Te livokʼ ta Tirana ti jaʼ skapital li Albaniae. Povreik noʼox li kutsʼ kalal lichʼi tale. Tsots ch-abtej li jtot sventa chakʼ li kʼusi chtun kuʼunkutike, lek snaʼ x-abtej. Akʼo mi jech, tijlebal noʼox oy jtakʼinkutik sventa li kʼusi chtun kuʼunkutike. Akʼo mi kʼoxun to, chkakʼ onoʼox venta ti povreunkutike. Vaʼun ta jvul-o tajek koʼonton. Xvul ta jol ti chʼabal lek jxonob lichʼi tale. Chʼabal jveʼel xtok.

 Kʼoxun toʼox kʼalal lik jtambe elekʼale, yuʼun ta jnop ti jaʼ jech ta jkolta li kutsʼ kʼalale. Li ta 1988 kʼalal 14 toʼox jabilale la xchukun batel li polisiae. Vaʼun libat ta jun chukinab sventa kerem tsebetik. Li chib jabil te likome la jchan spasel soldar. Kʼalal lilokʼe, ta jkʼan ox ta jsaʼ kabtel, pe muʼyuk bu la jta. Chʼabal tajek abtel li ta Albaniae, yuʼun jaʼo likem kʼop sventa politika. La jvul-o tajek koʼonton taje. Jaʼ yuʼun, lik jchiʼinan yan velta li kamigotak toʼoxe xchiʼuk lik elkʼakun yan velta. Ta tsʼakale, laj kichʼkutik chukel batel jkotolkutik. Oxib jabil li-akʼbatkutik.

 Kʼalal lilokʼ ta chukele, lik jpas yan velta li kʼusi chopole. Oy tajek vokolil li ta Albaniae xchiʼuk chʼabal tajek takʼin. Jaʼo lik jpas kʼusitik chopol sventa jpas kʼanal takʼin. Jun velta kʼalal yakal chi-elkʼajkutike li chaʼvoʼ jchiʼiltake laj yichʼik chukel batel. Lijatav batel ta yan lum, yuʼun mu jkʼan ti xi-och jayibuk jabil ta chukele. Li vaʼ kʼakʼale kikʼoj xa ox li Julindae xchiʼuk oy xa ox jneneʼkutik.

 Te likʼotkutik ta naklej ta Inglaterra. Ta jkʼan xa ox tajek li jkuxlejal sventa lekuk oyunkutik xchiʼuk li kajnil xchiʼuk li jnichʼone. Pe lik jpas yan velta li kʼusi chopol ti nopem xkaʼi spasele. Vaʼun lik jtikʼ jba ta xchonel droga. Ta skoj taje, ep tajek takʼin ch-echʼ ta jkʼob.

 ¿Kʼu yelan chil Julinda ti ta jchon drogae? Akʼo yalboxuk stuk: «Ta skoj ti te lichʼi ta Albaniae, ta jkʼan tajek ti oyuk jtakʼinkutike. Xuʼ kʼusuk noʼox jpas yaʼel sventa junuk noʼox koʼontonkutike. Kaloj mi jaʼ chakʼ muyubajel li takʼine. Jaʼ yuʼun la jkolta Artan ta spasel skotol: ti chloʼlavane, ti ch-elkʼaje, ti chchon drogae..., kʼusiuk noʼox sventa jpaskutik kʼanal takʼin».

 Pe li ta 2002 jel tajek li jkuxlejalkutike xchiʼuk chʼay skʼoplal skotol li kʼusi jnopoj ta jpaskutike. Yuʼun jaʼo kichʼoj epal droga kʼalal la staun li polisiae, vaʼun laj kichʼ chukel yan velta.

 Muʼyuk laj kakʼ venta kʼuxi lik kʼotuk ta jtojolal li Vivliae. Li Julindae lik xa onoʼox xchan Vivlia xchiʼuk li stestigotak Jeova ta sjabilal 2000. Pe li voʼone muʼyuk oy ta koʼonton ta jchan, yuʼun chichʼajub-o. Yan li Julindae tskʼupin tajek, xi chale: «Ta skoj ti oy srelijion li kutsʼ kalale, lek chkaʼi li kʼusi chal Vivliae. Oy onoʼox ta koʼonton ta jkʼan ta jchan xchiʼuk ta jkʼupin tajek ti ta jchan xchiʼuk li stestigotak Jeovae. Oy lek smelolal chkaʼi skotol li kʼusi ta jchan te ta Vivliae. Ta skoj li kʼusi yakal ta jchane, laj kikta jlom li kʼusitik ta jpas toʼoxe. Akʼo mi jech, jpatoj-o koʼonton ti jaʼ chakʼ muyubajel li takʼine. Jaʼ to te vul-o jchʼulel kʼalal laj yichʼ chukel batel li Artane, yuʼun laj kakʼ venta ti melel li kʼusi chal Vivlia ta sventa li takʼine. Ep xa ox kʼusi jpasojkutik sventa jpaskutik kanal takʼin, pe muʼyuk ximuyubajkutik. Te laj kakʼ venta ti skʼan jchʼunbe skotol smantal li Diose, ti mu tʼujbiluk noʼoxe».

 Lilokʼ ta chukel ta 2004. Lik jchon droga yan velta xtok. Pe li Julindae sjeloj xa ox xkuxlejal xchiʼuk oy kʼusi laj yalbun ti vul-o jchʼulel yuʼune: «Mu xa jkʼan li atakʼine. Li kʼusi ta jkʼane jaʼ ti liʼuk jmoj oyutike xchiʼuk ti liʼuk xchiʼuk stotik li kalabtake». Mu xa xibakʼ likom yuʼun kʼalal jech laj yalbune, yuʼun melel li kʼusi chale. Yuʼun oy xa ox jayibuk jabil ti muʼyuk te jchiʼinoj li kutsʼ kalale. La jta ta nopel xtok ti ep tajek kiloj tal jvokol ta skoj ti yan sba kʼusitik ta jpas sventa jpas kanal takʼine. Kʼot ta nopel kuʼun ti ta jel li jkuxlejale xchiʼuk ti chkikta li kamigotak toʼoxe.

 Li kʼusi la sjelbun tajek li jnopbene jaʼo kʼalal ay jchiʼin li kajnil xchiʼuk li chaʼvoʼ jkeremtak ta jun stsobajelik li stestigotak Jeovae. Labal sba laj kil ti lek yoʼontonik li buchʼutik te oyike. Ta tsʼakale, lek laj kaʼi ti xkichʼ chanubtasel ta Vivliae.

 Li ta Vivliae ti «skʼanel takʼine jaʼ yibel skotol li kʼusitik tsokesvane, yuʼun li buchʼutik batem ta yoʼontonik skʼanel li kʼusitik taje [...] ep tajek staoj svokolik ti toj kʼuxe» (1 Timoteo 6:9, 10). ¡Melel tajek li kʼusi chal li Vivliae! Chopol tajek chkaʼi jba ta skoj li kʼusitik la jpas ta voʼnee. Toj ep laj kakʼbe svokol li kutsʼ kalale (Galatas 6:7). La jchan xtok ti skʼanojutik tajek li Jeova xchiʼuk li Xnichʼon Jesukristoe, vaʼun lik jel li jkuxlejale. Muʼyuk xa mas ta jnop jkʼoplal jtuk, mas xa lik jtsak ta venta li yantike. Jtos ti kʼusi la jele jaʼ ti lik kakʼ ta koʼonton mas li kutsʼ kalale.

 Jtaojbe sbalil kʼalal ta jchʼun li tojobtasel chakʼ Vivlia liʼe: «Maʼukuk me batem ta avoʼontonik skʼanel takʼin ti kʼu yelan kuxuloxuke, muyubajanik noʼox me ta skoj ti kʼusi oy avuʼunik avie» (Ebreos 13:5). Jun xa koʼonton li avie xchiʼuk muʼyuk chopol chkaʼi jba. Muʼyuk xkaʼi-o jech muyubajel ti kʼu yelan ximuyubaj avie. Lek li jnupunele xchiʼuk jun koʼontonkutik li ta kutsʼ kalale.

 Ta jnop toʼox ti jaʼ xijmuyubaj-o mi oy ep jtakʼintike. Pe avie chkakʼ venta ti laj yakʼ jvokol xchiʼuk ti lisok yuʼun li skʼanel takʼine. Li avie muʼyuk jkʼulejunkutik, pe oy kʼusi jtaojkutik ti mas to ep sbalile: jaʼ ti lek chkil jbakutik xchiʼuk li Jeovae. Ti jmoj chkichʼkutik ta mukʼ Jeova xchiʼuk li kutsʼ kalale jaʼ ximuyubajkutik-o ta melel.