•   Noq minabʼen in kubʼ tbʼinchaʼna qe tiʼchaq, atzunte tukʼila, il tiʼj tuʼn tkubʼ t-ximen tnejel aju kbʼantel tuʼn.

•   Nya tgana tuʼn tyolina ex mintiʼ in xi tqʼamaʼn kye txqantl tiʼ in kubʼ tnaʼna. Atzunte tukʼila, tgan tuʼn tyolin ex tuʼn ttzeʼn kyukʼil txqantl.

 ¿Atpe jun tmod tchmila moqa t-xuʼjila nyaxix tgana? Qa in nok tqʼoʼn twiʼya tiʼj jlu, jaku tzaj nya bʼaʼn toj tmejebʼleʼna. Ex in tzaj tqʼamaʼn Biblia jlu: «Atzunju xjal in bʼaj tyolin qe kypaltil xjal, tuʼnx in che el laqʼeʼ qe tamiw tiʼj» (Proverbios 17:9).

 Miʼn t-xi tqʼoʼna ambʼil tuʼn ttzaj tqʼoja tuʼn jun nya bʼaʼn tmod tukʼila, sino mas bʼaʼn qa ma ten t-ximbʼetza toj tumel tiʼj.

Toj xnaqʼtzbʼil lu kʼelel qnikʼ tiʼj jlu:

•  Tenx t-ximbʼetza toj tumel tiʼj tmod tukʼila

•  Aju in tzaj kyqʼamaʼn junjuntl mejebʼleʼn

•  Junjun consej jaku che ximane tiʼj

 Kyxol qe tiʼchaq nya bʼaʼn in nela toj twitza tiʼjju in bʼant tuʼn tchmila moqa tuʼn t-xuʼjila, bʼalo at jun tbʼanel tmod in kubʼ tyekʼin ex tbʼanel in nela toj twitza. Qo yolin kyiʼj oxe techel:

 «In xi tiʼn ambʼil tuʼn tkubʼ tbʼinchaʼn nchmile junjun tiʼchaq moqa tuʼn tbʼaj tbʼinchaʼn tten aj qxiʼye toj jun lugar. Pero at nim tpasens, axpe ikx wukʼile. At maj in tzaj nqʼoje tuʼnju chebʼe in che bʼant junjun tiʼchaq tuʼn, pero atzun jun kyxol qe tmod bʼaʼn in nela toj nwitze» (Chelsea).

 «In kubʼ t-ximen nxuʼjile tzeʼnxix che kbʼantel qe tiʼchaq tuʼn. Taj tuʼn kybʼant ik tzeʼnx in kubʼ t-ximen ex at maj in tzaj nqʼoje tuʼn jlu. Pero tuʼnju in bʼant jlu tuʼn, mintiʼ in kyaj tqʼoʼn qe tiʼchaq te yajxitl» (Christopher).

 «At maj mintiʼ in nok tqʼoʼn nchmile toklen qe tiʼchaq in che bʼant tuʼn ex nya bʼaʼn in nela jlu toj nwitze. Pero tbʼanel in nela toj nwitze aj t-xi tbʼinchaʼn qe tiʼchaq tukʼil pasens ex atzun tmod lu mas ngane tej tok wojtzqiʼne. Ax ikx, in chin jaw labʼine tiʼj tuʼnju in jyon tumel tuʼn miʼn ttzaj bʼaj tkʼuʼj aj qok weʼye kywitz ambʼil kwest» (Danielle).

 Jaku kubʼ tbʼinchaʼn jun xuʼjilbʼaj moqa chmilbʼaj junjun tiʼchaq tbʼanel moqa nya bʼaʼn, pero at toklen jlu tukʼil jun tbʼanel tmod. Atzun jlu el tnikʼ Chelsea, Christopher ex Danielle tiʼj. Ex mlay kyaj ttzaqpiʼn tukʼila junjun tiʼchaq in bʼant tuʼn qa mintiʼ ma kubʼ tchʼexpuʼn jun tbʼanel tmod. ¿Tiquʼn? Tuʼnju aj tten jun tbʼanel tmod, ax ikx jaku kubʼ tbʼinchaʼn junjun tiʼchaq nya bʼaʼn jaku tzʼela toj twitza. In nok jlu ik tzeʼn jun moneda at kabʼe plaj twitz.

 Pero ateʼ junjun mod mintiʼ in che onin tuʼn tkubʼ tyekʼina tbʼanel tmoda. Jun techel, in tzaj tqʼamaʼn Biblia qa ateʼ xjal jun rat in tzaj kyqʼoj (Proverbios 29:22). Qa ikju, tbʼanel tuʼn tok tilil tuʼn xjal tuʼn t-xi tbʼiʼn nabʼil lu: «Kykolinkje qʼoj, miʼn che jaw kyaqpaje, miʼn tzaj tloʼch kykʼuʼje, miʼn che jaw schʼine tuʼn kyqʼoje, miʼn che yasune» (Efesios 4:31). a

 ¿Yajtzun qa in kubʼ tbʼinchaʼn tukʼila junjun tiʼchaq nya bʼaʼn in nela toj twitza? In tzaj tqʼamaʼn Tyol Dios jlu: «Tzikʼx kyuʼne aju kypaltil junjuntl, [axpe ikx] qa at jun at tyol tiʼj juntl» (Colosenses 3:13).

 Ax ikx, ximana tiʼjju tbʼanel jaku bʼant tuʼn t-xuʼjila moqa tchmila qa nya bʼaʼn in nela jun tmod toj twitza. Ex bʼaʼn tuʼn ttzaj tnaʼna qa bʼaʼn ela tmod toj twitza tej tok tojtzqiʼna. O kubʼ mojeʼ Joseph ex tqʼama jlu: «Qa oʼkx in nok tqʼoʼn twitza kyiʼj nya bʼaʼn tmod t-xuʼjila, in nok jlu ik tzeʼn aj tok tkeʼyina jun plaj diamante ex mintiʼ in nok tkeʼyina tkyaqil bʼinchabʼin te».

 Tnejel, che ximane kyiʼj xjel lu. Yajxitl, jaku che yoline kyiʼj.

•   ¿In kubʼpe t-ximana qa at jun tmod t-xuʼjila moqa tchmila jaku tzaj tiʼn nya bʼaʼn toj tmejebʼleʼna? Qa ikju, ¿alkye?

•   ¿Nya bʼaʼn tmod in kubʼ tyekʼin moqa nya bʼaʼn in nela toj twitza aju in bʼant tuʼn?

•   ¿Atpe jun tiʼ tbʼanel in kubʼ tyekʼin t-xuʼjila moqa tchmila tukʼil tmod lu? Qa ikju, ¿alkye ex tiquʼn nim toklen toj twitza?