1, 2. Haʼátʼíísh Tony ájiilaaígíí bitsʼą́ą́dóó bídahwiilʼą́ą́ʼ?

TONY éí bizhéʼé tʼáágééd neeyą́. Tʼah ndi jółtaʼ ákondi doo bízhneedlı̨́į da. Tʼahdoo nishtʼaahgo tʼóó bitsʼá deeshááł nisin. Doo ndaʼanish góneʼ, Tony éí ndaalkidgóó ałnáájídááh doodaiiʼ bikʼis yił ahínéekah. Doo báháchįʼ da doodaiiʼ azeeʼ tsiʼndaʼiiłáhígíí doo choyoołʼı̨́į da, tʼáadoo óoshłeʼgo hinishná. God daatsʼí hólǫ́ doo jinízin da. Jiihóvah Yá Dahalneʼé łaʼ haa níʼáazhgo Diyin God doo daatsʼí hólǫ́ǫ da hachʼįʼ ííshjání áyiilaa. Naakigo naaltsoos ádaałtʼą́ʼígíí háí yiʼnilgo yídííłtah hałní—Was Life Created? dóó The Origin of Life—Five Questions Worth Asking.

² Haa náánátʼáazhgo, Tony binitsékees yę́ę łahgo átʼé. Naaltsoos ádaałtʼą́ʼígíí ałtso jííłtaʼ yéigo choozʼįįd dóó ahąąh niilyáago yishjizhgo sinil. Tony éí Halneʼé ił hólneʼ: “God hólǫ́ lá.” Diyin Bizaad baa íhojoołʼaahgo baa nízhdiidzá, dóó hazhóʼó łahgo ájoonííł. Tʼahdoo Diyin Bizaad baa íhojoołʼaah yę́ędą́ą́ʼ, Tony éí ajółtaʼ doo hazhóʼó ajíłʼı̨́į  da, kʼad éí ayóó bízhneedlı̨́įgo ajółtaʼ! Óltaʼ principal ndi há ahééh niizı̨́ı̨́ʼ. Tony áháłní: “Nił hózhǫ́ǫgo ánítʼéhígíí dóó ííníłtaʼígíí tʼáá ałtso bínindlı̨́įgo áníłʼı̨́. Jiihóvah Yá Dahalneʼé bił honílǫ́ǫgoósh biniinaa ákónítʼé?” Tony, aooʼ jiní, áádóó bohojoołʼą́ʼígíí éí principal bee bił hojilneʼ. Nizhníłtaʼ, dííshjı̨́įdi regular pioneer dóó ministerial servant jílı̨́. Kʼad éí Tony ayóó bił hózhǫ́ bizhéʼé ayóóʼóʼóʼníinii éí Jiihóvah!—Psalm 68:5.

3. Jiihóvah éí nooséłí haʼátʼíísh béédaałniih yiłní?

³ Tony ájítʼé yę́ę yee nánihiyiiłniih Jiihóvah éí nooséłí nilíinii ayóóʼáyóʼní. Tʼáá aaníí neʼiinaʼ hazhóʼó ádíílíiłgo niháí nízin, áádóó “tʼah ániid nanináhídą́ą́ʼ Ániilaii” béénílniih nihiłní. (Ecclesiastes 12:1) Azhą́ shı̨́ı̨́ nantłʼa ndi, tʼáá ádíílíiłgo átʼé. Tʼáá nooséłí nilínígíí dóó honiiyą́ sínílı̨́įʼjįʼ iiná yáʼátʼéhígíí ádíílííł éí God níká adoolwoł. Bíhwiilʼą́ąʼgo haitʼéego kéyah bee ádee haʼoodzííʼ yę́ę God éí Ízrel dineʼé yikʼeh dadidoodleeł yee yíká eelwod dóó David beʼadziil akʼeh deesdlı̨́įʼgo ayóó átʼéii Goláíyath yee nihichʼįʼ ííshjání áyiilaa haitʼéego God nihíká adoolwołgo átʼé.

4, 5. Ízrel dineʼé éí Kéínan dineʼé yikʼeh dadeesdlı̨́ı̨́ʼ dóó David éí Goláíyath yikʼeh deesdlı̨́ı̨́ʼ, haʼátʼíísh bitsʼą́ą́dóó bíhwiidiilʼááł? (Áłtsé naashchʼąąʼígíí níníłʼı̨́.)

⁴ Ízrel dineʼé éí kʼadę́ę kéyah bee ádee haʼoodzííʼ biiʼ yaa hijikaahgo, Jiihóvah éí haʼátʼíí yee nahoneeztą́ą́ʼ? Hazhóʼó siláo biniyé ídahoołʼaah hałníísh? Ndagaʼ! (Deuteronomy 28:​1, 2) Áko kóní, shikʼeh dahwiinołʼı̨́ dóó shadaʼiinołní. (Joshua 1:​7-9) Diné łaʼ ádeinízingo éí daʼahijigánjí bóhojoołʼą́ąʼgo shı̨́ı̨́ nizhóní ńtʼééʼ. Jiihóvah éí Ízrel dineʼé ííłní éí díí tʼááłaʼí hazʼą́ągo tʼáá íiyisíí nihíká adoolwoł. Jiihóvah éí bidineʼé yíká eelwodgo Kéínan dineʼé tʼóó ahayóí yikʼeh deesdlı̨́ı̨́ʼ. (Joshua 24:​11-13) Hweʼoodląʼ hólǫ́ǫgo éí God bikʼeh hojíłʼı̨́, hweʼoodląʼ ííshjání ajíłʼı̨́įgo God éí tʼáá áłahájįʼ háká análwoʼ. Ákótʼéego Ízrel dineʼé yíká eelwod, nihí ałdóʼ nihíká adoolwoł.

⁵ Goláíyath ayóó átʼéii naabaahii jílı̨́ı̨́ ńtʼééʼ. Kʼasdą́ą́ʼ 3 meters (9.5 feet) áníłnééz, bee naʼabaahii ayóó bił bééhózingo choyoołʼı̨́. (1 Samuel 17:​4-7) David éí bee aditłʼı̨́ı̨́h tʼéiyá choyoołʼı̨́. Dóó God yaʼólíí ńtʼééʼ. Łaʼ diné beʼoodląʼ ádaadinígíí éí David doo áhojilyą́ą da éí Goláíyath bił ahizhdoogą́ą́ł daatsʼí ákódeinízin! Ndi Goláíyath doo áhályą́ą da.—1 Samuel 17:​48-51.

6. Haʼátʼíísh baa nídadíitʼįįł?

⁶ Áłtséédą́ą́ʼ baa nídasíitʼįįd, dı̨́įʼgo baa nídadíitʼįįłígíí nihił dahózhǫ́ dóó bee niheʼiinaʼ yáʼátʼéehgo íilʼı̨́į doo. Diyin kʼehgo bídin niidlínígíí baa áhwiilyą́ą doo, God ayóóʼáyóʼnínígíí danihikʼis doo, yáʼátʼéehgo íʼoolʼįįłígíí, dóó God ééʼdichííd nihainílá bił daʼílínígíí éí bídahwiilʼą́ą́ʼ. Kʼad bídahwiidiilʼááł, éí haitʼéego yáʼádaatʼéhígíí íilʼı̨́į doo yee nihíká adoolwoł. Psalm 16 góneʼé díí bikʼehgo oodáłígíí haʼátʼíí yee nihił halneʼ.

7. (a) God biníłchʼi diyinii hoyoołáałgo haʼátʼíí óolyé? (b) David éí Jiihóvah áhą́dígo kʼé yił ahidiʼnínígíí haitʼéego bíká eelwod?

⁷ God biníłchʼi diyinii hoyoołáałgo éí God hweʼoodląʼ hólǫ́ dóó God nitsékeesii bee nitsísíkéez doo. Hweʼiinaʼ éí Jiihóvah tʼáá íiyisíí bikʼeh hojíłʼı̨́į doo. (1 Corinthians 2:​12, 13) God biníłchʼi diyinii hoyoołáałgo éí David yáʼátʼéehgo ájiilaa. Díí yee hótaał, Jiihóvah éí tʼáá ałtso hachʼįʼ kóyiilaa. (Psalm 16:5) David éí God áhą́dígo kʼé yił ahidiʼnínígíí dóó yaʼólíhígíí yaa ahééh nízin. (Psalm 16:1) Éí binahjįʼ ájíní: “Shijéí bił hózhǫ́” (Psalm 16:9) David éí Jiihóvah yił ahą́dí nilı̨́įgo yaa bił hózhǫ́!—Psalm 16:11 yíníłtaʼ.

8. Haʼátʼíísh neʼiinaʼ baa nił hózhǫ́ áyósin?

⁸ Diné éí béeso dóó honeeni bił daʼaláahdiígíí éí doo David nahalingo hoł dahózhǫ́ǫ da. (1 Timothy 6:​9, 10) Canadadę́ę́ʼ nihibrother léiʼ ání: “Tʼáá haʼátʼíhída Jiihóvah bichʼįʼ hwiilʼínígíí éí tʼáá aaníí baa nihił dahózhǫ́, éí yáʼádaatʼéehii nihaidiyiiʼaah.” (James 1:17) Jiihóvah neʼoodląʼ bidziilgo bichʼįʼ íínísin dóó bá naalʼaʼ éí tʼáá aaníí iiná baa hózhóonii nídidíílééł. Haitʼéego neʼoodląʼ bidziilgo íínísin doo? Jiihóvah bizaad yíníłtaʼgo éí hazhóʼó bééhodíísįįł. Nizhónígo nahasdzáán bikááʼ hahoodiilaaígíí hazhóʼó baa nitsíníkees, éísh háí atʼı̨́? Haitʼéego nihá ádayiilaaígíí binahjįʼ ayóóʼánihóʼníigo nihił ííshjání áyósin?—Romans 1:20; 5:8.

9. Haitʼéego Diyin Bizaad hashtʼeʼnidoolííł?

⁹ Łaʼda Jiihóvah beʼayóóʼóʼóʼniʼ nihichʼįʼ ííshjání áyósin łahgo doo ákótʼéégóó íʼiilʼı̨́įgo éí hashtʼeʼninánihidoodlóós. Díí átʼéego azhéʼé baʼáłchíní yaa áhályą́. David éí hashtʼeʼnabiʼdeidloosígíí bił nilı̨́, áádóó ájíní: “Bóhólníihii [Jiihóvah] shá naʼakʼíyáłtiʼii baa hashniih doo; tłʼéeʼgo ałdóʼ shijéí nashinitin łeh.” (Psalm 16:7) God bintsékees éí David hazhóʼó yaa tsíndíkos áádóó tʼáá ákótʼéego nitsáhákees yíhoołʼą́ą́ʼ. God yee nitsékeesii hashtʼehodoolííł. Hashtʼehodoolíiłgo binahjįʼ diné yáʼátʼéehii jílı̨́į doo. Tʼáá ákótʼéego íʼiinilaago, God ayóóʼííníʼnínígíí náás nooséeł doo, áádóó bá naashʼaʼ nínízin doo. Áádóó neʼoodląʼ bidziilgo ádíílííł. Nihisister Christin ání, baa ííłtaʼígíí bikʼidiishtįįhígíí naashkaah dóó baa nitséskees, díí Jiihóvah tʼáá shí tʼéiyá shaa akʼeʼashchı̨́įgo baa ákoniizı̨́ı̨́ʼ!

10. Isaiah 26:3 binahjįʼ bíhwiilʼą́ą́ʼígíí, God biníłchʼi diyinii hoyoołáałgo éí haitʼéego níká adoolwoł?

¹⁰ Jiihóvah bintsékeesígíí bitsʼą́ą́dóó íhwiiniłʼą́ąʼgo, éí dííshjı̨́įdi nihił ákótʼéhígíí bikʼidiʼdiitı̨́ı̨́ł. Díí ayóó átʼéego bił ééhózin dóó akʼidiʼyiitįįh éí Jiihóvah nihainílá. Haʼátʼíísh biniyé? Niheʼiinaʼ ílı̨́įgo, yáʼátʼéehgo íʼiilʼı̨́į doo, dóó náásgóó áhodooníłígíí doo nihił yéeʼ da éí nihił bééhodoozįįł nóʼní! (Isaiah 26:3 yíníłtaʼ.) Nihibrother Joshua, United States kééhojitʼı̨́, éí ání, Jiihóvah bił ahą́dí ádíníilzingo, éí haʼátʼíhída ílíinii dóó doo ílíinii nihichʼįʼ ííshjání íidoolííł.

11. Háísh éí David bikʼis áyósin?

¹¹ David éí bił bééhózin haitʼéego  hakʼis yáʼátʼéhígíí ázhdoolííł. Jiihóvah ayóóʼádeiyóʼníinii bikʼis áyiilaa. Díí hakʼis éí David baa bił hózhǫ́. Jiihóvah bibee hazʼáanii hazhóʼó bikʼeh dahojíłʼı̨́. Náánáłaʼ psalmist éí hakʼis baa yájíłtiʼgo, akʼeʼjishchı̨́ ájíní: “Dandósinii áádóó nibikʼehgo iináanii yikʼeh dahółʼíinii tʼáá ałtso bikʼis nishłı̨́.” (Psalm 119:63) Áłtséédą́ą́ʼ baa nídasíitʼįįd yę́ę, ni ałdóʼ ląʼí akʼis yáʼádaatʼéehii ádíílííł éí Jiihóvah yikʼeh dahółʼı̨́ dóó ayóóʼádeiyóʼní. Doo tʼáá ni bił ahąąh naniseʼígíí tʼéiyá nikʼis íínísin da doo.

12. Haʼátʼíísh biniyé David dóó Jánathan ayóó akʼis jílı̨́ı̨́ ńtʼééʼ?

¹² David éí doo tʼáá yił ahąąh nidaniseʼígíí bikʼis áyiilaa da. David bikʼis yił ahą́dí nilínę́ęsh béénílniih? Jánathanísh béénílniih? David dóó Jánathan éí tʼáá íiyisíí áhą́dígo ałkʼis jílı̨́. Éí Diyin Bizaad biiʼdę́ę́ʼ baa daʼííłtaʼ. Nił bééhózinísh, Jánathan éí 30 binááhaigo David bilą́ąjįʼ nijighá? Haʼátʼíísh biniyé ayóó akʼis jílı̨́ı̨́ ńtʼééʼ? God binahjįʼ hweʼoodląʼ bee ałkʼis jílı̨́ı̨́ ńtʼééʼ. Tʼáá ájíłah ahił jídlı̨́ dóó ałhaa ahééh jinízin. Doo náhizhnilyéésgóó tʼáá ájíłah ííshjání ajíłʼı̨́ éí God bikʼijįʼ danilínígíí bichʼįʼ nijibaah éí baa ahééh jinízin.—1 Samuel 13:3; 14:13; 17:​48-50; 18:1.

13. Haitʼéego ląʼí akʼis ádíílííł? Łaʼ baa chʼíhoníʼą́.

¹³ Danihikʼisígíí éí Jiihóvah ayóóʼádeiyóʼní dóó bedaʼoodląʼ hólǫ́, nihí ałdóʼ binahjįʼ nihił dahózhǫ́, éí David dóó Jánathan nahalingo ádiilnííł. Kiera, éí God bá nijilʼaʼgo díkwíí shı̨́ı̨́ nááhai, ání, “Tʼáá náhwiistʼą́ą́ ńtʼééʼ, diné tʼáá ałʼąą ádaatʼéego dóó ádaʼałʼínígíí éí tʼóó ahayóí shikʼis íishłaa.” Ni ałdóʼ ákwíindzaago, éí tʼáá aaníí yidííłtsééł éí haitʼéego Diyin Bizaad dóó níłchʼi diyinígíí bee tʼáá náhwiistʼą́ą́ ńtʼééʼ tʼááłaʼí hooghan hazʼánígíí nahalingo ahił honiidlǫ́.

14. (a) Haitʼéego ádaʼoolʼįįłígíí ádíílííł? (b) Ániid nidaakaígíí haitʼéego ázhdoolíłígíí yaa yádaałtiʼ?

¹⁴ Psalm 16:8 yíníłtaʼ. David beʼiinaʼ éí Jiihóvah bá naashʼaʼ doo jinízin. David nahalingo nitsíníkeesgo éí neʼiinaʼ yáʼátʼéehgo yíłtʼih doo. Bíhwiiniłʼą́ą́ʼígíí baa nitsíníkees, Jiihóvah ádíílííł nił nínígíí dóó yáʼátʼéehgo íʼiinilaaígíí éí Jiihóvah bá naalʼaʼgo yee níká adoolwoł. Nihibrother Steven, ání: “Náásgóó ázhdoolííł binjishnish, dóó ałtso ájiilaa, áádóó nátʼą́ą́ʼ baa nitsíjíkeesgo hashtʼeeshłaa éí baa shił hózhǫ́.” Nihibrother ániid naagháhígíí éí Germanydę́ę́ʼ, kʼad éí náánáłaʼ kéyahdi Jiihóvah bá nijilʼaʼ, ájíní: “Náás sélı̨́įʼgo, nátʼą́ą́ʼ sheʼiinaʼ yáʼátʼéehgo íishłaago baa nitséskees. Doo tʼáá shí tʼéiyá bee ádaa nitséskees da.” Niísh ałdóʼ ákwii nínízin? Nidziil dóó bee ánítʼéhígíí éí Jiihóvah bee baa hóniih áádóó náánáłahjįʼ bee áká anánílwoʼ. (Galatians 6:10) Jiihóvah bá naʼaʼaʼgi bee ádá nahatʼáago ánílééh. Jiihóvah shíká anilyeed, bididííniił. Bíká sodilzinígíí éí bikʼeh ádoonííł!—1 John 3:22; 5:​14, 15.

15. Haʼátʼíísh íʼoolʼįįłígíí łaʼ ádíílííł? (“ Łaʼ Yáʼádaatʼéehgo Íʼoolʼįįłígíí Baa Nitsíníkees” níníłʼı̨́.)

¹⁵ Haʼátʼíísh íʼoolʼįįłígíí łaʼ ádíílííł? Áłah náʼádleehdi tʼáá ni baa nitsíníkeesígíí bee hadiidzih. Áłah náʼádleehdi Diné bizaad bíhwiiniłʼą́ą́ʼígíí bee hadiidzih. Alą́ąjįʼ dahalneʼé doodaiiʼ Bétheldi bá nanilʼaʼ ádíílííłísh? Náánáłaʼ saad bíhwiiniłʼą́ąʼgo choiníłʼı̨́, diné bichʼįʼ haneʼ yáʼátʼéhígíí bee bił hólneʼ. Nihibrother ániid naagháhígíí, Barak éí full-time service ajíłʼı̨́, éí ájíní: “Tʼáá ákwii jı̨́, tʼáá sheʼadziilígíí bee Jiihóvah bá naashʼaʼ shił bééhózin, éí baa shił hózhǫ́. Náánáłaʼ dahoneeninígíí éí doo baa shił hózhǫ́ǫ́góó áshósin.”

16. Jiihóvah bibee hazʼáanii dóó bikʼehgo oodáłígíí éí haitʼéego David yaa nitsékees, dóó haʼátʼíí biniinaa?

¹⁶ Psalm 16:​2, 4 yíníłtaʼ. Áłtséédą́ą́ʼ baa nídasíitʼįįd yę́ę, God bibee hazʼáanii dóó bikʼehgo oodáłígíí niheʼiinaʼ íilʼı̨́įgo, éí binahjįʼ tʼáá aaníí nihéédidoochił. Bídahwiilʼaahígíí éí yáʼádaatʼéehii ayóóʼádeínóhʼní índa doo yáʼádaatʼéehii dajiinohłá. (Amos 5:15) David ání, tʼáá ałtso “yáʼádaatʼéehii” éí Jiihóvah bitsʼą́ą́dę́ę́ʼ. Jiihóvah tʼáá ałtso yáʼátʼéhígíí ííłʼı̨́. God yeʼiilaa éí David yéigo yee naashnish, dóó Jiihóvah ayóóʼáyóʼnínígíí bí ałdóʼ ayóóʼáyóʼní. David éí yíhoołʼą́ą́ʼígíí éí God yijoołáhígíí hó ałdóʼ jijoołá. Łaʼ éʼélyaaígíí ádaatʼéii doodaiiʼ idolatry. Jiihóvah bichʼįʼ dooleeł yę́ęgi éí éʼélyaaígíí bichʼįʼ nidahojiłáá. Éʼélyaaígíí éí bílaʼashdlaʼii doo ádił ajílı̨́ı̨́góó áhoołʼįįh, áádóó Jiihóvah bichʼįʼ sodizin dooleeł yę́ęgi nahjįʼ kódajiilaa.—Isaiah 2:​8, 9; Revelation 4:11.

17. David doo tʼáá aaníí oodląʼ haʼátʼíí áháłní?

¹⁷ Ałkʼidą́ą́ʼ, doo tʼáá aaníí oodląʼ éí naʼageh bee tsiʼnaʼadá bił ahídéétʼiʼ. (Hosea 4:​13, 14) Ląʼí diné éí doo tʼáá aaníí oodląʼ chodayoołʼı̨́, háálá naʼageh bee tsiʼnaʼadá bił yáʼádaatʼééh. Ákótʼéego nidahałáagoósh yaa bił dahózhǫ́? Ndagaʼ! David ání, diné éí doo tʼáá  aaníí diyinii bichʼįʼ nidahojiłáhígíí “tʼóó tséʼédin yínííł bide ádaanííł.” Doo tʼáá aaníí diyinii éí baʼáłchíní yichʼįʼ ninádeidiyiiʼaah! (Isaiah 57:5) Jiihóvah éí kódajítʼínígíí yijoołxá. (Jeremiah 7:31) Ni ałdóʼ áadi kééhonítʼı̨́įgo, nizhéʼé dóó nimá éí tʼáá aaníinii Jiihóvah yichʼįʼ sodadilzin éí baa nił hózhǫ́ǫ doo!

18. Dííshjı̨́įdi, haitʼéego diné “tʼóó tséʼédin yínííł bide ádaanííł”?

¹⁸ Dííshjı̨́įdi, ląʼí doo tʼáá aaníí oodląʼ éí tsiʼnaʼadá bił yáʼádaatʼééh, diné doodaiiʼ asdzání tʼáá hó ahaa ninájíldeeh ałdóʼ. Jiihóvah bibee hazʼáanii tʼáágéedgo éí diné doo dabiníłtłʼagóó nitsídaakees, ákondi “tʼóó tséʼédin yínííł bide ádaanííł.” (1 Corinthians 6:​18, 19) Díísh baa ákonínízin? Sheʼawééʼ shiyáázh: Jiihóvah yíísíníłtsʼą́ą́ʼ. Baa nitsíníkees Jiihóvah bikʼeh honíłʼı̨́įgo naa yáʼátʼééh. Jiihóvah bibee hazʼáanii ahéʼéskéegi doo bikʼeh honołʼı̨́ı̨́góó bikʼee tiʼhooʼniih éí baa nitsíníkees doo. Łaʼ éí honeeni daaní, ákondi béénílniih tʼóó ahayóí yínííł bił naaztʼiʼ. (Galatians 6:8) Joshua baa chʼíhootʼánę́ę, ájíní: “Tʼáadoo honíłtłʼagóó iiná ájíłʼínę́ę, doo hazhóʼó ájíłʼı̨́ı̨́góó éí doo baa hózhǫ́ǫ da yileeh.”

19, 20. Nooséłí nilı̨́įgo Jiihóvah binahjįʼ neʼoodląʼ dóó bikʼeh honíłʼı̨́įgo éí haitʼéego bee nikʼihozhdoodliił?

¹⁹ Jesus ání: “Shizaad bikʼeh wohkahgo tʼéiyá tʼáá aaníí shídahoołʼaahii dadoohłeeł, áko tʼáá aaníinii nihił béédahodoozįįł, índa tʼáá aaníinii nihéédeididoochił.” (John 8:​31, 32) Jiihóvah bichʼįʼ ahééh nisin, doo tʼáá aaníí oodląʼ éí doo bitah honiidlǫ́ǫ da. Tʼáá aaníí oodląʼ nihił bééhózingo, dóó ííníziin kʼehgo ntsáhákees biiʼdóó néididoochił. Náasdi, “Diyin God baʼáłchíní baa hózhǫ́ǫgo béédahideeshchidígi” éí bíká dadíníitʼı̨́ı̨́ʼ. (Romans 8:21) Christ nanitinígíí bikʼeh yínáałgo, éí kʼad ndi néididoochił. ‘Tʼáá aaníinii nił bééhodoozįįłgo’ éí bíhwiiniłʼą́ą́ʼígíí dóó bikʼehgo iiná íníłʼı̨́į doo!

²⁰ Sheʼawééʼ shiyáázh, God ééʼdichííd nee diníʼánígíí baa ahééh nínízin. Yee naʼneeztą́ʼígíí yáʼádaatʼéehgo choiníłʼı̨́. Díí níká adoolwoł náásgóó ádá nidahodiyiitʼaahígíí áko hazhóʼó náasdi iiná nee dooleeł. Nihibrother ániid naagháhígíí ání: “Nooséłí nilı̨́įgo néididoochiłígíí níká adoolwoł nitsaago ádá nihodiniitʼą́ągo, díí naanish yáʼátʼéhígíí doodaiiʼ adeeshxeh daatsʼí nínízingo doodaiiʼ tʼáá sáhí iiná ashʼı̨́įgo daatsʼí nínízin doo.”

21. Haitʼéego “tʼáá aaníí iináanii” shóidííłtʼeeł?

²¹ Dííshjı̨́įdi, łaʼ diné, sheʼiinaʼ yáʼátʼéehgo yishtʼih daaní. Ákondi doo nízaadgo hiniiʼnáa da. Bílaʼashdlaʼii éí yiską́ągo áhodooníłígíí doo bił bééhózin da. (James 4:​13, 14) Yáʼátʼéehgo ádíílíłígíí níká adoolwoł “tʼáá aaníí iináanii” shóidííłtʼeeł. Díí hoolʼáágóó iiná baa hózhǫ́ éí Jiihóvah nihaa hashtʼeilééh. (1 Timothy 6:19) Jiihóvah doo yínihiniłchéehgo shá nanilʼaʼ nihiłníi da. Tʼááłaʼí niitínígo bííníigahígíí ádiilnííł. Jiihóvah bił kʼé ahidiʼnínígíí bidziilgo íinisin. Tʼáá ákwii jı̨́ áhą́dígo bikééʼ yinááł. “Yáʼádaatʼéehii” naa yiiníłígíí baa ahééh nínízin. (Psalm 103:5) Jiihóvah éí hoolʼáágóó ił hózhǫ́ nee dooleełgo baa ákonínízin doo!—Psalm 16:11.