʼufi Yehowa?

¹⁹ Imane Yesu, ”Na mitöngöni wehedegu, sindruhu-ndruhu wa nifahaʼögu ami, ba aboto ba dödömi zindruhu, ba sindruhu andrö zangefaʼö yaʼami.” (Yohane 8:31, 32) Taʼandrö saohagölö khö Yehowa me tola taʼokhögö waʼaboto ba dödö ba teʼefaʼö ita moroi ba wondrönisi dödö agama faya hegöi sanandrösa ba wakelemusa. Ba zi so miföna, hasambalö tatema ”wangefa solakhömi simane nitema ndraono Lowalangi.” (Roma 8:21) Iadaʼa, na öʼoʼö wamahaʼö Keriso, hasambalö örasoi ösa wangefa andrö. Tobali, tenga ha ”aboto ba dödömi zindruhu” börö me no mifahaʼö ami, hizaʼi börö me mifalua göi ia!

²⁰ Yaʼami si bohou ebua, moguna miʼameʼegö tödö wangefa nibeʼe Lowalangi khömi. Ogunaʼö daʼö si fao faʼatua-tua. Na mifalua daʼö, tola mihalö gangetula si sökhi sanandrösa ba waʼaurimi ba zi so miföna. Imane samösa talifusöda ira matua, ”Na taʼogunaʼö wangefa si no mubeʼe khöda si fao faʼatua-tua iadaʼa, tola so khöda waʼatua-tua ba wangai angetula sabölö ebua, simane ba wamili halöwö mazui ba wangai angetula sanandrösa ba wangowalu mazui na lö omasi ita mangowalu irugi inötö si no tatatugöi.”

21. Hewisa enaʼö tola ösöndra ”waʼauri sindruhu”?

²¹ Ba ginötö safuria andre, gofu hewisa waʼasana dödö nirasoida, ha ba zi sabata daʼö. Lö hadöi niha sangila hewisa waʼaurira mahemolu. (Yakobo 4:13, 14) Tobali, moguna öfili hadia zi tola manolo yaʼugö enaʼö ösöndra ”waʼauri sindruhu”. (1 Timoteo 6:19) Lö ifaso niha Yehowa ba wamosumange yaʼia. Tola latatugöi samösa hadia zomasi ira. Tobali, moguna öbaliʼö ’urakhamö’ Yehowa ero maʼökhö enaʼö tola tobali ndraʼugö si fahuwu khönia. Ameʼegö tödö ’zi sökhi’ nibeʼe Yehowa khömö. (Zinunö 103:5) Moguna faduhu dödömö wa hasambalö ibeʼe khöu Yehowa waʼomuso dödö hegöi faʼowua-wua dödö si lö irai taya sagötö faʼara!​—Zinunö 16:11.