1, 2. Bwidi kifwani ki Tony kimmonisina ti mutu kalenda balula luzingu lwandi?

TONY bo kayonzuka, kasa ba ko tata. Nandi wuba vanga ndongukulu yifwana mu kikola ayi kabasa vwanga ko beni nkinza mambu ma kikola. Nandi wuba yindula kuzinga mukhambu manisa kikola. Kutsuka kadika sabala, Tony wuba kwendanga ku bammonanga zifilmi ayi kuvyokisa thangu na bakundi bandi. Nandi kasa ba ko buphunya ayi kabasa volanga ko zitsunga zingolo, vayi nandi kasa ba ko makani mu luzingu. Nandi mvandi wuba divuda boti Nzambi widi. Kiba kilumbu, Tony wudengana Mbangi wadi zi Yave ayi wuba kamba divuda kaba mu matedi Nzambi. Bawu bamvana mwa zibuku ziwadi mwingi katanga: —A Vida—Teve um Criador? (lc) ayi A origem da vida—Cinco Perguntas que Merecem Resposta (lf).

² Khumbu yinkaka bawu bayenda ku nzo Tony, phila kaba yindudilanga yibaluka beni. Nandi wutanga beni mwa zibuku ziwadi ayi ziawu ziyiza ba beni zifutama. Tony wukamba Zimbangi beni ziwadi zi Yave: “Bukyedika, Nzambi widi.” Nandi wutona kulonguka Kibibila, ayi buvyokila thangu, phila kaba  tadilanga luzingu yibaluka. Ava katona longuka Kibibila, Tony kasa ba ko nlonguki wumboti mu kikola, vayi nandi wuyiza ba wumweka mu minlonguki milutidi mu kikola kyandi. Ayi mfumu yi kikola mvandi wuyituka beni. Nandi wukamba Tony: “Mambu mawombo mabalukidi mu ngyewu, mavanga maku ayi zinota zyaku. Mawu mamonikini bo wutonini kudyata na Zimbangi zi Yave?” Tony wunkamba ti ngete, ayi mvandi wulonga mambu kalonguka kwidi mfumu yi kikola. Nandi wumanisa kikola ayi bubu widi ntwami ntwala ayi nsadisi wu bakulutu. Tony widi beni mayangi bila bubu nandi widi Tata yi luzolo!—Minkunga 68:5.

3. Dilongi mbi Yave kamvana matoko?

³ Kifwani ki Tony kitutebula moyo ti Yave wumvwanga beni nkinza matoko. Nandi kantomba ngye wuba luzingu lumboti ayi lufwana, diawu ka kukambila wutebukila ‘Mvangi’aku moyo mu bilumbu bi butoko bwaku.’ (Mpovi 12:1) Disi ko dyambu dilwelu di kuvanga, vayi tulenda nunga. Mu lusalusu lu Nzambi, ngye wulenda baka luzingu lumboti bo widi ditoko ayi kuntwala bo wala ba nkulutu. Mwingi kutusadisa tuluta visa mawu, tunkwiza tubila mbi bisadisa basi Isaeli banunga kukota ku Ntoto Yave Kakanikisa ayi mbi bivana Davidi mangolo mwingi kununga Ngoliati.

4, 5. Dilongi mbi dinkinza tulenda longuka mu phila basi Isaeli banungina basi Kanani ayi phila Davidi kanungina Ngoliati? (Tala zifikula zidi va thononu.)

⁴ Mu thangu basi Isaeli baba nduka mwingi kukota ku Ntoto Yave Kakanikisa, zithwadusulu mbi Yave kaba vana? Bukyedika kwandi ti Yave wuba kamba baluta ba masodi mamboti voti bakubama mwingi kunwana mvita? Ndamba! (Deutelonomi 28:1, 2) Nandi wuba kamba bantumamana ayi bamfyatila. (Yosua 1:7-9) Ḿba dilongi adidi disi ko beni tsundu mu phila batu bantadilanga mambu, vayi diawu diluta ba dimboti kwidi basi Isaeli. Khumbu ziwombo, Yave wusadisa dikabu dyandi kununga basi Kanani. (Yosua 24:11-13) Kiminu kintombolu mwingi kutumukina Nzambi, ayi kiawu kintwadisanga ndandu. Mawu maba makyedika mu thangu yikhulu, ayi makhidi makyedika bubu mvandi.

⁵ Ngoliati wuba disodi dingolo di mvita. Nandi wuba wukula nduka zimetelu zitatu, ayi wuba natanga mata ma tsisi. (1 Samueli 17:4-7) Vayi Davidi, fizika to kanata ayi wuba lufyatu mu Nzambi. Mutu wukhambulu kiminu, kalenda tuba ti Davidi wuba kivungisi bo katomba nwana na Ngoliati! Vayi Ngoliati nandi wuba kivungisi.—1 Samueli 17:48-51.

6. Mbi tunkwiza longuka mu dilongi adidi?

⁶ Mu dilongi dibedi, tutubila byuma binna bilenda tuvanga tuluta ba mayangi ayi mamboti mu luzingu. Tulongukidi ti tufweti kyeba zitsatu zitu zi kiphevi, kuvanga bakundi bamboti banzolanga Nzambi, kubaka makani mankinza ayi kukinzika kiphwanza Nzambi katuvana. Mu dilongi adidi, tunkwiza tubila ziphila zinkaka tulenda bakila ndandu mu mambu beni. Mwingi kuzaba mawu, ndoko tutubila minswa midi mu buku yi Minkunga 16.

7. (a) Bwidi wulenda tubila mutu widi mayindu ma kiphevi? (b) Nani wuba kyuka ki Davidi ayi bwidi kinsadisila?

⁷ Mutu widi mayindu ma kiphevi widi kiminu mu Nzambi ayi wumvanganga mangolo mwingi kutadila mambu mu phila Nzambi kantadilanga. Nandi wumbikanga Yave katwadisa luzingu lwandi ayi widi makani ma kuntumamana.  (1 Kolinto 2:12, 13) Davidi widi kifwani kimboti ki mutu widi mayindu ma kiphevi. Nandi wuyimbila: ‘Yave ngyewu widi kyuka kyama.’ (Minkunga 16:5) Davidi wuba tondanga beni mu ‘kyuka’ kyandi, voti kikundi kyandi kifikama na Nzambi ayi wutomba kiswamunu kwidi Nandi. (Minkunga 16:1) Diawu katubila: ‘Ludimi luama lueti yangalala.’ Kuba kikundi kifikama ayi Yave, kiawu kyuma kiluta twadisa mayangi kwidi Davidi!—Tanga Minkunga 16:9, 11.

8. Byuma mbi bilenda kutwadisa mayangi makyedika mu luzingu?

⁸ Batu bansikikanga mayindu mawu mu zimbongo voti mu manyenze ma nza, balendi baka ko mayangi Davidi kabaka. (1 Timoteo 6:9, 10) Khomba mweka yi dibakala ku Canadá wutuba: “Mayangi makyedika mayizilanga ko mu mambu tumbaka mu luzingu, vayi mu byuma tumvananga kwidi mutu wu Tukabilanga byuma byoso bimboti, Yave Nzambi.” (Yakobi 1:17) Ngye kuba kiminu mu Yave ayi kunsadila, wala ba luzingu lwidi tsundu ayi lufwana. Diawu, mbi wulenda vanga mwingi wubwela kindisa kiminu kyaku? Wufweti vyokisa thangu na Yave mu kutanganga Dyambu dyandi, kutala byuma bimboti kavanga, kuyindula zikhadulu zyandi ayi luzolo kadi mu ngyewu.—Loma 1:20; 5:8.

9. Bwidi wulenda bikila Dyambu di Nzambi dibalula luzingu lwaku?

⁹ Khumbu zinkaka Nzambi wummonisanga luzolo kadi mu befu mu kutusemba mu thangu tuntomba tsembolo, dedi bumvangilanga tata yi luzolo. Davidi wuba kinzikanga tsembolo ayi wutuba: ‘Yela zitisa Yave, wu kuphananga malongi. Kheti va khati bwilu, mayindu mami ma khati ntima ma kutsembanga.’ (Minkunga 16:7) Davidi wubotula thangu mwingi kuyindula bu kuzingila mayindu ma Nzambi ayi kuvanga mawu buka nzingulu’andi. Nandi wubika mayindu ma Nzambi mambalula mwingi kaba mutu wulutidi. Ngye kulandakana kifwani ki Davidi, luzolo lwaku mu Nzambi ayi luzolo widi lu kunkwangidika lwala konzuka ayi ngyewu wala ba kisadi kiyonzuka mu kiphevi. Khomba mweka yinkyeto widi dizina Christin wutuba ti bo kamfyonguninanga ayi kanyindulanga bu kuzingila mambu kantanga, nandi wummonanga ti Yave wusonikina mambu beni kwidi nandi!

10. Dedi bo tunlongukila mu Yesaya 26:3, bwidi kuba mayindu ma kiphevi kulenda kusadisila?

¹⁰ Ngye kuba mutu widi mayindu ma kiphevi, wala tadila nza ayi mambu mala kwizila nza mu phila Nzambi kantadilanga. Yave wu kuvana nzayilu ayiyi ayi phisulu. Kibila mbi? Nandi kantomba wuzaba mambu malutidi nkinza mu luzingu, wubaka makani mamboti ayi wutala luzingu kuntwala mu khambu boma. (Tanga Yesaya 26:3.) Khomba mweka yi dibakala ku Estados Unidos widi dizina Joshua, wutuba ti ngye kufikama Yave, wala mona mbi bilutidi nkinza ayi mbi bikhambulu beni nkinza.

11. Bwidi Davidi kasodila bakundi bandi?

¹¹ Tanga Minkunga 16:3. Davidi wuzaba bwidi bu kubakila bakundi bamboti. Nandi wusola buka bakundi batu baba luzolo mu Yave ayi mawu mamvana ‘mayangi mawombo.’ Nandi wutedila bakundi bandi buka “banlongo,” bila bawu baba vanganga mangolo mwingi kulandakana zithumbu zisonga zi Yave. Nsoniki wunkaka wu minkunga mvandi wumwena buawu mu matedi kusola bakundi ayi wusonika: “[Yidi] nkundi wu batu boso bobo beti kukinzika ayi wu bobo  beti landakana minsiku miaku.” (Minkunga 119:63) Dedi bo tulongukidi mu dilongi dibedi, ngye mvaku wulenda baka bakundi bawombo badi va khati batu banzolanga ayi bantumamananga Yave. Ayi wulenda vanga kikundi kheti na batu bakhambulu yaku phunga yimweka.

12. Kibila mbi Davidi ayi Yonatani babela bakundi bamboti?

¹² Davidi kasa sola ko to batu baba yandi phunga yimweka mwingi baba bakundi bandi. Wulenda tuba dizina di wumweka mu bakundi ba Davidi? Ḿba wulenda yindula Yonatani. Kikundi ki Davidi ayi Yonatani kidi kimweka kilutidi kitoko mu baboso tulenda tanga mu Kibibila. Vayi ngye zebi ti Yonatani wuba nkulutu wu Davidi kuvyoka 30 di mimvu? Vayi kibila mbi babela bakundi bamboti? Kiminu kiawu kitwadisa kikundi kiawu. Bawu mvawu baba kuyikinzikanga, kumonisa luvalu mu zikhadulu zimboti baba, dedi kibakala kadika mutu mu bawu kamonisa mu thangu banwana na zimbeni zi Nzambi.—1 Samueli 13:3; 14:13; 17:48-50; 18:1.

13. Bwidi wulenda bwela vangila bakundi? Vana kifwani.

¹³ Dedi Davidi ayi Yonatani, tulenda baka ‘mayangi mawombo’ befu ba kikundi na batu banzolanga Yave ayi badi kiminu mu nandi. Kiera, wusadila Yave mu mimvu miwombo wutuba: “Yimvanganga kikundi na batu mu nza yimvimba, batu badi mbakulu ayi bikhulu bivyakana.” Ngye kuvanga mawu, wela mona bwidi Kibibila ayi phevi yinlongo yi tusadisilanga tuba dikanda dimweka di kithwadi di batu bansadilanga Yave.

14. (a) Bwidi wulenda sikikila makani mankinza mu luzingu? (b) Mambu mbi matoko mankaka batuba mu matedi makani mawu?

¹⁴ Tanga Minkunga 16:8. Kusadila Yave kiawu kyuma kiluta ba nkinza kwidi Davidi. Ngye kulandakana kifwani ki Davidi bo wumbaka makani ayi kuyindulanga mbi Yave kantomba mu ngyewu, luzingu lwaku lwala ba lumboti. Khomba mweka yi dibakala widi dizina Steven wutuba: “Kuvanga mangolo mu makani yidi, kudukisa mawu ayi kumona mambu yinunga kubalula, ku kuthwadisanga  beni mayangi.” Ditoko dimweka ku Alemanha widi mu kubwela myoko tsi yinkaka wutuba: “Bo yela ba nkulutu, yisintomba ko kutala mambu yima vanga mu luzingu lwami ayi kumona ti mamoso minu to yibakila mawu ndandu.” Buawu ngye mvaku wunyindudilanga? Boti buawu, buna sadila mambu zebi kuvanga mwingi kutwadisa nzitusu kwidi Nzambi ayi kusadisa batu bankaka. (Ngalatia 6:10) Sikika makani mu kisalu ki Yave ayi dinda Yave ka kusadisa kudukisa makani beni. Wulenda ba lufyatu ti nandi wela tambudila minsambu myaku!—1 Yoane 3:22; 5:14, 15.

15. Makani mbi ngye veka wulenda baka? (Tala quadro yintuba “Makani Wulenda Tomba Kudukisa.”)

¹⁵ Makani mbi wulenda baka? Wulenda vanga mangolo ma kuvana mimvutu mu bikuma byaku mu zikhutukunu? Voti, wulenda baka makani ma kuba ntwami ntwala voti kusadila ku Beteli? Mvandi wulenda kwedika kulonguka mbembu yinkaka mwingi wusadila yawu mu kusamuna zitsangu zimona kwidi batu bankaka. Ditoko dimweka widi dizina Barak, widi mu kisalu ki thangu ka thangu wutuba: “Kuzinga kadika kilumbu mu kuzaba ti yidi mu kuvana mangolo mami moso kwidi Yave, madi mabanza tulendi ko kubaka mu kuvanga kyoso kisalu kinkaka.”

16. Bwidi Davidi kaba mwenanga minsiku ayi minswa mi Yave ayi kibila mbi?

¹⁶ Tanga Minkunga 16:2, 4. Dedi bo tulongukidi mu dilongi dibedi, befu zingila mu minsiku ayi minswa mi Nzambi, tumbakanga mayangi makyedika. Tunlongukanga kuzola mambu mamboti ayi kulenda mambu mambi. (Amosi 5:15) Davidi wutuba ti Yave wuba “tho yi mamboti” kwidi nandi. Kuba mamboti kunsundula mvandi kuba mayindu masama voti kuvangila bankaka mamboti. Yave widi wumboti mu mambu moso kamvanganga, ayi byuma byoso bimboti twidi bimfuminanga kwidi Yave. Davidi wuvanga beni mangolo mwingi kulandakana kifwani ki Nzambi ayi kuzola byuma Yave kanzolanga. Vayi Davidi mvandi wulonguka kulenda mambu Nzambi kantuba ti madi mambi. Kimweka mu byuma beni kidi: kusambila bitumba, kunsundula kubwongimina woso mutu voti kyoso kyuma kubika kwandi Yave. Kubwongimina bitumba kumbotulanga nzitusu Yave kafweni tambula ayi kuvana yawu kwidi mutu voti kyoso kyuma.—Yesaya 2:8, 9; Nzaikusu 4:11.

17, 18. (a) Mbi Davidi katuba matedi phila yinsundukilanga mbwongimini yi luvunu? (b) Mbi bimvanganga batu bubu ‘kubwela kyadi kiawu’?

¹⁷ Mu thangu yikhulu, batu baba sambilanga zinzambi zi luvunu, baba sadilanga kitsuza mu mbwongimini’awu. (Hosea 4:13, 14) Bawu baba sambilanga zinzambi zi luvunu bila baba zolanga kuba batu ba kitsuza. Vayi bukyedika kwandi ti phila mbwongimini beni yi batwadisa mayangi? Ndambal! Davidi wutuba ti batu baba sambilanga zinzambi zi luvunu, baba ‘bwela kyadi kiawu.’ Batu abobo baba vananga bana bawu buka minkhayilu kwidi zinzambi zi luvunu! (Yesaya 57:5) Yave wuba monanga khenene kifu kiawu ki kuvika bana ku mbazu. (Yelemia 7:31) Bukyedika, boti ngye wuba zinganga mu thangu beni, khanu wuyangalala kuzaba ti matata maku bambwongiminanga Yave!

¹⁸ Bubu, binganga biwombo binkikininanga kitsuza, mvandi kubundana nyitu dibakala na dibakala ayi nkyeto na nkyeto. Kuba luzingu lu kitsuza kulenda vanga batu kumona buka ti badi kiphwanza, vayi bawu badi mu ‘kubwela kyadi kiawu.’ (1 Kolinto 6:18, 19)  Wumvisa mambu amama? Diawu matoko, yuwanu Tat’inu yi diyilu. Monisa kwidi ngye veka ti didi dyambu dimboti kutumukina Nzambi. Yindula buboti ziphasi zinkwizanga mu kibila ki kitsuza. Ngye wala mona ti mambu wunkwiza monikina, malutidi phasi na mayangi wumbaka mu thangu yilwelu mu kibila ki kitsuza. (Ngalatia 6:8) Joshua tube tubila va thononu, wubwe tuba: “Tulenda sadila kiphwanza kitu mu yoso phila tuntomba, vayi kusadila kiawu mu phila yikhambu fwana kutwadisanga ko mayangi.”

19, 20. Lusakumunu mbi lunkwizanga kwidi matoko badi kiminu mu Yave ayi ba kuntumukinanga?

¹⁹ Yesu wutuba: ‘Benu kusimbidila malongi mami, buna lwidi minlonguki myami mikyedika; benu lwela zaba kyedika ayi kyedika kyela kulukula.’ (Yoane 8:31, 32) Tuntondanga beni Yave, bila nandi wu tukula ku kitombi ki binganga bi luvunu ayi mu mambu bankikininanga. Mu bilumbu binkwiza, tumvingila kubaka ‘kiphwanza ki nkembu wu bana ba Nzambi.’ (Loma 8:21) Ngye wulenda baka ndandu kiphwanza beni bubu ngye kulandakana malongi ma Klisto. Mu phila ayoyi, ngye wela “zaba kyedika” bika to mu kulonguka kiawu, vayi mvandi mu kuzingila kiawu!

²⁰ Matoko, monisanu luvalu kiphwanza Nzambi ka luvana. Sadilanu kiawu mu ndwenga. Mawu mala ku lusadisa kubaka makani bubu ayi malenda ku luvana luzingu lulutidi mu bilumbu binkwiza. Ditoko dimweka wutuba: “Kusadila kiphwanza mu ndwenga bo wukhidi ditoko, kunsadisanga beni bo wunkwiza baka makani manneni matedi kisalu wunsola, kuyindula ti wunkwiza kwela voti wunkadila theti bobo mu mwa thangu.”

21. Bwidi wulenda bakila ‘luzingu lukyedika’?

²¹ Mu nza ayiyi, kheti mambu batu bantubanga ti madi mamboti, makadidilanga ko. Vasi ko mutu zebi mambu mala monika yono. (Yakobi 4:13, 14) Diawu, kyuma kilutidi wulenda vanga kidi: kubaka makani mala kusadisa kubaka ‘luzingu lukyedika’—luzingu lu mvu ka mvu mu nza yimona Nzambi kala twala. (1 Timoteo 6:19) Yave kakwikanga ko ni mutu kansadila. Kadika mutu mu befu kafweti sola mbi kala vanga. Diawu vanga Yave ‘kyuka’ kyaku mu kuvanga mangolo kadika kilumbu mwingi wumfikama, ayi kinzika byuma byoso bimboti nandi ka kuvana. (Minkunga 103:5) Ba lufyatu ti Yave kalenda kuvana mayangi mawombo mala kadidila mvu ka mvu!—Minkunga 16:11.