Iseri ri Jihova rehẹ Bulgaria muomaphiyọ eyono rẹ ihwo efa kpahen uyota ro shekpahen Ọghẹnẹ kugbe Ota rọyen rọ dia Baibol na. Rere ayen sa vwọ nabọ ruiruo na, Iseri buebun ri nẹ ẹkuotọ efa rhe kua kpo Bulgaria rhanvwẹ ukpe ri 2000. Egbabọse vọ yen e hirharokuẹ siẹrẹ e de che kpo ẹkuotọ ọfa re ghwoghwo? Diesorọ ẹgbaẹdavwọn nana vwọ dia obo ri fori? Ena yen oborẹ ihwo evo re kua kpo Bulgaria tare.

 Darren rọ dia England da ta: “Ọkieje avwanre vwo vwo ẹwẹn re vwo kpo inọko ra ga vwẹ asan ra da ma guọnọ ukẹcha. Me vwọ rọvwọn Dawn nu, avwanre da kua kpo London re yono ihwo Baibol na vwẹ ephẹrẹ ri Russia. Avwanre jẹ iroro ọke sansan re se vwo kpo inọko, ẹkẹvuọvo fikirẹ erọnvwọn evo avwanre gbe sa ra-a. Avwanre joma kpairoro vrẹ oyan na, ẹkẹvuọvo ugbeyan avwanre ọvo da chọn avwanre uko vwọ mrẹvughe nẹ ẹdia rẹ avwanre weneri enẹna, nẹ avwanre se kpo oyan na.” Darren vẹ Dawn ke guọnọ ẹkuotọ ra da ma guọnọ iyono rẹ Baibol na rẹ ayen sa kua ra. Vwẹ 2011, ayen da kua kpo Bulgaria.

 Aghọghọ rẹ ihwo re kua kpo ẹkuotọ ọfa mrẹre nẹrhẹ ihwo evo ri ke vwo ẹwẹn rẹ ayen vwo kpo ẹkuotọ ọfa ra ga jovwo-o jowọ ọtiọyen. Giada rọ vẹ ọshare rọyen re se Luca gba dia Italy da ta: “Me mrẹ Iseri buebun re ga vwẹ South America kugbe Africa re vọnre vẹ oruru rẹ oma je vwerhan. Aghọghọ vẹ ikuegbe rẹ oborẹ ayen rhiẹromrẹ na te vwe ẹwẹn mamọ. Ọnana chọn vwẹ uko vwo ru ewene phiyọ ẹkẹn ri mi bru koma vwẹ ẹga ri Jihova.”

 Tomasz vẹ Veronika kugbe emọ rayen ivẹ Klara kugbe Mathias kua vwo nẹ Czech Republic kpo Bulgaria vwẹ 2015. Die yen mu ayen vwọ kua? Tomasz da ta: “Avwanre nabọ fuẹrẹn idje rẹ ihwo efa re vẹ orua rayen kua kpo ẹkuotọ efa ji roro kokodo kpahen erọnvwọn sansan rẹ ayen rhiẹromrẹ. Aghọghọ rayen na te avwanre ẹwẹn mamọ, avwanre ke ta ota kpahọn vwevunrẹ uwevwin.” Orua nana rẹ oma vwerhan na nabọ ghwoghwo vwẹ ẹkuotọ ọkpokpọ rẹ ayen rare na vwẹ orere rẹ Montana vwẹ Bulgaria.

 Linda ọyen Oseri ọfa rọ kua kpo Bulgaria. Ọ da ta: “Ikpe buebun re wanre, mi de kpo Ecuador je mrẹ Iseri evo re kua kpo oboyin re ghwoghwo. Ọyena kọ nẹrhẹ mi roro nẹ, siẹvo-o, me je sa kua kpo asan ra da ma guọnọ ukẹcha vwẹ ẹdẹ ọvo.” Petteri vẹ Nadja re dia aye gbe ọshare ri nẹ Finland rhe ji roro kokodo kpahen idje rẹ ihwo efa. Ayen da ta: “Avwanre vwo ighwoghwota evo re tẹn ọna vwevunrẹ ukoko rẹ avwanre, re kua kpo asan efa ra vwẹ ukẹcha kẹ ihwo vwo yono kpahen Baibol na jovwore. Ọkieje yen ayen vwo gbikun rẹ oborẹ ayen ru te vwẹ ikpe rẹ ayen ghwọrọ phiyọ iruo nana vwevwerhen. Ayen tare nẹ ọna yen ikpe rẹ ayen ma riẹn ghwọrọ vwẹ akpeyeren rayen.”

 Omamọ egbemuo ọyen obo re ghanre vwọ kẹ ihwo re guọnọ ga vwẹ ẹkuotọ efa. (Luk 14:28-30) Nele ro nẹ Belgium rhe da ta: “Mi vwo roro kpahen oborẹ me sa vwọ ga vwẹ ẹkuotọ efa, me da nẹrhovwo ji se iyovwinreta evo vwẹ ẹbe rẹ ukoko na ri shekpahen ra vwọ ga vwẹ ẹkuotọ ọfa. Me fuẹrẹn ayen je jokaphiyọ ẹkpo sansan rẹ obo ro fori nẹ mi ru vwo muegbe vwọ kẹ oyan na.”

 Ọ vrẹ ẹgbukpe 9 rẹ Kristian vẹ Irmina ri nẹ Poland rhe dia Bulgaria re. Ayen vwo oniso rẹ erere rẹ ayen mrẹre rẹ ayen vwọ vwomaba uyono rẹ ẹko re jẹ ephẹrẹ ri Bulgaria vwẹ Poland tavwen ayen ke kparoma. Iniọvo rehẹ ẹko na phiuduphiyọ ayen awọ je chọn ayen uko vwo yono ejajẹ na. Kristian vẹ Irmina da ta: “Avwanre rhe mrẹvughe nẹ siẹrẹ wọ da vwẹ oma wẹn kpahotọ, Jihova kọ vwẹrote edavwẹ wẹn, ọnana kẹ ohwo omavwerhovwẹn. Wo de rhievun vuẹ Jihova nẹ, ‘Mẹvwẹ na! Ji vwe!’ ku wo se ru oborẹ wo rorori nẹ wo che se ru jovwo-o.”—Aizaya 6:8.

 Rere ayen se vwo muegbe je sẹro rẹ igho, Reto vẹ Cornelia re dia aye gbe ọshare ri nẹ Switzerland rhe de brorhiẹn rẹ ayen vwo yeren akpọ ri kekpe. Ayen da ta: “Ẹgbukpe ọvo tavwen avwanre ke kparoma, avwanre de ke kpo Bulgaria ra dia vwẹ udughwrẹn ọvo rere avwanre sa vwọ nabọ riẹn oborẹ akpeyeren ghene hepha vwẹ oboyin. Avwanre nene aye gbe ọshare ọvo re dia imishọnare re nabọ tẹn ona ta ota, ayen da kẹ avwanre uchebro kiriguo re sa chọn avwanre uko.” Reto vẹ Cornelia nabọ reyọ uchebro na vwo ruiruo, ọ vrẹ ẹgbukpe 20 rẹ ayen vwọ ga vwẹ Bulgaria re.

 Ihwo re kua kpo ẹkuotọ efa che ru ewene rere ayen se vwo yerin ghene egbabọse re sa vwomaphia. (Iruo 16:9, 10; 1 Kọrẹnt 9:19-23) Egbabọse ọvo kiriguo rẹ ihwo buebun hirharokuẹ yen e vwo yono ejajẹ ọkpokpọ. Luca re djunute siẹvure da ta: “Oma vwerhen avwanre siẹrẹ avwanre da vwẹ ota romobọ rẹ avwanre vwọ kpahanphiyọ enọ vwẹ uyono. Ẹkẹvuọvo ẹsosuọ, ọ bẹn kẹ avwanre ra vwọ reyọ ephẹrẹ ri Bulgaria vwo muegbe rẹ ẹkpahọnphiyọ ọlọlọhọ! Kọ ghwa họhọ nẹ avwanre ghwa imitete. Vwọrẹ uyota, ẹkpahọnphiyọ rẹ imitete re dia emotọ na ghwotọ nẹ ọ rẹ avwanre dibidibi.”

 Ravil ro nẹ Germany rhe da ta: “E vwo yono ephẹrẹ na nẹrhẹ ofu dje ohwo. Ẹkẹvuọvo, ki mi roro, ‘Wo ghwe muomaphiyọ siẹrẹ wọ da jẹ chọ-ọ, ukperẹ ọtiọyen wọ me hwẹ.’ Mi nẹ egbabọse na kerẹ ebẹnbẹ-ẹn, ẹkẹvuọvo mi no kerẹ ẹbẹre ọvo rẹ ẹga re me vwọ kẹ Jihova.”

 Linda re djunute siẹvure da ta: “Me fobọ nyo ephẹrẹ kpokpọ-ọ. Ephẹrẹ ri Bulgaria lọhọre-e, ọke buebun, mi vwo ẹwẹn me vwọ kpairoro vrẹ. Wọ mrẹ oma wẹn vwẹ ẹdia rẹ ọruvwohwo siẹrẹ wọ rha sa ta ota kẹ ihwo yẹrẹ vwo ẹruọ rẹ oborẹ ayen ta-a. Rere me sa vwọ sẹro rẹ oyerinkugbe re me vẹ Jihova vwori, ki mi yono erọnvwọn eje ra vwẹ ephẹrẹ ri Swedish vwọ fan. Ukuotọ rọyen, womarẹ ukẹcha rẹ iniọvo na mi de rhi phi egbabọse re vwo yono ephẹrẹ na kparobọ.”

 E vwo roro kpahen asan ra kua nurhe ọkieje sa dia egbabọse ọfa. Ihwo re kua kpo ẹkuotọ efa yanjẹ ihwo rẹ orua vẹ igbeyan vwo. Eva rọ vẹ ọshare rọyen Yannis kua kpo Bulgaria da ta: “Ẹsosuọ, me ka dia ẹdia rẹ ọruvwohwo. Avwanre se vwo yerin ghene ẹdia nana, ọkieje kọyen avwanre vwo nene igbeyan vẹ ihwo rẹ orua rehẹ obuwevwin ta ota, avwanre ji mu igbeyan kpokpọ vwẹ obonẹ.”

 Egbabọse efa je herọ. Robert kugbe Liana re kua nẹ Switzerland rhe da ta: “Ephẹrẹ na kugbe ẹkuruemu rẹ ihwo na, eyen egbabọse rode kẹ avwanre, avwanre ji muegbe vwọ kẹ ọke rẹ ekpahen rẹ obonẹ na-a.” Ẹkẹvuọvo, e vwo vwo ẹro abavo vẹ opharo ehwẹ chọn aye gbe ọshare nana uko vwọ fuevun ga vwẹ Bulgaria ẹgbukpe 14 re wanre na.

 Lilly ta omamọ rẹ ota kpahen re vwo ghwoghwo vwẹ asan ra da ma guọnọ ukẹcha. Ọ da ta: “Me rhe mrẹ ukẹcha ri Jihova enẹna vrẹ obo ri jovwo ọke me vwọ hẹ ẹkuotọ mẹ. Mi de muomaphiyọ ukẹcha ra vwọ kẹ ihwo efa vrẹ obo ri jovwo, ọnana kẹ vwẹ aghọghọ vẹ evunvọnvwẹ je chọn vwẹ uko vwo sikẹrẹ Jihova phiyọ.” Ravil, rọ dia ọshare rọyen rhọnvwephiyọ obo rọ tare na. Ọ da ta: “Ọnana yen akpeyeren ro me yovwin, ọ kẹ vwẹ uphẹn mi vwo vughe Inenikristi re tẹn ona, ri nẹ ẹkuotọ sansan rhe, ri yono ihwo uyota rehẹ Baibol na vẹ oruru. Mi yono emu buebun vwo mie ayen.”

 Ẹwẹn rẹ omaevwoze rẹ ihwo buebun vwori nẹrhẹ e se ghwoghwo “iyẹnrẹ esiri na wan akpọ na ejobi.” (Matiu 24:14) Kidie nẹ ayen vwo owenvwe rẹ ayen vwọ vwẹ ukẹcha kẹ ihwo efa, ihwo re kua rhe Bulgaria na mrẹ oborẹ Jihova ru ọdavwẹ rẹ ubiudu rayen kẹ ayen, je nẹrhẹ oyan rayen na phikparobọ.—Une Rẹ Ejiro 20:1-4.