1, 2. Tony ebiyarabiremu nibyoleka bita ngu nikisoboka kukora empindahinduka omu bwomeezi?

TONY akakura ataine ise. Akaba ali mwegi ha isomero, baitu tiyagonzaaga kusoma. Kandi akaba aliyo natekereza kwerekera kusoma atakatungire ebbaruha. Buli ha kumalirra kwa wiiki, Tony yayegenderaga kurora filimu rundi kumara obwire n’abanywani be. Tiyagonzaaga kurwana kandi tiyakozesaaga ebibazi ebitokooza obwongo, baitu akaba ataine kigendererwa omu bwomeezi. Akaba nagurukyagurukya mali Ruhanga obwaraaba aroho. Kiro kimu, Tony akatangaana Abakaiso ba Yahwe kandi yabagambira nk’oku akaba nagurukyagurukya Ruhanga obwaraaba aroho. Bakamuha burocuwa ibiri ez’okusoma, emu halizo niyo​—Was Life Created? hamu na The Origin of Life​—Five Questions Worth Asking.

² Abakaiso ba Yahwe obubagarukireyo kubungira Tony, entekereza ye ekaba ehindukiire kimu. Akaba asomere burocuwa ezibamuhaire n’empapura zahika ha kwegenya. Tony akabagambira ati: “Mali Ruhanga aroho.” Akatandika kwega Baibuli, kandi mporampora omulingo yaroramuga obwomeezi gukahinduka. Atakatandikire kwega Baibuli, Tony akaba nakora kubi ha isomero, baitu  hanyuma y’okutandika kwega Baibuli, akafooka omu ha beegi abarukukirayo amagezi ha isomero ery’akaba arumu! Mukuru w’isomero akahunirra muno. Akagambira Tony ati: “Okozere empinduka ez’amaani omu ntekereza yaawe, kandi oyeyongiire kukora kurungi omu kusoma kwawe. Kinu kibaireho habw’okweteraniza ha Bakaiso ba Yahwe?” Tony akagamba ngu nikyo kikaba kimukonyiire kandi yagambiraho mukuru w’isomero ebyakaba nayega n’Abakaiso ba Yahwe. Akasoma yamara kandi hati payoniya ow’akasumi koona kandi muheereza omu kitebe. Tony aine okusemererwa habwokuba hati aine Ise ow’engonzi, Yahwe!​—Zabuli 68:5.

3. Buhabuzi ki Yahwe obwarukuha ensingaanto?

³ Tony ebiyarabiremu nibitwijukya ngu Yahwe nafaaho muno ensingaanto. Nagonza obe musinguzi kandi otunge obwomeezi oburungi, egi niyo ensonga habwaki nakutererra kwijuka “Omuhangi wawe omu biro ebyobusigazi bwawe.” (Omugambizi 12:1) Ekintu kinu tikyanguhire, baitu nikisoboka. Yahwe naija kukukonyera kuba n’obwomeezi oburungi omu buto bwawe n’omu myaka yaawe ey’obukuru. Kutukonyera kwetegereza ekintu kinu kurungi, nitwija kubazaaho ekyakonyiire Abaisareri kutwara Ensi ey’Ekaba Eraganiziibwe hamu n’ekyakonyiire Daudi kusingura omusaija ow’amaani arukwetwa Goliasi.

4, 5. Isomo ki erikuru eruturukwegera ha mulingo Abaisareri basingwiremu ensi ya Kanaani hamu n’omulingo Daudi yasingwiremu Goliasi? (Rora ekisisani ekiri ha rupapura 21.)

⁴ Abaisareri obubaali bali haihi kutaaha omu Nsi ey’Ekaba Eraganiziibwe, Yahwe akabaha buragirizi ki? Akabagambira kwetendeka nukwo bafooke baserikale b’amaani kandi abakugu? Nangwa! (Ekyebiragiro 28:1, 2) Akabagambira kumworobera n’okumwesiga. (Yosuha 1:7-9) Amagezi ganu nigasobora kuba gazookere nk’agatali marungi ha bantu, baitu gakaba marungi hali Abaisareri. Emirundi nyingi, Yahwe akakonyera Abaisareri kusingura Abakanaani. (Yosuha 24:11-13) Nikyetagisa kuba n’okwikiriza kworobera Ruhanga, baitu obwire bwona okwikiriza oku kurugamu obusinguzi. Kinu nukwo kyabaga omu busumi obwaira, kandi n’omu kasumi kanu nukwo kiri.

⁵ Goliasi akaba murwani w’amaani. Akaba araihire kwinga nka mita isatu (fuuti 9.5), kandi akaba aine eby’okurwanisa by’amaani. (1 Samuiri 17:4-7) Baitu uwe Daudi, akaba aine omwesuuso hamu n’okwikiriza kwe omuli Ruhanga. Omuntu ataine kwikiriza akaba nasobora kutekereza ngu Daudi akaba ataine magezi kugenda kurwanisa Goliasi! Baitu amananu gali ngu Goliasi nuwe yali ataine magezi.​—1 Samuiri 17:48-51.

6. Kiki ekiturukwija kubazaaaho omu kicweka kinu?

⁶ Omu kicweka ekihoire, tukabazaho ebintu bbina ebisobora kutuletera okusemererwa n’obusinguzi omu bwomeezi. Tukeega ngu tusemeriire kufaaho obwetaago bwaitu obw’eby’omwoyo, kukomamu abanywani abarungi abarukugonza Ruhanga, kweteraho ebigendererwa ebirungi, kandi n’okutwara obugabe Ruhanga obw’atuhaire nk’ekintu eky’omuhendo. Omu kicweka kinu, nitwija kurora emiringo endi nk’oku turagasirwa obuturaikara nitukora ebintu binu. Kukora ekintu kinu, leka tubazeeho emisingi enyakuli omu Zabuli 16.

7. (a) Omuntu ow’eby’omwoyo nuwe oha? (b) “Omugabo” gwa Daudi gukaba niguha kandi eki kikamuletera kwehurra ata?

⁷ Omuntu ow’eby’omwoyo aikiririza omuli Ruhanga kandi alengaho kurora ebintu nk’oku Ruhanga abirora. Aleka Yahwe kumwebembera  kandi aba acweriiremu kimu kumworobera. (1 Abakolinso 2:12, 13) Daudi ali kyokurorraho kirungi eky’abantu ab’eby’omwoyo. Akazina ati: “Mukama nugwo mugabo ogwobugwetwa bwange.” (Zabuli 16:5) Daudi akooleka ngu nasiima ha “bwomugabo” gwe, ekirukumanyisa enkoragana ye na Ruhanga, kandi akamwesiga. (Zabuli 16:1) Ekyarugiremu, akagamba ati: “Omutima gwange nikyo guhiririirwe.” Kuba n’obunywani na Yahwe nikyo kyakiraga kuletera Daudi okusemererewa!​—Soma Zabuli 16:9, 11.

8. Ebimu ha bintu ebisobora kukuletera kuba n’okumarwa omu bwomeezi nibyo biha?

⁸ Abantu abata omutima ha sente rundi eby’okwesemeza tibasobora kuba n’okusemererwa nk’okwa Daudi. (1 Timoseo 6:9, 10) Ow’oruganda kuruga omu ihanga lya Canada akagamba ati: “Okumarwa kwonyini tikuruga omu bintu ebitutungire, baitu kuruga omu bintu ebituha Yahwe Ruhanga anyakuli Omugabi w’ebisembo byona ebirungi.” (Yakobo 1:17) Obworaaba n’okwikiriza omuli Yahwe kandi okamuheereza, noija kuba n’obwomeezi oburungi kandi oburumu okumarwa. Nahabweki, kiki eky’osobora kukora kurora wagumya okwikiriza kwawe? Osemeriire kumara obwire n’osoma Ekigambo kya Ruhanga, kurora ebintu ebirungi ebiyahangire, hamu n’okwecumitirizaho emiringo ye, otwaliremu n’engonzi ez’akwiniire.​—Abarumi 1:20; 5:8.

9. Nosobora ota kwikiriza Ekigambo kya Ruhanga kukuterekereza?

⁹ Obwire obumu Ruhanga atwoleka okugonza kwe kurabira omu kutuhabura obuturukuba nitwetaaga obuhabuzi, nk’oku taata ow’engonzi akora. Daudi akatwara obuhabuzi bunu kuba bw’omuhendo obuyagambire ati: “Ndayebazaaga [Yahwe] ayancweriire amagezi: ego ebyomunda yange binyegesa omu busumi obwekiro.” (Zabuli 16:7) Daudi akecumitiriza ha ntekereza ya Ruhanga kandi yagifoora ntekereza ye. Akaikiriza entekereza ya Ruhanga kumuterekereza, ekirukumanyisa ngu, akaikiriza entekereza ya Ruhanga kumuhindura nukwo ayeyongere kuba muntu omurungi. Naiwe kakuba okora ekintu nikyo kimu, okugonza okwoiniire Ruhanga hamu n’ekihika eky’okumusemeza nibiija kweyongera, kandi noija kuba Mukristaayo ow’akuzire omu by’omwoyo. Munyaanya itwe arukwetwa Christin nagamba ngu obwakora okuseruliza kandi akecumitirizaho eby’asomere, kimusisanira ngu Yahwe akahandiikisa ebintu binu habwe!

10. Kusigikirra ha bigambo ebiri omu Isaya 26:3, kuba muntu w’eby’omwoyo nikiija kukukonyera kita?

¹⁰ Obw’oraaba oli muntu w’eby’omwoyo, noija kurora ensi hamu n’ebiro byayo eby’omu maiso nk’oku Ruhanga arukubirora. Yahwe akuha okumanya n’okwetegereza kunu. Habwaki? Habwokuba nagonza omanye ebintu ebirukukira obukuru omu bwomeezi, okole encwamu enungi, kandi olindirre akasumi ak’omu maiso otarukutiina! (Soma Isaya 26:3.) Ow’oruganda arukwetwa Joshua, arukwikara omu Amerika, nagamba ngu kakuba oikara haihi na Yahwe noija kumanya ebintu ebikuru n’ebitali bikuru.

11. Daudi akakoma ata abanywani be?

¹¹ Soma Zabuli 16:3. Daudi akaba amanyire omulingo gw’okutungamu abanywani abarungi. Akanywana abantu abakaba nibagonza Yahwe, kandi kinu kikamuletera ‘kusemererwa muno.’ Akagamba ngu abanywani be baali “abarukwera” habwokuba baalengahoga kuhondera endengo za Yahwe ezirukukwata ha ngeso. Omuhandiiki ondi owa Zabuli nauwe akehurra omu omulingo nugwo gumu obukyahikaga ha kukomamu abanywani kandi akagamba ati: “Nyowe nterana hamu na bona  abanyakukutina, nabo abakwata ebyoyegesa.” (Zabuli 119:63) Nk’oku twarozere omu kicweka ekihoire, naiwe n’osobora kutunga abanywani abarungi kuruga omu bantu abarukugonza Yahwe kandi bakamworobera. Ky’amananu ngu tikirukwetagisa abanywani baawe kuba b’emyaka nk’eyaawe bonka.

12. Habwaki Daudi na Yonasani bakaba bali banywani nfe nanfe?

¹² Daudi atatunge abanywani kuruga omu bantu abaarukwingana nabo emyaka bonka. Haroho omu ha banywani ba Daudi nfe nanfe aw’omanyire? Nosobora kutekerezaaho Yonasani. Obunywani hagati ya Daudi na Yonasani buli bumu ha bunywani oburungi obutusobora kusomaho omu Baibuli. Baitu okimanyire ngu Yonasani akaba nakiza Daudi emyaka erukuhika nka 30? Hati habwaki baali banywani muno? Obunywani bwabo bukasigikirra ha kwikiriza kwabo omuli Yahwe. Buli omu yatekamuga mutaahi we ekitiinsa kandi baroranganamuga ebirungi, nk’ekyokurorraho, obumanzi buli omu yayolekere obubabaga nibarwanisa abanyanzigwa ba Ruhanga.​—1 Samuiri 13:3; 14:13; 17:48-50; 18:1.

13. Nosobora ota kweyongera kutunga abanywani baingi? Ha ekyokurorraho.

¹³ Nka Daudi na Yonasani, nitusobora kuba n’okusemererwa kwingi kakuba tunywana abantu abarukugonza Yahwe kandi abarukumwikiririzaamu. Kiera, anyakumazire emyaka naheereza Ruhanga, nagamba ati, “Ntungire abanywani kuruga omu biikaro bingi eby’ensi, abarukuruga omu nyikara n’omu buhangwa oburukwahukana.” Naiwe kakuba okora ekintu nikyo kimu, noija kwerorra omulingo Baibuli hamu n’omwoyo ogurukwera bitufoora eka emu ey’abantu abarukuramya Ruhanga omu nsi yoona.

14. (a) Nosobora ota kweteraho ebigendererwa ebirungi? (b) Abato abamu nibagambaho ki ebigendererwa ebibeteriireho?

¹⁴ Soma Zabuli 16:8. Kuheereza Yahwe kikaba kintu ekirukukirayo obukuru hali Daudi. Kakuba ohondera ekyokurorraho kya Daudi obworukuba n’oyeteraho ebigendererwa omu bwomeezi bwawe kandi okaikara n’otekereza hali Yahwe ekyarukugonza okole, obwomeezi bwawe nibwija kuba burungi. Ow’oruganda  arukwetwa Steven nagamba ati: “Kuba n’ekigendererwa, nkakihikiriza, kandi nkarora omulingo nkurakurainemu kindetera kuhurra nyine okumarwa.” Ow’oruganda omuto kuruga omu ihanga lya Bugirimaani arukuheerereza omu nsi endi nagamba ati: “Obundakura, tindukugonza kurora emyaka yange ey’obuto kandi nkasanga ngu nkagikozesa kwegasira nyenka.” Naiwe oine enyehurra nk’egi? Nahabweki kozesa amaani gaawe n’obusobozi bwawe kuhaisa Yahwe ekitiinisa kandi okonyere abandi. (Abagaratiya 6:10) Wetereho ebigendererwa omu kuheereza Yahwe, kandi omusabe akukonyere kubihikiriza. Okigumye ngu naija kugarukamu esaara yaawe!​—1 Yohana 3:22; 5:14, 15.

15. Nosobora kweteraho bigendererwa ki? (Rora akasanduuko “ Ebimu Ha Bigendererwa eby’Osobora Kweteraho.”)

¹⁵ Bigendererwa ki ebimu eby’osobora kweteraho? Habwaki otalengaho kuha eby’okugarukamu omu nsorrokano n’okozesa ebigambo byawe ha bwawe? Rundi habwaki oteteraho ekigendererwa ky’okuheereza nka payoniya rundi ha Beseeri? Nosobora n’okwega orulimi orundi nukwo kikukonyere kutebeza abantu baingi amakuru amarungi. Ow’oruganda omuto arukwetwa Barak anyakuli omu buheereza obw’akasumi koona nagamba ati: “Kwimuka buli kiro nimanya ngu ningenda kukozesa amaani gange kuheereza Yahwe kindetera kusemererwa okuntasobora kwiha ahantu handi hoona.”

16. Daudi akatwara ata ebiragiro n’emisingi ya Yahwe, kandi habwaki?

¹⁶ Soma Zabuli 16:2, 4. Nk’oku twarozere omu kicweka ekihoire, obutuhondera ebiragiro bya Yahwe n’emisingi ye, tutunga obugabe bwonyini. Twega kugonza ebirungi n’okunoba ebibi. (Amosi 5:15) Daudi akagamba ngu Yahwe akaba ali “Ndugirro y’oburungi, NW.” Yahwe murungi omu buli kimu ekyakora, kandi buli kirungi kyona ekitwine kirunga hali uwe. Daudi akakora kyona ekirukusoboka kwegera hali Ruhanga n’okugonza ebintu Yahwe agonza. Baitu Daudi akega n’okunoba ebintu Yahwe arukugamba ngu bibi. Ekimu halibyo nikyo kuramya ebisisani, ekirukumanyisa kuramya omuntu rundi ekintu omu kiikaro ky’okuramya Yahwe. Kuramya ebisisani kumaramu abantu ekitiinisa kandi kuletera ekitiinisa ekyakubaire nikiheebwa Yahwe kugenda hali omuntu rundi ekintu ekirukuramibwa.​—Isaya 2:8, 9; Okusuku’rwa 4:11.

17, 18. (a) Daudi akabazaaho ata ebizibu ebiruga omu kuramya okw’ebisuba? (b) Kiki ekiretera abantu omu kasumi kanu ‘kukanyisa obujune bwabo’?

¹⁷ Omu busumi obwa kara, obusiihani bukaba kicweka ky’okuramya okw’ebisuba. (Hoseya 4:13, 14) Abantu baingi bayegondezaaga omu kuramya okw’ebisuba habw’okuba kwali kwijwiremu ebikorwa eby’obusiihani, baitu eki kyabaleteraga okusemererwa? Nangwa! Daudi akagamba ngu abo abaramya ba ruhanga ab’ebisuba “obujune bwabu bulikanya.” Abantu abo baahongaga n’abaana babo hali baruhanga ab’ebisuba! (Isaya 57:5) Yahwe akanoba ebikorwa byabo eby’obwisi. (Yeremiya 7:31) Kakuba wabaireho omu biro ebi, busaho kugurukyagurukya wakusemeriirwe habw’abazaire baawe kuramya Yahwe.

¹⁸ N’omu kasumi kanu, amadiini maingi ag’ebisuba gasagika obusihani, otwaliremu n’obukuhya. Abantu abakora obusihani nibasobora kwehurra nk’abaine obugabe, baitu amananu gali ngu, baba ‘nibakanyisa obujune bwabo’ (1 Abakolinso 6:18, 19) Naiwe oyeroliire ebintu binu? Nahabweki abato, muhuliirize Isiinywe ow’omu iguru. Mukyoleke ngu kirungi kworobera Ruhanga. Mutekerezeeho muno ha bizibu ebiruga omu busiihani. Nimwija kurora  ngu okwesemeza kw’akacu kake kandi kurugamu ebizibu bingi. (Abagaratiya 6:8) Joshua, outasangirwe tubalizeeho nagamba ati: “Nitusobora kukozesa obugabe bwaitu nk’oku turukwenda, baitu kubukozesa kubi tikirugamu ebirungi.”

19, 20. Ensingaanto abaine okwikiriza kandi abarukworobera Yahwe nibaija kutunga migisa ki?

¹⁹ Yesu akagamba ati: “Obumuraba nimuikara omu kigambo kyange, nukwo muli begeswa bange mali; kandi mulimanya amananu, namananu galibafora bobugabe.” (Yohana 8:31, 32) Nitusiima Yahwe habw’okutwiha omu diini ez’ebisuba, obutamanya, hamu n’emigenzo etahikire. Omu busumi obw’omu maiso, nitulindirra kutunga ‘obugabe bw’ekikitiinisa eky’abaana ba Ruhanga.’ (Abarumi 8:21) Nosobora kwegondeza omu bugabe obu n’omu kasumi kanu kakuba ohondera enyesa za Kristo. Obu nubwo ‘oramanya amananu’ hatali kugeega kwonka baitu n’okugateka omu nkora!

²⁰ Ensingaato, obugabe Ruhanga obw’abahaire mubutwale kuba bw’omuhendo. Mubukozese omu mulingo ogw’amagezi. Kinu nikiija kubakonyera kukora encwamu enungi hati ezirabakonyera kuba n’obusumi bw’omu maiso oburungi. Ow’oruganda omu omuto akagamba ati: “Kukozesa kurungi obugabe bwawe nk’ensingaanto, mali nikikukonyera omu busumi obw’omu maiso obukiryetaagisa kukora encwamu ez’amaani, nk’okuserra omulimo ogusemeriire, rundi obworaaba n’ocwamu kutaaha obuswere rundi kulindaho kumara akasumi.”

21. Nosobora ota kutunga ‘obwomeezi mali’?

²¹ Omu businge bunu obuli haihi kuhwaho, obwomeezi abantu abandi obubeeta oburungi buhwaho bwangu. Busaho muntu ow’amanyire ekiraabaho nyenkya. (Yakobo 4:13, 14) Nahabweki ekintu eky’amagezi eky’osobora kukora nukwo kukora encwamu ezirakukonyera kutunga ‘obwomeezi mali’​—obu nubwo obwomeezi obutahwaho omu nsi empyaka. (1 Timoseo 6:19) Yahwe tahambiriza omuntu weena kumuheereza. Kiri haliitwe kucwamu kiki ekiturukwija kukora. Nahabweki foora Yahwe “mugabo” gwawe, buli kiro olengeho kumwirra haihi, kandi oyoleke okusiima habw’ebirungi byona ebyakuha. (Zabuli 103:5) Kigumye ngu Yahwe nasobora kukuha okusemererwa kwingi okw’ebiro n’ebiro!​—Zabuli 16:11.