Kʼalal te Dios la spas te Adán sok te Eva la yakʼ nujpunukik. Jaʼ la schiknajtes te nujpunel yuʼun jich jun ya xkʼot jtul ants sok jtul winik sok jich ya xjuʼ ya staik yal snichʼnabik (Génesis 1:27, 28; 2:18).

 Te Dios ya skʼan te tseʼeluk yoʼtanik te machʼatik nujpunemik (Proverbios 5:18). Jaʼ yuʼun ya yakʼtiklanbey tojobtesel sok mantaliletik ta Biblia te ya xkoltayotik ta stael stseʼelil yoʼtanik ta snujpunelik.

Te bin ya kiltik ta artículo ini:

•  ¿Bin mantaliletik ya yakʼ te Dios ta stojol te machʼatik nujpunemik?

•  ¿Yabal smulan Dios te ya yijkitay sbaik sok te ya slajinbeyik sjunal te snujpunelik?

•  ¿Mukʼbal skʼoplal ya yil Dios te nujpunel ta stojol juez?

•  ¿Bin mantalil ya yal te Biblia ta stojol te machʼatik nujpunemike?

•  ¿Yabal yal Dios te puersa ya sta yal snichʼnabik te machʼatik nujpunemike?

•  ¿Yabal skoltayon te Biblia ta jnujpunel?

•  Textoetik te ya yalbey skʼoplal te nujpunel

 Te Dios ya skʼan te jaʼnax ya xnujpun jtul ants sok jtul winik (Génesis 2:24). Maba ya smulan teme chaʼoxtul yinam te winik o chaʼoxtul smamalal te ants, te machʼa ya skuy sba ta winik o ta ants sok te jichnax ya yikʼ sbaik te ants sok te winik (1 Corintios 6:9; 1 Tesalonicenses 4:3). Te Jesús la snojptes te jnopojeletik yuʼun ta schʼuunel te mantaliletik yuʼun te Dios ta swenta te nujpunel (Marcos 10:6-8).

 Te Dios ya skʼan te spisiluk-ora yikʼoj sbaik te machʼatik nujpunemike. Kʼalal te ants sok te winik ya xnujpunik, ya yalik te jun ya yakʼ sbaik jaʼ chikan te jayeb tiempo kuxulike. Te Dios ya smaliy te ya skʼotesik ta pasel te bin jamal la yalike (Marcos 10:9).

 Ta swenta te ay machʼa ya stsakot ta chamel ta sfamiliaik, ay baeltik te ants sok te winik ya yijkitay sbaik cheʼoxebuk kʼajkʼal. Pero te Biblia maba ya yal te ya skʼan ya yijkitay sbaik yuʼun ya xchajpaj-a te kʼop yuʼunike. Te bin ya yale, jaʼ te yakuk slekubtesbey sba yoʼtanik te machʼatik nujpunemik (1  Corintios 7:10).

 Te Biblia ya yal te jaʼnax ya xjuʼ ya slajinbeyik sjunal te snujpunelik, teme te ants o te winik ya sjokin ta wayel te machʼa maba nujpunem soke (Mateo 19:9). Teme ma jaʼuk ta swenta-abi te ya yijkitay sbaik o ya slajinbeyik sjunal te snujpunelik, ma xjuʼ te ya xchaʼnujpun (Mateo 5:32; 1  Corintios 7:11).

 Te Dios ya skʼan te yakuk yichʼik ta mukʼ te leyetik ta swenta te nujpunel te j-abatetik yuʼune (Tito 3:1). Mukʼ skʼoplal te ya xnujpunik ta stojol juez, teme jich ya spasike ya yakʼik ta ilel te ya yichʼik ta mukʼ te j-aʼtel patanetik sok te mukʼ skʼoplal ya yilik te nujpunel jich bin-utʼil ya yil te Diose. a

•   Te bin ya spas ta schebalik. Te inamil sok te mamalalil ya skʼan pajal ya yakʼbey sba yil skʼuxul yoʼtanik sok ya yichʼ sbaik ta mukʼ (Efesios 5:33). Ya skʼan ya yakʼik ta ilel skʼuxul yoʼtanik te kʼalal ya sjokin sbaik ta wayel sok te ma sloʼlay sbaike (1  Corintios 7:3; Hebreos 13:4). Teme ay yal snichʼnabik, jaʼ ay ta swentaik schʼitesel (Proverbios 6:20).

   ¿Bin ya xjuʼ ya kaltik ta swenta te aʼtel sok te bin ya yichʼ pasel ta yutil na? Te Biblia maba ya yal te bin ya skʼan pasele. Te machʼatik nujpunemik, jaʼ ya staik ta nopel te bin lek ya yichʼ pasel ta yutil snaik.

•   Te bin ya skʼan ya spas te mamalalil. Te Biblia ya yal te «ha jolal yuʼun ants te smamalal» (Efesios 5:23). Jaʼ-abi ya skʼan ya yal te jaʼ ya stojobtes te sfamilia sok te lekuk te bin ya sta ta nopel spasele.

   Ỳa skʼan ya yakʼbey te bin ya xtuun yuʼun te sfamilia, te bin yaʼiyel ya yaʼiy sbaik sok ya skʼan ya skanantaybey te schʼuunel yoʼtanik (1 Timoteo 5:8). Kʼalal te mamalalil ya yichʼ ta wenta te skʼop sok te bin yaʼiyel ya yaʼiy sba te yinam te kʼalal ay bin ya sta ta nopele, ya yakʼ ta ilel te ya yichʼ ta mukʼ te taleliletik yuʼun sok te bintik ya xjuʼ ya spase (Proverbios 31:11, 28). Te Biblia ya yal te ya skʼan ya spas sok skʼuxul yoʼtan te yaʼtel te mamalalil (Colosenses 3:19).

•   Te bin ya skʼan ya spas te inamil. Te Biblia ya yal te antse ya skʼan ya «yichʼ ta cuenta te smamalale» (Efesios 5:33). Te Dios lek ya yil te antsetik te ya yichʼik ta mukʼ te aʼtelil akʼbilik te mamalaliletik.

   Te inamiletik ya skʼan te yakuk skoltay te smamalalik ta stael ta nopel spasel te bin lek sok te yakuk yichʼik ta mukʼ te bitʼil jaʼ jolaletik ta yutil te na (Génesis 2:18). Te Biblia lek ya yalbey skʼoplal te antsetik te lek ya spas te yaʼtelik ta sfamiliaike (Proverbios 31:10).

 Maʼuk. Melelnix-a te ta namey te Dios la yal te yakuk sta yal snichʼnabik te ants winiketik, pero te j-abatetik yuʼun te Dios ta kʼajkʼal ini, maba sujbilotikix ta schʼuunel te mantal-abi (Génesis 1:28; 9:1). Te Jesús maʼyuk bin-ora la yalbey te jnopojeletik yuʼun te ayuk yal snichʼnabik sok te jnopojeletik maba la yalbeyik te machʼatik nujpunemik te ya skʼan ya sta yal snichʼnabike. Te machʼatik nujpunemike jaʼ ya staik ta nopel teme ya skʼan yal snichʼnabik o teme maʼuke.

 Yak. Melel te Biblia yichʼoj mantaliletik sok tojobteseletik te ya xjuʼ ya skoltayat yuʼun lek ya xjajch te nujpunel awuʼun sok ta sitintayel te wokoliletik ya xtal ta atojolike.

 Te Biblia ya skoltay te machʼatik nujpunemik ta spasel ini:

•   Te ya yakʼik ta ilel te kʼuxul oʼtanil (1 Corintios 13:4-7; Colosenses 3:14).

•   Pajal ya sle yutsil slekilik (1 Corintios 10:24).

•   Ya yaʼiybey sba skʼopik (Santiago 1:19).

•   Te ya yichʼ sbaik ta mukʼ (Romanos 12:10).

•   Te ya spasbey sbaik perdón (1 Pedro 4:8).

•   Te junuk ayik (Marcos 10:9).

•   Te lamaluk yoʼtanik (Efesios 4:2, 3).

•   Te pajal ya skoltay sbaik (Eclesiastés 4:9).

•   Te yakuk stsak yip te snujpunelik (El Cantar de los Cantares 8:7).