1, 2. Сар о искуство е Тонискоро сикавела кај секој шај те керел промене ко живото?

О ТОНИ барило бизо дад. Кеда сине ки средно школа, ов на интересиринела пе сине бут баши школа. Чак размислинѓа порано те мукхел ла. Ко викендија, о Тони џала сине ко кино или дружинела пе сине пле амаленцар. На сине насилно хем на лела сине дрога, ама на сине ле нисави смисла ко живото. А чак сумнинела пе сине кај постојнела Девел. Јекх диве, о Тони аракхља дује џенен сој тане е Јеховаскере сведокија хем вакерѓа ленге кај сумнинела пе кај постојнела Девел. Ола денѓе ле дуј брошуре — Кој створинѓа о живото? хем Панџ важна пучиба башо адава котар авела о живото. *

² Јавер пути кеда е Јеховаскере сведокија але ко Тони, ов целосно менинѓа пло мислење. Добором бут читинѓа о брошуре со о стране ленгере сине виткиме. Ов вакерѓа е Сведоконге: „Мора те постојнел Девел“. Почминѓа те проучинел  и Библија хем хари по хари менинѓа пло стави башо живото. Исто аѓаар, поангле о Тони на сине шукар ученико, ама кеда почминѓа те проучинел, ов уло јекх таро најшукар ученикија ки школа! Чак о директори сине воодушевимо таро лескере промене. Ов вакерѓа леске: „Туте акана иси тут бут пошукар стави спрема и школа хем иси тут пошукар оценке. Дали тано адава адалеске со дружинеа тут е Јеховаскере сведоконцар?“ Ов вакерѓа леске кај адава тано аѓаар хем сведочинѓа е директореске. О Тони завршинѓа и средно школа хем авдиве служинела сар општо пионери хем слуга-помошнико. Ов тано бут бахтало со пенџарела е Јехова, кова сој лескоро Дад ко небо (Пс. 68:5).

3. Саво совет дела о Јехова е терненге?

³ О искуство е Тонискоро сетинкерела амен кај о Јехова бут грижинела пе е терненге. Ов мангела те ове чаче успешно хем задоволно ко живото. Адалеске дела туке акава совет: „Ко тернипе сетин ту ко тло Баро Створители“ (Проп. 12:1). Акава нане секогаш локхо, ама шај те керел пе. Адалеа со о Девел ка поможинел туке, ту шај те ове успешно на само џикоте сиан терно него ко цело тло живото. Те шај пошукар те хаљова акава, ка кера лафи башо адава со поможинѓа е Израелцонге те освојнен и Ветими пхув хем сар о Давид успејнѓа те побединел е Голијате.

4, 5. Сави важно поука шај те сикљова таро адава сар о Израелција освојнѓе о Ханаан хем о начин сар о Давид побединѓа е Голијате? (Дикх о слике ко почеток тари статија.)

⁴ Саве упатствија денѓа о Јехова е Израелцонге кратко англедер те кхувен ки Ветими пхув? Дали вакерѓа ленге те овен пошукар војникија или те спреминен пе војнаке? На! (5. Мој. 28:1, 2). Ов вакерѓа ленге те шунен ле хем те овел лен доверба ки лесте (Ис. Нав. 1:7-9). Акава совет е манушенге шај изглединела сине кај на сине исправно, ама уствари адава сине о најшукар совет е Израелцонге. О Јехова повише пути поможинѓа пле народоске те побединел е Ханаанцон (Ис. Нав. 24:11-13). Те шај те шуне е Јехова ваљани туке вера, хем адаја вера анела секогаш џи ко успех. Адава сине аѓаар ко пурано време, а аѓаар тано авдиве да.

⁵ О Голијат сине силно војнико. Ов сине учо скоро 3 метре, хем сине ле опасно оружје (1. Сам. 17:4-7). Тари јавер страна, е Давиде сине ле само јекх шело со фрдела сине леа бара хем сине ле вера ко Девел. Јекх мануш со нане ле вера шај те мислинел песке кај о Давид сине глупаво со мангља те боринел пе е Голијатеа. Ама, уствари о Голијат сине глупаво (1. Сам. 17:48-51).

6. Башо со ка кера лафи ки акаја статија?

⁶ Ки англуни статија, керѓем лафи башо штар буќа со керена амен те ова побахтале хем те ова поуспешна ко живото. Амен сиклилем кај ваљани те грижина амен башо амаре духовна потребе, те овен амен шукар амала со мангена е Девле, те чхива аменге целија со дена смисла ко живото хем те ценина и слобода со дела ла аменге о Девел. Ки акаја статија ка кера лафи панда повише башо акала буќа хем саве користија шај те овен амен лендар. Те шај те кера адава, те дикха несаве начелија со аракхљовена ко 16 Псалм.

7. а) Сар ка опишине јекхе духовно зрело мануше? б) Со сине е Давидескоро „дело таро наследство“ хем сар адава влијајнѓа упри лесте?

⁷ О духовно зрело мануш иси ле вера хем трудинела пе те дикхел ко буќа сар  со дикхела о Девел. Ов родела водство таро Јехова хем одлучно тано те овел леске послушно (1. Кор. 2:12, 13). О Давид тано шукар пример башо духовно зрело мануш. Ов вакерѓа: „О Јехова тано дело таро мло наследство“ (Пс. 16:5). Ко адава сине вклучимо лескоро амалипе е Јеховаја кова со сине леске тхан гарајбаске (Пс. 16:1). Сар резултати таро адава, о Давид вакерѓа: „Бахтали тани мли душа“. Е Давиде на керѓа ништо побахтало таро адава те овел амал е Јеховаја. (Читин Псалм 16:9, 11.)

8. Кола тане несаве буќа со шај те керен те овел тут смисла ко живото?

⁸ О мануша коленге сој најважна о паре или о задоволствија никогаш нане те овен бахтале сар о Давид со сине (1. Тим. 6:9, 10). Јекх пхрал тари Канада вакерѓа: „О чачутно задоволство на авела таро адава со добинаја ко живото, него таро адава со даја е Јеховаске кова со дела секова шукар поклон“ (Јак. 1:17). Ако бајрареа тли вера ко Јехова хем служинеа леске, ка ове бахтало хем ка овел тут чачутни смисла ко живото. Адалеске, сар шај те бајраре тли вера? Ваљани те накхе време е Јеховаја адалеа со ка читине лескоро Лафи, те дикхе о шукар буќа со створинѓа лен хем те размислине башо лескере особине, сар сој о мангипе со сикавела ле туке (Рим. 1:20; 5:8).

9. Сар шај те мукхе е Девлескоро Лафи те обликујнел тут?

⁹ Понекогаш о Девел сикавела аменге пло мангипе аѓаар со поправинела амен кеда грешинаја, исто сар со керела јекх дад. О Давид бут ценинела сине о советија со авена сине таро Јехова, хем вакерѓа: „Ка фалинав е Јехова, кова со дела ман советија. Раќате опоменинена ман мле најгаравде чувствија“ (Пс. 16:7, фус.). О Давид хор размислинѓа башо адава сар о Јехова дикхела ко буќа хем трудинела пе сине те размислинел сар лесте. Ов мукхља е Девлескере мисле те обликујнел ле те шај те овел пошукар мануш. Ако ту да кереа адава, ка манге повише е Девле хем ка овел тут побари желба те ове леске послушно. Исто аѓаар, ка ове духовно зрело христијани. Јекх пхен, која со викинела пе Кристин, вакерѓа: „Кеда истражинава хем кеда размислинава башо адава со читинѓум, иси ман чувство кај о Јехова адава пишинѓа ле баш манге!“

10. Спрема о лафија таро Исаија 26:3, сар ка поможинел туке адава со сиан духовно зрело личност?

¹⁰ Ако сиан духовно зрело личност, ту ка дикхе ко свето хем ки лескири иднина аѓаар сар со дикхела о Девел. О Јехова ка дел туке асавки мудрост хем способност те проценине о буќа. Соске? Ов мангела ту те џане сој тано најважно ко живото, те ане мудра одлуке хем те на дара таро адава со ка анел туке и иднина! (Читин Исаија 26:3.) Јекх пхрал, кова со викинела пе Џошуа хем живинела ко САД вакерела кај, ако ачховеа паше е Јеховаја јасно ка дикхе сој тано важно ко живото, а со на.

11. Сар о Давид биринѓа пле амален?

¹¹ Читин Псалм 16:3. О Давид џанља сар те биринел шукар амален. Ов биринѓа те овен лескере амала адала со мангена е Јехова, а адава керѓа ле бут бахтало. Ов вакерѓа кај ола тане „света“ соске трудинена пе сине те живинен спрема е Јеховаскере морална мерилија. Јавере псалмисте сине ле исто стави кеда керела пе лафи саве амала шај те бирине. Ов вакерѓа: „Амал сиум сариненцар со дарана тутар, хем околенцар со икерена тле заповедија“ (Пс. 119:63). Сар со дикхлем ки англуни статија, ту да шај те аракхе шукар амала машкар  окола со мангена хем шунена е Јехова. Нормално, тле амала на ваљани те овен само адала со иси лен тле берша.

12. Соске о Давид хем о Јонатан сине шукар амала?

¹² Е Давиде на сине ле само амала со сине ко лескере берша. Џанеа ли кој сине јекх таро лескере најпаше амала? О Јонатан! О амалипе машкар о Давид хем о Јонатан сине јекх таро најшукар амалипе сој тане пишиме ки Библија. Дали џанеа кај о Јонатан сине околу 30 берш попхуро таро Давид? Тегани, соске ола сине добором шукар амала? Ленгоро амалипе темелинела пе сине ки вера со сине лен ко Девел. Ола исто аѓаар поштујнена пе сине машкар песте хем ценинена сине пумаре шукар особине, сар на пример и храброст со сикавѓе ла џикоте боринена пе сине е Девлескере душманенцар (1. Сам. 13:3; 14:13; 17:48-50; 18:1).

13. Сар шај те овен тут повише амала? Вакер јекх пример.

¹³ Исто сар о Давид хем о Јонатан, амен да шај те ова бахтале ако биринаја амала со мангена е Јехова хем иси лен вера ки лесте. И Кира, која со служинела бершенцар е Јеховаске, вакерела: „Иси ман амала ко цело свето. Ола авена таро различно потекло хем култура“. Ако ту да дружинеа тут пхраленцар хем пхењенцар таро различно потекло хем култура, ка уверине тут кај е Девлескоро Лафи хем о свети дух керена те ова сар јекх фамилија ко цело свето.

14. а) Сар шај те чхиве туке целија со ка керен те овел тут смисла ко живото? б) Со вакерена несаве терне башо ленгере целија?

¹⁴ Читин Псалм 16:8. Најважно нешто ко е Давидескоро живото сине и служба башо Јехова. Исто аѓаар, ту да ка ове задоволно ко тло живото ако и служба башо Јехова туке ко прво тхан хем ако секогаш мислинеа ки лесте кеда чхивеа туке несави цел. Јекх пхрал со викинела пе Стивен вакерела: „Кеда трудинава ман те исполнинав мле целија, кеда исполнинава лен хем кеда дикхава кај овава пошукар ки адаја бути, осетинава ман задоволно“. Јекх терно пхрал тари Германија со служинела ки јавер пхув  вакерела: „Кеда ка пхујровав хем кеда ка размислинав башо мло живото, на мангава те дикхав кај са со керѓум сине само баши манде“. Дали ту да осетинеа тут аѓаар? Тегани користин тле способностија хем талентија те шај те фалине е Девле хем те поможине е јавере манушенге (Гал. 6:10). Чхив туке целија ки служба башо Јехова хем молин ле те поможинел туке те исполнине лен. Хем ту ка шај те ове сигурно кај ов ка шунел тле молитве (1. Јов. 3:22; 5:14, 15).

15. Саве целија шај те чхиве туке? (Дикх и рамка „ Несаве целија коленге шај те размислине“.)

¹⁵ Саве тане несаве целија со шај те чхиве туке? Со мислинеа башо адава те коментирине тле лафенцар? Или башо адава те ове пионери или те служине ко Бетел? Исто аѓаар шај те сикљове неви чхиб хем аѓаар те проповедине о шукар хабери повише манушенге. Јекх терно пхрал о Барак кова сој ки полновремено служба, вакерела: „Адава со џанава кај секова диве трошинава цели мли сила е Јеховаске керела те овав бахтало кова со ништо јавер нашти те керел те осетинав ман аѓаар“.

16. Сар о Давид сикавѓа кај ценинела е Девлескере законија хем начелија?

¹⁶ Сар со дикхлем ки англуни статија, кеда живинаја спрема е Девлескере законија хем начелија, амен оваја чаче слободна. Амен сикљоваја те манга адава сој шукар хем те мрзина адава сој лошно (Амос 5:15). О Давид халило кај е Јеховаскоро шукарипе тано бут баро (Пс. 31:19). Адалеске, бут трудинела пе сине те џал пало е Јеховаскоро пример хем те мангел о буќа со мангела лен о Јехова. Исто аѓаар, о Давид сиклило те мрзинел адава сој тано лошно англо е Јеховаскере јакхја. Јекх таро акала буќа тане о идолопоклонство, а адава значинела те обожавинел пе нешто или некас, наместо е Јехова. О идолопоклонство понижинела е манушен хем ов на дела и слава е Јеховаске кова со само ов заслужинела ла (Иса. 2:8, 9; Отк. 4:11).

17, 18. а) Со вакерѓа о Давид башо последице со авена ако обожавинела пе е ховавне девлен? б) Таро кола причине е манушен „иси лен са побаре дукха“?

¹⁷ Ко библиско време, о сексуално неморал бут пути сине дело таро ховавно обожавање (Оси. 4:13, 14). Буте манушенге свиџинела пе сине и ховавни религија соске ој мукхела лен сине те керен неморал. Ама дали адава керела лен сине те овен бахтале? На, ни најхари! О Давид вакерѓа кај окола со обожавинена е ховавне девлен „иси лен са побаре дукха“. (Читин Псалм 16:4.) Асавке мануша чак жртвујнена сине пумаре чхавен е ховавне девленге! (Иса. 57:5). О Јехова мрзинела сине адава со керена акала мануша (Ерем. 7:31). Те живине сине ко адава време, ту ка ове сине благодарно со тле родителија обожавинена е Јехова!

¹⁸ Авдиве, бут ховавне религие прифатинена о сексуално неморал, сар сој и хомосексуалност. Акава шај те керел о мануша те осетинен пе кај тане слободна, ама лен реално „иси лен са побаре дукха“ (1. Кор. 6:18, 19). Дали ту да дикхеа адава? Адалеске, тернален, шунен тумаре Даде сој ко небо. Уверинен тумен кај адава тано башо тумаро шукарипе. Размислинен шукар башо лошна последице таро неморал. Ка дикхен кај и дукх со анела о неморал тани побари таро моментално задоволство (Гал. 6:8). О Џошуа, со спомнинѓем ле англедер, вакерѓа: „Шај амари слобода те користина ла сар со мангаја амен, ама ако злоупотребинаја ла само ка разочарина амен“.

19, 20. Саве берекетија ка добинен о терне со иси лен вера ко Девел хем тане леске послушна?

 ¹⁹ О Исус вакерѓа: „Ако ачховена мле лафенде, чаче сиен мле ученикија, хем ка џанен о чачипе, хем о чачипе ка ослободинел тумен“ (Јован 8:31, 32). Благодарна сием е Јеховаске со џанаја о чачипе хем со сием ослободиме тари ховавни религија хем таро суеверие. Ки иднина, едвај аџикераја те добина „и славно слобода е Девлескере чхавенгири“ (Рим. 8:21). Панда авдиве шај те уживине ки одредено мера ки адаја слобода аѓаар со ка икере тут ко адава со сикавела о Исус. Ко акава начин, ту ка џане о чачипе на само адалеа со ка сикљове баши лесте него хем адалеа со ка живине спрема лесте.

²⁰ Тернален, ценинен и слобода со денѓа ла туменге о Девел. Користинен ла мудро. Адава ка поможинел туменге те анен одлуке со ка керел те овел тумен пошукар иднина. Јекх терно пхрал вакерѓа: „Ако панда сар терно мудро користинеа тли слобода, покасно ко живото ка шај те ане мудра одлуке башо бут поважна буќа, сар сој, те аракхе шукар бути или те бирине дали ка кхуве ко брако или ка ачхове коркори несаво време“.

21. Сар шај те добине „о чачутно живото“?

²¹ Ко акава свето, чак окола со вакерена кај о живото тано шукар, ле нане ле нисави сигурност хем кратко трајнела. Никој амендар на џанела со ка овел тајса (Јак. 4:13, 14). Адалеске, и најшукар бути со шај те кере тани те бирине буќа со ка поможинен туке те добине „о чачутно живото“ — о вечно живото ко е Девлескоро нево свето (1. Тим. 6:19). О Јехова никас на чхивела силаја те служинел леске. Секој коркори одлучинела со ка керел. Адалеске кер о Јехова те овел дело таро тло наследство адалеа со ка трудине тут секова диве те ове леа са попаше. Ценин са о шукар буќа со дела лен туке ов (1. Тим. 6:17). Ов сигурно кај о Јехова ка поможинел туке те ове бахтало ки цели вечност (Пс. 16:11).