“Atichala pakwiganya mkalasi, achimjangu ŵane ŵangapikanilaga, mmalo mwakwe akusaŵa ali awete mmawiwi mwawo yakupikanila nyimbo. Jemanjaji ŵangamanyililaga ligongo lyakwe akusalepela mayeso. Ni panasoni ŵandu ŵane, ŵali mpela unejo ŵakusalimbichila mnope mkalasi, nambo palembile mayeso ŵangatendaga chenene. Kusala yisyene jwangamanyililaga chachikusatendekasya yeleyi. Yeleyi yikusatendekasya kuti mundu akasangalalaga pakuganichisya kuti aŵele ali ngakugona mwakwanila ni chakulinga akombole mayeso.”—Yolanda.

Ana pakwete payatendechele yakulandana ni yayamtendechele Yolanda? Kusala yisyene mpaka yiŵe yakupweteka naga mundu alepele lijiganyo limo atamosesoni majiganyo gejinji.

Ŵachinyamata ŵane pakulepela mkalasi, akusawujila munyuma m’malo mwakulimbichila. Ŵane akusagamba kuleka kwene sukulujo. Mwine mpaka ayiwoneje yeleyi kuŵa yakamuchisya, nambope pana litala lyampaka lyakamuchisye. Kwende tukambilane matala 6 gampaka gakamuchisye kuti akalepelaga.

•  Yampaka atende

•  Yaŵechete ŵachinyamata ŵane

• Akajombaga. Litalali mpaka liwoneche kuŵa lyangakamuchisya, nambo mundu pakujomba mnope yikusatendekasya kuti akatendaga chenene mkalasi.

  “Kusukulu kwetu, ŵanache ŵele ŵangadandawulaga palepele, ni ŵakusajombaga mwamti yeleyi yikusatendekasya kuti alepeleje mkalasi.”—Matthew.

  Mfundo ja m’Baibulo, “Yele yakusapanda mundu, tachigowola iyoyo.”—Agalatiya 6:7.

• Alinjilileje kupikanichisya yakulijiganyayo. Atamose kuti kusimanikwa mkalasi lili litala lyandanda lyakamuchisya, nambope akusosekwa kutendaga yakomboleka kuti apikanichisyeje yakulijiganyayo. Alembeje yakwiganya atichala ŵawo soni apikanileje mwachidwi. Naga nganapikanichisya panepakwe ŵawusyeje atichalawo.

  “Pandaŵi jakwiganya atichala, nawusyaga yiwusyo yejinji ligongo namanyililaga kuti kutenda yeleyi mpaka kwakamuchisye atichalawo kwiganyaga mu litala lyangasawusya.”—Olivia.

  Mfundo ja m’baibulo, “Msamale ni mwele yimkuti pakugapikana maloŵe.”—Luka 8:18.

• Aŵambaleje kulolela mayeso. Kulolela mayeso kuli ungakulupichika. Pana matala gejinji gampaka mundu alolele mayeso. Litala limo lili kulolela yakulemba mundu jwine. Mundu jwakusatenda yeleyi akusaŵa jwangakulupichika soni jwangalijiganya yindu.

  “Naga nganupikanichisya panepakwe, ngawukusosekwa kulolela pa yalembile mundu jwine. Kulolela nganikuŵa kumkamuchisye mundu. Myoyo mmalo mwakuti ulijiganye matala gakukukamuchisya kumalana ni chakusawusyacho pajika, yikusaŵaga kuti mkulijiganya kwadalila ŵane.”—Jonathan.

  Mfundo ja m’Baibulo, “Mundu jwalijose agalinjeje masengo gakwe mugaŵelele. Naga gali gambone, komboleka kusengwa ligongo lya masengo gakwego.”—Agalatiya 6:4.

• Alembeje chile yaŵasalile atichila payiche kunyumba. Naga ŵapele masengo gakwayana ni kusukulu gakuti akatendele kunyumba, atendeje yeleyo mkanatende chilichose, mnopemnope mkanaŵe kutanda kunguluka ni achimjawo. Kutenda yeleyi mpaka kwakamuchisye kuti asangalaleje pandaŵi jakutenda yindu yakusangalasya.

  “Nalembelaga chile yakusukulu mkanindende chilichose, yeleyi yangamuchisyaga kuti ndendeje chenene mkalasi. Payiche kunyumba, nasachililaga kwamba gona kapena kupikanila nyimbo. Nambope chandanda nalolechesyaga kuti ndende kaje ya kusukulu.”—Calvin.

  Mfundo ja m’Baibulo, “Timpakombole kusagula ayo yayili yambone mnope.”—Afilipi 1:10.

• Aŵendeje chikamuchisyo. Akatendaga sooni kwaŵenda ŵane kuti ŵakamuchisye. Mpaka ŵaŵende achinangolo ŵawo kuti ŵakamuchisye. Naga ngakutenda chenene mkalasi mpaka ŵaŵende atichala ŵawo kuti ŵakamuchisye. Ndaŵi sine mpaka apate mundu jwine kuti ŵajiganyeje yindu yayikusiyasawusyaga wawojo.

  “Akusosekwa ŵajawulile atichala ŵawo. Ŵaŵende kuti ŵakamuchisye kupikanichisya lijiganyo lyakusajiganyalyo soni yampaka wawojo atende kuti akomboleje chenene. Atichalawo chachitenda yakomboleka kuti ŵakamuchisye.”—David.

  Mfundo ja m’Baibulo, “Nambo pati atupile apungu, yakuyiganichisya kuyitenda yikusakomboleka kusyene.”—Misyungu 15:22.

• Akamulichisyeje masengo upile wakwete. M’yilambo yine, mayeso gakusakola yiwusyo yakonjechesya yampaka yakamuchisye kuti akombole chenene. Mpaka atendesoni yindu yine yakwakamuchisya kuti akole lunda ni chakulinga chakuti akomboleje chenene mkalasi. Naga ali alepele mayesogo mpaka ŵaŵende atichala ŵawo kuti ŵape upile wakulembasoni mayesogo.

  “Naga ngusaka kuti ngomboleje chenene lijiganyo line lyakwe, uneji ni jungusosekwa kutendapo kandu. Naŵendaga atichala kuti asalile yindu yine yampaka ndende kuti ngomboleje chenene soni naga mpaka yikomboleche kunembesyasoni mayesogo.”—Mackenzie.

  Mfundo ja m’Baibulo, “Masengo galigose gana malipilo gakwe.”—Misyungu 14:23.