1, 2. Eky’okureeberaho kya Tony nikyoreka kita ngu nikibaasika kukora empindahinduka?

TONY akakura ataine ishe. Akaba ari omu siniya, kwonka atarikukunda kushoma. Nangwa akaba naayenda n’okuruga omu ishomero atakahendeire emishomo ye. Omu wiikenda, Tony akaba aza kureeba vidiyo nari kweshemeza n’abanywani be. Akaba atarikoresa mibazi y’ekitabura bwongo kandi atari nshaarizi, kwonka akaba ataine kigyendererwa kyona. Akaba atarikuhamya yaaba Ruhanga ariho. Eizooba rimwe, Tony akagaaniiraho n’Abajurizi ba Yehova babiri yaabagambira ku atarikuhamya yaaba Ruhanga ariho. Bakamuha obutabo bubiri,​—Was Life Created? na The Origin of Life​—Five Questions Worth Asking.

² Omurundi ogundi ku baagarukire kutaayaayira Tony, emiteekateekyere ye ekaba ehindukire. Obutabo obu baamutsigiire akabushoma emirundi mingi bwahika n’aha kwefunya. Tony akagira ab’eishe-emwe aba ati: “Ruhanga ashemereire kuba ariho.” Akatandika kwega Baibuli kandi mporampora yaahindura emiteekateekyere ye. Tony obu yaabaire atakeegire Baibuli, akaba atarikukora gye aha ishomero, kwonka ku yaayegire Baibuli  yaaba omwe aha beegi abarikukora gye! Nangwa na mukuru w’eishomero kikamutangaaza. Akagira Tony ati: “Okozire empindahinduka z’amaani omu mitwarize yaawe, kandi nookora gye omu kwega kwawe. N’ahabw’okugira ngu nookira kuba ori n’Abajurizi ba Yehova?” Tony akamugarukamu ngu nikwo kiri, kandi yaatandika kumugambira ebi yaabaire naayega. Akahendera emishomo ye, kandi hati ni payoniya ow’obutwire kandi omuheereza omu kibiina. Tony aine okushemererwa kwingi ahabw’okumanya ngu Yehova Tataitwe naamukunda!​—Zaaburi 68:5.

3. Ni buhabuzi ki obu Yehova arikuha abato?

³ Eky’okureeberaho kya Tony nikitwijutsya ngu Yehova naafayo aha bato. Naayenda ngu obe omusinguzi, kandi otungye okumarwa, n’ahabw’ekyo naakuhabura kuguma noijuka “Omuhangi waawe omu biro by’obutsigazi bwawe.” (Omubuurizi 12:1) Eki butoosha tikyorobi kukora, kwonka nikibaasika. Ahabw’obuhwezi bwa Yehova, noobaasa kuba omusinguzi hati okiri muto na bwanyima waakura. Okutuhwera kwetegyereza enshonga egi, nitwija kureeba ekyahwereire Abaisraeli kusingura abazigu baabo omu Nsi Eyaaraganisiibwe n’ekyahwereire Daudi kusingura Goliasi ekikaaka.

4, 5. Abaisraeli okusingura Abanyakanaani na Daudi okusingura Goliasi, nitukyegyeraho eishomo ki erikuru? (Reeba ekishushani aha kutandika.)

⁴ Obu Abaisraeli baabaire bari haihi kutaaha omu Nsi Eyaaraganisiibwe, Yehova akabagambira kukora ki? Mbwenu shi akabagambira kuba abaserukare barungi nari kwetendeka kuza omu rutaro? Ngaaha! (Eky’Ebiragiro 28:1, 2) Akabagambira kumworobera n’okumwesiga. (Yoshua 1:7-9) Obuhabuzi obu nibubaasa kuba bwareebekire nk’obutarikukora, kwonka nibwo obu Abaisraeli baabaire nibeetenga. Kaingi, Yehova akaguma naabahwera kusingura Abanyakanaani. (Yoshua 24:11-13) Nikyetengyesa okwikiriza kubaasa kworobera Ruhanga, kwonka butoosha nikurugamu obusinguzi. Nikwo kyabaire kiri ira, kandi n’omu bunaku obu nikwo kiri.

⁵ Goliasi akaba ari omurwani rugambwa. Oburaingwa bwe bukaba buri nka fuuti 9.5, kandi akaba aine ebirwaniso by’amaani. (1 Samueli 17:4-7) Kwonka Daudi we akaba aine enjungu yonka kandi arikwesiga Yehova. Omuntu otaine kwikiriza naabaasa kuteekateeka ngu Daudi akaba ari omushema okuteeraho kurwanisa Goliasi! Kwonka amazima gari ngu, Goliasi niwe yaabaire ari omushema.​—1 Samueli 17:48-51.

6. Nituza kushwijuma ki omu kicweka eki?

⁶ Omu kicweka ekihwaire, tureebire ebintu bina ebirikubaasa kutureetera kushemererwa n’okuba abasinguzi. Twegire ngu twine kwigutsya ekyetengo kyaitu eky’eby’omwoyo, tugire abanywani barungi abarikukunda Yehova, tuteho ebigyendererwa by’omugasho, kandi tukorese gye obugabe obu Yehova atuhaire. Omu kicweka eki nituza kwongyera kureeba emiringo endiijo oku turikubaasa kugasirwa omu kukora ebintu ebi. Kubaasa kukikora nituza kushwijuma emisingye emwe eri omu Zaaburi 16.

7. (a) Noobaasa kushoboorora ota omuntu orikuta omutima aha by’omwoyo? b) Ni ‘mugabo’ ki ogu Daudi yaabaire aine, kandi eki kikamukwataho kita?

⁷ Omuntu orikuta omutima aha by’omwoyo naikiririza omuri Ruhanga, kandi naateeraho kureeba ebintu nk’oku Ruhanga arikubireeba.  Naikiriza Yehova kumuhabura kandi naaba amaririire kumworobera. (1 Abakorinso 2:12, 13) Daudi akataho eky’okureeberaho kirungi arikuta omutima aha by’omwoyo. Akeeshongora ngu Yehova ‘n’omugabo gwangye.’ (Zaaburi 16:5) Daudi akaba naasiima ‘omugabo’ gwe nari omukago gwe murungi na Ruhanga, kandi niwe yaabaire ahungiraho. (Zaaburi 16:1) N’ahabw’ekyo akaba naabaasa kugira ati: ‘Omutima gwangye gushemerereirwe.’ Tihariho ekyabaire nikireetera Daudi okushemererwa kwingi nk’okuba munywani wa Yehova!​—Shoma Zaaburi 16:9, 11.

8. Ni bintu ki ebirikubaasa kukureetera kugira okumarwa?

⁸ Abantu abarikuta omutima aha kusherura sente nari eby’okweshemeza tibarikubaasa kutunga okushemererwa nk’oku Daudi yaabaire aine. (1 Timoseo 6:9, 10) Ow’eishe-emwe omuri Canada naagira ati: “Okumarwa okwabuzima tikurikuruga omu bi turikubaasa kutunga, beitu nikuruga omu bi turikuha Yehova Ruhanga orikutuha ekiconco kyona ekirungi.” (Yakobo 1:17) Waayesiga Yehova kandi okamuheereza noija kugira okumarwa n’okushemererwa okwabuzima. Mbwenu shi, noobaasa kukora ki kugira okwikiriza kuhami? Oine kugira obwire bw’okushoma Ekigambo kye, oketegyereza ebihangirwe bye, kandi okateekateeka aha mitwarize ye na rukundo ei akwiniire.​—Abarooma 1:20; 5:8.

9. Noobaasa kwikiriza ota Ekigambo kya Ruhanga kukubumba?

⁹ Obumwe Ruhanga naayoreka ngu naatukunda arikutuhabura, nk’oku omuzaire arikuhabura omwana we ou arikukunda. Daudi akasiima obuhabuzi obu, reero yaagira ati: “Ninsiima Mukama ompa obwengye, kandi nyekiro omutima gwangye guunyegyesa.” (Zaaburi 16:7) Daudi akaba naateekateeka munonga aha miteekateekyere ya Ruhanga, reero ateeraho kumutooreza. Akaikiriza kubumbwa emiteekateekyere ya Ruhanga, ekirikumanyisa ngu akaba naakora empindahinduka ezi Yehova arikwenda. Waatwaza nka Daudi, noija kwongyera kukunda Ruhanga n’okumushemeza kandi noija kuba Omukristaayo okuzire omu by’omwoyo. Munyaanyazi-itwe Christin naagira ngu ku arikucoondoza kandi akateekateeka aha bi yaaheza kushoma, naareeba ngu Yehova niwe yaabihandiikire!

10. Nk’oku kirikworekwa omuri Isaaya 26:3, okuta omutima aha by’omwoyo nikiija kuhwera kita?

¹⁰ Waata omutima aha by’omwoyo, nooreeba ensi na nyentsya yaayo nk’oku Ruhanga arikugireeba. Yehova niwe arikukuha obwengye bw’omutaano obu n’okwetegyereza. Ahabw’enki? Naayenda ngu omanye eki oine kwebembeza, ocwemu gye, kandi otegyereze ebiro by’omumaisho otaine bwoba! (Shoma Isaaya 26:3.) Ow’eishe-emwe Joshua, ow’omuri United States, naagira ngu waaguma ohamiire ahari Yehova, noija kumanya gye ekirikukira obukuru.

11. Daudi akaba atoorana ata banywani be?

¹¹ Shoma Zaaburi 16:3. Daudi akaba naamanya kusherura abanywani barungi. Akaba atoorana abanywani abarikukunda Yehova, kandi eki kikamureetera kugira ‘okushemererwa’ kwingi. Akagira ngu banywani be bakaba bari “abarikwera” ahabw’okugira ngu bakaba nibateeraho kukuratira emitindo ya Yehova eshemeire. Omuhandiiki wa zaaburi ondiijo nawe akeehurira atyo aha kikwatiraine n’okutoorana abanywani, akahandiika ngu “ndi mugyenzi wa boona” abarikutiina  Ruhanga kandi ‘bakakwata ebi arikwegyesa.’ (Zaaburi 119:63) Nk’oku kirikworekwa omu kicweka ekihwaire, niiwe noobaasa kutunga abanywani barungi omuri abo abarikukunda Yehova kandi bakamworobera. Kandi banywani baawe tibashemereire kuba ab’emyaka yaawe bonka.

12. Ahabw’enki Daudi na Yonasaani baabaire nibakundana?

¹² Daudi akaba atarikunywana ab’emyaka ye bonka. Noomanya eiziina ry’omwe ahari banywani ba Daudi ab’aha mara? Noobaasa kuteekateeka ahari Yonasaani. Omukago ogu Daudi yaabaire aine na Yonasaani ni gumwe aha mikago mirungi ei turikushomaho omu Baibuli. Kwonka shi nookimanya ngu Yonasaani akaba naakiza Daudi emyaka nka 30? Mbwenu shi niki ekyabareetaire kukundana? N’ahabw’okugira ngu bombi bakaba nibaikiririza omuri Ruhanga. Bombi bakaba nibahaana ekitiinisa, baine emitwarize mirungi nk’obumanzi obu baayorekire barikurwanisa abazigu ba Ruhanga.​—1 Samueli 13:3; 14:13; 17:48-50; 18:1.

13. Noobaasa kutunga ota abanywani barungi? Ha eky’okureeberaho.

¹³ Nka Daudi na Yonasaani, nitubaasa kugira okushemererwa kwingi twaba twine abanywani abarikukunda Yehova, kandi abarikumwikiririzamu. Kiera, oheereize Ruhanga kumara emyaka mingi naagira ngu “atungire abanywani baingi omu nsi yoona, omu bantu batarikushushana n’enganda zitarikushushana.” Naiwe waakora otyo, noija kureeba oku turikuhwerwa Baibuli n’omwoyo gurikwera kuba eka emwe omu nsi yoona.

14. (a) Noobaasa kutaho ota ebigyendererwa by’omugasho? (b) Eminyeeto emwe nibagamba ki aha bigyendererwa byabo?

¹⁴ Shoma Zaaburi 16:8. Daudi akaba naayebembeza okuheereza Yehova. Waatooreza Daudi okataho ebigyendererwa, kandi butoosha okateekateeka aha ki Yehova arikukwendeza, noija kutunga okumarwa. Ow’eishe-emwe Steven naagira ati: “Ku ndikuhikiiriza ekigyendererwa, kandi nkareeba empindahinduka nungi ezi nkozire, nikindeetera  okumarwa.” Ow’eishe-emwe muto kuruga Germany orikuheereza omu ihanga erindi naagira ati: “Naaba naakuzire, tindikwenda kureeba byona ebi nkozire nkeefuuza ahabw’okwebembeza ebyangye nyenka.” Naiwe nooyehurira otyo? Kyaba nikwo kiri koresa okubaasa kwawe n’etalanta ezi oine kuhaisa Ruhanga ekitiinisa n’okuhwera abandi. (Abagalatia 6:10) Taho ebigyendererwa by’okuheereza Yehova, kandi omushabe kukuhwera kubihikiiriza. Noobaasa kuhamya ngu naija kugarukamu okushaba kwawe!​—1 Yohaana 3:22; 5:14, 15.

15. Noobaasa kweteeraho bigyendererwa ki? (Reeba akabokisi “ Ebigyendererwa Bimwe eby’Okuteekateekaho.”)

¹⁵ Ni bigyendererwa ki ebi orikubaasa kutaho? Noobaasa kuteeraho kugarukamu omu nteerane omu bigambo ebyawe? Nari noobaasa kutaho ekigyendererwa ky’okuba payoniya nari kuheereza aha Beseeli? Kandi noobaasa kuteeraho kwega orurimi rusya kugira ngu obuurire abantu baingi amakuru marungi. Barak omunyeeto ori omu buheereza obw’obutwire naagira ati: “Okwimuka buri kasheeshe ndikumanya ngu ninkoresa amaani gangye goona kuheereza Yehova, n’enyehurira etarikubaasa kureetwa ogundi murimo.”

16. Daudi akatwara ata ebiragiro bya Yehova n’emisingye ye, kandi ahabw’enki?

¹⁶ Shoma Zaaburi 16:2, 4. Nk’oku twegire omu kicweka ekihwaire, twagyendera aha misingye n’ebiragiro bya Ruhanga, nitugira obugabe obwabuzima. Nitwega kukunda ekihikire n’okwanga ekibi. (Amosi 5:15) Daudi akagira ngu Yehova niwe bukomooko bw’ebirungi byona ebi yaabaire naatunga. Ebirungi ebirikugambwaho aha nibumanyisa emicwe mirungi, nari oburungi. Yehova ni murungi omu buri kimwe eki arikukora, kandi buri kirungi eki turikutunga nikiruga ahariwe. Daudi akateeraho kutooreza Yehova n’okukunda ebi arikukunda. Kwonka kandi Daudi akeega n’okwanga n’ebi Ruhanga arikugira ngu ni bibi. Kimwe aharibyo n’okuramya ebishushani, ekirikutwariramu okuramya omuntu weena nari ekintu kyona omu mwanya gw’okuramya Yehova. Okuramya ebishushani nikigarura abantu ahansi, kandi ekitiinisa ekishemereire kuheebwa Yehova nikiheebwa omuntu nari ekintu.​—Isaaya 2:8, 9; Okushuuruurwa 4:11.

17, 18. (a) Daudi akagira ngu ni bibi ki ebirikuruga omu kuramya kw’ebishuba? (b) Niki ekirikureetera abantu ‘kwekanyisiza obusaasi’?

¹⁷ Omu kuhandiikwa kwa Baibuli, okuramya kw’ebishuba kukaba nikugyendera hamwe n’okushambana. (Hosea 4:13, 14) Baingi bakaba nibakunda okuramya kw’ebishuba ahakuba bakaba nibakunda kuba enshambani, kwonka shi okuramya nk’okwo kukabareetera okushemererwa? Ngaaha! Daudi akagira ngu abarikuramya baaruhanga b’ebishuba ‘nibeekanyisiza obusaasi.’ Abantu abo bakaba bahongyera abaana baabo baaruhanga b’ebishuba! (Isaaya 57:5) Yehova akaba naayanga obwinazi bwabo. (Yeremia 7:31) Kuri waabaire oriho omu bwire obwo, obundi okaba noija kushemererwa ahabw’okugira ngu abazaire baawe nibaheereza Yehova!

¹⁸ Obunaku obu, amadiini g’ebishuba nigaikiriza ebikorwa by’obushambani otwariiremu n’ebitingwa. Abarikushambana nibabaasa kuteekateeka ngu baine obugabe, kwonka omu mazima ‘nibeekanyisiza obusaasi.’ (1 Abakorinso 6:18, 19) Waareebire eki nikibaho? N’ahabw’ekyo, eminyeeto mworobere Shoimwe ow’omu iguru. Mwetungire  obuhame ngu ni kirungi kumworobera. Muteekateekye aha bintu bibi ebirikuruga omu bushambani. Nimwija kukireeba ngu obusaasi obu murikubaasa kutunga nibukirira kimwe okushemererwa kw’akaire kakye. (Abagalatia 6:8) Joshua, ou twaba twagambireho naagira ati: “Nitubaasa kukoresa obugabe bwaitu nk’oku turikwenda, kwonka okubukoresa kubi tikirikureeta okumarwa.”

19, 20. Abato abarikwikiririza omuri Yehova kandi bakamworobera nibatunga migisha ki?

¹⁹ Yesu akagira ati: ‘Ku muraahamire aha kigambo kyangye, nimuba muri abeegi bangye buzima. Kandi nimwija kumanya amazima, n’amazima nigaija kubahindura ab’obusingye.’ (Yohaana 8:31, 32) Nitusiima Yehova ahabw’okutwiha omu diini z’ebishuba, omu butamanya n’emigyenzo egwire. Omu biro by’omumaisho, twine ekihika ky’okugira “obusingye bw’abaana ba Ruhanga obw’ekitiinisa.” (Abarooma 8:21) Na hati nimubaasa kutunga obusingye buringaniire mwakuratira enyegyesa za Kristo. Reero nimwija ‘kumanya amazima’ murikugeega kandi mukagagyenderaho!

²⁰ Abato, obugabe obu Ruhanga abahaire mubutware nk’obw’omuhendo. Mubukorese gye. Eki nikiija kubahwera kucwamu gye, mubone kugira ebiro birungi eby’omumaisho. Ow’eishe-emwe omwe omuto naagira ati: “Okukoresa gye obugabe bwawe okiri muto buzima nikikuhwera omu biro by’omumaisho waaba oine kucwamu aha nshonga nkuru, nk’okusherura omurimo ogushemeire, okucwamu kutaaha omu bushwere nari kuba orekire.”

21. Noobaasa kutunga ota “amagara agaabuzima”?

²¹ Omu nsi egi embi, eki abantu barikweta okushemererwa nikuba kuri okw’akaanya kakye. Tihaine muntu orikumanya ekirikuza kubaho nyencakare. (Yakobo 4:13, 14) N’ahabw’ekyo, ekintu kirungi eki orikubaasa kukora n’okucwamu ebiraakuhwere kutunga “amagara agaabuzima,” nigo magara agatahwaho omu nsi ensya. (1 Timoseo 6:19) Yehova tarikugyema omuntu weena kumuheereza. Kiri ahari buri omwe ahariitwe kucwamu eki araakore. N’ahabw’ekyo hindura Yehova ‘omugabo’ gwawe orikuteeraho kuguma noomwirira haihi, kandi osiime “ebirungi” ebi arikukuha. (Zaaburi 103:5) Gira obuhame ngu Yehova naija kukuha okushemererwa n’okumarwa ebiro byona!​—Zaaburi 16:11.