1, 2. Σαρ σικαβέλα η εμπειρία σο τθερέλας ο Τόνι ότι εκ τζενό μπορίνελα τι αλλάνελ πι ζωή;

Ο ΤΟΝΙ μπαριόλας μπι-νταντέσκο. Τζάλας γυμνάσιος, αλλά να χάλας-λες ανάγκη ο σχολείος. Κι πραγματικότητα, μανγκέλας τι τσσιναβέλ-λες. Κο σαββατοκύριακα, ο Τόνι τζάλας τι ντικχέλ ταινίες ή κερέλας παρέα πι αμαλέντζαρ. Να ισινέ βίαιος τσσαβό ούτε λέλας ναρκωτικά, απλά να τθερέλας σκοπός πι ζωγιάτε. Επίσης, να ισινέ σίγουρος αν υπαρχίντιβελα Ντεβέλ. Εκ ντιβές, γνωριντάς εκχέ αντρογυνός σο ισινέ Μάρτυρες ντα κερντάς λένγκε ερωτήσεις. Βον ντινέ-λες τι διαβάνελ ο βιβλιάρια Δημιουργήθηκε η Ζωή; ντα Η Προέλευση της Ζωής​—Πέντε Ερωτήματα που Αξίζει να Τεθούν.

² Κάνα γκιλέ πάλι, ο Τόνι αλλαντάας τρόπος σκέψης. Διαβαντάας αζόμ μπουτ ο βιβλιάρια σο πουράνιλε. Ο Τόνι βακερντάς λένγκε: «Πρέπει τι υπαρχίντιβελα Ντεβέλ». Ο Τόνι αρχισάλο τι κερέλ μελέτη κατά Γραφή ντα σιγά σιγά η άποψη σο τθερέλας ι ζωγιάκε αλλαξάλι. Οτθέ σο να ισινέ λατσσό μαθητής, αβιλό εκ κατά πιο λατσσέ μαθητές κο σχολείος! Ατζέ-ντα ο διευθυντής σαστισάλο. Βακερντάς κο Τόνι: «Κερντάν μπαρέ αλλαγές εμ κι συμπεριφορά εμ κο βαθμοί. Μήπως  βοηθιντάς-τουτ η παρέα με το Μάρτυρες ι Ιεχωβάσκε;» Ο Τόνι βακερντάς «βα» ντα κερντάς λέσαρ λάφι οντουλένγκε σο σικλιόλας. Τελειωντάς ο σχολείος ντα αντιβές ισί τακτικός σκαπανέας ντα διακονικός υπηρέτης. Ισί μπουτ ευτυχισμέ σο τθερέλα εκ μπουτ λατσσέ Νταντές, ι Ιεχωβάς!​—Ψαλμός 68:5.

3. Σο βακερέλα ο Ιεχωβά κο τερνέ;

³ Η εμπειρία σο τθερέλας ο Τόνι σικαβέλα αμένγκε ότι ο Ιεχωβά πφαμπόλα μπαγιά ι τερνένγκε. Μανγκέλα τι τθερές εκ λατσσί ντα πφερντί ζωή. Οτθάρ, βακερέλα τούκε «τι ντες-τουτ γκοντί κάνα ισινάν τερνό ι πιο Μπαρές, Οντουλές σο κερντάς-τουτ». (Εκκλησιαστής 12:1) Ανταβά νανέ πάντα εύκολος, αλλά μπορίνεσα τι κερές-λες. Με τη βοήθεια ι Ντεβλέσκι, μπορίνεσα τι τθερές λατσσί ζωή, όχι σάντε κάνα ισινάν τερνό, αλλά κάνα κα μπαριός-ντα. Για τι αγαβάς-λες πιο λατσσές, κα ντικχάς σο βοηθιντάς ι Ισραηλιτέν τι λεν ο Υποσχεμέ Τθεμ ντα σο ντινάς ζορ κο Δαβίδ τι τσσουβέλ-λεν με το γίγαντας Γολιάθ.

4, 5. Σο σικλιάσα κάνα διαβάνασα ότι ο Ισραηλίτες λιντέ ι Χαναάν ντα ότι ο Δαβίδ τσσουντάς-λεν με το Γολιάθ; (Ντικχ ο φωτογραφίες σο ισί κι αρχή)

⁴ Κάνα ο Ισραηλίτες ερεσένας κο Υποσχεμέ Τθεμ, σο οδηγίες ντινάς-λεν ο Ιεχωβά; Μήπως βακερντάς λένγκε τι αβέν πιο λατσσέ στρατιώτες ή τι σικλιόν πιο λατσσές τι πολεμίνεν; Όχι! (Δευτερονόμιο 28:1, 2) Βακερντάς λένγκε τι ντεν-λες καν ντα τι τθερέν λέσκε εμπιστοσύνη. (Ιησούς του Ναυή 1:​7-9) Κο γιακχά κι τζενένγκε, ανταγιά συμβουλή μπορεί μα τι ντικχίντιβελας λογική, αλλά ισινέ η πιο λατσσί συμβουλή ι Ισραηλιτένγκε. Ο Ιεχωβά βοηθιντάς μπουτ φαρ πι λαός τι νικίνελ ι Χαναναιόν. (Ιησούς του Ναυή 24:​11-13) Για τι ντας καν ι Ντεβλές χρειαζίντιβελα πίστη, αλλά η πίστη ανέλα πάντα λατσσιπέ. Ανταβά αβέλα-πες αμαρέ ντιβεσέντε σαρ αβέλας-πες κο πουρανέ μπρεσά-ντα.

⁵ Ο Γολιάθ ισινέ εκ ζουρανό πολεμιστής. Ισινέ περίπου 3 μέτρα βουτσσό ντα τθερέλας επικίνδυνα όπλα. (1 Σαμουήλ 17:​4-7) Ο Δαβίδ, οκιά μπάνταρ, τθερέλας σάντε εκ σφεντόνα ντα πίστη κο Ντεβέλ. Κο γιακχά κι τζενένγκε σο να τθερένας πίστη, ντικχίντιβελας ντινιλό σο τζάλας τι τσσουβέλ-λεν οντουλέ γιγαντάσαρ! Αλλά ο ντινιλό ισινέ ο Γολιάθ.​—1 Σαμουήλ 17:​48-51.

6. Σο κα ντικχάς ανταλέ μαθημάστε;

⁶ Κο γιαβέρ μάθημας, ντικχλάμ σταρ πράγματα σο κερένα αμαρί ζωή πιο ευτυχισμέ ντα πιο λατσσί. Σικλιλάμ ότι πρέπει τι φροντίνας αμαρί ανάγκη ι πνευματικέ πραγματένγκε, τι τραμπίνας λατσσέ αμαλέν σο μανγκένα ι Ντεβλές, τι τσσουβάς λατσσέ στόχοι ντα τι εκτιμίνας ι ελευθερία σο ντέλα-αμέν ο Ντεβέλ. Ανταλέ μαθημάστε, κα σικλιάς πιο μπουτ ανταλέ πραγματένγκε. Για τι κεράς-λες ανταβά, κα ντικχάς κάποιες αρχές σο ισί κο Ψαλμός 16.

7. (α) Σαρ ισί ο πνευματικός τζενό; (β) Καγιά ισινέ η «κληρονομιά» σο τθερέλας ο Δαβίδ, ντα σαρ επηρεάνελας-λες;

⁷ Ο πνευματικός τζενό πακιάλα κο Ντεβέλ ντα ντικχέλα ο πράγματα σαρ ντικχέλα-λεν Βοβ. Μουκχέλα ι Ιεχωβάς τι οδηγίνελ λέσκι ζωή ντα ισί αποφασισμέ τι ντελ-λες καν. (1 Κορινθίους 2:​12, 13) Ο Δαβίδ, σο ισινέ εκ πνευματικός τζενό, ισί εκ λατσσό παράδειγμας αμένγκε.  Γκιλιαντάς: «Ο Ιεχωβά ισί μι κληρονομιά». (Ψαλμός 16:5) Ο Δαβίδ εκτιμίνελας πι «κληρονομιά», ι μπουτ λατσσί φιλία σο τθερέλας ι Ντεβλέσαρ ντα τζάλας λέστε για τι αρακχαβέλ-πες. (Ψαλμός 16:1) Οτθάρ βακερντάς: «Σαρό μο νεαυτός πφερντιόλα χαρά». Οντουβά σο ντέλας-λες ι πιο μπαρί χαρά ισινέ η λατσσί φιλία σο τθερέλας ι Ιεχωβάσαρ!​—Διαβάνεν Ψαλμός 16:9, 11.

8. Καλά πράγματα μπορίνενα τι πφερέν τι ζωή;

⁸ Οντουλά σο μανγκένα πρώτα ο λοβέ ντα τι νακχέν σουκάρ ποτές να κα τθερέν αζόμ χαρά καζόμ τθερέλας ο Δαβίδ. (1 Τιμόθεο 6:9, 10) Εκ πφραλ κατά Καναδάς βακερέλα: «Οντουβά σο κερέλα αμαρί ζωή πφερντί νανέ ο πράγματα σο λάσα, αλλά οντουλά σο ντάσα κο Ιεχωβά Ντεβέλ, Οντουλέστε σο ντέλα σαρέ ο λατσσέ πράγματα». (Ιακώβου 1:​17) Κάνα μπαριαρέσα τι πίστη κο Ιεχωβά ντα υπηρετίνεσα-λες, τι ζωή κα τθερέλ νόημας ντα κα αβέλ πφερντί. Σαρ κα κερές τι πίστη πιο ζουρανί; Πρέπει τι νακχές χρόνος ι Ιεχωβάσαρ. Κα κερές-λες ανταβά κάνα διαβάνεσα λέσκο Λάφι, ντικχέσα ο σουκάρ πράγματα σο κερντάς ντα σκεφτίνεσα ο ιδιότητες λέσκε, σαρ ισί η αγάπη σο τθερέλα τούκε.​—Ρωμαίους 1:​20· 5:8.

9. Σαρ κα μουκχές ο Λάφι ι Ντεβλέσκο τι λατσσαρέλ-τουτ;

⁹ Μερικές φορές ο Ντεβέλ, σαρ εκ λατσσό ντατ, σικαβέλα αμένγκε πι αγάπη κάνα διορθώνελα-αμέν αζομάν σο χρειαζίντιβασα-λες. Ο Δαβίδ εκτιμίνελας ανταγιά διόρθωση ντα βακερντάς: «Κα δοξάναβ ι Ιεχωβάς, σο ντέλα-μαν συμβουλές. Ατζέ-ντα ιράτ, ο σκέψεις σο ισί ντιπ αντρέ μάντε διορθώνενα-μαν». (Ψαλμός 16:7) Ο Δαβίδ σκεφτίνελας ο σκέψεις ι Ντεβλέσκε ντα κερέλας-λεν πιρέ. Μουκχέλας ο σκέψεις ι Ντεβλέσκε τι λατσσαρέν-λες, δηλαδή τι αλλάνεν-λες για τι αβέλ πιο λατσσό τζενό. Όταν κερέσα-λες τούι-ντα ανταβά, τι αγάπη ι Ντεβλέσκε κα μπαριόλ ντα κα μανγκές πιο μπουτ τι ντες-λες καν. Επίσης, κα αβές εκ ώριμος Χριστιανός. Εκ πφεν σο λάκο ναβ ισί Κριστίν βακερέλα ότι κάνα ρόντελα κι Γραφή ντα κο έντυπα ντα σκεφτίνελα οντουλά σο διαβάνελα, νιωθίνελα ότι ο Ιεχωβά κερντάς τι γραφίντιβεν λάκε!

10. Σαρ σικλιάσα κατά Ησαΐας 26:3, σαρ κα βοηθίντιβες άμα ισινάν πνευματικός τζενό;

¹⁰ Κάνα ισινάν πνευματικός τζενό, ο Ιεχωβά σικλιαρέλα-τουτ ντα πουτρέλα το γιακχά για τι μπορίνες τι ντικχές ι ντουνιάς ντα οντουλά σο κα αβέν-πες σαρ ντικχέλα-λεν Βοβ. Σόσκε; Μανγκέλα τι τζανές σο ισί σημαντικός κι ζωή, τι λες λατσσέ αποφάσεις ντα τι ντικχές ανγκλάλ χωρίς νταρ! (Διαβάνεν Ησαΐας 26:3) Εκ πφραλ ο Τζόσουα, σο μπεσέλα κι Αμερική, βακερέλα ότι άμα ατσσόσα πασέ κο Ιεχωβά ντικχέσα ξεκάθαρα σο ισί ντα σο νανέ σημαντικός.

11. Σαρ τραμπίνελας ο Δαβίδ πι αμαλέν;

¹¹ Διαβάνεν Ψαλμός 16:3. Ο Δαβίδ τζανέλας σαρ τι αρακχέλ λατσσέ αμαλέν. Τραμπίνελας τι τθερέλ αμαλέν σο μανγκένας ι Ιεχωβάς ντα ανταβά ανέλας λέσκε «μπουτ μπαρί χαρά». Βακερντάς ότι λέσκε αμαλά ισινέ «άγιοι» επειδή προσπαθίνενας τι κερέν πουμαρέ ζωγιάτε ο πάκι ντα δίκαιοι κανόνες ι Ιεχωβάσκε. Εκ γιαβέρ-ντα ψαλμωδός τθερέλας ι ίδια άποψη ι αμαλένγκε, ντα γραφιντάς: «Ισινόμ αμάλ σαρέ οντουλένγκο σο νταρένα τούταρ ντα οντουλένγκο σο κερένα το εντολές». (Ψαλμός 119:​63) Σαρ ντικχλάμ κο γιαβέρ μάθημας, μπορίνεσα τούι-ντα τι  αρακχές μπερεκέτι λατσσέ αμαλέν αντρέ οντουλέντε σο μανγκένα ι Ιεχωβάς ντα ντένα-λες καν. Ντα σίγουρα το αμαλά νανέ ανάγκη τι τθερέν ι ίδια ηλικία τούσαρ.

12. Σόσκε ισινέ ο Δαβίδ ντα ο Ιωνάθαν λατσσέ αμαλά;

¹² Ο Δαβίδ να τραμπίνελας αμαλέν σάντε οντουλέν σο τθερένας ι ίδια ηλικία λέσαρ. Ντέσα-τουτ γκοντί εκχέ λατσσέ αμαλές σο τθερέλας ο Δαβίδ; Ο ναβ λέσκο ισινέ Ιωνάθαν. Η φιλία λένγκι ισί εκ κατά πιο σουκάρ φιλίες σο βακερέλα η Γραφή. Τζανέας όμως ότι ο Ιωνάθαν ισινέ περίπου 30 μπρεσά πιο μπαρό κατά Δαβίδ; Σόσκε ισινέ αζόμ λατσσέ αμαλά; Πακιάνας κο Ντεβέλ, σεβάνενας ο εκ ι γιαβερές ντα ντικχένας ο λατσσέ ιδιότητες ο εκ ι γιαβερέσκε, σαρ ισινέ ο θάρρος σο σικαβένας κάνα τσσουβένας-λεν ι Ντεβλέσκε ντουσμανίντζαρ.​—1 Σαμουήλ 13:3· 14:​13· 17:​48-50· 18:1.

13. Σαρ μπορίνεσα τι αρακχές πιο μπουτ αμαλέν; Βάκερ εκ παράδειγμας.

¹³ Σαρ ο Δαβίδ ντα ο Ιωνάθαν αντικάς αμέν-ντα τθεράσα «μπουτ μπαρί χαρά» κάνα ισινάμ αμαλά οντουλέντζαρ σο μανγκένα ι Ιεχωβάς ντα πακιάνα λέστε. Η Κίρα, σο υπηρετίνελα ι Ντεβλές μπουτ μπρεσά, βακερέλα: «Κερντόμ αμαλέν σαρό κατά ντουνιάς, τζενέν σο μπαριλέ γιαβέρτουλους ντα τθερένα γιαβέρ κουλτούρα». Κάνα κερέσα-λες ανταβά, κα ντικχές σαρ η Γραφή ντα ο άγιος πνεύμας κερένα-αμέν εκ φαμιλί οντουλέντζαρ σο υπηρετίνενα ι Ντεβλές σαρό κο ντουνιάς.

14. (α) Σαρ κα τσσουβές λατσσέ στόχοι κι ζωή; (β) Σαρ ντικχένα μερικά τερνέ ο πνευματικοί στόχοι σο τθερένα;

¹⁴ Διαβάνεν Ψαλμός 16:8. Ο Δαβίδ πακιάλας ότι ο πιο σημαντικός πράγμας ισινέ τι υπηρετίνελ ι Ντεβλές. Άμα σκεφτίνεσα πάντα σο μανγκέλα ο Ιεχωβά τούκε κάνα τσσουβέσα στόχους, τι ζωή κα αβέλ πφερντί. Εκ πφραλ, ο Στίβεν, βακερέλα: «Κάνα προσπαθίναβα τι πετυχίναβ εκ στόχος ντα καταφερίναβα-λεν, ντικχάβα κατέ αβιλόμ πιο λατσσό ντα ανταβά πφερέλα μι ζωή». Εκ τερνό πφραλ κατά Γερμανία, σο ακανά υπηρετίνελα γιαβερέ τθεμέστε, βακερέλα: «Κάνα κα νακχέν ο μπρεσά ντα  κα νταβ-μαν γκοντί σο κερντόμ μι ζωγιάτε, να μανγκάβα τι νιωθίναβ ότι σαρέ κερντόμ-λεν σάντε μάνγκε». Μήπως νιωθίνεσα τούι-ντα αντικάς; Αν βα, τι χρησιμοποιήνες ο ικανότητες ντα ο ταλέντα σο τθερέσα για τι ντες δόξα ι Ντεβλές ντα τι βοηθίνες ι γιαβερέ τζενέν. (Γαλάτες 6:​10) Τι τσσουβές πνευματικούς στόχους ντα τι προσευχίντιβες κο Ιεχωβά τι βοηθίνελ-τουτ τι πετυχίνες-λεν. Τι αβές σίγουρος ότι κα απαντίνελ τι προσευχιέντε!​—1 Ιωάννη 3:​22· 5:​14, 15.

15. Καλά στόχοι κα μπορίνεας τι τσσουβές; (Ντικχ ο πλαίσιος « Στόχοι σο Μπορίνεσα τι Τσσουβές»)

¹⁵ Καλά στόχοι κα μπορίνεας τι τσσουβές; Τι απαντίνες τιρέ λαφίντζαρ κο συναθροίσεις, τι κερές σκαπανικός ή τι υπηρετίνες κο Μπέθελ. Κα μπορίνεας τι σικλιός εκ γιαβέρ τσσιπ για τι βακερές ο λατσσέ αμπέρια πιο μπουτ τζενέντε. Ο Μπάρακ, εκ τερνό σο ισί κι ολοχρόνια υπηρεσία, βακερέλα: «Κάθε ντιβές σο ιστιάβα, τζανάβα ότι κα νταβ σο τθεράβα ντα να τθεράβα κο Ιεχωβά, ντα τίποτα γιαβέρ ναστί κερέλα-τουτ τι νιωθίνες αντικάς».

16. Σαρ ντικχέλας ο Δαβίδ ο νόμοι ντα ο αρχές ι Ιεχωβάσκε, ντα σόσκε;

¹⁶ Διαβάνεν Ψαλμός 16:2, 4. Σαρ ντικχλάμ κο γιαβέρ μάθημας, κάνα ντάσα καν κο νόμοι ντα κο αρχές κι Ντεβλέσκε, αβάσα μπαγιά ελεύθεροι. Σικλιάσα τι μανγκάς ο λατσσιπέ ντα τι μισίνας ο γκεραλιπέ. (Αμώς 5:​15) Ο Δαβίδ βακερντάς ότι σαρέ ο λατσσέ πράγματα σο τθερέλας αβένας κατά Ιεχωβά, σόσκε Βοβ ισί λατσσό. (Ψαλμός 145:7) Ο Δαβίδ κερέλας μπαρέ προσπάθειες για τι μοιάζελ κο Ντεβέλ ντα τι μανγκέλ ο πράγματα σο μανγκέλα ο Ιεχωβά. Αλλά σικλιλό τι μισίνελ ο πράγματα σο βακερέλα ο Ντεβέλ ότι ισί γκεραλέ. Εκ ανταλέ πραγματένταρ ισί τι ντας λατρεία εκχέ γιαβερέστε ή σε κάτι γιαβέρ εκτός κατά Ιεχωβά. Ανταβά χαλαβέλα ι τζενέν ντα ντέλα γιαβερτθέ ι δόξα σο πρέπει τι ντιντιόλ κο Ιεχωβά.​—Ησαΐας 2:8, 9· Αποκάλυψη 4:11.

17, 18. (α) Σο βακερντάς ο Δαβίδ για το μπέτι αποτελέσματα οντουλένγκε σο πακιάνα ψεύτικε ντεβλέντε; (β) Σο κερέλα ι τζενέν αντιβές τι “ανέν πουμένγκε πιο μπουτ προβλήματα”;

¹⁷ Κο πουρανέ μπρεσά, κάνα ο τζενέ ντένας λατρεία ψεύτικε ντεβλέντε κερένας λουμνικανέ πράγματα. (Ωσηέ 4:​13, 14) Μπουτ τζενέ μανγκένας τι ντεν λατρεία ψεύτικε ντεβλέντε επειδή μπεϊντίνενας τι κερέν λουμνιπέ, αλλά κερέλας-λεν ανταβά ευτυχισμέ; Σίγουρα όχι! Ο Δαβίδ βακερντάς ότι οντουλά σο πακιάνα ψεύτικε ντεβλέντε «ανένα πουμένγκε πιο μπουτ προβλήματα». Οντουλά τζενέ θυσιάνενας ατζέ-ντα πουμαρέ τσσαβέν! (Ησαΐας 57:5) Ο Ιεχωβά μισίνελας ανταβά πράγμας. (Ιερεμίας 7:​31) Αν κα τζουβντιόας οντουλέ μπρεσέντε, κα αβέας μπουτ χαρούμενος άμα το ντατ ντα τι ντάι πακιάνας κο Ιεχωβά!

¹⁸ Αντιβές-ντα μπουτ ψεύτικες θρησκείες μουκχένα ι τζενέν τι κερέν λουμνιπέ, ατζέ-ντα τι τζαν μουρς μουρσέσαρ ντα τζουβέλ τζουβλιάσαρ. Ο τζενέ σο κερένα λουμνιπέ μπορεί τι νιωθίνεν ελεύθεροι, αλλά κι πραγματικότητα «ανένα πουμένγκε πιο μπουτ προβλήματα». (1 Κορινθίους 6:​18, 19) Τουμέν, ντικχένα-λες ανταβά; Οτθάρ, τερνάλεν, τι ασουνέν τουμαρέ Νταντές σο ισί κο ουρανός. Τι αβέν σίγουροι ότι ισί τουμαρέ λατσσιμάσκε τι ασουνέν ι Ντεβλές. Τι σκεφτίνεν προσεκτικά ο μπέτι αποτελέσματα ι λουμνιμάσκε. Κα ντικχέν ότι ανταλά μπέτι αποτελέσματα ισί μπουτ πιο μπαρέ κατά  ευχαρίστηση σο ατσσόλα για χάνικ. (Γαλάτες 6:8) Ο Τζόσουα βακερέλα: «Μπορίνασα τι χρησιμοποιήνας αμαρί ελευθερία σαρ μανγκάσα, αλλά κάνα χρησιμοποιήνασα-λα με λάθος τρόπος, να πφερντιόλα αμαρί ζωή».

19, 20. Καλά ευλογίες κα λεν ο τερνέ σο τθερένα πίστη κο Ιεχωβά ντα ντένα-λες καν;

¹⁹ Ο Ιησούς βακερντάς: «Άμα κα ατσσόν μι λαφίστε, ισινέν μπαγιά μο μαθητές, ντα κα σικλιόν ι αλήθεια ντα η αλήθεια κα ελευθερώνελ-τουμέν». (Ιωάννης 8:​31, 32) Χάρη κο Ιεχωβά ισινάμ ελεύθεροι κατά ψεύτικη θρησκεία, τζανάσα ι αλήθεια ντα να νταράσα μπουτέ πραγματένταρ σο νταρένα ο τζενέ. Κο μέλλον, μπεκλεντίνασα τι λας ι «ελευθερία σο τθερένα με δόξα ο τσσαβέ ι Ντεβλέσκε». (Ρωμαίους 8:​21) Μπορίνασα τι τθεράς ατζέ-ντα ακανά χάνικ κατά ελευθερία ανταγιά άμα ντάσα καν κο λάφια σο σικλιαρντάς ο Χριστός. Αντικάς, να “κα σικλιάς ι αλήθεια” σάντε κο λάφια, αλλά κα τζουβντιάς-ντα σαρ βακερέλα ι αλήθεια!

²⁰ Τερνάλεν, τι εκτιμίνεν ι ελευθερία σο ντέλα-τουμέν ο Ντεβέλ. Τι χρησιμοποιήνεν-λα γκοντιάσαρ. Κα βοηθίνελ-τουμέν τι λεν αποφάσεις σο κα ανέν τουμένγκε ο πιο λατσσό μέλλον. Εκ τερνό πφραλ βακερντάς: «Αν χρησιμοποιήνεσα τι ελευθερία γκοντιάσαρ τι τερνιμάστε, ανταβά κα βοηθίνελ-τουτ τι λες πιο μπαρέ αποφάσεις σοράν, σαρ ισί τι αρακχές εκ λατσσί μπουτί ή τι τραμπίνες αν κα παντρίνες ή αν κα ατσσός εργένη για χάνικ».

21. Σαρ μπορίνεσα τι τθερές «ι πραγματική ζωή»;

²¹ Ανταλέ πουρανέ ντουνιάστε, ατζέ-ντα η ζωή σο κι τζενένγκε γιακχά ισί λατσσί ατσσικιαρέλα χάνικ. Καέκ να τζανέλα σο κα αβέλ-πες ο γιαβέρ ντιβές. (Ιακώβου 4:​13, 14) Οτθάρ, ο πιο λατσσό ισί τι τραμπίνες πράγματα σο κα βοηθίνεν-τουτ τι τθερές «ι πραγματική ζωή», ι αιώνια ζωή κο σουκάρ νεβό ντουνιάς κι Ντεβλέσκο. (1 Τιμόθεο 6:​19) Ο Ιεχωβά να τσσουβέλα καεκχές τι υπηρετίνελ-λες ζορίσαρ. Ο κάθε εκ αμένταρ τραμπίνελα σο κα κερέλ. Οτθάρ, προσπάθινε κάθε ντιβές τι τζας πιο πασέ κο Ιεχωβά για τι κερές ι Ιεχωβάς τι «κληρονομιά», ντα τι εκτιμίνες σαρέ ο “λατσσέ πράγματα” σο ντέλα-τουτ. (Ψαλμός 103:5) Τι αβές σίγουρος ότι ο Ιεχωβά μπορίνελα τι ντελ-τουτ μπαρί χαρά ντα ευτυχία για πάντα!​—Ψαλμός 16:11.