Naburhagwa e Uganda omu eneo y’e Gomba. Bantu banji bâli bakenyi muli eyo eneo. Evile yirhu erhagwerhe muliro (courant), muli oko erhi bwakabire budufu rhwakagikolesa amatara g’epetrole.

 Ababusi bani bâli bahînzi barhengaga e Rwanda bahamira e Uganda. Bakagihinga agahwa n’emijôco, n’omu kukolesa eyo mijôco bakagikanda amamvu g’eka gamanyikine bwenene gahamagalwa waragi. Banakagishweka engôko, empene, engulube n’enkafu. Enkomedu z’emunda nakuliraga zarhuma nayemera oku omukazi, akwanine arhumikire omulume wage ensiku zoshi n’oku arhakahâna entanya zage.

 Erhi nyeneza myaka 23, nahamira e Rwanda. Erhi nkola ndi eyo, nakaja oku ma klebe g’omuziki haguma n’eyirhu misole y’irangi ly’omubiri gwani. Nagaluka kanji-kanji oku klebe nguma y’omuziki, kuhika abaliyiyimangire bampa ecimanyiso c’okunyemerera okuyijamo buzira kulipa kantu koshi-koshi. Kandi nakagisîma okulola efilime z’obuminya. Ebi nakagicishagalula nabyo byashumya akalamo kani bwenene kuhika naba mukali nka ntale na mulalwe bwenene.

 Omu mwaka gwa 2000, narhondera nalama n’omukazi wakagihamagalwa Skolastique Kabagwira, rhwanaburha naye bana basharhu. Nk’oku naliyemire erhi nciri murho, mukanie âl’ikwanine afukame ngasi kundamusa erhi ngasi kumpûna kantu kalebe. Kandi, naliyemire oku ebintu byoshi rhwagwerhe byali byani niene, nanagwerhe oluhûma lw’okubikolesa nk’oku nandonzize. Ensiku nyinji zo nakagirhenga ahaka bijîngo n’okugaluka aha nsa mwenda z’obudufu, akasanzi kanji ko nakagiba ndalusire. N’erhi Skolastique akalegerire embere ayigule, nakagimushûrha.

 Ago mango nagwerhe ecikono omu sosyete y’obulanzi yakagintabala okulama. Skolastique akagijira okwage koshi lyo nja naye oku kanisa k’Ecipantekoste omu kurhanya mpu okujira ntyo kwakanshanjire. Cikoki ntakagisima ambwire ebyo. Bulya nali mukali nka ntale nanagwerhe olugenzi lubi, Skolastique abungira emwabo haguma n’abana birhu oku banali basharhu.

 Mwira wirhu muguma wali rhurhalusire emyaka, anganiza lugenda akalamo kani. Ampa omurhima ncigalula Skolastique. Aderha oku abana birhu balikwanine babe haguma n’ishe wabo. Muli oko, omu mwaka gwa 2005, naleka okunywa amamvu, naleka oyo wundi mukazi, nagalukira Skolastique. Omu mwaka gwa 2006 rhwajira obuhya. Cikone, kuhika ago mango nanaciri mukali nanakashûrha mukanie.

 Omu mwaka gwa 2008, Muhamirizi wa Yehova muguma ohamagalwa Joël arhulambagirira ahaka, nanayumvirhiza omwanzi âl’irhulerhire. Omu myezi milebe, ye haguma n’owundi Muhamirizi wa Yehova ohamagalwa, Bonaventure, bakandambagirira kanji-kanji, rhwanakaganira binji lugena Ebibliya. Nakadosa madoso manji, ci bwenene agayerekire ecitabu c’Amafulûlo. Akantu nakagilonza okujira kwali kulonza okuyerekana oku Abahamirizi ba Yehova banywesire. Kwa lwiganyo, nabadosa gurhi bakalonza okuhugûla oku “ehitu hinene” y’abantu baganirirwe omu citabu c’Amafulûlo 7:9 balamire okw’igulu, n’obo ogo mustari guyerekine oku ‘badamire embere z’eciti c’obwami [ca Nnâmahanga] n’embere z’Omwanabuzi,’ Yezu Kristu. Joël ashuza amadoso gani omu kulembera. Kwa lwiganyo, anyereka Izaya 66:1, aha Nnâmahanga adesire okw’igulu co ‘citi c’amagulu gage.’ Muli oko, ehitu hy’abantu bayimanzire embere ly’eciti c’Obwami bwa Nnâmahanga. Buzinda nasoma Ennanga 37:29, ziyerekine oku abashinganyanya balama ensiku n’amago kw’igulu.

 Enyuma z’aho, nayemera ifunzo ly’Ebibliya. Muli oko Bonaventure arhondera okunyigiriza Ebibliya haguma na Skolastique. Erhi rhukaba rhuli rhwacifunza Ebibliya, narhondera nashumibwa okujira empindûlo omu kalamo. Naciyigiriza okukolera mukanie n’obukenge. Ntacilonzagya akafukama amango andamusa erhi amango ampûna kantu kalebe, nanaleka okurhanya oku ebintu byoshi biri byani. Kandi naleka okulola efilime z’obuminya. Birhali bilembu okujira ezo mpindûlo, nanalilagirire oku kucihasha bwenene n’oku kuba mwirhohye.

 Myaka milebe embere z’aho, nali erhi namarhuma enfula yani Christian ajilama haguma na bene wirhu e Uganda. Cikoki erhi nsoma olwandiko lwa Olushika 6:4-7, nahugûkwa oku nie na mukanie rhugwerhe omukolo kurhenga emwa Nnâmahanga gw’okulera abana birhu, kuhiziremo okubayigiriza amakanuni g’Ebibliya. Rhwashagaluka bwenene erhi agaluka ahaka, naye ashagaluka bwenene!

 Naciyigirizize oku Yehova aba Nnâmahanga wa kubabalira, na nyemire oku ababalire olugenzi n’oku nakagilama mira. Nshagalusire okubona Skolastique acilunzire nani omu kuciyigiriza Ebibliya. Rhwacihanyire emwa Yehova n’okubatizibwa oku rhunali babirhi omu nsiku 4/12/2010. Kuhika buno, rhukola rhuba rhucikubagirine, rhunashagalusire okukolesa amakanuni ga Nnâmahanga omu mulala gwirhu. Mukanie agwerhe obushagaluke bwenene okubona kuhika buno nkola ngaluka eka ho n’aho erhi ntenga oku kazi. Kandi ashagalusire okubona kuhika buno nkola mukenga, nahizire okuleka okunywa amamvu n’okurhaciba mukali nka ntale. Omu mwaka gwa 2015, naba mugula lyo ntabala omu kulanga ecigamba cirhu. Rhugwerhe bana barhanu na basharhu egarhi kabo babatizîbwe.

 Erhi ntondera okuciyigiriza Ebibliya haguma n’Abahamirizi ba Yehova, ntakagiyemera emyanzi bakagimbwira buzira kulabiriza erhi enali y’okuli. Nashagalukira oku bakagikolesa Ebibliya lyo bashuza oku madoso gani. Nie na Skolastique rhwashagalusire okumanya oku balya baderha mpu banakolere Nnâmahanga bakwanine barhumikire ngasi kantu bayigiriza, ci arhali kurhumikira ebi balonzize byone. Nvuzire Yehova omunkwa bwenene okubona ankulwire emwage na kuhika buno nkola mba muguma w’omu mulala gwage gw’ekiroho. Erhi ntanya lugenda akalamo kani ka mira, nanyemere n’obwalagale oku, kugerera oburhabale bwa Yehova, ngasi muntu mwikubagirwa anajira empindûlo ly’asîmisa Nnâmahanga.