“Ba kelas, bisi pemelajar enda mai bup teks, lalu selalu ninga lagu lebuh pengajar benung ngajar. Enti sida enda mujur ba peresa, nya biasa meh. Tang bisi mega ke baka aku, bebendar amat belajar, tang tetap meh enda mujur ba peresa. Nama kebuah baka tu? Tentu meh aku berasai asa! Indah, aku sanggup belajar nyentukka laun malam, tang agi meh enda mujur.”—Yolanda.

 Kala nuan ngasaika utai ti nyadi ba Yolanda nya? Enda ngira nuan suah enda mujur ba peresa, tauka kekadang, nya tentu ngasaka ati.

 Sekeda nembiak ke selalu enda mujur ba peresa, engka udah leju bebendar ngemanahka pemutus peresa sida. Bisi ke sanggup ngetu sekula. Iya ke bendar, bisi chara mutarka penanggul tu. Peratika enam iti utai ke ulih digaga ngambi bulih peresa ti manah agi.

•  Utai ke ulih digaga nuan

•  Nama ku nembiak serambau nuan

•   Anang enda datai sekula. Enti nuan selalu enda datai sekula, nya tentu ngurangka penemu nuan.

   “Ba sekula aku, sekeda nembiak ke enda pedulika markah peresa, selalu enda datai sekula. Sida selalu ngaga mayuh penanggul lalu ngenusahka diri empu.”—Matthew.

   Prinsip Bup Kudus: “Kita deka ngetau utai ti ditanam kita empu.”—Galatia 6:7.

•   Dingaka enggau manah maya pengajar ngajar. Ukai semina datai ke sekula aja, tang bebendar meh ninga enggau manah maya pengajar ngajar. Tulis nota. Enti nuan ngasaika diri enda nemu nama utai ku pengajar, tanya meh iya.

   “Aku ngasaika, enti aku nanya mayuh tanya ba kelas, pengajar nya deka nerangka enggau silik agi, lebuh iya nemu bisi pemelajar enda tentu nemu.”—Olivia.

   Prinsip Bup Kudus: “Nya alai, pendingka enggau manah.”—Luke 8:18.

•   Anang nipu. Nipu nya pengawa ti enda manah. Mayuh chara ke dikena nipu ba sekula. Siti ari nya, niru kereja sekula orang bukai. Tu nadai mai penguntung ke nuan.

   “Enti nuan enda nemu, anang meh niru ari pemelajar bukai. Niru, enda ulih mutarka penanggul nuan. Ketegal tu, nuan enggai belajar lalu semina bepanggai ba orang bukai aja.”—Jonathan.

   Prinsip Bup Kudus: “enap iku kita patut meresa pengawa diri. Nya baru iya tau temegahka diri empu.”—Galatia 6:4.

•   Gaga meh kereja sekula. Enti ulih, tembuka kereja sekula nuan sebedau sebarang pengawa ke bukai, kelebih agi pemerindang. a Enti kereja sekula udah tembu, nya baru nuan berasai lantang agi ngereja pengawa bukai!

   “Pengudah aku selalu nembuka kereja sekula, peresa aku bisi baik agi. Kesuah iya, maya pulai sekula, aku deka tinduk tauka ningaka lagu. Tang sebedau nya, aku bebendar nembuka dulu kereja sekula, baru meh aku ulih relax!”—Calvin.

   Prinsip Bup Kudus: “Milih utai ti pemadu badas.”—Pilipi 1:10.

•   Minta tulung. Anang malu minta tulung. Tanya meh apai indai. Tanya meh pengajar chara ngulihka markah ti manah agi. Enti nuan tuisyen, nuan mega ulih nanya pengajar tuisyen.

   “Padahka enggau terus-terang ngagai pengajar nuan. Minta meh tulung pasal sesiti topik ke tusah ba nuan, ngambi ulih ngemanahka agi peresa nuan. Pengajar engka rindu agi meda pengeran nuan deka mujur ba peresa. Iya tentu deka nulung nuan.”—David.

   Prinsip Bup Kudus: “Enggau naka ulih giga semua jaku lalau, nya baru nuan deka mujur.”—Jaku Dalam 15:22.

•   Ngena tiap iti peluang ngambi ulih mujur. Ba sekeda menua, bisi tanya tambah dalam peresa, ngambi nuan ulih ngemanahka agi peresa. Nuan mega ulih ngaga mayuh agi projek tambah, ngambi bulih mayuh agi markah. Enti nuan enda mujur ba peresa, uji tanya, kati ulih nuan ngambi peresa nya sekali da agi?

   “Enti aku deka mujur ba peresa, aku empu meh ke patut ngereja sesiti utai dulu. Aku nanya pengajar, kati bisi projek tambah ke ulih nambahka markah aku? Tauka, kati bisi sekeda pengawa ke ulih ngemanahka agi peresa aku?”—Mackenzie.

   Prinsip Bup Kudus: “Nya alai anang leju ngereja utai ti badas.”—Galatia 6:9