Na tausia aʻe aʻu o se Katoliko, i Rochester i Niu Ioka ma o le ono o oʻu tausaga na teteʻa ai oʻu mātua. Na ma nonofo ma loʻu tinā i se fale mautotogi i le amataga o vaiaso, ae o faaiʻuga o vaiaso e ma te nonofo ai ma loʻu tamā i se nofoaga e nonofo ai tagata maumea. Na ou manaʻo ia ou mauoloa ona sa ou vaai i le faigatā ona tausia e loʻu tinā o se fanau e toʻaono.

 Na manaʻo loʻu tamā ina ia taulau manuia loʻu olaga, o lea na ia faatulaga ai se aso ou te asiasi ai i se aʻoga lauiloa e aʻoaʻo ai mataupu mo le puleaina o faletalimālō. Na ou fiafia i le aʻoga ma na faaulu ai loa aʻu ma loʻu manatu ua tali mai le Atua i aʻu tatalo ina ia ou mauoloa. E lima tausaga na ou aʻoga ai i mataupu mo le puleaina o faletalimālō, o tulafono faapisinisi ma faiga e pulea ai tupe a se pisinisi. I le taimi e tasi na ou galue ai foʻi i faletalimālō e fai ai taaloga faitupe i Las Vegas i Nevada.

 Na avea aʻu ma sui peresitene lagolago o se faletalimālō mo taaloga faitupe ina ua 22 oʻu tausaga. Na vaai tagata iā te aʻu o se tagata mauʻoa ma taulau manuia. Na ou masani i meaʻai sili ona lelei ma uaina sili ona taugatā ma isi meainu. Na faapea mai aʻu uō e fai foʻi a latou pisinisi, “Ia manatua o le mauaina o tupe o le mea lenā e sili ona tāua i le lalolagi.” Na latou manatu o le tele o tupe e maua ai le fiafia moni.

 O laʻu galuega, o le vaavaaia lelei lea o manaʻoga o tagata mauʻoa e ō mai e taaalo i taaloga faitupe i Las Vegas. E ui ina matuā tele a latou tupe, ae e foliga lē fiafia. Na amata ai fo’i ona ou lē fiafia. O le mea moni, o le tele o tupe ou te mauaina o le tele foʻi lenā o loʻu popole ma lē moe lelei ai i le pō. Na oso ane foʻi iā te aʻu faalogona o le fia pule i le ola. Na avea loʻu lē mautonu ma le lē fiafia i le ituaiga olaga na ou ola ai ma māfuaaga na ou saʻili atu ai i le Atua. Na ou talosaga atu i le Atua, “O fea ou te maua ai le fiafia moni?”

 I le taimi lenā, na siitia atu ai i Las Vegas oʻu tuafāfine e toʻalua ua avea ma Molimau a Ieova. E ui ou te leʻi taliaina a latou lomiga, ae na ou fiafia e faitau faatasi ma i laʻua laʻu Tusi Paia. I laʻu Tusi Paia, o fetalaiga uma a Iesu e lolomi i le lanu mūmū. O lea, e tele lava ina talanoa mai oʻu tuafāfine i fetalaiga a Iesu ona ou te taliaina uma ana fetalaiga. Na ou faitauina foʻi e aʻu lava ia le Tusi Paia.

 Na faateʻia aʻu i le tele o mea na ou faitauina. O se faataʻitaʻiga, na fetalai Iesu: “Pe a e tatalo, aua le tautū i upu masani e pei o tagata o nuu ese, auā ua latou manatu o le a faafofogaina i latou i le tele o upu.” (Mataio 6:7) Peitaʻi, na tuu mai e se faifeʻau le ata o Iesu ma fai mai, a ou tatalo i le ata ma lau faasefulu le tatalo Lo matou Tamā ma le Talosia Maria, e foaʻi mai e le Atua so o se aofaʻi o se tupe ou te manaʻo ai. Ae o loʻu taʻua soo o na upu ua ou tautū ai i aʻu tatalo. Na ou faitau foʻi i fetalaiga a Iesu i le Mataio 23:9: “Aua foʻi neʻi taʻua se tasi i le lalolagi o lo outou tamā, auā e toʻatasi lo outou Tamā o Lē o i le lagi.” O lea, na ou fesili ifo ai, ʻAiseā la e taʻua ai a matou faifeʻau o “Tamā”?’

 Na amata ona ou manatunatu po o saʻo le mea o loo faia i loʻu olaga ina ua ou faitauina le tusi o Iakopo. O loo taʻua i le mataupu 4: “Pe e tou te lē iloa ea o le faauō atu i le lalolagi ua fai ai tagata ma fili o le Atua? O lea la, o so o se tasi e fia uō ma le lalolagi ua fai o ia ma fili o le Atua.” (Iakopo 4:4) Na matuā faateʻia foʻi aʻu i upu i le fuaiupu 17: “Afai ua iloa e se tasi le mea saʻo e ao ona fai, ae e lē faia, ua agasala ai o ia.” O lea, na ou vili ai i oʻu tuafāfine ma taʻu i ai o le a ou faamavae mai i laʻu galuega ona o lea ou te aafia ai i mea ua ou lē toe taliaina, e aofia ai taaloga faitupe.

 Na ou manaʻo e faaleleia la ma faiā ma le Atua, faapea oʻu mātua ma nai oʻu tei. O lea, na ou filifili ai e faafaigofie loʻu olaga. Ae e leʻi faigofie na fai na suiga. O se faataʻitaʻiga, na faaosoosoina aʻu ina ua ofo mai e le galuega o le a siitia loʻu tulaga, ma o le a faaluaina pe faatoluina loʻu totogi. Ae ina ua uma ona ou tatalo, na ou filifili ai e lē o le ituaiga olaga lea ou te manaʻo ai. Na ou faamavae mai loa i laʻu galuega. Na ou nofo i le fale taavale a loʻu tinā ma amata ai laʻu tamaʻi pisinisi, e laminate lisi o meaʻai o fale ʻaiga.

 E ui ina fesoasoani le Tusi Paia iā te aʻu e faatulaga mea e tatau ona faamuamua i loʻu olaga, ae ou te leʻi alu lava i se sauniga a Molimau a Ieova. Na fesili mai oʻu tuafāfine pe e iai se mea ou te lē fiafia ai i Molimau a Ieova. Na ou tali i ai: “Ona e faa fevaevaeaʻi e Ieova le tou Atua aiga. E na o le pau taimi ou te mafuta ai i oʻu aiga o Kerisimasi ma aso fanau, ae e tou te lē faamanatuina aso na.” Na tagi le isi oʻu tuafafine ma fai mai, “Ae o ā au mea e fai i isi aso o le tausaga? E matou te fia faatasitasi ma oe i na taimi. Ae e na o aso mālōlō na e te fia sau ai, ona ua pei o se tiute tauave iā te oe.” O na upu na matuā pāʻia ai loʻu loto, ma na amata ai foʻi ona ou tagi.

 Ina ua ou malamalama i le alolofa tele o Molimau a Ieova i o latou aiga, na ou iloa ai loʻu sesē ma amata ai loa ona ou auai i a latou sauniga na faia i se Maota mo Sauniga i lo matou vaipanoa. O i inā na ma feiloaʻi ai ma Kevin o se faiaʻoga agavaa o le Tusi Paia, ma amata ai loa ona ma suʻesuʻe.

 E paleni le olaga na ola ai Kevin ma lana avā. Na faafaigofie o la olaga ina ia tele le taimi e fesoasoani ai i tagata e malamalama i le Tusi Paia. Na gafatia foʻi e a la tupe maua ona malaga ai i Aferika ma Amerika Tutotonu, ina ia fesoasoani i le fauina o ofisa o lālā mo Molimau a Ieova. Na ou mātauina le fiafia tele o Kevin ma lana avā, ma le alofa o le tasi i le isi. Na ou faapea ifo, ʻO le olaga tonu lava lea na ou moomoo i ai.’

 Na faaali mai e Kevin se vitiō e faatatau i le fiafia e maua i le auaunaga faamisionare, ma na ou filifili ai o le mea lea ou te manaʻo e fai. I le 1995, e pe ā ma le ono masina na ou faaaluina ai le tele o le taimi ma taumafaiga e suʻesuʻe ai le Tusi Paia, ma mulimuli ane ou papatiso ai o se tasi o Molimau a Ieova. O lea, na amata ai ona ou tatalo i le Atua e tusa ma upu nei: “Ia aua neʻi oʻu matuā mativa po o ou te matuā tamaoaiga.”—⁠Faataoto 30:8.

 Ua ou maua nei ʻoa moni, ʻoa faaleagaga ae lē o ʻoa faaletino. Na ma masani ma laʻu avā lalelei o Nuria i Honduras, ma na ma auauna o ni misionare i Panama. Ae i le taimi lenei o loo ma auauna i Mekisikō. Maʻeu le moni o upu a le Tusi Paia: “O le faamanuiaga a Ieova, e faatamaoaiga ai ma e na te lē faaopoopo i ai se tigā!”—⁠Faataoto 10:22.